ಡಿ.ಕೆ. ಶಿವಕುಮಾರ್‌ ಅವರ ರಾಜಕೀಯ ನಿರ್ವಹಣಾ ಸಾಮರ್ಥ್ಯದ ಮೊದಲ ಪ್ರಮುಖ ಚುನಾವಣಾ ಪರೀಕ್ಷೆ ಎಂದು ವ್ಯಾಪಕವಾಗಿ ಪರಿಗಣಿಸಲಾಗಿದ್ದ ಈ ಚುನಾವಣೆಯ ಫಲಿತಾಂಶವು, ವಿದ್ಯಾವಂತ ಮತದಾರರು ಮತ್ತು ಶಿಕ್ಷಕ ಸಮುದಾಯದೊಂದಿಗೆ ಸಂಪರ್ಕ ಸಾಧಿಸುವಲ್ಲಿ ಕಾಂಗ್ರೆಸ್‌ ಎದುರಿಸುತ್ತಿರುವ ಸವಾಲುಗಳನ್ನು ಬಹಿರಂಗಪಡಿಸಿದೆ.

ನಾಲ್ಕೂ ಖಾಲಿ ಕ್ಷೇತ್ರಗಳನ್ನು ಗೆದ್ದಿರುವ ಎನ್‌ಡಿಎಗೆ ಈ ಫಲಿತಾಂಶ ಸಂಪೂರ್ಣ ಜಯ ತಂದುಕೊಟ್ಟಿದೆ. ಬಿಜೆಪಿ–ಜೆಡಿಎಸ್‌ ಮೈತ್ರಿಗೆ ಇದು ದೊಡ್ಡ ಉತ್ತೇಜನ ನೀಡಿದ್ದು, ಪದವೀಧರರು, ಶಿಕ್ಷಕರು ಮತ್ತು ನಗರ ಮಧ್ಯಮ ವರ್ಗದ ಮತದಾರರಲ್ಲಿ ಕಾಂಗ್ರೆಸ್‌ನ ಬೆಂಬಲದ ಕುರಿತು ಆತಂಕಗಳನ್ನು ಹುಟ್ಟುಹಾಕಿದೆ.

ಅತ್ಯಂತ ಕುತೂಹಲ ಕೆರಳಿಸಿದ್ದ ಬೆಂಗಳೂರು ಶಿಕ್ಷಕರ ಕ್ಷೇತ್ರದ ಚುನಾವಣೆ ಕೇಂದ್ರ ಸಚಿವ ಎಚ್‌.ಡಿ. ಕುಮಾರಸ್ವಾಮಿ ಮತ್ತು ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್‌ ಅವರ ನಡುವಿನ ಪ್ರತಿಷ್ಠೆಯ ಹೋರಾಟವಾಗಿ ರೂಪುಗೊಂಡಿತ್ತು. ಇಬ್ಬರೂ ಪ್ರಮುಖ ಒಕ್ಕಲಿಗ ನಾಯಕರು. ಒಕ್ಕಲಿಗ ಮತದಾರರಲ್ಲಿ ದೇವೇಗೌಡರ ಕುಟುಂಬ ಹೊಂದಿರುವ ಸಾಂಪ್ರದಾಯಿಕ ಪ್ರಭಾವಕ್ಕೆ ಸವಾಲೊಡ್ಡಲು ಕಾಂಗ್ರೆಸ್‌ ತೀವ್ರ ಪ್ರಯತ್ನ ನಡೆಸಿತು.

ಆದರೆ, ಸಾಕಷ್ಟು ಸಂಘಟನಾ ಸಂಪನ್ಮೂಲಗಳನ್ನು ಬಳಸಿದರೂ ಪಕ್ಷಕ್ಕೆ ಈ ಕ್ಷೇತ್ರವನ್ನು ಗೆಲ್ಲಲು ಸಾಧ್ಯವಾಗಲಿಲ್ಲ. ಎನ್‌ಡಿಎ ಬೆಂಬಲಿತ ಅಭ್ಯರ್ಥಿ ಗೆಲುವು ಸಾಧಿಸಿದ್ದು, ಕುಮಾರಸ್ವಾಮಿ ಅವರಿಗೆ ರಾಜಕೀಯವಾಗಿ ಮತ್ತು ಸಾಂಕೇತಿಕವಾಗಿ ಮಹತ್ವದ ಮುನ್ನಡೆ ನೀಡಿದೆ.

ನಾಲ್ಕೂ ಕ್ಷೇತ್ರಗಳಲ್ಲಿ ಎನ್‌ಡಿಎ ಸಾಧಿಸಿದ ಗೆಲುವು ಬಿಜೆಪಿ ಮತ್ತು ಜೆಡಿಎಸ್‌ ನಡುವಿನ ತಳಮಟ್ಟದ ಹೊಂದಾಣಿಕೆ ಹೆಚ್ಚುತ್ತಿರುವುದನ್ನು ತೋರಿಸುತ್ತದೆ ಎಂದು ರಾಜಕೀಯ ವೀಕ್ಷಕರು ಅಭಿಪ್ರಾಯಪಟ್ಟಿದ್ದಾರೆ. ನಾಲ್ಕೂ ಕ್ಷೇತ್ರಗಳಲ್ಲಿ ಮೈತ್ರಿ ಪಕ್ಷಗಳ ನಡುವೆ ಪರಿಣಾಮಕಾರಿಯಾಗಿ ಮತಗಳ ವರ್ಗಾವಣೆ ನಡೆದಿರುವುದು ಗೆಲುವಿಗೆ ನೆರವಾಗಿದೆ ಎಂದು ಅವರು ಹೇಳಿದ್ದಾರೆ.

ಶಿಕ್ಷಕರು ಮತ್ತು ಪದವೀಧರರ ಕ್ಷೇತ್ರಗಳಲ್ಲಿ ಸೋಲು ಕಂಡಿರುವುದು, ಶಿಕ್ಷಣ ಕ್ಷೇತ್ರದವರು, ವೃತ್ತಿಪರರು ಮತ್ತು ನಗರ ಮಧ್ಯಮ ವರ್ಗದ ಕೆಲವು ವಿಭಾಗಗಳಲ್ಲಿ ಅಸಮಾಧಾನವಿದೆಯೇ ಎಂಬ ಚರ್ಚೆಗೆ ಕಾರಣವಾಗಿದೆ. ಈ ಗೆಲುವು ಮುಂಬರುವ ಸ್ಥಳೀಯ ಸಂಸ್ಥೆ ಮತ್ತು ನಗರಸಭೆ ಚುನಾವಣೆಗಳಿಗೂ ಮುನ್ನ ಎನ್‌ಡಿಎಗೆ ಹೊಸ ರಾಜಕೀಯ ಚೈತನ್ಯ ನೀಡುವ ಸಾಧ್ಯತೆಯಿದೆ. ಆಡಳಿತ ಮತ್ತು ನೀತಿ ವಿಚಾರಗಳಲ್ಲಿ ರಾಜ್ಯ ಸರ್ಕಾರವನ್ನು ಎದುರಿಸಲು ಮೈತ್ರಿಕೂಟದ ಸ್ಥಾನವನ್ನು ಇದು ಬಲಪಡಿಸಿದೆ.

ಆದರೆ, ಈ ಫಲಿತಾಂಶವು ರಾಜ್ಯ ಸರ್ಕಾರದ ಕಾರ್ಯನಿರ್ವಹಣೆಯ ಕುರಿತ ಜನಮತಸಂಗ್ರಹವಲ್ಲ; ಸ್ಥಳೀಯ ವಿಚಾರಗಳೂ ಚುನಾವಣೆಯ ಮೇಲೆ ಪ್ರಭಾವ ಬೀರಿವೆ ಎಂದು ಕಾಂಗ್ರೆಸ್‌ ನಾಯಕರು ಹೇಳಿದ್ದಾರೆ. ಭವಿಷ್ಯದ ಚುನಾವಣಾ ಸ್ಪರ್ಧೆಗಳಿಗೆ ಮುನ್ನ ಈ ಹಿನ್ನಡೆಯ ಕುರಿತು ಪಕ್ಷದೊಳಗೆ ಆತ್ಮಾವಲೋಕನ ನಡೆಯುವ ನಿರೀಕ್ಷೆಯಿದೆ.

“..ಎದೆಯೊಳಗಿನ ಮಾತೆ ಜ್ಯೋತಿಯಾಗಿ ಆರದಂತೆ ಬೆಳಗಬೇಕು ಹೀಗೆ ನುಡಿದು ಜೀವನದ ಸಾರ್ಥಕತೆಯನ್ನು ಅರುಹಿದ ಆಯ್ದಕ್ಕಿ ಲಕ್ಕಮ್ಮ ಆಸೆಯನ್ನು ಬಡತನವನ್ನೂ ಮೀರಿ ನಿಲ್ಲುವ ಬಗೆಯನ್ನು ಮಾರ್ಮಿಕವಾಗಿ ತಿಳಿಸಿದ್ದಾಳೆ..” ಲೇಖಕರಾದ ಡಾ.ಲಲಿತಾ ಹೊಸಪ್ಯಾಟಿ ಅವರ ಬರಹದಲ್ಲಿ

      **ಅಂಗಕ್ಕೆ ಬಡತನವಲ್ಲದೆ, ಮನಕ್ಕೆ ಬಡತನವುಂಟೆ? 
      ಬೆಟ್ಟ ಬಲ್ಲಿತೆಂದಡೆ  ಉಳಿಯ ಮೊನೆಯಲ್ಲಿ 
      ಬಡತನವಿದ್ದಡೆ ಒಡೆಯದೆ?....**

ಎಂಬ ಅನುಭಾವವನ್ನು ಗಟ್ಟಿ ಗಳಿಸಿಕೊಂಡು ಜೀವನ ನಡೆಸುವುದು ಸುಲಭವಲ್ಲ. ಅನುಭಾವಿಕ ಬದುಕಿಗಾಗಿ ಸ್ವಾರ್ಥ ಮತ್ತು ಸ್ವಂತ ಅಭಿಲಾಷೆಗಳನ್ನು, ಆಸೆ ಆಮಿಷಗಳನ್ನು ತೊರೆಯಬೇಕು. ಜೀವನ ನಡೆಸಬೇಕೆಂದರೆ ನುಡಿದಂತೆ ನಡೆಯಬೇಕು. ಇಲ್ಲಿ ನುಡಿಯೇ ಮೊದಲು. ನಂತರ ನಡೆಯ ದಾರಿ. ಅದು ಎದೆಯೊಳಗಿನ ಮಾತೆ ಜ್ಯೋತಿಯಾಗಿ ಆರದಂತೆ ಬೆಳಗಬೇಕು ಹೀಗೆ ನುಡಿದು ಜೀವನದ ಸಾರ್ಥಕತೆಯನ್ನು ಅರುಹಿದ ಆಯ್ದಕ್ಕಿ ಲಕ್ಕಮ್ಮ ಆಸೆಯನ್ನು ಬಡತನವನ್ನೂ ಮೀರಿ ನಿಲ್ಲುವ ಬಗೆಯನ್ನು ಮಾರ್ಮಿಕವಾಗಿ ತಿಳಿಸಿದ್ದಾಳೆ.

ಆಸೆಯನ್ನಾಗಲೀ ಬಡತನವನ್ನಾಗಲೀ ಮೀರಲು ಮನಸ್ಸು ಬಾಗಬೇಕು ಮಾಗಬೇಕು. ಬಾಗುವ ಔದಾರ್ಯ ವೆಂದರೆ ಹೆಣ್ಣು ಹೊನ್ನು ಮಣ್ಣಿನ ಆಚೆಗೆ ಆಸೆಯನ್ನು ತೊರೆಯುವುದು. ತಾನು ಬದುಕುವ ಜೊತೆಗೆ ಇತರರು ಬದುಕುವ ದಿಸೆಯಲ್ಲಿ ಒಡಲ ಹಸಿವಿಗೆ ಸಿಡಿಮಿಡಿಗೊಳ್ಳದೇ, ಅರಿವಿನ ಹಸಿವಿಗಾಗಿ ಒಡಲುಗೊಳ್ಳಬೇಕೆಂದು ತಿಳಿಸಿದ ಶಿವಶರಣೆ ಆಯ್ದಕ್ಕಿ ಲಕ್ಕಮ್ಮನ ವಚನಗಳು ನರ ಮನುಷ್ಯನ ನರಳಾಟದ ಬದುಕಿಗೊಂದು ತೃಪ್ತತೆಯ ಸಾಕಾರ ಒದಗಿಸುವಂತದ್ದು. ಆಸೆಯೆಂಬ ಪಾಶವನ್ನು ಮುಕ್ತಗೊಳಿಸುವಂತದ್ದು.

ಆಯ್ದಕ್ಕಿ ಲಕ್ಕಮ್ಮನ ಪತಿ ಆಯ್ದಕ್ಕಿ ಮಾರಯ್ಯನವರು. ಅನುಭಾವಿಕ, ಮತ್ತು ಕಾಯಕದೊಳಗೆ ನಿರತನಾದೊಡೆ ಲಿಂಗ ಮುಂದಿದ್ದರೂ ಕಾಯಕದೊಳಗು ಎಂದೇ ಕಾಯಕದಲ್ಲಿಯೇ ಶಿವನೊಲುಮೆ ಕಂಡವರು. ಭಕ್ತರಾದ ಸತಿಪತಿ ಅಮರೇಶ್ವರ ಲಿಂಗ ಭಕ್ತರು. ಇವರು ಬಡತನದ ಸಂಸಾರವನ್ನು ಗೋಳೆಂದು ತೋಡಿ ಕೊಂಡವರಲ್ಲ. ಲಿಂಗದ ಮುಂದೆ ಬೇಡಿಕೊಂಡವರಲ್ಲ. ಬಡತನವು ಅಮರೇಶ್ವರ ಲಿಂಗ ಪ್ರಸಾದವೆಂದೇ ಅನುಭವಿಸಿದವರು. ಅಣ್ಣ ಬಸವಣ್ಣನವರ ಕಾಯಕದ ಕರೆಗೆ ಓಗೊಟ್ಟು, ಶರಣ ಸಂಕುಲ ಸೇರುವ ಬಯಕೆಯಿಂದ ಬಂದು, ಕಲ್ಯಾಣದಲ್ಲಿಯೇ ನೆಲೆ ನಿಂತವರು. ಪತಿ ಆಯ್ದಕ್ಕಿ ಮಾರಯ್ಯನವರು ಆಯಗಾರ ಕಾಯಕದಲ್ಲಿ ನಿರತರಾದರೆ ಶರಣಿ ಲಕ್ಕಮ್ಮ ದಾಸೋಹ ಜಂಗಮ ಸೇವೆ ಮಾಡುತ್ತಾ ಶರಣೆಯರು ನಡೆಸುತ್ತಿದ್ದ ಅಕ್ಷರ ಶಾಲೆಯಲ್ಲಿ ಕಾಯಕ ಸೇವೆಯಲ್ಲಿದ್ದವರು.

ಕಾಯಕ ನಿರತ ಆಯ್ದಕ್ಕಿ ಲಕ್ಕಮ್ಮನವರ ಹಿರಿದಾದ ವಚನ ಇಂದಿನ ನಮ್ಮ ಸಂಗ್ರಹಿಸುವ ಗುಣಕ್ಕೆ ಚಾಟಿ ಏಟು ನೀಡುವಂತದ್ದು. ಬಡತನದ ಬಗ್ಗೆ ನಮಗೆಲ್ಲ ಬೇಸರವಿದೆ. ನೋವಿದೆ ದುಗುಡವಿದೆ. ಮನುಷ್ಯ ಸುಖವಾಗಿರಲು ಬಯಸುತ್ತಾನೇಯೇ ಹೊರತು ಕಷ್ಟವನ್ನು ಪಡೆಯಲು, ಪರಿಪಾಟಲದ ಜೀವನ ಸಾಗಿಸಲು ಬಯಸಲಾರನು. ದೇವರಲ್ಲಿಯೂ ಬಡತನ ತರಬೇಡವೆಂದೇ ಬೇಡಿಕೊಳ್ಳುವ ಮನೋಭಿಲಾಷೆಯಲ್ಲಿ ನಾವು ನಿರತರು. ದೇವರೇ ಯಾಕಪ್ಪ ಈ ಬಡತನ ?ಎಂದು ದೇವರಿಗೆ ಮೊರೆ ಹೋಗುವವರೇ ನಾವೆಲ್ಲ.

ಆದರೆ ಆಯ್ದಕ್ಕಿ ಲಕ್ಕಮ್ಮ ಬಡತನದ ವಿಶ್ಲೇಷಣೆಯನ್ನು ಮಾಡುವ ರೀತಿಯೇ ಅನನ್ಯ, ಅದು ಅನುಭಾವಿಕ ಸ್ಥರದ ಅರಿವಿನ ಬೆಳಕು. ದೇಹವಿದೆ, ದೇಹದೊಳಗೆ ಜೀವವಿದೆ. ಕಾಯಕ ಮಾಡುವ ಶಕ್ತಿಯಿದೆ. ಕಣ್ಣಿಂದ ನೋಡಬಲ್ಲೆವು, ಕಿವಿಯಿಂದ ಕೇಳಬಲ್ಲೆವು,ಕಾಲಿನಿಂದ ನಡೆಯಬಲ್ಲೆವು. ಅದರೆ ಇದ್ಯಾವುದು ನಮಗೆ ಸಿರಿವಂತಿಕೆಯದ್ದಲ್ಲ. ದೇಹ ಶ್ರೀಮಂತಿಕೆಯನ್ನು ಮರೆತು, ಸಿರಿಯ ಆಸೆಗೆ ಬಿದ್ದವರು ನಾವು.

ಆದರೆ ಆಯ್ದಕ್ಕಿ ಲಕ್ಕಮ್ಮನದು ಮಾರಯ್ಯಪ್ರಿಯ ಅಮರೇಶ್ವರ ಲಿಂಗವನ್ನೇ ಪೂಜಿಸುವ ನಮಗೆ ಬಡತನ ಎಲ್ಲಿಯದು? ಎನ್ನುವ ಮನೋನಿರ್ಧಾರ ಗಟ್ಟಿಯಾದುದು. ಬಾಳಿನಲ್ಲಿ ಒಂದು ಹೊತ್ತಿನ ಪ್ರಸಾದ ದೊರೆಯುವಂತೆ ಅನುಗ್ರಹಿಸಿದ ಅಮರೇಶ್ವರ ಪ್ರಸಾದ ಕೊಟ್ಟಿರುವುದು ಸುಕೃತ ಎಂದು ಭಾವಿಸಿದ ಶರಣೆ.

ಒಂದು ಸಂದರ್ಭದಲ್ಲಿ ಪತಿ ಆಯ್ದಕ್ಕಿ ಮಾರಯ್ಯನವರು ಆಯಗಾರ ಕಾಯಕ ಮುಗಿಸಿ ದಾಸೋಹದ ಮನೆಯಿಂದ ಬರುವಾಗ ದಿನಕ್ಕೆ ಬೇಕಾಗಿದ್ದಕ್ಕಿಂತ ಒಂದಿಷ್ಟು ಹೆಚ್ಚು ಅಕ್ಕಿಯನ್ನು ತಂದಿರುತ್ತಾರೆ. ನೋಡಿದ ಲಕ್ಕಮ್ಮ ಅವರು ಹೇಳುವ ವಚನ, ಮಾನವ ಆಸೆಯನ್ನು ತ್ಯಜಿಸಿ, ಹೇಗೆ ಬಾಳಬೇಕೆಂಬುದಕ್ಕೆ ಸಾಕ್ಷಿಯಾಗಿದೆ
ಆಸೆಯೆಂಬುದು ಅರಸಿಂಗಲ್ಲದೆ ಶಿವಭಕ್ತರಿಗುಂಟೆ ಅಯ್ಯಾ
ರೋಷವೆಂಬುದು ಯಮದೂತರಿಗಲ್ಲದೆ ಅಜಾತರಿಗುಂಟೆ ಅಯ್ಯಾ
ಈಸಕ್ಕಿಯಾಸೆ ನಿಮಗೇಕೆ ಅಯ್ಯಾ? ಮಾರಯ್ಯಪ್ರಿಯ ಅಮರೇಶ್ವರ ಲಿಂಗಕ್ಕೆ ದೂರ ಮಾರಯ್ಯ ಎನ್ನುತ್ತಾಳೆ

ಸಂಗ್ರಹ ಬುದ್ಧಿ ಎಂಬುದು ಎಂದಿಗೂ ಸಲ್ಲ, ಎಂದರಿತ ಹಿರಿಯ ಶರಣರು ಆಯ್ದಕ್ಕಿ ಮಾರಯ್ಯನವರು. ಕಾಯಕ ನಿಷ್ಠರು. ಶರಣ ತತ್ವ ಪರಿಪಾಲಕರು. ಇಂತವರೇ ತತ್ವನಿಷ್ಠೆ ಯನ್ನು ಮೀರಿದ್ದಕ್ಕೆ ಪ್ರಶ್ನೆ ಕೇಳುವ ಲಕ್ಕಮ್ಮ ಪತಿಯಾದರೂ ವ್ರತಕ್ಕೆ ಭಂಗ ಬಂದಾಗ ಪ್ರಶ್ನಿಸಿ ಸರಿಪಡಿಸಬೇಕೆನ್ನುವ ವಿಚಾರಧಾರೆಯುಳ್ಳವಳು. ಅದೇ ರೀತಿ ಕುಟುಂಬದ ಜವಾಬ್ದಾರಿ ಹೊತ್ತ ಸತಿಪತಿಗಳು ಪಾಲಿಸುವುದು ಕೂಡಾ ಯೋಗ್ಯವೆ. ಇಲ್ಲಿ ಮಾರಯ್ಯನವರು ಇಂದು ತಂದ ಅಕ್ಕಿ ಹೆಚ್ಚಾಗಿದೆ, ಎಂದರೆ ಇನ್ನೊಬ್ಬರ ಹಸಿವಿಗೆ ಬೇಕಾದ ಅಕ್ಕಿಯನ್ನು ಕಸಿದುಕೊಂಡಂತೆ. ಇದು ಇನ್ನರಿಗೋ ಸಲ್ಲಬೇಕಿತ್ತು. ಸಲ್ಲಲಿಲ್ಲ ಎಂದರೆ ಅವರ ಪ್ರಸಾದಕ್ಕೆ ಕೊರತೆಯಾದಂತೆ. ಅಂತೆಯೇ ಇಂದಿನದ್ದನ್ನು ಇಂದೇ ಸಂಪಾದಿಸಿ ಕಾಯಕದಿಂದಲೇ ಸಂಗ್ರಹಿಸಿ ಪ್ರಸಾದ ಸೇವಿಸಬೇಕೆ ವಿನಃ, ಅದನ್ನು ನಾಳೆ ನಾಡಿದ್ದು ಮುಂದಿನ ದಿನಮಾನಕ್ಕೆ ಎತ್ತಿಡುವುದು ಶಿವ ಭಕ್ತರಿಗೆ ಸಲ್ಲ ಎನ್ನುತ್ತಾಳೆ.

ಆಸೆಗೆ,ಜಯಕ್ಕೆ, ತಲೆಯ ಮೇಲಿನ ರತ್ನದ ಕಿರೀಟಕ್ಕೆ ಆಸೆ ಪಟ್ಟು ಸಾಮ್ರಾಜ್ಯ ಕಟ್ಟಿ ಸಂತಸ ಪಡುವವರು ಅರಸರು. ರಾಜ್ಯದ ಮೇಲಿನ ಆಸೆಗೆ,ಮಣ್ಣಿನ ಮೇಲಿನ ಮೋಹಕ್ಕೆ, ಇರುವವರು ಅರಸರು. ಶಿವಶರಣರು ಅಲ್ಲ. ಯಾರ್ಯಾರಿಗೆ ಯಾವ ಗುಣ ಸಲ್ಲಬೇಕು ಆ ಗುಣಗಳಿಂದಲೇ ಅವರ ವ್ಯಕ್ತಿತ್ವ ಗುರುತಿಸುತ್ತದೆ. ಹಾಗೆ ಯಮದೂತರು ಅಂದರೆ ಸಾವನ್ನು ಕೈಯಲ್ಲಿ ಹಿಡಿದು ಬರುವವರು,ಅವರಿಗೆ ರೋಷವೇ ಮುಖ್ಯ ಹೊರತು ಅಂತಃಕರಣದಿಂದ ಸಾವಿಗಿ ಬಿದ್ದವರನ್ನು ಎತ್ತಿ ಪುನರ್ಜನ್ಮ ನೀಡಲಾರರು. ಆದರೆ ಶಿವಶರಣರು ಬಡತನವನ್ನೂ, ಸಾವನ್ನು ಮೀರಿ ನಿಂತವರು. ಅವರಿಗೆ ಯಾವ ಯಾರ ಭಯ ಇರಲಾರದು. ಶಿವಭಕ್ತರಿಗೂ ಒಂದು ಗುಣವಿದೆ. ಅದೂ ಆಸೆತೊರೆದ ಶರಣ ನಡೆ. ಆಸೆ ಪಟ್ಟು ತಂದ ಅಕ್ಕಿ, ದಾಸೋಹಕ್ಕು ಸಲ್ಲದು. ಪ್ರಸಾದಕ್ಕೂ ಸಲ್ಲದು. ತಂದ ಅಕ್ಕಿಯನ್ನು ಮತ್ತೇ ದಾಸೋಹದ ಮನೆಯಲ್ಲಿಯೇ ಸಲ್ಲಿಸಬೇಕೆಂದು ನಿರ್ಧಾಕ್ಷಿಣ್ಯವಾಗಿ ಮರಳಿ ದಾಸೋಹದ ಮನೆಗೆ ಕಳಿಸುವ ಲಕ್ಕಮ್ಮನ ವಿಚಾರಧಾರೆಯಿಂದ ನಾವೆಲ್ಲ ಹೆಣ್ಣುಮಕ್ಕಳು ಕಲಿಯಬೇಕಾದದ್ದು ಬಹಳಷ್ಟಿದೆ.

ಆಹಾರ ಪದಾರ್ಥಗಳು ಅಷ್ಟೇ ಅಲ್ಲ, ಬಟ್ಟೆ, ಕಾಳು, ಆಸ್ತಿ ಬಂಗಾರ, ಒಡವೆ, ಹಣ, ಮನೆ, ಹೊಲ ಎಲ್ಲವೂ ನಾಳೆಗಾಗಿಯೇ ಹೊರತು, ಇಂದು ತಿನ್ನುವುದು ಮಾತ್ರ ಒಂದು ಮುಷ್ಠಿ ಅನ್ನ ಎರಡು ರೊಟ್ಟಿ ಆದರೂ, ಮನೆಯಲ್ಲಿ ಚೀಲದ ನೆಟ್ಟು ಒಟ್ಟಿರಬೇಕು ಅಂದಾಗಲೇ ಮನುಷ್ಯ ಜನ್ಮಕ್ಕೆ ಸಮಾಧಾನ. ಒಂದು ತಗಡು ಬಿದ್ದರೂ, ನಾಳೆಗೆ ಬಂದಿತೆಂದು ಎತ್ತಿಟ್ಟುಕೊಳ್ಳುವ ನಮಗೆ ಆಯ್ದಕ್ಕಿ ಲಕ್ಕಮ್ಮ ಹೇಳುವ ಮಾತು ಬಡತನ ಎಂಬುದು ಹೊರಗಿನದು ಸಿರಿತನ ಎಂಬುದು ಒಳಗಿನದು ಎಂಬ ಮಾತು ಪ್ರಮಾಣವಾಗಬೇಕು. ಒಳಗಣ ಮನಸ್ಸು ಸಂತೃಪ್ತವಾಗಲು ಶ್ರೀಮಂತಿಕೆಯಿದ್ದರೆ ಸಾಲದು. ಹೃದಯ ಸಿರಿವಂತರಾಗಬೇಕು, ಜ್ಞಾನ ಶ್ರೀಮಂತರಾಗಬೇಕು, ಅರಿವಿನಿಂದ ಶ್ರೀಮಂತರಾಗಬೇಕೆನ್ನುತ್ತಾಳೆ. ಆಗ ಮಾತ್ರವೇ ಹೊರಗಿನ ಯಾವ ಬಡತನವು ಕಾಡಲಾರದು .

ಯಾರಿಗೆ ಆಗಲಿ ಚಿತ್ತದಲ್ಲಿ ಒಮ್ಮೆ ಬಡತನವನ್ನು ಹೋಗಲಾಡಿಸುವುದೇ ಆದ್ಯ ಎಂಬ ಭಾವ ಬಂದು ನಿಂತರೆ ಮುಗಿಯಿತು. ಶ್ರೀಮಂತಿಕೆಯನ್ನು ಪಡೆವ ಮಹದಾಸೆಯಲ್ಲಿ ಯಾವುದಾವುದೋ ದುಷ್ಕೃತ್ಯಗಳು ನಮ್ಮಿಂದ ಹೆಚ್ಚಾಗುತ್ತವೆ. . ಅದು ಯಾರಿಗೆ ಆಗಲಿ ಕಾಯಕದ ವ್ರತ, ಜೀವನ ವೃತ್ತ, ಸನ್ನಡತೆ ಮೀರಿದ ಭಾವ ಎಂಬುದನ್ನು ಪದೇ ಪದೇ ತಿಳಿಸುತ್ತಾಳೆ. ಶ್ರೀಮಂತಿಕೆ ಬಡತನ ಎಂಬ ಭೇದವನ್ನು ಹುಟ್ಟುಹಾಕಿದಂತೆ. ಎಂಬುದು ಲಕ್ಕಮ್ಮನ ಅರಿವಿನ ತಿಳಿವಿನ ನಡೆ. ಶರಣರು ತಿಳಿಸಿದಂತೆ ಇದ್ದುದರಲ್ಲಿಯೇ ತೃಪ್ತಿಯಿಂದ ಜೀವನ ನಡೆಸುವ ವಿಧಾನವನ್ನು ತಿಳಿಸುತ್ತಾಳೆ.

ಪತಿಯ ಚಿತ್ರ ಚಂಚಲವಾಯಿತು ಎಂದು ಭಾವಿಸಿದ ಲಕ್ಕಮ್ಮ ಸುಮ್ಮನಿರುವುದಿಲ್ಲ. ವರೆಗಚ್ಚುವ ಕಾರ್ಯವನ್ನೂ ಮಾಡುತ್ತಾಳೆ. ಅನುಮಾನಿಸಿ ನೋಡುವಳಲ್ಲದೆ, ಮತ್ತು ತಿಳಿಸಿ ಹೇಳುವ ಬಗ್ಗೆಯೂ ಹಿಂಜರಿಯುವುದಿಲ್ಲ.
ಒಮ್ಮನವ ಮೀರಿ ಇಮ್ಮನವ ತಂದಿರಯ್ಯ
ಇದು ನಿಮ್ಮ ಮನವೋ ಬಸವಣ್ಣನವರ
ಅನುಮಾನದ ಚಿತ್ತವೋ
ಈ ಮಾತು ಮಾರಯ್ಯ ಪ್ರಿಯ ಅಮರೇಶ್ವರ ಲಿಂಗಕ್ಕೆ ಸಲ್ಲದ ಬೋನ
ಸುರಿದು ಬನ್ನಿ ಎನ್ನುತ್ತಾಳೆ.

ಭಕ್ತರು ಕಾಯಕವೆಂದು ಪಡೆಯುವುದು ಒಮ್ಮನದಲ್ಲಿಯೇ ಇರಬೇಕೇ ಹೊರತು ಅದು ಇಮ್ಮನವಾಗಬಾರದು. ಇಮ್ಮನ ತಂದು ದಾಸೋಹ ಮಾಡಲಾಗದು ಎಂದು ನಿರಾಕರಿಸುತ್ತಾಳೆ. ಒಮ್ಮನವ ತಂದು ಬೋನವ ಮಾಡಿದಲ್ಲಿಯೇ ಮಾತ್ರ ಮಾರಯ್ಯಪ್ರಿಯ ಅಮರೇಶ್ವರ ಲಿಂಗಕ್ಕೆ ಸಲ್ಲಲಿ ಇಮ್ಮನವಾಗುವ ಮುನ್ನವೇ ಎಚ್ಚರಗೊಳ್ಳಬೇಕೆನ್ನುವ ಅರಿವಿನ ಎಚ್ಚರಿಕೆಯಲ್ಲಿ ಸರ್ವರ ಸುಖ ಬಯಸುವ ಗುಣವೂ ಇದೆ. ಒಮ್ಮನ ಇರಬೇಕೆ ಹೊರತು ಇಮ್ಮನ ಇರಬಾರದು. ಮನಸ್ಸು ಯಾವ ಸಂದರ್ಭದಲ್ಲಿ ಅತ್ತ ಇತ್ತ ಹರಿದಾಡುವುದೋ ತಿಳಿಯದು. ಅಂತಹ ಏಕಾಗ್ರ ಮನವನ್ನು ಮೀರಬಾರದು. ಇಮ್ಮನ ಆಗುವುದೆಂದರೆ, ಮನಸ್ಸು ಚಂಚಲಗೊಂಡಂತೆ. ಸದಾ ಒಂದರಿಂದ ಇನ್ನೊಂದಕ್ಕೆ ಹರಿದಾಡಿಸುವ ಈ ಮನಸ್ಸು ದ್ವಂದ್ವದ್ದು. ಈ ದ್ವಂದ ಮನಸಿಜರಾಗಿ ಕಾಯಕವನ್ನೂ ಪ್ರಸಾದವನ್ನೂ, ದಾಸೋಹವನ್ನಾಗಲಿ ಕೈಗೊಳ್ಳಲಾಗದು.

ಅದಕ್ಕೆ ಮನಸ್ಸು ಜಾಗ್ರತೆಯನ್ನು ಮೀರಿ ಸಾಗುವ ಮೊದಲೇ ಎಚ್ಚರವಾಗಿರಬೇಕು. ಆಗ ಮಾತ್ರ ನಮ್ಮ ಲೌಕಿಕದ ಅಗತ್ಯತೆಗಳು ಪಡೆಯುವ ಹಂಬಲ ಕಡಿಮೆಯಾಗುತ್ತದೆ. ಈ ತೆರನಾದ ಮನಸ್ಸಿನ ಭಾವದಿಂದ ನಾವು ಒಂದೇ ಮನಸ್ಸಿನವರಾಗಿ ಬದುಕಲು ಸಾಧ್ಯವಾಗುತ್ತದೆ. ಯಾವ ಬಂಧನಗಳು ಯಾವ ಆಸೆಗಳು ಯಾವ ಆಕಾಂಕ್ಷೆಗಳು ಯಾವ ಬಯಕೆಗಳು ಹತ್ತಿರ ಸುಳಿಯುವುದಿಲ್ಲ. ಚಂಚಲ ಮನಸ್ಸಿನ ಹತೋಟಿಯನ್ನು ಮಾಡುವುದೂ ಅದೇ ಮನಸ್ಸಿನ ಶಕ್ತಿ. ಮನಸ್ಸು ಬಯಸಿದ್ದನ್ನು ತಾ ಪಡೆಯುತ್ತಾ ಹೋದರೆ ಕೊನೆಯೆಂಬುದಿಲ್ಲ. ಈ ಮನಸ್ಸು ಬಯಸುವ ಆಸೆಯಲ್ಲಿಯೇ ಸಾರ್ಥಕ ಜೀವನವಿದೆ ಎಂದು ಹೇಳುತ್ತಾಳೆ.

ಈ ಬಡತನವೆಂಬುದೇ ಈ ತೆರನಾದ ಇಮ್ಮನಸ್ಸಿನ ಹಾದಿಗೆ ಕೊರೆದೊಯ್ಯುತ್ತದೆ ಆದರೆ, ಬಡತನವೆಂದರೇನೆಂಬುದಕ್ಕೂ ವ್ಯಾಖ್ಯಾನ ನೀಡುತ್ತಾಳೆ. ಬಡತನವ ಮೀರುವ, ತಿಳಿವನು ಸಿದ್ಧಿಸಿಕೊಳ್ಳುವ ಬಗ್ಗೆ ಯೂ ತಿಳಿಸುತ್ತಾಳೆ
ತನ್ನ ಒಂದು ವಚನದಲ್ಲಿ
ಭಕ್ತಂಗೆ ಬಡತನ ಉಂಟೆ, ನಿತ್ಯಂಗೆ ಮರಣವುಂಟೆ?
ಭಕ್ತರು ಬಡವರೆಂದು ಮತ್ತೊಂದು ಕೊಟ್ಟಿಹೇನೆಂದಡೆ
ಮಾರಯ್ಯ ಪ್ರಿಯ ಅಮರೇಶ್ವರ ಲಿಂಗ, ಮಾರಯ್ಯ ಪ್ರಿಯ ಅಮರೇಶ್ವರ ಲಿಂಗವು ಸತ್ತಂದಿಗಲ್ಲದೆ ಬಡತನವಿಲ್ಲ ಎನ್ನುವಲ್ಲಿ

ಅಮರೇಶ್ವರ ಲಿಂಗ ತಮ್ಮ ಬೆನ್ನ ಹಿಂದೆ ಇರುವವರೆಗೂ, ನಂಬಿದ ಲಿಂಗ ಎಂದಿಗೂ ಕೈ ಬಿಡುವುದಿಲ್ಲ. ನಂಬಿದವರಿಗೆ ಬಡತನದ ಚಿಂತೆಯೂ ಇಲ್ಲ. ಈಸಕ್ಕಿಯಾಸೆಯೂ ಸಲ್ಲ. ಎನ್ನುತ್ತ, ಲೌಕಿಕದ ಬಡತನವನ್ನೂ ಮೀರಿ ಸಾಧನೆಯ ಅರಿವೇ ಗುರುವಾಗಿ ಕಾಯುವುದೆಂಬ ಅವಳ ವಚನ ಈಸಕ್ಕಿಯಾಸೆ ಭ್ರಮೆಯನ್ನುಕಳೆದು, ಒಂದು ಸೈದಾಂತಿಕ ವಿಚಾರವನ್ನೇ ನೀಡುತ್ತದೆ.

“..ಇವತ್ತು ನಾವು ಮಾತಾಡುತ್ತಿರುವುದು ಮಧ್ಯಪ್ರಾಚ್ಯದ ರಾಜಕೀಯವನ್ನು ಕಳೆದ ಹಲವು ದಶಕಗಳಿಂದ ತನ್ನ ಮುಷ್ಟಿಯಲ್ಲಿ ಇಟ್ಟುಕೊಂಡು, ಯುದ್ದ, ಭಯ ಮತ್ತು ರಕ್ತಪಾತವನ್ನೇ ರಾಜಕೀಯ ಬಂಡವಾಳ ಮಾಡಿಕೊಂಡಿರುವ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಬಗ್ಗೆ..” ಇಸ್ರೇಲ್ ಚುನಾವಣಾ ವಿಶ್ಲೇಷಣೆ.. ಚಿಂತಕರಾದ ವಿ.ಆರ್.ಕಾರ್ಪೆಂಟರ್ ಬರಹದಲ್ಲಿ

ಜಗತ್ತಿನ ರಾಜಕೀಯ ಭೂಪಟದಲ್ಲಿ ಕೆಲವು ನಾಯಕರು ಅಧಿಕಾರ ಹಿಡಿಯುವುದಕ್ಕಾಗಿ ರಾಜಕೀಯ ಮಾಡುತ್ತಾರೆ, ಆದರೆ ಇನ್ನು ಕೆಲವರು ತಮ್ಮ ಅಧಿಕಾರದ ಕುರ್ಚಿ ಉಳಿಸಿಕೊಳ್ಳುವುದಕ್ಕಾಗಿ ಇಡೀ ದೇಶವನ್ನೇ, ಅಷ್ಟೇ ಯಾಕೆ ಇಡೀ ಪ್ರದೇಶವನ್ನೇ ನಿರಂತರ ಯುದ್ದದ ಬೆಂಕಿಗೆ ತಳ್ಳುತ್ತಾರೆ! ಇವತ್ತು ನಾವು ಮಾತಾಡುತ್ತಿರುವುದು ಮಧ್ಯಪ್ರಾಚ್ಯದ ರಾಜಕೀಯವನ್ನು ಕಳೆದ ಹಲವು ದಶಕಗಳಿಂದ ತನ್ನ ಮುಷ್ಟಿಯಲ್ಲಿ ಇಟ್ಟುಕೊಂಡು, ಯುದ್ದ, ಭಯ ಮತ್ತು ರಕ್ತಪಾತವನ್ನೇ ರಾಜಕೀಯ ಬಂಡವಾಳ ಮಾಡಿಕೊಂಡಿರುವ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಬಗ್ಗೆ. ಇವತ್ತು ಅಕ್ಟೋಬರ್ 21, 2026. ಇನು ದಿನಗಳಲ್ಲಿ, ಅಂದರೆ ಅಕ್ಟೋಬರ್ 27ರಂದು ಇಸ್ರೇಲ್ ಸಂಸತ್ತಿಗೆ ನಿರ್ಣಾಯಕ ಚುನಾವಣೆ ನಡೆಯಲಿದೆ. ಈ ಚುನಾವಣೆ ಬರೀ ಒಬ್ಬ ಪ್ರಧಾನಿಯನ್ನು ಆಯ್ಕೆ ಮಾಡುವ ಅಥವಾ ಒಂದು ಸರ್ಕಾರವನ್ನು ಬದಲಾಯಿಸಿ ಸಾಮಾನ್ಯ ಪ್ರಕ್ರಿಯೆಯಲ್ಲ; ಬದಲಾಗಿ ಇದು ನೆತನ್ಯಾಹು ಅವರ ಯುದ್ಧದಾಹದ ರಾಜಕೀಯಕ್ಕೆ ಇಸ್ರೇಲ್ ಜನತೆ ನೀಡಲಿರುವ ಅಂತಿಮ ತೀರ್ಪು!

2023ರ ಅಕ್ಟೋಬರ್ 7ರಂದು ಹಮಾಸ್ ನಡೆಸಿದ ಆ ದಾಳಿಯ ನಂತರ ಇಸ್ರೇಲ್ ಮತ್ತು ಪ್ಯಾಲೆಸ್ತೀನ್ ನಡುವಿನ ಚಿತ್ರಣವೇ ಬದಲಾಗಿ ಹೋಯಿತು. ಆದರೆ ಆವತ್ತಿನಿಂದ ಇವತ್ತಿನವರೆಗೆ, ಅಂದರೆ ಈ 3 ವರ್ಷಗಳಲ್ಲಿ ನೆತನ್ಯಾಹು ಮಾಡಿದ್ದೇನು? ಭದ್ರತೆಯ ಹೆಸರಿನಲ್ಲಿ ಗಾಜಾ ಪಟ್ಟಿಯನ್ನು ಅಕ್ಷರಶಃ ಒಂದು ಸ್ಮಶಾನವನ್ನಾಗಿ ಮಾಡಿದರು. ಹತ್ತಾರು ಸಾವಿರ ಅಮಾಯಕ ಜನರ ಪ್ರಾಣ ಹೋಯಿತು, ಆಸ್ಪತ್ರೆಗಳು, ಶಾಲೆಗಳು, ನಿರಾಶ್ರಿತರ ಶಿಬಿರಗಳು ಬಾಂಬ್ ದಾಳಿಗೆ ಧೂಳೀಪಟವಾದವು.

ಇಷ್ಟೆಲ್ಲಾ ರಕ್ತಪಾತ ನಡೆದರೂ ನೆತನ್ಯಾಹು ಅವರ ಯುದ್ಧದಾಹ ತಣಿಯಲೇ ಇಲ್ಲ. ಗಾಜಾ ಆಯ್ತು, ಆಮೇಲೆ ಲೆಬನಾನ್ ಕಡೆ ತಿರುಗಿದರು, ಅಲ್ಲಿಂದ ಇರಾನ್ ಜೊತೆ ನೇರಾನೇರ ಯುದ್ಧಕ್ಕೆ ಇಳಿದರು. ಯಾಕೆ ಗೊತ್ತಾ? ಯುದ್ಧ ನಿಂತರೆ ಜನ ಪ್ರಶ್ನೆ ಕೇಳುತ್ತಾರೆ! ಯುದ್ಧ ನಿಂತರೆ ದೇಶದ ಭದ್ರತಾ ವೈಫಲ್ಯದ ಬಗ್ಗೆ ತನಿಖೆ ನಡೆಯುತ್ತದೆ! ಯುದ್ಧ ನಿಂತರೆ ಭ್ರಷ್ಟಾಚಾರದ ಕೇಸ್ಗಳಲ್ಲಿ ಕೋರ್ಟ್ ಕಟಕಟೆಗೆ ಬಂದು ನಿಲ್ಲಬೇಕಾಗುತ್ತದೆ! ಈ ಭಯದಿಂದಲೇ ನಿರಂತರ ಯುದ್ಧದ ವಾತಾವರಣವನ್ನು ಸೃಷ್ಟಿಸಿದ ನೆತನ್ಯಾಹು ಇವತ್ತು ಮತ್ತೆ ಮತದಾರರ ಮುಂದೆ ಬಂದು ನಿಂತಿದ್ದಾರೆ.

ಅಕ್ಟೋಬರ್ 19 ಮತ್ತು 20ರವರೆಗೆ ಹೊರಬಿದ್ದಿರುವ ಇತ್ತೀಚಿನ ಚುನಾವಣಾ ಸಮೀಕ್ಷೆಗಳನ್ನು ನೋಡಿದರೆ ಒಂದು ವಿಚಾರ ಸ್ಪಷ್ಟವಾಗುತ್ತದೆ-ಇಸ್ರೇಲ್ ಮತದಾರರು ಹಿಂದೆಂದಿಗಿಂತಲೂ ಹೆಚ್ಚು ಗೊಂದಲದಲ್ಲಿದ್ದಾರೆ ಮತ್ತು ದೇಶ ರಾಜಕೀಯವಾಗಿ ಎರಡು ಹೋಳಾಗಿದೆ. ಯಾವುದೇ ಒಂದು ರಾಜಕೀಯ ಬಣಕ್ಕೂ ಸ್ಪಷ್ಟ ಬಹುಮತ ಸಿಗುವ ಲಕ್ಷಣ ಕಾಣಿಸುತ್ತಿಲ್ಲ. ಒಂದು ಕಡೆ ನೆತನ್ಯಾಹು ಅವರ ಬಲಪಂಥೀಯ ಲಿಕುಡ್ ಪಕ್ಷ ಮತ್ತು ಅದರ ಉಗ್ರ ಮಿತ್ರಪಕ್ಷಗಳು ಶತಾಯಗತಾಯ ಅಧಿಕಾರ ಉಳಿಸಿಕೊಳ್ಳಲು ತಂತ್ರ ಹೆಣೆಯುತ್ತಿದ್ದರೆ, ಇನ್ನೊಂದು ಕಡೆ ಮಾಜಿ ಸೇನಾ ಮುಖ್ಯಸ್ಥಗಾದಿ ಐಸೆನ್ಕೋಟ್ ನೇತೃತ್ವದ ಯಾಶಾರ್ ಪಕ್ಷ ಸೇರಿದಂತೆ ವಿರೋಧ ಪಕ್ಷಗಳು ಹೇಗಾದರೂ ಮಾಡಿ ನೆತನ್ಯಾಹು ಅವರನ್ನು ಮನೆಗೆ ಕಳಿಸಲೇಬೇಕು ಅಂತ ಪಣ ತೊಟ್ಟಿವೆ.

ಆದರೆ ದುರಂತ ಏನಪ್ಪಾ ಅಂದ್ರೆ, ಈ ವಿರೋಧ ಪಕ್ಷಗಳ ನಡುವೆಯೇ ನಾಯಕತ್ವ ಯಾರದ್ದು, ಮೈತ್ರಿ ಹೇಗಿರಬೇಕು ಎಂಬ ವಿಚಾರದಲ್ಲಿ ನೂರಾರು ಭಿನ್ನಾಭಿಪ್ರಾಯಗಳಿವೆ. ಹೀಗಾಗಿ ಅಕ್ಟೋಬರ್ 27ರ ಚುನಾವಣೆಯ ಫಲಿತಾಂಶ ಎಷ್ಟು ಮುಖ್ಯವೋ, ಚುನಾವಣೆ ಮುಗಿದ ಮರುದಿನದಿಂದ ಶುರುವಾಗುವ ರೆಸಾರ್ಟ್ ರಾಜಕೀಯ ಅಥವಾ ಚುನಾವಣೋತ್ತರ ಮೈತ್ರಿಯ ಆಟ ಕೂಡ ಅಷ್ಟೇ ನಿರ್ಣಾಯಕವಾಗಲಿದೆ. ಬನ್ನಿ, ಈ ಚುನಾವಣೆಯ ಪ್ರತಿಯೊಂದು ಆಯಾಮವನ್ನೂ ಎಳೆಎಳೆಯಾಗಿ ಬಿಚ್ಚಿಡೋಣ.

120 ಸೀಟು, 61 ಮ್ಯಾಜಿಕ್ ನಂಬರ್!
ಇಸ್ರೇಲ್ ಚುನಾವಣೆಯ ರಾಜಕೀಯ ಚದುರಂಗದ ಆಟವನ್ನು ಅರ್ಥ ಮಾಡಿಕೊಳ್ಳಬೇಕು ಅಂದರೆ, ಮೊದಲು ನಾವು ಅಲ್ಲಿನ ಸಂಸತ್ತಿನ ನಂಬರ್ ಗೇಮ್ ಅಥವಾ ಸಂಖ್ಯಾಬಲದ ಗಣಿತವನ್ನು ತಿಳಿದುಕೊಳ್ಳಬೇಕು. ಇಸ್ರೇಲ್ ಸಂಸತ್ತನ್ನು ‘ನೆಸೆಟ್’ (Knesset) ಅಂತ ಕರೆಯುತ್ತಾರೆ. ಈ ನೆಸೆಟ್ನಲ್ಲಿ ಒಟ್ಟು 120 ಸ್ಥಾನಗಳಿವೆ. ಭಾರತದಲ್ಲಾದರೆ ಪ್ರತಿಯೊಂದು ಕ್ಷೇತ್ರಕ್ಕೂ ಒಬ್ಬ ಅಭ್ಯರ್ಥಿ ನಿಲ್ಲುತ್ತಾರೆ. ಆದರೆ ಇಸ್ರೇಲ್ನಲ್ಲಿ ಹಾಗಿಲ್ಲ. ಅಲ್ಲಿ ಇಡೀ ದೇಶವೇ ಒಂದು ಚುನಾವಣಾ ಚುನಾವಣಾ ಕ್ಷೇತ್ರ! ಕ್ಷೇತ್ರ ಜನರು ಅಭ್ಯರ್ಥಿಗೆ ಮೋ ಹಾಕುವುದಿಲ್ಲ, ಬದಲಾಗಿ ರಾಜಕೀಯ ಪಕ್ಷಕ್ಕೆ ವೋಟ್ ಹಾಕುತ್ತಾರೆ. ಯಾವ ಪಕ್ಷಕ್ಕೆ ಎಷ್ಟು ಪರ್ಸೆಂಟ್ ವೋಟ್ ಬೀಳುತ್ತದೆಯೋ, ಅದರ ಆಧಾರದ ಮೇಲೆ ಆ ಪಕ್ಷಕ್ಕೆ ಈ 120 ಸೀಟುಗಳಲ್ಲಿ ಪಾಲು ಸಿಗುತ್ತದೆ.

ಇಲ್ಲಿ ಸರ್ಕಾರ ರಚನೆ ಮಾಡಲು ಬೇಕಾಗಿರುವ ಮ್ಯಾಜಿಕ್ ನಂಬರ್ 61! ಅಂದರೆ ಕನಿಷ್ಠ 61 ಸಂಸದರ ಬೆಂಬಲ ಯಾರಿಗೆ ಇರುತ್ತದೆಯೋ ಅವರು ಮಾತ್ರ ಪ್ರಧಾನಿ ಕುರ್ಚಿ ಏರಲು ಸಾಧ್ಯ. ಇಸ್ರೇಲ್ ಇತಿಹಾಸದಲ್ಲಿ ಯಾವುದೇ ಒಂದು ಪಕ್ಷ ಸ್ವಂತ ಬಲದ ಮೇಲೆ 61 ಸೀಟು ಗೆದ್ದಿದ್ದು ಇಲ್ಲವೇ ಇಲ್ಲ ಎನ್ನಬಹುದು. ಹೀಗಾಗಿ ಅಲ್ಲಿ ಯಾವತ್ತಿದ್ದರೂ ಸಮ್ಮಿಶ್ರ ಸರ್ಕಾರ ಅಥವಾ ಮೈತ್ರಿಕೂಟದ ಸರ್ಕಾರವೇ ಅನಿವಾರ್ಯ.

ಹಾಗಾದರೆ ಈಗಿನ ಗೌಂಡ್ ರಿಯಾಲಿಟಿ ಏನು? ಅಕ್ಟೋಬರ್ 19 ಮತ್ತು 20ರ ವೇಳೆಗೆ ಲಭ್ಯವಿರುವ Middle East Forum 2 ‘Poll of Polls’ & The Petek (Seat Average) ನೋಡಿದರೆ ಚಿತ್ರಣ ತುಂಬಾ ಕುತೂಹಲಕಾರಿಯಾಗಿದೆ. ಈ ಸಮೀಕ್ಷೆಗಳ ಪ್ರಕಾರ ಸದ್ಯದ ಲೆಕ್ಕಾಚಾರ ಹೀಗಿದೆ:

ಇಲ್ಲಿ ನಾವು ಒಂದು ವಿಚಾರವನ್ನು ತುಂಬಾ ಸ್ಪಷ್ಟವಾಗಿ ನೆನಪಿನಲ್ಲಿಟ್ಟುಕೊಳ್ಳಬೇಕು. ಈ 49 ರಿಂದ 54 ಅಥವಾ 50 ರಿಂದ 52 ಎಂಬ ನಂಬರ್ಗಳು ಯಾವುದೋ ಒಂದೇ ಒಂದು ಸರ್ವೆ ಕಂಪನಿ ಕೊಟ್ಟಿರುವ ಫಲಿತಾಂಶವಲ್ಲ. ಇದು ಬೇರೆ ಬೇರೆ ಸಮೀಕ್ಷಾ ಸಂಸ್ಥೆಗಳು ನಡೆಸಿರುವ ಸರ್ವೆಗಳ ಸರಾಸರಿ. ಪ್ರತಿಯೊಂದು ಸಮೀಕ್ಷಾ ಸಂಸ್ಥೆಯ ಮಾದರಿ, ಅವರು ಪಕ್ಷಗಳನ್ನು ಗುಂಪು ಮಾಡುವ ರೀತಿ ಮತ್ತು ಮೈತ್ರಿಕೂಟದ ಲೆಕ್ಕಾಚಾರ ಬೇರೆ ಬೇರೆಯಾಗಿರುವುದರಿಂದ ಸೀಟುಗಳ ಸಂಖ್ಯೆಯಲ್ಲಿ ಸಣ್ಣಪುಟ್ಟ ವ್ಯತ್ಯಾಸಗಳಿವೆ.

ಆದರೆ ಈ ಟೇಬಲ್ ನಮಗೆ ಹೇಳುತ್ತಿರುವ ಅಸಲಿ ಸತ್ಯ ಏನು ಗೊತ್ತಾ? ಕಳೆದ 3 ವರ್ಷಗಳಿಂದ “ನಾನೇ ಇಸ್ರೇಲ್ನ ರಕ್ಷಕ, ನಾನಿಲ್ಲದಿದ್ದರೆ ಇಸ್ರೇಲ್ ಉಳಿಯುವುದೇ ಇಲ್ಲ” ಅಂತ ಅಬ್ಬರಿಸುತ್ತಾ ಗಾಜಾ ಮೇಲೆ ಬಾಂಬ್ ಸುರಿಸುತ್ತಿರುವ ನೆತನ್ಯಾಹು ಅವರ ಇಡೀ ಮೈತ್ರಿಕೂಟಕ್ಕೆ ಜನ 61 ಸೀಟು ಕೊಡಲು ತಯಾರಿಲ್ಲ! ಅವರ ಮೈತ್ರಿಕೂಟ 49 ರಿಂದ 54 ಸೀಟುಗಳ ಆಸುಪಾಸಿನಲ್ಲಿ ಕುಂಟುತ್ತಿದೆ. ಅಂದರೆ ಮ್ಯಾಜಿಕ್ ನಂಬರ್

ತಲುಪಲು ಇನ್ನೂ 7 ರಿಂದ 12 ಸೀಟುಗಳ ಕೊರತೆಯಿದೆ! ಅದೇ ಸಮಯದಲ್ಲಿ. ಇನ್ನೊಂದು ಕಹಿ ಸತ್ಯ ಏನಪ್ಪಾ ಅಂದ್ರೆ, ನೆತನ್ಯಾಹು ಅವರನ್ನು ಅಧಿಕಾರದಿಂದ ಕೆಳಗಿಳಿಸಲೇಬೇಕು ಅಂತ ಹೊರಟಿರುವ ಪ್ರಮುಖ ಯಹೂದಿ ವಿರೋಧ ಪಕ್ಷಗಳ ಬಣ ಕೂಡ 50 ರಿಂದ 52 ಸೀಟುಗಳಲ್ಲೇ ಸಿಕ್ಕಿಹಾಕಿಕೊಂಡಿದೆ. ಅವರಿಗೂ 61ರ ಗಡಿ ದಾಟಲು ಸುಲಭದ ದಾರಿ ಕಾಣಿಸುತ್ತಿಲ್ಲ. ಅಂದರೆ ಮತದಾರರು ಯಾವುದೇ ಒಂದು ಬಣಕ್ಕೂ ಕ್ಲೀನ್ ಚಿಟ್ ಕೊಡುತ್ತಿಲ್ಲ. ಇದರ ನೇರ ಅರ್ಥ-ಅಕ್ಟೋಬರ್ 27ರ ನಂತರ ಸಣ್ಣಪುಟ್ಟ ಪಕ್ಷಗಳ ಚೌಕಾಸಿ, ಕುದುರೆ ವ್ಯಾಪಾರ ಮತ್ತು ಚುನಾವಣೋತ್ತರ ಮೈತ್ರಿಗಳೇ ಇಸ್ರೇಲ್ನ ಭವಿಷ್ಯವನ್ನು ನಿರ್ಧರಿಸಲಿವೆ!

ಭಯವನ್ನೇ ಬಂಡವಾಳ ಮಾಡಿಕೊಂಡ ಲಿಕುಡ್!
ಬೆಂಜಮಿನ್ ನೆತನ್ಯಾಹು ಇಸ್ರೇಲ್ ಇತಿಹಾಸದಲ್ಲಿ ಅತಿ ದೀರ್ಘಕಾಲ ಪ್ರಧಾನಿಯಾಗಿ ಅಧಿಕಾರ ನಡೆಸಿದ ವ್ಯಕ್ತಿ. ಅವರ ಲಿಕುಡ್ (Likud) ಪಕ್ಷ ದಶಕಗಳಿಂದ ವೋಟ್ ಕೇಳುತ್ತಿರುವುದೇ ರಾಷ್ಟ್ರೀಯ ಭದ್ರತೆ, ಬಲಪಂಥೀಯ ಯಹೂದಿ ರಾಷ್ಟ್ರೀಯತೆ ಮತ್ತು ಆರ್ಥಿಕ ನೀತಿಗಳ ಹೆಸರಿನಲ್ಲಿ. ನೆತನ್ಯಾಹು ತಮ್ಮನ್ನು ತಾವು “ಮಿಸ್ಟರ್ ಸೆಕ್ಯೂರಿಟಿ” ಅಂತ ಕರೆದುಕೊಳ್ಳುತ್ತಿದ್ದರು. ಆದರೆ ಅವರ ಈ “ಮಿಸ್ಟರ್ ಸೆಕ್ಯೂರಿಟಿ” ಎಂಬ ಮುಖವಾಡ ಕಳಚಿ ಬಿದ್ದಿದ್ದು 2023ರ ಅಕ್ಟೋಬರ್ 7ರಂದು!

ಆವತ್ತು ಹಮಾಸ್ ನಡೆಸಿದ ದಾಳಿಯಲ್ಲಿ ಸುಮಾರು 1,200 ಜನರು ಪ್ರಾಣ ಕಳೆದುಕೊಂಡರು. ಇಸ್ರೇಲ್ ಇತಿಹಾಸದಲ್ಲೇ ಅತ್ಯಂತ ಭೀಕರವಾದ ಆ ಘಟನೆ, ಜಗತ್ತಿನಲ್ಲೇ ಅತ್ಯಂತ ಬಲಿಷ್ಠ ಅಂತ ಕರೆಸಿಕೊಳ್ಳುತ್ತಿದ್ದ ಇಸ್ರೇಲ್ ಗುಪ್ತಚರ ವ್ಯವಸ್ಥೆ (ಮೊಸಾದ್ ಮತ್ತು ಶಿನ್ ಬೆಟ್), ಕೋಟ್ಯಂತರ ಡಾಲರ್ ಸುರಿದು ಕಟ್ಟಿದ್ದ ಹೈಟೆಕ್ ಗಡಿ ಬೇಲಿ ಮತ್ತು ಸೇನಾ ಸಿದ್ಧತೆಯ ಬಣ್ಣವನ್ನು ಬಯಲು ಮಾಡಿತು. ಮಾಡಿತು. ಇಲ್ಲಿಯೇ ಒಂದು ಮೂಲಭೂತ ಪ್ರಶ್ನೆ ಹುಟ್ಟಿಕೊಳ್ಳುತ್ತದೆ-ಆವತ್ತು ಅಧಿಕಾರದಲ್ಲಿ ಇದ್ದವರು ಯಾರು? ಇದೇ ಬೆಂಜಮಿನ್ ನೆತನ್ಯಾಹು! ಕಳೆದ ಒಂದೂವರೆ ದಶಕದಿಂದ ದೇಶದ ಭದ್ರತಾ ನೀತಿಯನ್ನು ರೂಪಿಸಿದವರು ಯಾರು? ಇದೇ ನೆತನ್ಯಾಹು! ಹಾಗಾದರೆ ಅಕ್ಟೋಬರ್ 7ರಂದು ಆದ ಆ ಮಹಾ ಭದ್ರತಾ ವೈಫಲ್ಯಕ್ಕೆ ನೇರ ಹೊಣೆ ಯಾರು ಆಗಬೇಕು? ಸ್ವಾಭಾವಿಕವಾಗಿಯೇ ಪ್ರಧಾನಿ ಕುರ್ಚಿಯಲ್ಲಿ ಕುಳಿತಿದ್ದ ನೆತನ್ಯಾಹು ಅವರೇ ಜವಾಬ್ದಾರಿ ಹೊರಬೇಕಿತ್ತು, ನೈತಿಕ ಹೊಣೆ ಹೊತ್ತು ರಾಜೀನಾಮೆ ಕೊಡಬೇಕಿತ್ತು!

ಆದರೆ ನೆತನ್ಯಾಹು ರಾಜೀನಾಮೆ ಕೊಡಲಿಲ್ಲ. ಬದಲಾಗಿ ಅವರು ಮಾಡಿದ್ದೇನು ಗೊತ್ತಾ? ತಮ್ಮ ಸರ್ಕಾರದ ಘೋರ ವೈಫಲ್ಯವನ್ನು ಮುಚ್ಚಿಕೊಳ್ಳಲು ಪ್ರತೀಕಾರದ ಯುದ್ಧವನ್ನು ಶುರು ಮಾಡಿದರು. ಇವತ್ತು ಚುನಾವಣಾ ಕಣದಲ್ಲಿ ನೆತನ್ಯಾಹು ವಿಮರ್ಶಕರು ಮತ್ತು ವಿರೋಧ ಪಕ್ಷಗಳು ಕೇಳುತ್ತಿರುವ ಮೊದಲ ಪ್ರಶ್ನೆಯೇ ಇದು “ಅಕ್ಟೋಬರ್ 7ರ ದಾಳಿ ನಡೆಯದಂತೆ ತಡೆಯುವುದು ನಿಮ್ಮಸರ್ಕಾರದ ಜವಾಬ್ದಾರಿಯಾಗಿತ್ತು, ನೀವು ಅದರಲ್ಲಿ ಸಂಪೂರ್ಣವಾಗಿ ವಿಫಲರಾಗಿದ್ದೀರಿ!”

ಆದರೆ ನೆತನ್ಯಾಹು ಮತ್ತು ಅವರ ಕುರುಡು ಬೆಂಬಲಿಗರು ಇದೇ ವಿಷಯವನ್ನು ಉಲ್ಟಾ ತಿರುಗಿಸಿ ರಾಜಕೀಯ ಮಾಡುತ್ತಿದ್ದಾರೆ. ಹಮಾಸ್ ಮತ್ತು ಇತರ ಶತ್ರುಗಳ ವಿರುದ್ಧ ನಡೆಸಿದ ನಿರ್ದಯಿ ಸೇನಾ ಕಾರ್ಯಾಚರಣೆಗಳನ್ನೇ ನೆತನ್ಯಾಹು ಅವರ “ಗಟ್ಟಿ ನಾಯಕತ್ವದ ಬಲ” ಎಂದು ಬಿಂಬಿಸುತ್ತಿದ್ದಾರೆ! ಅಂದರೆ, ಮೊದಲು ತಮ್ಮದೇ ವೈಫಲ್ಯದಿಂದ ದೇಶವನ್ನು ಅಪಾಯಕ್ಕೆ ತಳ್ಳುವುದು, ಆಮೇಲೆ ಆ ಅಪಾಯದಿಂದ ರಕ್ಷಿಸಲು ನಾನೇ ಯುದ್ಧ ಮಾಡುತ್ತಿದ್ದೇನೆ ಎಂದು ಹೇಳಿ ಮತ್ತೆ ವೋಟ್ ಕೇಳುವುದು! ಒಂದೇ ಭದ್ರತಾ ವಿಚಾರ ಇವತ್ತು ಎರಡು ವಿರುದ್ಧ ರಾಜಕೀಯ ಸಂದೇಶಗಳಿಗೆ ವೇದಿಕೆಯಾಗಿದೆ. ವಿರೋಧ ಪಕ್ಷಗಳು ವೈಫಲ್ಯಕ್ಕೆ ಉತ್ತರ ಕೇಳುತ್ತಿದ್ದರೆ, ನೆತನ್ಯಾಹು ಪಾಳಯ ತಾವು ನಡೆಸಿದ ಮಿಲಿಟರಿ ಧ್ವಂಸವನ್ನೇ ಸಾಧನೆ ಎಂದು ತೋರಿಸುತ್ತಿದೆ.

ಗಾಜಾ ಸ್ಮಶಾನವಾಗಿದೆ, ಲೆಬನಾನ್-ಇರಾನ್ ಹೊತ್ತಿ ಉರಿಯುತ್ತಿದೆ!
ಕಳೆದ 3 ವರ್ಷಗಳಲ್ಲಿ ಇಸ್ರೇಲ್ ರಾಜಕೀಯವನ್ನು ಆಳುತ್ತಿರುವುದು ಪ್ರಜಾಪ್ರಭುತ್ವದ ಮೌಲ್ಯಗಳಲ್ಲ, ಬದಲಾಗಿ ಬಾಂಬ್, ಮಿಸೈಲ್ ಮತ್ತು ಯುದ್ಧದ ಉನ್ಮಾದ! ಗಾಜಾ ಪಟ್ಟಿಯಲ್ಲಿ ನೆತನ್ಯಾಹು ಸೇನೆ ನಡೆಸಿದ ಮಿಲಿಟರಿ ದಾಳಿ ನೋಡನೋಡುತ್ತಿದ್ದಂತೆ ಒಂದು ಇಡೀ ಜನಾಂಗವನ್ನು ಗುರಿಯಾಗಿಸಿಕೊಂಡ ವಿನಾಶಕಾರಿ ಸಮರವಾಯಿತು. ಗಾಜಾದಲ್ಲಿ ಕುಡಿಯಲು ನೀರಿಲ್ಲ, ಚಿಕಿತ್ಸೆಗೆ ಆಸ್ಪತ್ರೆಗಳಿಲ್ಲ, ಮಲಗಲು ಸೂರಿಲ್ಲ-ಇಡೀ ಭೂಭಾಗವನ್ನು ಕಲ್ಲುಮಣ್ಣಿನ ರಾಶಿಯನ್ನಾಗಿ ಮಾಡಲಾಗಿದೆ. ಇಷ್ಟಾದರೂ ನೆತನ್ಯಾಹು ಯುದ್ಧ ನಿಲ್ಲಿಸಿದರಾ? ಇಲ್ಲ! ಗಾಜಾದ ಬೆಂಕಿ ಆರುವ ಮುನ್ನವೇ ಲೆಬನಾನ್ ಮೇಲೆ ಮುಗಿಬಿದ್ದರು, ಅಲ್ಲಿಂದ ಇರಾನ್ ಜೊತೆ ನೇರ ಸಂಘರ್ಷಕ್ಕೆ ಇಳಿದರು.

ಈಗ ಚುನಾವಣಾ ಕಣದಲ್ಲಿ ಈ ಯುದ್ಧವೇ ಕೇಂದ್ರಬಿಂದು ಆಗಿದೆ. ನೆತನ್ಯಾಹು ಅವರ ಬಲಪಂಥೀಯ ಮತಬ್ಯಾಂಕ್ಗೆ ಈ ಕ್ರೌರ್ಯ ಮತ್ತು ಕಠಿಣ ನಿಲುವು “ರಾಷ್ಟ್ರೀಯ ಭದ್ರತೆಗೆ ಅನಿವಾರ್ಯ” ಅಂತ ಕಾಣಿಸುತ್ತಿರಬಹುದು. ಆದರೆ ಇಸ್ರೇಲ್ನೊಳಗೇ ಇರುವ ಪ್ರಜ್ಞಾವಂತ ನಾಗರಿಕರು ಮತ್ತು ಜಗತ್ತಿನಾದ್ಯಂತ ಇರುವ ಮಾನವ ಹಕ್ಕುಗಳ ಪ್ರತಿಪಾದಕರು ಇವತ್ತು ಒಂದು ನೇರ ಪ್ರಶ್ನೆ ಕೇಳುತ್ತಿದ್ದಾರೆ-ಈ ನಿರಂತರ ಯುದ್ಧದಿಂದ ಸಾಧಿಸಿದ್ದಾದರೂ ಏನು? ಗಾಜಾದಲ್ಲಿ ನಡೆಸಿದ ಈ ಭೀಕರ ಮಾನವೀಯ ಹಾನಿ ಮತ್ತು ರಕ್ತಪಾತದಿಂದ ಇಸ್ರೇಲ್ ಜಾಗತಿಕ ಮಟ್ಟದಲ್ಲಿ ರಾಜತಾಂತ್ರಿಕವಾಗಿ ಏಕಾಂಗಿಯಾಗುತ್ತಿದೆ.

ಯುದ್ಧವನ್ನು ಯಾರು ಹೇಗೆ ನಡೆಸಿದರು ಎನ್ನುವುದು ಒಂದು ಕಡೆಯಾದರೆ, ಈ ಯುದ್ಧದ ಅಂತಿಮ ಗುರಿ ಏನು?’ಯಾವಾಗ ಶಾಂತಿ ಸ್ಥಾಪನೆಯಾಗುತ್ತದೆ? ಎಂಬ ಪ್ರಶ್ನೆಗೆ ನೆತನ್ಯಾಹು ಬಳಿ ಇವತ್ತಿಗೂ ಉತ್ತರವಿಲ್ಲ! ಯಾಕೆಂದರೆ ನೆತನ್ಯಾಹು ಅವರಿಗೆ ಶಾಂತಿ ಬೇಕಾಗಿಲ್ಲ. ಶಾಂತಿ ನೆಲೆಸಿದರೆ ಅವರ ರಾಜಕೀಯ ಅಸ್ತಿತ್ವವೇ ಅಲುಗಾಡುತ್ತದೆ. ಒಬ್ಬ ನಾಯಕ ತನ್ನ ವೈಯಕ್ತಿಕ ರಾಜಕೀಯ ಉಳಿವಿಗಾಗಿ ಸಾವಿರಾರು ಅಮಾಯಕರ ಸಾವಿಗೆ ಕಾರಣವಾಗುವ ಯುದ್ಧವನ್ನು ಎಳೆದುಕೊಂಡೇ ಹೋಗುತ್ತಾನೆ ಎಂದರೆ, ಅದು ನಾಯಕತ್ವವಲ್ಲ, ಅದು ಕ್ರೂರ ಯುದ್ಧದಾಹ! ಇವತ್ತು ಇಸ್ರೇಲ್ ಮತದಾರರ ಮುಂದೆ ಇರುವ ದೊಡ್ಡ ಪ್ರಶ್ನೆಯೇ ಇದು ನಮಗೆ ಶಾಶ್ವತ ಯುದ್ಧ ಬೇಕಾ ಅಥವಾ ಶಾಂತಿಯುತ ಭವಿಷ್ಯ ಬೇಕಾ?

ಜೈಲು ತಪ್ಪಿಸಿಕೊಳ್ಳಲು ಯುದ್ಧವೇ ಗುರಾಣಿಯೇ?
ನೆತನ್ಯಾಹು ಯಾಕೆ ಇಷ್ಟೊಂದು ಹಠಕ್ಕೆ ಬಿದ್ದು ಪ್ರಧಾನಿ ಕುರ್ಚಿಗೆ ಅಂಟಿಕೊಂಡಿದ್ದಾರೆ ಅಂತ ನಿಮಗೆ ಅನಿಸಬಹುದು. ಅದಕ್ಕೆ ಉತ್ತರ ಯುದ್ಧಭೂಮಿಯಲ್ಲಿ ಇಲ್ಲ, ಬದಲಾಗಿ ಜೆರುಸಲೇಮ್ನ ಕೋರ್ಟ್ ಹಾಲ್ನಲ್ಲಿದೆ! ಹೌದು, ಬೆಂಜಮಿನ್ 5 ನೆತನ್ಯಾಹು ನೆತನ್ಯಾಹ ಸದ್ಯ ಭ್ರಷ್ಟಾಚಾರ, ವಂಚನೆ ಮತ್ತು ನಂಬಿಕೆ ದ್ರೋಹಕ್ಕೆ ಸಂಬಂಧಿಸಿದ ಗಂಭೀರ ಕ್ರಿಮಿನಲ್ ಪ್ರಕರಣಗಳನ್ನು ಎದುರಿಸುತ್ತಿದ್ದಾರೆ. ಕೋಟ್ಯಂತರ ರೂಪಾಯಿ ಮೌಲ್ಯದ ಉಡುಗೊರೆಗಳನ್ನು ಪಡೆದ ಆರೋಪದಿಂದ ಹಿಡಿದು, ತಮ್ಮ ಪರವಾಗಿ ಸುದ್ದಿ ಪ್ರಕಟಿಸಲು ಮಾಧ್ಯಮ ಸಂಸ್ಥೆಗಳ ಜೊತೆ ಅಕ್ರಮ ಡೀಲ್ ಕುದುರಿಸಿದ ಆರೋಪಗಳವರೆಗೆ ಅವರ ಮೇಲೆ ಕೇಸ್ಗಳ ಸರಮಾಲೆಯೇ ಇದೆ. European Parliamentary Research Service (EPRS) 2026 ರ ಇಸ್ರೇಲ್ ಚುನಾವಣಾ ವಿಶ್ಲೇಷಣೆಯಲ್ಲಿ ಗುರುತಿಸಿರುವಂತೆ, ಈ ಭ್ರಷ್ಟಾಚಾರ ಪ್ರಕರಣಗಳು ನೆತನ್ಯಾಹು ಅವರ ರಾಜಕೀಯ ನಿರ್ಧಾರಗಳ ಮೇಲೆ ದೀರ್ಘಕಾಲದಿಂದ ನೇರ ಪರಿಣಾಮ ಬೀರುತ್ತಿವೆ.

ವಿರೋಧ ಪಕ್ಷಗಳು ಇವತ್ತು ಬೀದಿಗಿಳಿದು ಕೇಳುತ್ತಿರುವುದು ಇದನ್ನೇ-ಒಬ್ಬ ಸಾಮಾನ್ಯ ಪ್ರಜೆ ತಪ್ಪು ಮಾಡಿದರೆ ಕಾನೂನು ಕ್ರಮ ತೆಗೆದುಕೊಳ್ಳಲಾಗುತ್ತದೆ, ಆದರೆ ಪ್ರಧಾನಿ ಕುರ್ಚಿಯಲ್ಲಿ ಕುಳಿತಿರುವ ವ್ಯಕ್ತಿ ತನ್ನ ಅಧಿಕಾರವನ್ನು ಬಳಸಿಕೊಂಡು ನ್ಯಾಯಾಂಗ ವ್ಯವಸ್ಥೆಯನ್ನೇ ದುರ್ಬಲಗೊಳಿಸಲು ನೋ ನೋಡುತ್ತಾರಲ್ಲ, ಕಾನೂನಿನ ಮುಂದೆ ಎಲ್ಲರೂ ಸಮಾನರಲ್ಲವೇ? ಸರ್ಕಾರದ ಹೊಣೆಗಾರಿಕೆ ಮತ್ತು ರಾಜಕೀಯ ವಿಶ್ವಾಸಾರ್ಹತೆ ಎಲ್ಲಿ ಹೋಯಿತು? ನೆತನ್ಯಾಹು ಬೆಂಬಲಿಗರು ಇದನ್ನು ರಾಜಕೀಯ ಪ್ರೇರಿತ ಕೇಸ್ ಅಂತ ತಳ್ಳಿಹಾಕಲು ನೋಡುತ್ತಾರೆ. ಆದರೆ ಯುವ ಮತದಾರರು ಮತ್ತು ಪ್ರಜಾಪ್ರಭುತ್ವವಾದಿಗಳಿಗೆ ಇದು ಸ್ಪಷ್ಟವಾಗಿ ಕಾಣಿಸುತ್ತಿದೆ-ಪ್ರಧಾನಿ ಕುರ್ಚಿಯಿಂದ ಕೆಳಗಿಳಿದರೆ ಕಾನೂನು ಕುಣಿಕೆ ಬಿಗಿಯಾಗುತ್ತದೆ ಎಂಬ ಭಯವೇ ನೆತನ್ಯಾಹು ಅವರ ಪ್ರತಿಯೊಂದು ರಾಜಕೀಯ ನಡೆಯ ಹಿಂದಿರುವ ಅಸಲಿ ಇಂಧನ!

ನೆತನ್ಯಾಹು ವಿರುದ್ಧ ತೊಡೆತಟ್ಟಿರುವ ಸವಾಲುಗಾರರು ಯಾರು?
ಹಾಗಾದರೆ ಅಕ್ಟೋಬರ್ 27ರ ಈ ಚುನಾವಣೆಯಲ್ಲಿ ನೆತನ್ಯಾಹು ಅವರನ್ನು ಮಣಿಸಲು ಅಖಾಡಕ್ಕಿಳಿದಿರುವ ನಾಯಕರು ಯಾರು? ಇಲ್ಲಿ ವಿಶೇಷ ಏನಪ್ಪಾ ಅಂದ್ರೆ, ನೆತನ್ಯಾಹು ವಿರುದ್ಧ ಒಬ್ಬನೇ ಒಬ್ಬ ನಾಯಕ ನಿಂತಿಲ್ಲ; ಬದಲಾಗಿ ತೀರ ವಿಭಿನ್ನ ಸಿದ್ಧಾಂತಗಳನ್ನು ಹೊಂದಿರುವ ನಾಲ್ಕು ಪ್ರಮುಖ ಶಕ್ತಿಗಳು ತೊಡೆತಟ್ಟಿ ನಿಂತಿವೆ. ಅವರನ್ನು ಒಬ್ಬೊಬ್ಬರನ್ನಾಗಿ ನೋಡೋಣ:

1. ಗಾದಿ ಐಸೆನ್ಕೋಟ್ (ಯಾಶಾರ್ ಪಕ್ಷ – Yashar) : ಈ ಬಾರಿಯ ಚುನಾವಣಾ ಸಮೀಕ್ಷೆಗಳಲ್ಲಿ ನೆತನ್ಯಾಹು ಅವರಿಗೆ ನಡುಕ ಹುಟ್ಟಿಸಿರುವ ಪ್ರಮುಖ ಹೆಸರು ಗಾದಿ ಐಸೆನ್ಕೋಟ್! ಇವರು ಇಸ್ರೇಲ್ ಸೇನೆಯ ಮಾಜಿ ಮುಖ್ಯಸ್ಥರು. ಇವರ ‘ಯಾಶಾರ್’ ಪಕ್ಷ ಚುನಾವಣಾ ಪೂರ್ವ ಸಮೀಕ್ಷೆಗಳಲ್ಲಿ ಅತ್ಯಂತ ಪ್ರಮುಖ ಸ್ಪರ್ಧಿಯಾಗಿ ಹೊರಹೊಮ್ಮಿದೆ. ಐಸೆನ್ಕೋಟ್ ಬರೀ ರಾಜಕಾರಣಿಯಲ್ಲ; ಸ್ವತಃ ಗಾಜಾ ಯುದ್ಧದಲ್ಲಿ ತಮ್ಮ ಸ್ವಂತ ಮಗನನ್ನು ಕಳೆದುಕೊಂಡ ತಂದೆ! ನೆತನ್ಯಾಹು ಸರ್ಕಾರ ಯುದ್ಧವನ್ನು ರಾಜಕೀಯಕ್ಕೆ ಬಳಸಿಕೊಳ್ಳುತ್ತಿದ್ದರೆ, ಯುದ್ಧದ ನೋವನ್ನು ಸ್ವಂತ ಕುಟುಂಬದಲ್ಲಿ ಅನುಭವಿಸಿರುವ ಐಸೆನ್ಕೋಟ್ ಅವರು ಸೇನಾ ಅನುಭವ, ರಾಷ್ಟ್ರೀಯ ಭದ್ರತೆ ಮತ್ತು ಎಲ್ಲಕ್ಕಿಂತ ಮುಖ್ಯವಾಗಿ ಸರ್ಕಾರದ Accountabilityಯನ್ನು ಮುಂದಿಟ್ಟುಕೊಂಡು ಮತ ಕೇಳುತ್ತಿದ್ದಾರೆ. ಭದ್ರತೆಯೆ 6 ವಿಚಾರದಲ್ಲಿ ವಿಚಾ ಕಠಿಣ ನಿಲುವು ಹೊಂದಿದ್ದರೂ, ನೆತನ್ಯಾಹು ಅವರ ಸರ್ವಾಧಿಕಾರಿ ಮತ್ತು ಬೇಜವಾಬ್ದಾರಿ ಆಡಳಿತಕ್ಕೆ ಒಂದು ಗಂಭೀರ ಪರ್ಯಾಯವಾಗಿ ಇವರು ಗುರುತಿಸಿಕೊಂಡಿದ್ದಾರೆ.
2. ನಫ್ತಾಲಿ ಬೆನೆಟ್ ಮತ್ತು ಯೈರ್ ಲಾಪಿಡ್ (ಬಿಯಾಖಾದ್ ಮೈತ್ರಿ – Biyachad) : ಇನ್ನೊಂದು ಕಡೆ ಇಬ್ಬರು ಮಾಜಿ ಪ್ರಧಾನಿಗಳು ಕೈಜೋಡಿಸಿದ್ದಾರೆ! ಒಬ್ಬರು ಬಲಪಂಥೀಯ ಹಿನ್ನೆಲೆಯ ನಫ್ತಾಲಿ ಬೆನೆಟ್. ಇನ್ನೊಬ್ಬರು ಮಧ್ಯಮವಾದಿ ರಾಜಕೀಯದ ಟೈರ್ ಲಾಪಿಡ್. ಇವರಿಬ್ಬರೂ ಸೇರಿ ಕಟ್ಟಿರುವ ‘ಬಿಯಾಖಾದ್’ ಮೈತ್ರಿಯ ಏಕೈಕ ಗುರಿ-ನೆತನ್ಯಾಹು ಅವರನ್ನು ಅಧಿಕಾರದಿಂದ ಕಿತ್ತೊಗೆಯುವುದು! ಆದರೆ ಇಲ್ಲಿ ಒಂದು ದೊಡ್ಡ ಸವಾಲಿದೆ. ಬೆನೆಟ್ ಮತ್ತು ಲಾಪಿಡ್ ಇಬ್ಬರ ಸಿದ್ಧಾಂತಗಳು ಬೇರೆ ಬೇರೆ. ಚುನಾವಣೆಯಲ್ಲಿ ಸೀಟು ಗೆಲ್ಲುವುದು ಒಂದು ಭಾಗವಾದರೆ, ಭಿನ್ನಾಭಿಪ್ರಾಯಗಳನ್ನು ಬದಿಗಿಟ್ಟು 5 ವರ್ಷ ಸರ್ಕಾರ ನಡೆಸುವುದು ಇನ್ನೊಂದು ದೊಡ್ಡ ಸವಾಲು. ಯಾಕೆಂದರೆ 2021ರಲ್ಲಿ ಇದೇ ಬೆನೆಟ್ ಮತ್ತು ಲಾಪಿಡ್ ಸೇರಿ ನೆತನ್ಯಾಹು ಅವರನ್ನು ಅಧಿಕಾರದಿಂದ ಹೊರಗಿಟ್ಟು ಸರ್ಕಾರ ರಚಿಸಿದ್ದರು, ಆದರೆ ಆ ಸರ್ಕಾರ ಕೇವಲ 18 ತಿಂಗಳಲ್ಲಿ ಬಿದ್ದುಹೋಗಿತ್ತು! ಆ ಕಹಿ ಅನುಭವ ಈಗಲೂ ವಿರೋಧ ಪಕ್ಷಗಳ ಮುಂದೆ ಒಂದು ಎಚ್ಚರಿಕೆಯ ಗಂಟೆಯಾಗಿ ನಿಂತಿದೆ.
3. ಅವಿಗೋರ್ ಲೀಬರ್ಮನ್ (ಯಿಸ್ರೇಲ್ ಬೆಲ್ವೇನು – Yisrael Beiteinu) : ಅವಿಗೋರ್ ಲೀಬರ್ಮನ್ ಒಂದು ಕಾಲದಲ್ಲಿ ನೆತನ್ಯಾಹು ಅವರ ಆಪ್ತ ಮಿತ್ರನಾಗಿದ್ದವರು. ಆದರೆ ಇವತ್ತು ನೆತನ್ಯಾಹು ಅವರ ಕಟ್ಟಾ ಟೀಕಾಕಾರ! ಇವರ ಪ್ರಮುಖ ಅಜೆಂಡಾ ಏನಪ್ಪಾ ಅಂದ್ರೆ, ಅಲ್ಟಾ-ಆರ್ಥಡಾಕ್ಸ್ ಧಾರ್ಮಿಕ ಕೈ ಧಾರ್ಮಿಕ ಸಮುದಾಯಕ್ಕೆ ನೆತನ್ಯಾಹು ಸರ್ಕಾರ ನೀಡುತ್ತಿರುವ ಸೇನಾ ಸೇವೆಯ ವಿನಾಯಿತಿ ಮತ್ತು ಓಲೈಕೆ ರಾಜಕೀಯವನ್ನು ವಿರೋಧಿಸುವುದು.
4. ಹೈರ್ ಗೋಲನ್ (ಡೆಮಾಕ್ರಾಟ್ಸ್ ಪಕ್ಷ – The Democrats) : ಮಧ್ಯ-ಎಡಪಂಥೀಯ ರಾಜಕೀಯವನ್ನು ಪ್ರತಿನಿಧಿಸುತ್ತಿರುವ ಯ್ಯರ್ ಗೋಲನ್ ಅವರ ‘ಡೆಮಾಕ್ರಾಟ್ಸ್’ ಪಕ್ಷವು ಈ ಚುನಾವಣೆಯಲ್ಲಿ ಅತ್ಯಂತ ಮಹತ್ವದ ಧ್ವನಿಯಾಗಿದೆ. ಇಡೀ ಇಸ್ರೇಲ್ ಬಲಪಂಥೀಯ ಯುದ್ಧೋನ್ಮಾದದಲ್ಲಿ ಮುಳುಗಿರುವಾಗ, ಮೈರ್ ಗೋಲನ್ ಅವರು ಪ್ಯಾಲೆಸ್ತೀನ್ ಪ್ರಶ್ನೆಗೆ ರಾಜಕೀಯ ಪರಿಹಾರ, ನಾಗರಿಕ ಹಕ್ಕುಗಳ ರಕ್ಷಣೆ ಮತ್ತು ನೆತನ್ಯಾಹು ಹಾಳುಗೆಡವಿರುವ ಇಸ್ರೇಲ್ನ ಪ್ರಜಾಪ್ರಭುತ್ವ ಸಂಸ್ಥೆಗಳನ್ನು ಉಳಿಸುವ ವಿಚಾರಗಳಿಗೆ ಒತ್ತು ನೀಡುತ್ತಿದ್ದಾರೆ.

ಇಟಮಾರ್ ಬೆನ್-ಗ್ವಿರ್ ಎಂಬ ಉಗ್ರ ಬಲಪಂಥೀಯ ಭೂತ!
ಈ ಚುನಾವಣೆಯ ಅತ್ಯಂತ ಅಪಾಯಕಾರಿ ಮತ್ತು ಆತಂಕಕಾರಿ ಬೆಳವಣಿಗೆ ಏನು ಗೊತ್ತಾ? ಅದು ಉಗ್ರ ಬಲಪಂಥೀಯ ನಾಯಕ ಇಟಮಾರ್ ಬೆನ್-ಗ್ವಿರ್ (Itamar Ben-Gvir) ನೇತೃತ್ವದ ‘ಒಟ್ನಾಯೆಹುದಿತ್’ (Otzma Yehudit) ಪಕ್ಷದ ಗ್ರಾಫ್ ಮೇಲೇರುತ್ತಿರುವುದು! ಅಕ್ಟೋಬರ್ 20ರಂದು ಪ್ರಕಟವಾದ Reuters ವರದಿಯ ಪ್ರಕಾರ, ಬೆನ್-ಗ್ವಿರ್ ಅವರ ಪಕ್ಷವು ಈ ಚುನಾವಣೆಯಲ್ಲಿ 8 ಅಥವಾ ಅದಕ್ಕಿಂತ ಹೆಚ್ಚು ಸ್ಥಾನಗಳನ್ನು ಗೆಲ್ಲುವ ಅಂದಾಜಿದೆ. ಇನ್ನೂ ಆಘಾತಕಾರಿ ಸಂಗತಿ ಏನೆಂದರೆ, ಇಸ್ರೇಲ್ನ ಯುವ ಮತದಾರರು ಮತ್ತು ನಗರ ಪ್ರದೇಶದ ಕೆಲವು ಮತದಾರರಲ್ಲಿ ಈ ಉಗ್ರ ಬಲಪಂಥೀಯ ಪಕ್ಷಕ್ಕೆ ಬೆಂಬಲ ಹೆಚ್ಚುತ್ತಿದೆ!

ಯಾರು ಈ ಬೆನ್-ಗ್ವಿರ್? ಪ್ಯಾಲೆಸ್ತೀನಿಯರ ವಿರುದ್ಧ ಅತ್ಯಂತ ಕ್ರೂರ ಮತ್ತು ಕಠಿಣ ಕ್ರಮಗಳನ್ನು ತೆಗೆದುಕೊಳ್ಳಬೇಕು, ಗಾಜಾವನ್ನು ಸಂಪೂರ್ಣವಾಗಿ ವಶಪಡಿಸಿಕೊಳ್ಳಬೇಕು ಎಂದು ಬಹಿರಂಗವಾಗಿಯೇ ಪ್ರಚೋದನಾಕಾರಿ ಹೇಳಿಕೆಗಳನ್ನು ಕೊಡುವ ವ್ಯಕ್ತಿ. ಇವರ ಜನಾಂಗೀಯ ದ್ವೇಷದ ಹೇಳಿಕೆಗಳು ಇಡೀ ಪ್ರಪಂಚದಾದ್ಯಂತ ತೀವ್ರ ಟೀಕೆಗೆ ಗುರಿಯಾಗಿವೆ. ನೆತನ್ಯಾಹು ತಮ್ಮ ಹಿಂದಿನ ಸರ್ಕಾರವನ್ನು ಉಳಿಸಿಕೊಳ್ಳಲು ಇಂತಹ ಉಗ್ರಗಾಮಿ ಚಿಂತನೆಯ ವ್ಯಕ್ತಿಯನ್ನು ರಾಷ್ಟ್ರೀಯ ಭದ್ರತಾ ಸಚಿವನನ್ನಾಗಿ ಮಾಡಿದ್ದರು!

ಆದರೆ ಈಗ ಚುನಾವಣಾ ಗಣಿತದಲ್ಲಿ ನೆತನ್ಯಾಹು ಅವರಿಗೆ ಇದೇ ಬೆನ್-ಗ್ವಿರ್ ನುಂಗಲಾರದ ಬಿಸಿ ತುಪ್ಪವಾಗಿದ್ದಾರೆ. ಹೇಗೆ ಅಂತೀರಾ? ಒಂದು ಕಡೆ ಬೆನ್-ಗ್ವಿರ್ ಪಕ್ಷ 8 ಅಥವಾ ಅದಕ್ಕಿಂತ ಹೆಚ್ಚು ಸೀಟು ಗೆದ್ದರೆ, ನೆತನ್ಯಾಹುಗೆ 61ರ ಮ್ಯಾಜಿಕ್ ನಂಬರ್ ತಲುಪಲು ಇವರ ಬೆಂಬಲ ಅನಿವಾರ್ಯವಾಗುತ್ತದೆ. ಆದರೆ ಇನ್ನೊಂದು ಕಡೆ, ಬೆನ್-ಗ್ವಿರ್ ಅವರಂತಹ ಅತಿರೇಕದ ವ್ಯಕ್ತಿಯನ್ನು ಮೈತ್ರಿಕೂಟದಲ್ಲಿ ಇಟ್ಟುಕೊಂಡರೆ, ಯಾವುದೇ ಮಧ್ಯಮವಾದಿ ಪಕ್ಷಗಳು ನೆತನ್ಯಾಹು ಹತ್ತಿರಕ್ಕೂ ಸುಳಿಯುವುದಿಲ್ಲ! ಅಂದರೆ ಬೆನ್-ಗೈರ್ ಬೆಳೆದಷ್ಟೂ ನೆತನ್ಯಾಹು ರಾಜಕೀಯವಾಗಿ ಅವರ ಕೈಗೊಂಬೆಯಾಗಬೇಕಾಗುತ್ತದೆ ಮತ್ತು ಇತರ ಪಕ್ಷಗ ಜೊತೆ ಮೈತ್ರಿ ಮಾಡಿಕೊಳ್ಳುವ ದಾರಿ ಶಾಶ್ವತವಾಗಿ ಮುಚ್ಚಿಹೋಗುತ್ತದೆ. ತಾವೇ ಪೋಷಿಸಿದ ಉಗ್ರ™ ಬಲಪಂಥೀಯ ರಾಜಕೀಯ ಇವತ್ತು ನೆತನ್ಯಾಹು ಅವರ ಕುತ್ತಿಗೆಗೇ ಸುತ್ತಿಕೊಳ್ಳುತ್ತಿದೆ!

ನೆತನ್ಯಾಹು ಅವರ ರಾಜಕೀಯ ಬೂಟಾಟಿಕೆಯನ್ನು ಬಯಲು ಮಾಡುವ ಮತ್ತೊಂದು ದೊಡ್ಡ ವಿಚಾರ ಅಂದರೆ ‘ಹರೇದಿ’ ಅಥವಾ ಅಲ್ಟಾ-ಆರ್ಥಡಾಕ್ಸ್ ಯಹೂದಿ ಸಮುದಾಯದ ಸೇನಾ ಸೇವೆಯ ವಿನಾಯಿತಿ! ಇಸ್ರೇಲ್ ರಾಜಕೀಯದಲ್ಲಿ ‘ಶಾಸ್’ ಮತ್ತು ‘ಯುನೈಟೆಡ್ ತೋರಾ ಜುದಾಯಿಸಂ’ ಎಂಬ ಎರಡು ಧಾರ್ಮಿಕ ಪಕ್ಷಗಳು ಬಹಳ ಪ್ರಭಾವಶಾಲಿಯಾಗಿವೆ. ನೆತನ್ಯಾಹು ತಮ್ಮ ಸರ್ಕಾರವನ್ನು ಉಳಿಸಿಕೊಳ್ಳಲು ಯಾವಾಗಲೂ ಈ ಎರಡು ಪಕ್ಷಗಳ ಬೆಂಬಲದ ಮೇಲೆ ಅವಲಂಬಿತರಾಗಿರುತ್ತಾರೆ.

ಆದರೆ ಈಗ ಏನಾಗಿದೆ ನೋಡಿ-ಇಸ್ರೇಲ್ನಲ್ಲಿ ಪ್ರತಿಯೊಬ್ಬ ನಾಗರಿಕನಿಗೂ ಸೇನಾ ಸೇವೆ ಕಡ್ಡಾಯ. ಕಳೆದ 3 ವರ್ಷಗಳಿಂದ ನೆತನ್ಯಾಹು ನಡೆಸುತ್ತಿರುವ ಗಾಜಾ, ಲೆಬನಾನ್ ಮತ್ತು ಇರಾನ್ ಯುದ್ಧಗಳಿಗಾಗಿ ದೇಶದ ಸಾಮಾನ್ಯ ಯುವಕರು, ವಿದ್ಯಾರ್ಥಿಗಳು, ಐಟಿ ಉದ್ಯೋಗಿಗಳು ಮತ್ತು ಮೀಸಲು ಸೇನಾ ಸಿಬ್ಬಂದಿ ತಮ್ಮ ಕೆಲಸ, ಕುಟುಂಬ ಎಲ್ಲವನ್ನೂ ಬಿಟ್ಟು ತಿಂಗಳುಗಟ್ಟಲೆ ಯುದ್ಧಭೂಮಿಯಲ್ಲಿ ಪ್ರಾಣ ಪಣಕ್ಕಿಟ್ಟು ಹೋರಾಡುತ್ತಿದ್ದಾರೆ. ಆದರೆ ಇದೇ ಸಮಯದಲ್ಲಿ, ಧಾರ್ಮಿಕ ಅಧ್ಯಯನ ಮಾಡುತ್ತಿದ್ದಾರೆ ಎಂಬ ಒಂದೇ ಕಾರಣಕ್ಕೆ ಅಲ್ಟಾ-ಆರ್ಥಡಾಕ್ಸ್ ಸಮುದಾಯದ ಯುವಕರಿಗೆ ಸೇನೆಗೆ ಸೇರುವುದರಿಂದ ವಿನಾಯಿತಿ ನೀಡಲಾಗಿದೆ!

ಇದು ಇಸ್ರೇಲ್ ಸಮಾಜದಲ್ಲಿ ಆಕ್ರೋಶದ ಜ್ವಾಲಾಮುಖಿಯನ್ನೇ ಸ್ಫೋಟಿಸಿದೆ. “ನೆತನ್ಯಾಹು ಅವರ ಯುದ್ಧಗಳಲ್ಲಿ ಸಾಯಲು ನಮ್ಮ ಮಕ್ಕಳು ಬೇಕು, ಆದರೆ ಅವರ ಸರ್ಕಾರಕ್ಕೆ ವೋಟ್ ಹಾಕುವ ಧಾರ್ಮಿಕ ಪಕ್ಷಗಳ ಮಕ್ಕಳಿಗೆ ಮಾತ್ರ ಎಸಿ ರೂಮಿನಲ್ಲಿ ಕುಳಿತು ಧರ್ಮಗ್ರಂಥ ಓದಲು ವಿನಾಯಿತಿಯೇ? ಇದೆಂಥಾ ನ್ಯಾಯ?” ಎಂದು ಸಾಮಾನ್ಯ ಜನ ಮತ್ತು ಸೈನಿಕರ ಕುಟುಂಬಗಳು ಪ್ರಶ್ನಿಸುತ್ತಿವೆ. ಅಕ್ಟೋಬರ್ 14ರಂದು ಪ್ರಕಟವಾದ Israel Democracy Institute (IDI) ಸಮೀಕ್ಷೆಯು ಒಂದು ಸ್ಪಷ್ಟ ಸಂದೇಶ ನೀಡಿದೆ-ಅಲ್ಟಾ-ಆರ್ಥಡಾಕ್ಸ್ ಪುರುಷರಿಗೂ ಸೇನಾ ಸೇವೆಯನ್ನು ಕಡ್ಡಾಯಗೊಳಿಸುವ ಕಾನೂನು ತರಬೇಕು ಎಂಬುದಕ್ಕೆ ಇಸ್ರೇಲ್ನಲ್ಲಿ ಭಾರೀ ಸಾರ್ವಜನಿಕ ಬೆಂಬಲ ವ್ಯಕ್ತವಾಗಿದೆ.

ಈಗ ನೆತನ್ಯಾಹು ಇಬ್ಬಂದಿ ಸ್ಥಿತಿಯಲ್ಲಿ ಸಿಲುಕಿದ್ದಾರೆ. ಒಂದು ವೇಳೆ ಶಾಸ್ ಮತ್ತು ಯುನೈಟೆಡ್ ತೋರಾ ಜುದಾಯಿಸಂ ಪಕ್ಷಗಳ ಬೆಂಬಲ ಉಳಿಸಿಕೊಳ್ಳಲು ಸೇನಾ ವಿನಾಯಿತಿ ಮುಂದುವರಿಸಿದರೆ, ಸಾಮಾನ್ಯ ಮತದಾರರು ಮತ್ತು ಮೀಸಲು ಸೈನಿಕರು ಲಿಕುಡ್ ಪಕ್ಷಕ್ಕೆ ತಕ್ಕ ಪಾಠ ಕಲಿಸುತ್ತಾರೆ. ಒಂದು ವೇಳೆ ಸೇನಾ ಸೇವೆ ಕಡ್ಡಾಯ ಮಾಡಿದರೆ, ಧಾರ್ಮಿಕ ಪಕ್ಷಗಳು ನೆತನ್ಯಾಹು ಸರ್ಕಾರಕ್ಕೆ ನೀಡುವ ಬೆಂಬಲ ವಾಪಸ್ ಪಡೆಯುತ್ತವೆ! ಕುರ್ಚಿಗಾಗಿ ಮಾಡಿದ ಓಲೈಕೆ ರಾಜಕೀಯ ಇವತ್ತು ನೆತನ್ಯಾಹು ಅವರಿಗೆ ಮುಳುವಾಗಿದೆ.

ಟ್ರಂಪ್ ಕಾರ್ಡ್ ವರ್ಕ್ ಆಗುತ್ತಾ?
ದೇಶದೊಳಗೆ ಇಷ್ಟೆಲ್ಲಾ ವಿರೋಧ ಎದುರಿಸುತ್ತಿರುವ ನೆತನ್ಯಾಹು ಅವರಿಗೆ ಈಗ ಉಳಿದಿರುವ ದೊಡ್ಡ ಟ್ರಂಪ್ ಕಾರ್ಡ್ ಅಂದರೆ ಸಾಕ್ಷಾತ್ ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್! ಹೌದು, ಚುನಾವಣೆಗೆ ಸರಿಯಾಗಿ 9 ದಿನಗಳಿರುವಾಗ, ಅಂದರೆ ಅಕ್ಟೋಬರ್ 18ರಂದು ಡೊನಾಲ್ಡ್ ಟ್ರಂಪ್ ಬಹಿರಂಗವಾಗಿಯೇ ನೆತನ್ಯಾಹು ಅವರಿಗೆ ತಮ್ಮ ಬೆಂಬಲ ಘೋಷಿಸಿದ್ದಾರೆ. ನೆತನ್ಯಾಹು ಅವರ ನಾಯಕತ್ವವನ್ನು ಹಾಡಿ ಹೊಗಳಿರುವ ಟ್ರಂಪ್, ಇಸ್ರೇಲ್ ಜನತೆ ಅವರನ್ನು ಮತ್ತೆ ಪ್ರಧಾನಿಯಾಗಿ ಆಯ್ಕೆ ಮಾಡಬೇಕು ಎಂದು ಕರೆ ಕೊಟ್ಟಿದ್ದಾರೆ.

ಅಮೆರಿಕದಿಂದ ಶಸ್ತ್ರಾಸ್ತ್ರ ಆರ್ಥಿಕ ನೆರವು ಮತ್ತು ರಾಜತಾಂತ್ರಿಕ ರಕ್ಷಣೆ ಪಡೆಯುವ ಇಸ್ರೇಲ್ನಲ್ಲಿ ಅಮೆರಿಕದ ಅಧ್ಯಕ್ಷರ ಮಾತಿಗೆ ತೂಕ ಇರುತ್ತದೆ ನಿಜ. ನೆತನ್ಯಾಹು ಕೂಡ ಇದನ್ನು ತಮ್ಮ ನಾಯಕತ್ವಕ್ಕೆ ಸಿಕ್ಕಿರುವ ಅಂತರರಾಷ್ಟ್ರೀಯ ಸರ್ಟಿಫಿಕೇಟ್ ಎಂಬಂತೆ ಬಿಂಬಿಸಿಕೊಳ್ಳುತ್ತಿದ್ದಾರೆ. ಆದರೆ ಪ್ರಶ್ನೆ ಏನಪ್ಪಾ ಅಂದ್ರೆ-ಟ್ರಂಪ್ ಹೇಳಿದರು ಅಂತ ಇಸ್ರೇಲ್ ಜನ ಕಣ್ಣು ಮುಚ್ಚಿಕೊಂಡು ನೆತನ್ಯಾಹುಗೆ ವೋಟ್ ಹಾಕುತ್ತಾರಾ? ಖಂಡಿತ ಇಲ್ಲ! ಅದಕ್ಕೆ ಪ್ರಮುಖವಾಗಿ 3 ಕಾರಣಗಳಿವೆ:

1. ಇಸ್ರೇಲಿ ಮತದಾರರ ಆದ್ಯತೆಗಳು : ವಾಷಿಂಗ್ಟನ್ನಲ್ಲಿ ಕುಳಿತಿರುವ ಟ್ರಂಪ್ ಹೇಳಿಕೆಗಿಂತ, ತಮ್ಮ ದೇಶದೊಳಗಿನ ಭದ್ರತಾ ವೈಫಲ್ಯ, ಮುಗಿಯದ ಯುದ್ಧದ ನೋವು, ಗಗನಕ್ಕೇರಿರುವ ಜೀವನ ವೆಚ್ಚ ಮತ್ತು ಸರ್ಕಾರದ ಭ್ರಷ್ಟಾಚಾರವೇ ಮತದಾರರಿಗೆ ಮುಖ್ಯವಾಗಿದೆ.
2. ಇರಾನ್ ಯುದ್ಧದ ವಿಚಾರದಲ್ಲಿನ ಭಿನ್ನಾಭಿಪ್ರಾಯ : ಇರಾನ್ ವಿರುದ್ಧದ ಯುದ್ಧದಲ್ಲಿ ಅಮೆರಿಕ-ಇಸ್ರೇಲ್ ಸಂಬಂಧ ಹೇಗಿರಬೇಕು ಮತ್ತು ಆ ಯುದ್ದದಿಂದ ಇಸ್ರೇಲ್ ಅನುಭವಿಸುತ್ತಿರುವ ನಷ್ಟವೇನು ಎಂಬ ಬಗ್ಗೆ ಸಾರ್ವಜನಿಕ ವಲಯದಲ್ಲಿ ತೀವ್ರ ಚರ್ಚೆಗಳಿವೆ.
3. ಬೆಂಬಲ ಘೋಷಣೆಯಾದ ಸಮಯ : ಮತದಾನಕ್ಕೆ ಕೇವಲ 9 ದಿನ ಇರುವಾಗ ಬಂದಿರುವ ಈ ಬೆಂಬಲವು ಈಗಾಗಲೇ ತಮ್ಮ ನಿರ್ಧಾರ ಮಾಡಿಕೊಂಡಿರುವ ಮತದಾರರ ಮನಸ್ಸನ್ನು ಬದಲಾಯಿಸುವುದು ಅನುಮಾನ.

Reuters ವರದಿಯಲ್ಲಿ ರಾಜಕೀಯ ವಿಶ್ಲೇಷಕರು ಹೇಳಿರುವಂತೆ, ಟ್ರಂಪ್ ಅವರ ಈ ಮಾತು ನೆತನ್ಯಾಹು ಅವರಿಂದ ದೂರ ಸರಿದಿದ್ದ ಕೆಲವು ಸಾಂಪ್ರದಾಯಿಕ ಬಲಪಂಥೀಯ ಮತದಾರರನ್ನು ಮತ್ತೆ ಒಗ್ಗೂಡಿಸಲು ಸ್ವಲ್ಪ ಮಟ್ಟಿಗೆ ಸಹಾಯ ಮಾಡಬಹುದೇ ಹೊರತು, ಇಡೀ ಚುನಾವಣೆಯ ದಿಕ್ಕನ್ನೇ ಬದಲಾಯಿಸುವ ಮ್ಯಾಜಿಕ್ ಮಾದ ಜಿಕ್ ಮಾಡುವುದಿಲ್ಲ!

70% ಸಾಲದ ಸುಳಿಯಲ್ಲಿ ಇಸ್ರೇಲ್!
ಯುದ್ಧ ಅಂದರೆ ಬರೀ ಗಡಿಯಲ್ಲಿ ಸಿಡಿಯುವ ಬಾಂಬ್ ಮಾತ್ರವಲ್ಲ ಗೆಳೆಯರೇ, ಅದು ದೇಶದೊಳಗಿನ ಜನಸಾಮಾನ್ಯರ ಜೇಬಿಗೆ ಬೀಳುವ ಕತ್ತರಿ ಕೂಡ ಹೌದು! ನೆತನ್ಯಾಹು ಅವರ ಯುದ್ಧದಾಹ ಇಸ್ರೇಲ್ ಆರ್ಥಿಕತೆಯನ್ನು ಎಂತಹ ಪಾತಾಳಕ್ಕೆ ತಳ್ಳಿದೆ ಎನ್ನುವುದನ್ನು ಅಕ್ಟೋಬರ್ 20ರ Reuters Breakingviews ವಿಶ್ಲೇಷಣೆ ಅಂಕಿಅಂಶಗಳ ಸಮೇತ ಬಿಚ್ಚಿಟ್ಟಿದೆ. ಮೇಲ್ನೋಟಕ್ಕೆ ನೋಡಿದರೆ, ಯುದ್ಧಗಳ ನಡುವೆಯೂ 2025ರಲ್ಲಿ ಇಸ್ರೇಲ್ ಆರ್ಥಿಕತೆ ಸ್ವಲ್ಪ ಬೆಳವಣಿಗೆ ದಾಖಲಿಸಿತ್ತು ಅಂತ ನೆತನ್ಯಾಹು ಬೆಂಬಲಿಗರು ಬಡಾಯಿ ಕೊಚ್ಚಿಕೊಳ್ಳಬಹುದು. ಆದರೆ ಅದರ ಒಳಗಿರುವ ಭಯಾನಕ ಸತ್ಯ ಏನು ಗೊತ್ತಾ? ನಿರಂತರ ಯುದ್ದಕ್ಕಾಗಿ ಶಸ್ತ್ರಾಸ್ತ್ರ ಖರೀದಿ ಮತ್ತು ಮಿಲಿಟರಿ ಕಾರ್ಯಾಚರಣೆಗಳಿಗೆ ಹಣ ಸುರಿದ ಪರಿಣಾಮವಾಗಿ, ಇಸ್ರೇಲ್‌ನ ” ರಾಷ್ಟ್ರೀಯ ಸಾಲವು ದೇಶದ ಒಟ್ಟು ದೇಶೀಯ ಉತ್ಪನ್ನದ (GDP) ಬರೋಬ್ಬರಿ 70%ಕ್ಕೆ ಏರಿಕೆಯಾಗಿದೆ! ಅಷ್ಟೇ ಅಲ್ಲ, ಸರ್ಕಾರದ ವಿತ್ತೀಯ ಕೊರತೆ (Fiscal Deficit) ಸುಮಾರು 5%ರ ಮಟ್ಟಕ್ಕೆ ತಲುಪಿದೆ!

ಇದರ ಅರ್ಥ ತುಂಬಾ ಸಿಂಪಲ್-ಸರ್ಕಾರದ ಖಜಾನೆ ಖಾಲಿಯಾಗುತ್ತಿದೆ ಮತ್ತು ಸಾಲದ ಹೊರೆ ಬೆಟ್ಟದಷ್ಟಾಗಿದೆ. ಅಕ್ಟೋಬರ್ 27ರ ನಂತರ ಯಾರೇ ಸರ್ಕಾರ ರಚಿಸಿದರೂ ಅವರ ಮುಂದೆ ಇರುವ ದೊಡ್ಡ ಪ್ರಶ್ನೆ-ಈ ಯುದ್ಧದ ಸಾಲವನ್ನು ತೀರಿಸುವುದು ಹೇಗೆ? ಜನರ ಮೇಲೆ ಇನ್ನಷ್ಟು ತೆರಿಗೆ ಹೇರಬೇಕಾ? ಅಥವಾ ಇನ್ನೂ ಸಾಲ ಮಾಡಬೇಕಾ? ಇಲ್ಲವೇ ಶಿಕ್ಷಣ, ಆರೋಗ್ಯದಂತಹ ಸಾರ್ವಜನಿಕ ವೆಚ್ಚಗಳನ್ನು ಕಡಿತಗೊಳಿಸಬೇಕಾ? ನೆತನ್ಯಾಹು ಅವರ ಯುದ್ಧದ ರಾಜಕೀಯಕ್ಕೆ ಇವತ್ತು ಇಸ್ರೇಲ್‌ನ ಪ್ರತಿಯೊಬ್ಬ ಪ್ರಜೆಯೂ ತನ್ನ ದುಡಿಮೆಯ ದುಡಿಮೆಯ ಹಣದಿಂದ ಬೆಲೆ ತೆರುತ್ತಿದ್ದಾನೆ!

ಕಿಂಗ್‌ಮೇಕ‌ರ್ ಸ್ಥಾನದಲ್ಲಿ ಅರಬ್ ಪಕ್ಷಗಳು!
ನಾವು ಮೊದಲೇ ನೋಡಿದಂತೆ ನೆತನ್ಯಾಹು ಬಣಕ್ಕೆ 49-54 ಸೀಟು, ವಿರೋಧ ಪಕ್ಷಗಳ ಬಣಕ್ಕೆ 50-52 ಸೀಟು ಬರುವ ಅಂದಾಜಿದೆ. ಹಾಗಾದರೆ ಉಳಿದ 13-14 ಸೀಟುಗಳು ಯಾರ ಬಳಿ ಇವೆ? ಅವು ಇಸ್ರೇಲ್‌ನ ಅರಬ್ ನಾಗರಿಕರನ್ನು ಪ್ರತಿನಿಧಿಸುವ ಅರಬ್ ಪಕ್ಷಗಳ ಕೈಯಲ್ಲಿವೆ! ಸಂಖ್ಯಾಬಲದ ದೃಷ್ಟಿಯಿಂದ ನೋಡಿದರೆ, ಈ 13-14 ಸ್ಥಾನಗಳು ಯಾರ ಕಡೆ ವಾಲುತ್ತವೆಯೋ ಅವರು ಆರಾಮಾಗಿ 61ರ ಮ್ಯಾಜಿಕ್ ನಂಬ‌ರ್ ದಾಟಿ ಸರ್ಕಾರ ರಚಿಸಬಹುದು.

ಪೇಪರ್ ಮೇಲೆ ಕೂಡಿ ಕಳೆಯುವ ಗಣಿತದಷ್ಟು ಸುಲಭವಲ್ಲ ಇಸ್ರೇಲ್ ರಾಜಕೀಯ! ಯಾಕೆಂದರೆ ನೆತನ್ಯಾಹು ಬಣವಂತೂ ಅರಬ್ ಪಕ್ಷಗಳನ್ನು ಹತ್ತಿರಕ್ಕೂ ಸೇರಿಸುವುದಿಲ್ಲ. ಇತ್ತ ಪ್ರಮುಖ ಯಹೂದಿ ವಿರೋಧ ಪಕ್ಷಗಳಲ್ಲಿಯೂ ಕೆಲವು ನಾಯಕರು ಅರಬ್ ಪಕ್ಷಗಳ ಜೊತೆ ಸೇರಿ ಸರ್ಕಾರ ರಚಿಸಲು ಹಿಂಜರಿಯುತ್ತಾರೆ. ಇನ್ನೊಂದು ಕಡೆ, ಸ್ವತಃ ಅರಬ್ ಪಕ್ಷಗಳಿಗೂ ಗಾಜಾ ಮೇಲಿನ ಮಿಲಿಟರಿ ದಾಳಿಯನ್ನು ನಿಲ್ಲಿಸುವುದು, ಪ್ಯಾಲೆಸ್ತೀನಿಯರ ಹಕ್ಕುಗಳನ್ನು ರಕ್ಷಿಸ ರಕ್ಷಿಸುವುದು ಮತ್ತು ಇಸ್ರೇ ಇಸ್ರೇಲ್‌ನೊಳಗೆ ಅರಬ್ ನಾಗರಿಕರಿಗೆ ಸಮಾನತೆ ತರುವುದು ಮೊದಲ ಆದ್ಯತೆಯಾಗಿದೆ. ಗಾಜಾವನ್ನು ಧ್ವಂಸ ಮಾಡಿದ ನಾಯಕರ ಜೊತೆ ಅವರು ಹೇಗೆ ತಾನೇ ಕೈಜೋಡಿಸಲು ಸಾಧ್ಯ? ಹೀಗಾಗಿ ಅರಬ್ ಪಕ್ಷಗಳು ಸರ್ಕಾರಕ್ಕೆ ಹೊರಗಿನಿಂದ ಬೆಂಬಲ ಕೊಡುತ್ತವೆಯೇ ಅಥವಾ ವಿರೋಧ ಪಕ್ಷಗಳ ಜೊತೆ ಕನಿಷ್ಠ ಸಾಮಾನ್ಯ ಕಾರ್ಯಕ್ರಮದ ಒಪ್ಪಂದ ಮಾಡಿಕೊಳ್ಳುತ್ತವೆಯೇ ಎನ್ನುವುದೇ ಮಿಲಿಯನ್ ಡಾಲ‌ರ್ ಪ್ರಶ್ನೆ!

ಅಕ್ಟೋಬ‌ರ್ 21ರ ವೇಳೆಗೆ ನಮ್ಮ ಮುಂದಿರುವ ಸಮೀಕ್ಷೆಗಳು ಹೇಳುತ್ತಿರುವುದು ಒಂದೇ ಮಾತು-ಬೆಂಜಮಿನ್ ನೆತನ್ಯಾಹು ಅವರ ರಾಜಕೀಯ ಭವಿಷ್ಯ ಕೇವಲ ಮತಪೆಟ್ಟಿಗೆಯಲ್ಲಿ ಇಲ್ಲ, ಬದಲಾಗಿ ಚುನಾವಣೆಯ ನಂತರ ನಡೆಯುವ ಮೈತ್ರಿ ರಾಜಕೀಯದಲ್ಲಿದೆ. ಲಿದೆ. ಡೊನಾಲ್ಡ್ ಟ್ರಂಪ್ ಅವರ ಅವರ ಬೆಂಬಲ ಇರಬಹುದು ಅಥವಾ ಯುದ್ಧದ ಅಬ್ಬರ ಇರಬಹುದು, ಅವು ಯಾವುವೂ ಗಾಜಾದಲ್ಲಿ ಹರಿದ ಅಮಾಯಕರ ರಕ್ತವನ್ನಾಗಲೀ, ಇಸ್ರೇಲ್ ಎದುರಿಸುತ್ತಿರುವ ಆರ್ಥಿಕ ಮತ್ತು ನೈತಿಕ ಕುಸಿತವನ್ನಾಗಲೀ ಮರೆಮಾಚಲು ಸಾಧ್ಯವಿಲ್ಲ. ಅಕ್ಟೋಬರ್ 27ರ ಚುನಾವಣೆಯ ಫಲಿತಾಂಶ ಕೇವಲ ಇಸ್ರೇಲ್‌ಗೆ ಮಾತ್ರವಲ್ಲ, ಇಡೀ ಮಧ್ಯಪ್ರಾಚ್ಯದ ಶಾಂತಿ, ಪ್ಯಾಲೆಸ್ತೀನ್ ಜನರ ಬದುಕು ಮತ್ತು ಜಾಗತಿಕ ರಾಜಕೀಯದ ದಿಕ್ಕನ್ನು ನಿರ್ಧರಿಸಲಿದೆ. ಯುದ್ಧದಾಹ ಸೋತು ಶಾಂತಿ ಮತ್ತು ಮಾನವೀಯತೆ ಗೆಲ್ಲುತ್ತದೆಯೇ ಎನ್ನುವುದನ್ನು ಕಾದು ನೋಡಬೇಕಿದೆ.

ಸಾಮಾಜಿಕ ಜಾಲತಾಣ ಎಕ್ಸ್‌ನಲ್ಲಿ ಪ್ರತಿಕ್ರಿಯಿಸಿರುವ ಜೈರಾಮ್ ರಮೇಶ್, ತಮ್ಮನ್ನು ‘ವಿಶ್ವಗುರು’ ಎಂದು ಬಿಂಬಿಸಿಕೊಳ್ಳುವ ಪ್ರಧಾನಿ ಚೀನಾಕ್ಕೆ ಉದ್ದೇಶಪೂರ್ವಕವಾಗಿ ರಿಯಾಯಿತಿಗಳನ್ನು ನೀಡುತ್ತಿದ್ದಾರೆ ಎಂದು ಟೀಕಿಸಿದ್ದಾರೆ. ಚೀನಾದ ಪೀಪಲ್ಸ್ ಲಿಬರೇಷನ್ ಆರ್ಮಿ (ಪಿಎಲ್‌ಎ) ಜೊತೆಗಿನ ಇತ್ತೀಚಿನ ಮುಖಾಮುಖಿ ಸಂದರ್ಭದಲ್ಲಿ ಭಾರತೀಯ ಪಡೆಗಳು ತೋರಿದ ಕಾರ್ಯಕ್ಷಮತೆಯನ್ನು ಐಟಿಬಿಪಿ ಮುಖ್ಯಸ್ಥರು ಶ್ಲಾಘಿಸಿರುವುದನ್ನು ಅವರು ಉಲ್ಲೇಖಿಸಿದ್ದಾರೆ. ಆದರೆ, ಈ ಬೆಳವಣಿಗೆಗಳ ಕುರಿತು ಪ್ರಧಾನಿ ಅಥವಾ ಸರ್ಕಾರದಿಂದ ಯಾವುದೇ ಸ್ಪಷ್ಟ ಪ್ರತಿಕ್ರಿಯೆ ಬಂದಿಲ್ಲ ಎಂದು ಪ್ರಶ್ನಿಸಿದ್ದಾರೆ.

ಜೈರಾಮ್ ರಮೇಶ್ ಅವರ ಪ್ರಕಾರ, ಅರುಣಾಚಲ ಪ್ರದೇಶದ ತವಾಂಗ್‌ನಿಂದ ದೂರದಲ್ಲಿರುವ ತಕ್ಸಿಂಗ್ ಪ್ರದೇಶದಲ್ಲಿ ಮುಖಾಮುಖಿ ಪರಿಸ್ಥಿತಿ ಉಂಟಾದ ಬಳಿಕ ಕಳೆದ ತಿಂಗಳು ವಾಚಾ ಮತ್ತು ದಮೈ ಪ್ರದೇಶಗಳಲ್ಲಿ ಕೋರ್ ಕಮಾಂಡರ್ ಮಟ್ಟದ ಮಾತುಕತೆ ನಡೆದಿತ್ತು. ಭಾರತೀಯ ಸೈನಿಕರು ಗಸ್ತು ತಿರುಗುತ್ತಿದ್ದ ಕೆಲವು ಸ್ಥಳಗಳ ಮೇಲಿನ ಹಿಡಿತ ಮತ್ತೆ ತಪ್ಪಿದೆ ಎಂದು ಸ್ಥಳೀಯರು ತಿಳಿಸಿರುವುದಾಗಿ ಅವರು ಹೇಳಿದ್ದಾರೆ. ಲಡಾಖ್‌ನಲ್ಲಿನ ಪರಿಸ್ಥಿತಿಯೊಂದಿಗೆ ಇದನ್ನು ಹೋಲಿಸಿರುವ ಅವರು, ಚೀನಾ ಅರುಣಾಚಲ ಪ್ರದೇಶದ ಸ್ಥಳಗಳ ಹೆಸರುಗಳನ್ನು ಬದಲಾಯಿಸುತ್ತಿರುವುದನ್ನೂ ಪ್ರಸ್ತಾಪಿಸಿದ್ದಾರೆ.

ಚೀನಾ ಅರುಣಾಚಲ ಪ್ರದೇಶದ ಸಮೀಪ 60,000 ಮೆಗಾವಾಟ್ ಸಾಮರ್ಥ್ಯದ ಬೃಹತ್ ಅಣೆಕಟ್ಟನ್ನು ನಿರ್ಮಿಸುತ್ತಿದೆ ಎಂದಿರುವ ರಮೇಶ್, ಇದರಿಂದ ಭಾರತದ ಪರಿಸರ ಮತ್ತು ಜಲಸುರಕ್ಷತೆಗೆ ಅಪಾಯ ಉಂಟಾಗಬಹುದು ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ.

ಚೀನಾದೊಂದಿಗಿನ ಭಾರತದ ಹೆಚ್ಚುತ್ತಿರುವ ವ್ಯಾಪಾರ ಕೊರತೆಯ ಬಗ್ಗೆಯೂ ಅವರು ಕಳವಳ ವ್ಯಕ್ತಪಡಿಸಿದ್ದಾರೆ. 2025–26ನೇ ಹಣಕಾಸು ವರ್ಷದಲ್ಲಿ ಚೀನಾದೊಂದಿಗಿನ ಭಾರತದ ವ್ಯಾಪಾರ ಕೊರತೆ ದಾಖಲೆಯ 112 ಶತಕೋಟಿ ಡಾಲರ್‌ಗೆ ಏರಿದೆ; ಹಿಂದಿನ ಹಣಕಾಸು ವರ್ಷದಲ್ಲಿ ಇದು 99 ಶತಕೋಟಿ ಡಾಲರ್‌ ಇತ್ತು ಎಂದು ಅವರು ಹೇಳಿದ್ದಾರೆ. ಚೀನಾದಿಂದ ಹೆಚ್ಚುತ್ತಿರುವ ಆಮದುಗಳು ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳ ಮೇಲೆ ಪರಿಣಾಮ ಬೀರುತ್ತಿವೆ ಎಂದು ಆರೋಪಿಸಿರುವ ಅವರು, ‘ಮೇಕ್ ಇನ್ ಇಂಡಿಯಾ’ ಯೋಜನೆ ಚೀನಾದಿಂದ ಆಮದು ಮಾಡಿಕೊಳ್ಳುವ ಪರಿಸ್ಥಿತಿಗೆ ತಿರುಗಿದೆ ಎಂದು ಟೀಕಿಸಿದ್ದಾರೆ.

2020ರ ಜೂನ್‌ 19ರಂದು ಪ್ರಧಾನಿ ನರೇಂದ್ರ ಮೋದಿ ನೀಡಿದ್ದ ಹೇಳಿಕೆಯನ್ನೂ ರಮೇಶ್ ಉಲ್ಲೇಖಿಸಿದ್ದಾರೆ. “ನಮ್ಮ ಗಡಿಯೊಳಗೆ ಯಾರೂ ನುಸುಳಿಲ್ಲ, ನಮ್ಮ ಯಾವುದೇ ನೆಲವನ್ನು ವಶಪಡಿಸಿಕೊಂಡಿಲ್ಲ” ಎಂಬ ಅರ್ಥದ ಆ ಹೇಳಿಕೆಯನ್ನು ಅವರು ಚೀನಾಕ್ಕೆ ನೀಡಿದ ‘ಕ್ಲೀನ್ ಚಿಟ್’ ಎಂದು ಟೀಕಿಸಿದ್ದಾರೆ. ಗಲ್ವಾನ್ ಕಣಿವೆಯಲ್ಲಿ ಚೀನಾದ ಸೈನಿಕರೊಂದಿಗಿನ ಘರ್ಷಣೆಯಲ್ಲಿ ಭಾರತದ 20 ಸೈನಿಕರು ಹುತಾತ್ಮರಾದ ಬಳಿಕ ಪ್ರಧಾನಿ ಈ ಹೇಳಿಕೆ ನೀಡಿದ್ದರು ಎಂದು ಅವರು ನೆನಪಿಸಿದ್ದಾರೆ.

ಲಡಾಖ್‌ನಲ್ಲಿ ಚೀನಾದ ಒಳನುಸುಳುವಿಕೆಯ ಸಂದರ್ಭದಲ್ಲಿ ಸೇನಾ ಮುಖ್ಯಸ್ಥರಾಗಿದ್ದ ಜನರಲ್ ಎಂ.ಎಂ. ನರವಣೆ ಅವರಿಗೆ “ನಿಮಗೆ ಸೂಕ್ತವೆನಿಸುವುದನ್ನು ಮಾಡಿ” ಎಂಬ ಸೂಚನೆ ಮಾತ್ರ ನೀಡಲಾಗಿತ್ತು ಎಂಬ ವಿಚಾರವನ್ನೂ ರಮೇಶ್ ಪ್ರಸ್ತಾಪಿಸಿದ್ದಾರೆ. ಗಡಿ ವಿವಾದವನ್ನು ಸರ್ಕಾರ ನಿರ್ವಹಿಸಿದ ರೀತಿಯ ಬಗ್ಗೆ ಈ ಹೇಳಿಕೆಯ ಮೂಲಕ ಅವರು ಪ್ರಶ್ನೆ ಎತ್ತಿದ್ದಾರೆ.

‘ಆಪರೇಷನ್ ಸಿಂದೂರ್’ ಸಂದರ್ಭದಲ್ಲಿ ಪಾಕಿಸ್ತಾನದ ಸೇನಾ ಕಾರ್ಯಾಚರಣೆಯಲ್ಲಿ ಚೀನಾ ವಹಿಸಿದ್ದ ಪಾತ್ರದ ಬಗ್ಗೆಯೂ ರಮೇಶ್ ಸರ್ಕಾರವನ್ನು ಪ್ರಶ್ನಿಸಿದ್ದಾರೆ. 2025ರ ಜುಲೈ 4ರಂದು ಸೇನೆಯ ಉಪ ಮುಖ್ಯಸ್ಥ ಲೆಫ್ಟಿನೆಂಟ್ ಜನರಲ್ ರಾಹುಲ್ ಸಿಂಗ್ ಅವರು, ಆ ಕಾರ್ಯಾಚರಣೆಯ ಸಂದರ್ಭದಲ್ಲಿ ಪಾಕಿಸ್ತಾನದ ಸೇನಾ ಕಾರ್ಯಾಚರಣೆಯಲ್ಲಿ ಚೀನಾ ವ್ಯಾಪಕ ಪಾತ್ರ ವಹಿಸಿತ್ತು ಎಂದು ಬಹಿರಂಗವಾಗಿ ಹೇಳಿದ್ದರು ಎಂಬುದನ್ನು ಅವರು ಉಲ್ಲೇಖಿಸಿದ್ದಾರೆ.

ಆದರೆ, 2026ರ ಆಗಸ್ಟ್‌ 25ರಂದು ಸೇನಾ ಸಿಬ್ಬಂದಿ ಮುಖ್ಯಸ್ಥರ ಸಮಿತಿಯ ಅಧ್ಯಕ್ಷ ಸ್ಥಾನದಿಂದ ನಿವೃತ್ತರಾದ ಜನರಲ್ ಅನಿಲ್ ಚೌಹಾಣ್ ಅವರು ಈ ಹೇಳಿಕೆಯನ್ನು ಸಾರ್ವಜನಿಕವಾಗಿ ನಿರಾಕರಿಸಿದ್ದರು ಎಂದು ರಮೇಶ್ ಹೇಳಿದ್ದಾರೆ. ಬಳಿಕ ಜನರಲ್ ಚೌಹಾಣ್ ಆರ್‌ಎಸ್‌ಎಸ್‌ ಮತ್ತು ಬಿಜೆಪಿಯ ಸೈದ್ಧಾಂತಿಕ ವಲಯಕ್ಕೆ ಸಂಬಂಧಿಸಿದೆ ಎಂದು ರಮೇಶ್ ವಿವರಿಸಿರುವ ಚಿಂತನಾ ಸಂಸ್ಥೆಯೊಂದರ ಜವಾಬ್ದಾರಿ ವಹಿಸಿಕೊಂಡಿದ್ದಾರೆ ಎಂದೂ ಅವರು ಆರೋಪಿಸಿದ್ದಾರೆ.

ಐಟಿಬಿಪಿ ಮಹಾನಿರ್ದೇಶಕ ಶತ್ರುಜೀತ್ ಕಪೂರ್ ಗುರುವಾರ ರಾಜಸ್ಥಾನದ ಅಲ್ವಾರ್‌ನಲ್ಲಿರುವ ಕೇಂದ್ರ ತರಬೇತಿ ಮಹಾವಿದ್ಯಾಲಯದಲ್ಲಿ ನಡೆದ ಐಟಿಬಿಪಿಯ ವಾರ್ಷಿಕ ‘ಹಿಮವೀರ್ ಸಮ್ಮಾನ್ ಸಮಾರಂಭ’ದಲ್ಲಿ ಮಾತನಾಡಿದ್ದರು. ಕಳೆದ ಕೆಲವು ದಿನಗಳಿಂದ ಅರುಣಾಚಲ ಪ್ರದೇಶದ ಹಲವು ಸ್ಥಳಗಳಲ್ಲಿ ಚೀನಾದ ಸೈನಿಕರೊಂದಿಗೆ ಮುಖಾಮುಖಿ ಪರಿಸ್ಥಿತಿ ಮುಂದುವರಿದಿದೆ ಎಂದು ಅವರು ತಿಳಿಸಿದ್ದರು.

ಈ ಸಂದರ್ಭಗಳಲ್ಲಿ ಐಟಿಬಿಪಿ ಕಮಾಂಡೊಗಳು ಸಕ್ರಿಯವಾಗಿ ಕಾರ್ಯನಿರ್ವಹಿಸಿದ್ದು, ಇತ್ತೀಚೆಗೆ ರಚಿಸಲಾದ ಶೌರ್ಯ ಕಮಾಂಡೊಗಳು ಉತ್ತಮ ಪ್ರದರ್ಶನ ನೀಡಿದ್ದಾರೆ ಎಂದು ಕಪೂರ್ ಶ್ಲಾಘಿಸಿದ್ದರು. ಪರ್ವತ ಪ್ರದೇಶಗಳಲ್ಲಿ ಗೆರಿಲ್ಲಾ ಯುದ್ಧಕ್ಕೆ ತರಬೇತಿ ಪಡೆದಿದ್ದ ಐಟಿಬಿಪಿಗೆ 2004ರಲ್ಲಿ ಚೀನಾ ಗಡಿಯ ಭದ್ರತೆಯ ಹೊಣೆಗಾರಿಕೆ ನೀಡಲಾಯಿತು ಎಂದು ಅವರು ವಿವರಿಸಿದ್ದರು. ಗಡಿಯ ರಕ್ಷಣೆಯಲ್ಲಿ ತನ್ನ ಮೂಲ ಸಾಮರ್ಥ್ಯವನ್ನು ಉಳಿಸಿಕೊಳ್ಳುವ ಉದ್ದೇಶದಿಂದ ಸೇನೆಯಿಂದ ಪ್ರತ್ಯೇಕವಾದ ವಿಶೇಷ ಎತ್ತರದ ಪರ್ವತ ಯುದ್ಧಪಡೆಯನ್ನು ಸಿದ್ಧಪಡಿಸಲಾಗುತ್ತಿದೆ. ಶೀಘ್ರದಲ್ಲೇ ಶೌರ್ಯ ಕಮಾಂಡೊಗಳ ಪೂರ್ಣ ಬೆಟಾಲಿಯನ್ ಸಿದ್ಧವಾಗಲಿದೆ ಎಂದೂ ಅವರು ಹೇಳಿದ್ದಾರೆ.

ಪ್ರಮುಖ ವಿಭಾಗಗಳ ಕಡತಗಳನ್ನು ಯಾವ ಮಾರ್ಗದಲ್ಲಿ ಮತ್ತು ಯಾರ ಮೂಲಕ ರವಾನಿಸಬೇಕು ಎಂಬ ಪ್ರಕ್ರಿಯೆಯಲ್ಲಿ ಗರ್ಗ್‌ ಬದಲಾವಣೆ ತಂದಿದ್ದರು. ಇಂತಹ ಬದಲಾವಣೆಗಳನ್ನು ಮಾಡಬಾರದು ಎಂಬ ಹಿಂದಿನ ಸೂಚನೆಗಳಿದ್ದರೂ ಈ ಆದೇಶ ಹೊರಡಿಸಲಾಗಿದೆ ಎಂದು ಇಬ್ಬರು ಆಯುಕ್ತರು ತಮ್ಮ ಪತ್ರಗಳಲ್ಲಿ ಆಕ್ಷೇಪಿಸಿದ್ದಾರೆ ಎಂದು ವರದಿಯಾಗಿದೆ.

ಆದರೆ, ಕ್ಯಾಬಿನೆಟ್‌ ಕಾರ್ಯದರ್ಶಾಲಯವು ಈ ಪತ್ರಗಳನ್ನು ಪೂರ್ಣ ಚುನಾವಣಾ ಆಯೋಗದ ಅಧಿಕೃತ ಸಂವಹನವೆಂದು ಪರಿಗಣಿಸದೆ, ವೈಯಕ್ತಿಕವಾಗಿ ಸಲ್ಲಿಸಲಾದ ಪತ್ರಗಳೆಂದು ಪರಿಗಣಿಸಿದೆ. ಈ ವಿಷಯದಲ್ಲಿ ಗರ್ಗ್‌ ವಿರುದ್ಧ ಯಾವುದೇ ಕ್ರಮ ಕೈಗೊಂಡಿಲ್ಲ ಎಂದು ಬಹಿರಂಗಗೊಂಡ ದಾಖಲೆಗಳು ಸೂಚಿಸುತ್ತವೆ.

ಆಗಸ್ಟ್‌ 5ರಂದು ಪತ್ರಗಳ ಸ್ವೀಕೃತಿಯನ್ನು ದೃಢೀಕರಿಸಲಾಗಿದ್ದು, ಅವುಗಳ ಪ್ರತಿಗಳನ್ನು ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್‌ ಕುಮಾರ್‌ ಅವರಿಗೂ ಕಳುಹಿಸಲಾಗಿದೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ. ಸಂವಿಧಾನಬದ್ಧ ಸಂಸ್ಥೆಯ ಆಂತರಿಕ ಕಾರ್ಯವೈಖರಿಯಲ್ಲಿ ಕಾರ್ಯಾಂಗದ ಹಸ್ತಕ್ಷೇಪದ ಕುರಿತು ಪತ್ರಗಳಲ್ಲಿ ಕಳವಳ ವ್ಯಕ್ತಪಡಿಸಲಾಗಿದೆ.

ಮಾಜಿ ನೌಕಾಪಡೆಯ ಅಧಿಕಾರಿ ಹಾಗೂ ಮಾಹಿತಿ ಹಕ್ಕು ಕಾರ್ಯಕರ್ತ ಕಮೋಡೋರ್‌ ಲೋಕೇಶ್‌ ಬಾತ್ರಾ ಅವರು ಮಾಹಿತಿ ಹಕ್ಕು ಕಾಯ್ದೆಯಡಿ ಪಡೆದ ದಾಖಲೆಗಳ ಮೂಲಕ ಈ ಬೆಳವಣಿಗೆ ಬಹಿರಂಗವಾಗಿದೆ. ಈ ಪ್ರಕರಣವು ಚುನಾವಣಾ ಆಯೋಗದ ಆಂತರಿಕ ಆಡಳಿತಾತ್ಮಕ ಪ್ರಕ್ರಿಯೆಗಳು ಮತ್ತು ಅಧಿಕಾರಿಗಳ ನಡುವಿನ ಕಾರ್ಯವಿಧಾನಕ್ಕೆ ಸಂಬಂಧಿಸಿದ ಭಿನ್ನಾಭಿಪ್ರಾಯಗಳನ್ನು ಮುನ್ನೆಲೆಗೆ ತಂದಿದೆ.

ರಾಜ್‌ ಠಾಕ್ರೆ ಅವರು ಸಾಕ್ಷ್ಯಚಿತ್ರವನ್ನು ಹಂಚಿಕೊಂಡ ಬಳಿಕ ಅದು ಒಂದು ಮಿಲಿಯನ್‌ಗೂ ಹೆಚ್ಚು ವೀಕ್ಷಣೆಗಳನ್ನು ಗಳಿಸಿದೆ ಎಂದು ವರದಿ ತಿಳಿಸಿದೆ. ಈ ನಡುವೆ, ಸಾಕ್ಷ್ಯಚಿತ್ರವನ್ನು ಸಾಮಾಜಿಕ ಮಾಧ್ಯಮದಿಂದ ತೆಗೆದುಹಾಕುವಂತೆ ಮುಂಬೈ ಪೊಲೀಸರು ಕೆಲವು ಬಳಕೆದಾರರಿಗೆ ನೋಟಿಸ್‌ ನೀಡಿದ್ದಾರೆ ಎಂದೂ ವರದಿಯಾಗಿದೆ.

ಸಾಮಾಜಿಕ ಮಾಧ್ಯಮದ ವ್ಯಕ್ತಿ ಧ್ರುವ್‌ ರಾಠಿ ಅವರು ಅದಾನಿ ಸಮೂಹದ ಆಸ್ತಿಗಳನ್ನು ರಾಷ್ಟ್ರೀಕರಣಗೊಳಿಸುವಂತೆ ಕರೆ ನೀಡಿದ್ದಾರೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ. ಪತ್ರಕರ್ತೆ ಅರ್ಫಾ ಖಾನುಂ ಶೆರ್ವಾನಿ ಅವರು ರಾಜ್‌ ಠಾಕ್ರೆ ಸಾಕ್ಷ್ಯಚಿತ್ರ ಹಂಚಿಕೊಂಡಿರುವುದರ ಕುರಿತು ಪ್ರತಿಕ್ರಿಯಿಸಿದ್ದಾರೆ.

ಇದೇ ವೇಳೆ, ಹಿಂದೆ ರಾಜ್‌ ಠಾಕ್ರೆ ಅವರು ಗೌತಮ್‌ ಅದಾನಿ ಅವರನ್ನು ಭೇಟಿಯಾಗಿದ್ದ ವಿಚಾರವನ್ನೂ ಕೆಲವರು ಪ್ರಸ್ತಾಪಿಸಿದ್ದಾರೆ. ಸಾಕ್ಷ್ಯಚಿತ್ರದಲ್ಲಿ ವಿಷಯಗಳನ್ನು ಆಯ್ಕೆ ಮಾಡಿರುವ ರೀತಿಯ ಬಗ್ಗೆಯೂ ಪ್ರಶ್ನೆಗಳು ವ್ಯಕ್ತವಾಗಿವೆ.

ಸಾಕ್ಷ್ಯಚಿತ್ರದ ಪ್ರಸಾರ ಮತ್ತು ಅದನ್ನು ತೆಗೆದುಹಾಕುವಂತೆ ನೀಡಲಾದ ನೋಟಿಸ್‌ಗಳ ಬೆಳವಣಿಗೆಯು ಉದ್ಯಮ ಮತ್ತು ಸರ್ಕಾರದ ನಡುವಿನ ಸಂಬಂಧಗಳು, ಖಾಸಗೀಕರಣ ಹಾಗೂ ಮೂಲಸೌಕರ್ಯ ಯೋಜನೆಗಳ ಕುರಿತು ಚರ್ಚೆಗೆ ಕಾರಣವಾಗಿದೆ.

ಮಂಡ್ಯ ಜಿಲ್ಲೆಯ ಬಸಾರಾಳು ಪ್ರದೇಶದಲ್ಲಿ ನಿರ್ಮಾಣವಾಗಲಿರುವ ನಿರ್ಮಾಣ ಮತ್ತು ಮೂಲಸೌಕರ್ಯ ಉಪಕರಣಗಳ ಪರೀಕ್ಷಾ ಕೇಂದ್ರಕ್ಕೆ (CIE Test Centre) ಸುಮಾರು 100 ಎಕರೆ ಹಾಗೂ ಎಲೆಕ್ಟ್ರಿಕ್‌ ವಾಹನಗಳ ಪರೀಕ್ಷಾ ಕೇಂದ್ರಕ್ಕೆ (EV Test Centre) ಹೆಚ್ಚುವರಿಯಾಗಿ 60 ಎಕರೆ ಭೂಮಿಯನ್ನು ಒದಗಿಸುವಂತೆ ARAI ಪ್ರಸ್ತಾಪಿಸಿದೆ. ಈ ಯೋಜನೆಗಳು ವಾಹನ ಸಂಶೋಧನೆ, ಕೈಗಾರಿಕಾ ಹೂಡಿಕೆ ಮತ್ತು ಉದ್ಯೋಗ ಸೃಷ್ಟಿಗೆ ಉತ್ತೇಜನ ನೀಡಲಿವೆ ಎಂದು ಕುಮಾರಸ್ವಾಮಿ ತಿಳಿಸಿದ್ದಾರೆ.

2026–27ರ ಕರ್ನಾಟಕ ಬಜೆಟ್‌ನಲ್ಲಿ ಈ ಯೋಜನೆಗಳನ್ನು ಘೋಷಿಸಲಾಗಿದ್ದರೂ, ಭೂಮಿ ಹಂಚಿಕೆ ಪ್ರಕ್ರಿಯೆ ವಿಳಂಬವಾಗಿರುವುದನ್ನು ಅವರು ಪ್ರಶ್ನಿಸಿದ್ದಾರೆ. ರಾಜ್ಯ ಮತ್ತು ಕೇಂದ್ರ ಸರ್ಕಾರಗಳ ನಡುವಿನ ಪತ್ರವ್ಯವಹಾರ, ಸಭೆಗಳ ನಡಾವಳಿಗಳು ಹಾಗೂ ಇತರ ದಾಖಲೆಗಳನ್ನು ಬಿಡುಗಡೆ ಮಾಡುವ ಮೂಲಕ ಯೋಜನೆಯ ಪ್ರಗತಿಯ ಕುರಿತು ತಮ್ಮ ಕಳವಳವನ್ನು ಅವರು ವ್ಯಕ್ತಪಡಿಸಿದ್ದಾರೆ.

ಕೈಗಾರಿಕಾ ಅಭಿವೃದ್ಧಿಗೆ ಭೂಮಿ ಒದಗಿಸುವುದಾಗಿ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್‌ ಈ ಹಿಂದೆ ಭರವಸೆ ನೀಡಿದ್ದರೂ, ಅಗತ್ಯ ಕ್ರಮಗಳು ವಿಳಂಬವಾಗುತ್ತಿವೆ ಎಂದು ಕುಮಾರಸ್ವಾಮಿ ಹೇಳಿದ್ದಾರೆ. ಸಂಬಂಧಿತ ಸಭೆಗಳು ನಡೆದಿದ್ದರೂ ಯೋಜನೆಗಳಿಗೆ ಭೂಮಿ ಹಸ್ತಾಂತರವಾಗದಿರುವುದು ಅಭಿವೃದ್ಧಿ ಕಾರ್ಯಗಳ ಮೇಲೆ ಪರಿಣಾಮ ಬೀರಬಹುದು ಎಂಬ ಆತಂಕವನ್ನೂ ಅವರು ವ್ಯಕ್ತಪಡಿಸಿದ್ದಾರೆ.

ಮಂಡ್ಯದಲ್ಲಿ ಈ ಪರೀಕ್ಷಾ ಕೇಂದ್ರಗಳು ಸ್ಥಾಪನೆಯಾದರೆ ವಾಹನ ಮತ್ತು ಎಲೆಕ್ಟ್ರಿಕ್‌ ವಾಹನಗಳ ತಂತ್ರಜ್ಞಾನ ಸಂಶೋಧನೆಗೆ ಉತ್ತೇಜನ ದೊರೆಯುವ ನಿರೀಕ್ಷೆಯಿದೆ. ಅಲ್ಲದೆ, ಕೈಗಾರಿಕಾ ಚಟುವಟಿಕೆಗಳ ವಿಸ್ತರಣೆ ಮತ್ತು ಸ್ಥಳೀಯ ಉದ್ಯೋಗಾವಕಾಶಗಳ ಸೃಷ್ಟಿಗೂ ಸಹಕಾರಿಯಾಗಬಹುದು. ಹೀಗಾಗಿ, ರಾಜ್ಯ ಸರ್ಕಾರವು ಭೂಮಿ ಹಂಚಿಕೆಗೆ ಸಂಬಂಧಿಸಿದ ಪ್ರಕ್ರಿಯೆಯನ್ನು ಶೀಘ್ರ ಪೂರ್ಣಗೊಳಿಸಿ ಯೋಜನೆಗಳ ಅನುಷ್ಠಾನಕ್ಕೆ ಸಹಕರಿಸಬೇಕು ಎಂದು ಕೇಂದ್ರ ಸಚಿವರು ಮನವಿ ಮಾಡಿದ್ದಾರೆ.

‘ವಿ ದಿ ಲೀಡರ್ಸ್‌’ (We The Leaders) ಉಪಕ್ರಮದಡಿ ಕೃಷ್ಣಗಿರಿಯಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಮಾತನಾಡಿದ ಅಣ್ಣಾಮಲೈ, ತಮ್ಮ ವೃತ್ತಿಜೀವನದ ಅನುಭವಗಳನ್ನು ಉಲ್ಲೇಖಿಸಿ ರಾಷ್ಟ್ರೀಯ ಏಕತೆಯ ಕುರಿತು ಮಾತನಾಡಿದರು.

ಹಲವು ರಾಜ್ಯಗಳಲ್ಲಿ ಸೇವೆ ಸಲ್ಲಿಸಿದ ಅನುಭವದ ಉಲ್ಲೇಖ

ತಮಿಳುನಾಡಿನಲ್ಲಿ ಜನಿಸಿದ ತಾವು ಲಖನೌನಲ್ಲಿ ಶಿಕ್ಷಣ ಪಡೆದಿದ್ದು, ಆಂಧ್ರಪ್ರದೇಶದಲ್ಲಿ ಎರಡು ವರ್ಷ ಮತ್ತು ದೆಹಲಿಯಲ್ಲಿ ಒಂದು ವರ್ಷ ಐಪಿಎಸ್‌ ತರಬೇತಿ ಪಡೆದಿದ್ದಾಗಿ ಅಣ್ಣಾಮಲೈ ಹೇಳಿದರು. ಬಳಿಕ ಕರ್ನಾಟಕದಲ್ಲಿ ಒಂಬತ್ತು ವರ್ಷ ಸೇವೆ ಸಲ್ಲಿಸಿದ್ದಾಗಿ ತಿಳಿಸಿದರು.

“ನನಗಿಂತ ದೊಡ್ಡ ರಾಷ್ಟ್ರೀಯತಾವಾದಿ ಯಾರು ಎಂಬುದನ್ನು ತೋರಿಸಿ” ಎಂದು ಹೇಳಿದ ಅವರು, ಭಾರತದ ವಿವಿಧ ರಾಜ್ಯಗಳಲ್ಲಿ ವಾಸಿಸಿ ಕೆಲಸ ಮಾಡಿದ ಅನುಭವವು ದೇಶದ ಏಕತೆ ಮತ್ತು ಸಾರ್ವಭೌಮತ್ವದ ಕುರಿತು ತಮ್ಮ ತಿಳುವಳಿಕೆಯನ್ನು ರೂಪಿಸಿದೆ ಎಂದು ಅಭಿಪ್ರಾಯಪಟ್ಟರು.

ವಿವಿಧ ಭಾಷೆ ಮತ್ತು ಸಂಸ್ಕೃತಿಗಳ ಜನರು ಒಟ್ಟಾಗಿ ಬದುಕುತ್ತಿರುವ ಕೃಷ್ಣಗಿರಿ, ಭಾರತದ ವೈವಿಧ್ಯತೆಯ ಪ್ರತಿರೂಪವಾಗಿದೆ ಎಂದು ಅವರು ಬಣ್ಣಿಸಿದರು. ಅಲ್ಲಿನ ಜನರು ತಮಿಳುನಾಡಿನ ಇತರ ಭಾಗಗಳಿಗೆ ಮಾದರಿಯಾಗಿದ್ದಾರೆ ಎಂದರು.

ರಾಜ್ಯಗಳ ನಡುವೆ ಗಡಿಗಳಿಗಿಂತ ಸಹಕಾರ ಮುಖ್ಯ

ಪ್ರಾದೇಶಿಕ ಭೇದಗಳಿಗೆ ಸೀಮಿತವಾಗದೆ, ಎಲ್ಲ ರಾಜ್ಯಗಳೂ ಸಮಾನಾಂತರವಾಗಿ ಅಭಿವೃದ್ಧಿ ಹೊಂದುವ ಒಕ್ಕೂಟ ವ್ಯವಸ್ಥೆಗೆ ಅಣ್ಣಾಮಲೈ ಒತ್ತು ನೀಡಿದರು. ತಮಿಳುನಾಡು ಮತ್ತು ಕರ್ನಾಟಕದ ನಡುವೆ ಆರ್ಥಿಕ ಹಾಗೂ ಮೂಲಸೌಕರ್ಯ ಸಂಪರ್ಕವನ್ನು ಮತ್ತಷ್ಟು ಬಲಪಡಿಸಬೇಕು ಎಂದು ಹೇಳಿದರು.

“ಗುಜರಾತ್‌ ಬೆಳೆಯಬೇಕು, ತಮಿಳುನಾಡು ಬೆಳೆಯಬೇಕು, ದೆಹಲಿ ಮತ್ತು ಹರಿಯಾಣವೂ ಅಭಿವೃದ್ಧಿಯಾಗಬೇಕು. ಗಡಿಗಳಲ್ಲಿ ತಡೆಗೋಡೆಗಳನ್ನು ನಿರ್ಮಿಸಿ ಜನರನ್ನು ಹಿಂದಕ್ಕೆ ಕಳುಹಿಸುವ ಅಗತ್ಯವೇನು?” ಎಂದು ಅವರು ಪ್ರಶ್ನಿಸಿದರು.

ಹೆಚ್ಚಿನ ಸಂಖ್ಯೆಯಲ್ಲಿ ತಮಿಳುನಾಡಿನ ಜನರು ಬೆಂಗಳೂರಿಗೆ ಬರಬೇಕು; ಕರ್ನಾಟಕದ ಜನರು ಹೊಸೂರಿಗೆ ತೆರಳಬೇಕು. ಎರಡೂ ಪ್ರದೇಶಗಳ ನಡುವಿನ ಪರಸ್ಪರ ಸಹಕಾರದಿಂದ ಅಭಿವೃದ್ಧಿ ಸಾಧ್ಯ ಎಂದು ಹೇಳಿದರು. ಹೊಸೂರು ಮತ್ತು ಬೆಂಗಳೂರು ನಡುವೆ ಮೆಟ್ರೊ ರೈಲು ಸಂಪರ್ಕ ಕಲ್ಪಿಸುವ ಪ್ರಸ್ತಾವನೆಯನ್ನೂ ಅವರು ಉಲ್ಲೇಖಿಸಿದರು.

‘ಸಾಮಾಜಿಕ ಜಾಲತಾಣದ ಲೈಕ್‌ಗಳಿಗಾಗಿ ನಮ್ಮ ಕೆಲಸವಲ್ಲ’

‘ವಿ ದಿ ಲೀಡರ್ಸ್‌’ ಉಪಕ್ರಮದ ಉದ್ದೇಶವನ್ನು ವಿವರಿಸಿದ ಅಣ್ಣಾಮಲೈ, ಸಾಮಾಜಿಕ ಜಾಲತಾಣಗಳಲ್ಲಿ ಜನಪ್ರಿಯತೆ ಗಳಿಸುವುದಕ್ಕಿಂತ ಆಡಳಿತದಲ್ಲಿ ಭಾಗವಹಿಸುವ ನಾಯಕತ್ವವನ್ನು ಬೆಳೆಸುವುದು ಮುಖ್ಯ ಎಂದರು.

“20 ಅಥವಾ 50 ಲಕ್ಷ ಜನರ ಚಪ್ಪಾಳೆ ಪಡೆಯಲು ನಾವು ಇಲ್ಲಿಗೆ ಬಂದಿಲ್ಲ. ಸಾಮಾಜಿಕ ಜಾಲತಾಣಗಳಲ್ಲಿ ಲೈಕ್‌ಗಳನ್ನು ಸಂಗ್ರಹಿಸುವುದೂ ನಮ್ಮ ಉದ್ದೇಶವಲ್ಲ. ಆಡಳಿತಾತ್ಮಕ ಅಧಿಕಾರವನ್ನು ಪಡೆಯುವುದೇ ನಮ್ಮ ಗುರಿ. ವೇದಿಕೆಯಲ್ಲಿ ಎಷ್ಟೇ ಭಾಷಣ ಮಾಡಿದರೂ, ಒಂದೇ ಒಂದು ಸಹಿ ಲಕ್ಷಾಂತರ ಜನರ ಬದುಕಿನ ದಿಕ್ಕನ್ನು ಬದಲಿಸಬಹುದು” ಎಂದು ಅವರು ಹೇಳಿದರು.

ಗ್ರಾಮ ಪಂಚಾಯಿತಿ ಅಧ್ಯಕ್ಷರು, ಮೇಯರ್‌ಗಳು, ಶಾಸಕರು ಮತ್ತು ಸಚಿವರು ಸೇರಿದಂತೆ ಸಾಂವಿಧಾನಿಕ ಹಾಗೂ ಚುನಾಯಿತ ಹುದ್ದೆಗಳನ್ನು ನಿರ್ವಹಿಸಬಲ್ಲ ಎಂಟು ಲಕ್ಷಕ್ಕೂ ಹೆಚ್ಚು ತಳಮಟ್ಟದ ನಾಯಕರನ್ನು ರೂಪಿಸುವುದು ತಮ್ಮ ಚಳವಳಿಯ ಗುರಿ ಎಂದು ತಿಳಿಸಿದರು.

ಪ್ರಜಾಸತ್ತಾತ್ಮಕ ಮಾರ್ಗದಲ್ಲಿ ಹೋರಾಡಲು ಯುವಜನರಿಗೆ ಕರೆ

ವಿದ್ಯಾರ್ಥಿಗಳು ಮತ್ತು ಯುವ ಕಾರ್ಯಕರ್ತರನ್ನು ಉದ್ದೇಶಿಸಿ ಮಾತನಾಡಿದ ಅಣ್ಣಾಮಲೈ, ನ್ಯಾಯಯುತ ಬೇಡಿಕೆಗಳಿಗಾಗಿ ಪ್ರಜಾಸತ್ತಾತ್ಮಕ ಮತ್ತು ರಚನಾತ್ಮಕ ಮಾರ್ಗಗಳಲ್ಲಿ ಹೋರಾಡುವಂತೆ ಕರೆ ನೀಡಿದರು. ರೈತರ ಹಿಂದಿನ ಹೋರಾಟಗಳು ಹಾಗೂ ದೆಹಲಿಯ ಜಂತರ್‌ ಮಂತರ್‌ನಲ್ಲಿ ನಡೆದ ಪ್ರತಿಭಟನೆಗಳನ್ನು ಅವರು ಉದಾಹರಣೆಯಾಗಿ ಉಲ್ಲೇಖಿಸಿದರು.

ರಾಜಕೀಯ ವ್ಯವಸ್ಥೆಯ ಬಗ್ಗೆ ತಕ್ಷಣವೇ ನಿರಾಶರಾಗದೆ, ಒಂದೇ ರಾತ್ರಿಯಲ್ಲಿ ರಾಜಕೀಯ ಬದಲಾವಣೆ ತರುವುದಾಗಿ ಹೇಳುವವರ ಮಾತುಗಳನ್ನು ಎಚ್ಚರಿಕೆಯಿಂದ ಪರಿಶೀಲಿಸಬೇಕು ಎಂದು ಯುವಜನರಿಗೆ ಸಲಹೆ ನೀಡಿದರು.

ವಿದೇಶಿ ಹಸ್ತಕ್ಷೇಪದ ಆರೋಪಗಳ ಕುರಿತು ಸರ್ಕಾರಕ್ಕೆ ಸವಾಲು

ಭಾರತದಲ್ಲಿ ಶಾಂತಿ ಕದಡಲು ವಿದೇಶಿ ಶಕ್ತಿಗಳು ಹಸ್ತಕ್ಷೇಪ ಮಾಡುತ್ತಿದ್ದರೆ, ಸರ್ಕಾರವು ಸಾಮಾಜಿಕ ಜಾಲತಾಣಗಳಲ್ಲಿ ಹೇಳಿಕೆ ನೀಡುವುದಕ್ಕೆ ಸೀಮಿತವಾಗದೆ ಕ್ರಮ ಕೈಗೊಳ್ಳಬೇಕು ಎಂದು ಅಣ್ಣಾಮಲೈ ಹೇಳಿದರು.

ವಿದೇಶಿ ಹಣ ಪಡೆದು ದೇಶದಲ್ಲಿ ಅಶಾಂತಿ ಸೃಷ್ಟಿಸುವವರ ವಿರುದ್ಧ ಗುಪ್ತಚರ ದಳ (IB), ಸಂಶೋಧನೆ ಮತ್ತು ವಿಶ್ಲೇಷಣಾ ವಿಭಾಗ (RAW) ಹಾಗೂ ಪೊಲೀಸರ ಮೂಲಕ ತನಿಖೆ ನಡೆಸಿ ಕಾನೂನುಬದ್ಧ ಕ್ರಮ ಕೈಗೊಳ್ಳಬೇಕು ಎಂದು ಅವರು ಒತ್ತಾಯಿಸಿದರು.

ಮಹಾರಾಷ್ಟ್ರ ಸರ್ಕಾರ ಇತ್ತೀಚೆಗೆ ಜಾರಿಗೆ ತಂದಿರುವ ಮತಾಂತರ ವಿರೋಧಿ ಕಾನೂನಿನ ಸಾಂವಿಧಾನಿಕ ಸಿಂಧುತ್ವವನ್ನು ಪ್ರಶ್ನಿಸಿ ಸಲ್ಲಿಸಲಾಗಿದ್ದ ಅರ್ಜಿಯ ವಿಚಾರಣೆ ವೇಳೆ ನ್ಯಾಯಾಲಯ ಈ ಅಭಿಪ್ರಾಯ ವ್ಯಕ್ತಪಡಿಸಿದೆ.

ಥಾಣೆಯ 70 ವರ್ಷದ ಇಸ್ಲಾಂ ಧರ್ಮ ಬೋಧಕರೊಬ್ಬರು ಈ ಅರ್ಜಿ ಸಲ್ಲಿಸಿದ್ದರು. ಸಂವಿಧಾನದ 25ನೇ ವಿಧಿಯು ಧರ್ಮವನ್ನು ಆಚರಿಸುವ ಮತ್ತು ಪ್ರಚಾರ ಮಾಡುವ ಸ್ವಾತಂತ್ರ್ಯವನ್ನು ಖಾತರಿಪಡಿಸುತ್ತದೆ. ಆದರೆ, ರಾಜ್ಯ ಸರ್ಕಾರದ ಹೊಸ ಕಾನೂನು ಈ ಸ್ವಾತಂತ್ರ್ಯಕ್ಕೆ ಅಡ್ಡಿಯಾಗುತ್ತದೆ ಎಂದು ಅರ್ಜಿದಾರರು ವಾದಿಸಿದ್ದರು.

ಬಲವಂತದ ಮತಾಂತರ ತಡೆಯುವ ಉದ್ದೇಶ

ಮುಖ್ಯ ನ್ಯಾಯಮೂರ್ತಿ ಮಹೇಶ್‌ ಸೀತಾರಾಮ್‌ ತ್ರಿಪಾಠಿ ಮತ್ತು ನ್ಯಾಯಮೂರ್ತಿ ಅದ್ವೈತ್‌ ಸೇಥ್ನಾ ಅವರನ್ನೊಳಗೊಂಡ ನ್ಯಾಯಪೀಠವು, ಸಮಾಜದ ಜಾತ್ಯತೀತ ಸ್ವರೂಪವನ್ನು ರಕ್ಷಿಸುವುದು ಮತ್ತು ಬಲವಂತದ ಮತಾಂತರಕ್ಕೆ ಸಂಬಂಧಿಸಿದ ಸಮಸ್ಯೆಗಳನ್ನು ಪರಿಹರಿಸುವುದು ಕಾನೂನಿನ ಉದ್ದೇಶವಾಗಿದೆ ಎಂದು ಹೇಳಿದೆ.

ಪ್ರತಿಯೊಬ್ಬ ನಾಗರಿಕನಿಗೂ ತನ್ನ ಧರ್ಮವನ್ನು ಬದಲಿಸಿಕೊಳ್ಳುವ ಹಕ್ಕಿದೆ. ಆದರೆ, ಕೇವಲ ಮದುವೆಯ ಉದ್ದೇಶದಿಂದ, ಅದರಲ್ಲೂ ಮದುವೆಗೆ ಒಂದು ಅಥವಾ ಎರಡು ದಿನಗಳ ಮೊದಲು ಧರ್ಮ ಬದಲಿಸಿಕೊಳ್ಳುವ ವಿಚಾರವನ್ನು ನ್ಯಾಯಪೀಠ ಪ್ರಸ್ತಾಪಿಸಿದೆ ಎಂದು ವರದಿ ತಿಳಿಸಿದೆ.

ಹೊಸ ಅರ್ಜಿ ಸಲ್ಲಿಸಲು ಅವಕಾಶ

ಅರ್ಜಿಯಲ್ಲಿ ನಿರ್ದಿಷ್ಟವಾದ ವಾಸ್ತವಾಂಶಗಳು ಮತ್ತು ಅವುಗಳಿಗೆ ಸಂಬಂಧಿಸಿದ ಸಮರ್ಥನೆಗಳ ಕೊರತೆಯಿದ್ದ ಕಾರಣ, ಪ್ರಸ್ತುತ ಅರ್ಜಿಯನ್ನು ಸ್ವೀಕರಿಸಲು ನ್ಯಾಯಾಲಯ ನಿರಾಕರಿಸಿತು. ಅಗತ್ಯ ದಾಖಲೆಗಳು ಮತ್ತು ವಾಸ್ತವಾಂಶಗಳೊಂದಿಗೆ ಹೊಸ ಅರ್ಜಿ ಸಲ್ಲಿಸಲು ಅರ್ಜಿದಾರರಿಗೆ ಅವಕಾಶ ನೀಡಿತು.

ಇದರ ಬೆನ್ನಲ್ಲೇ ಅರ್ಜಿಯನ್ನು ಹಿಂಪಡೆಯಲು ಒಪ್ಪಿದ ಅರ್ಜಿದಾರರು, ಶೀಘ್ರದಲ್ಲೇ ಹೊಸ ಅರ್ಜಿ ಸಲ್ಲಿಸುವುದಾಗಿ ನ್ಯಾಯಾಲಯಕ್ಕೆ ತಿಳಿಸಿದ್ದಾರೆ.

ಈ ನಿಯಮಗಳನ್ನು ಪಾಲಿಸಲು ಡಿಸೆಂಬರ್‌ 31, 2026ರವರೆಗೆ ಗಡುವು ನೀಡಲಾಗಿದ್ದು, ಹೊಸ ವ್ಯವಸ್ಥೆ 2027ರ ಜನವರಿ 1ರಿಂದ ಜಾರಿಗೆ ಬರಲಿದೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.

ವೈ-ಫೈ ಮೂಲಕ ಬಳಸುವವರಿಗೂ ಅನ್ವಯವಾಗುತ್ತದೆಯೇ?

ನೋಂದಾಯಿತ ಸಿಮ್‌ ಕಾರ್ಡ್‌ ಇಲ್ಲದೆ ಕೇವಲ ವೈ-ಫೈ ಸಂಪರ್ಕದ ಮೂಲಕ ವಾಟ್ಸ್‌ಆ್ಯಪ್‌ ಅಥವಾ ಟೆಲಿಗ್ರಾಮ್‌ ಬಳಸುವ ಸ್ಮಾರ್ಟ್‌ಫೋನ್‌ ಬಳಕೆದಾರರ ಮೇಲೆ ಈ ನಿಯಮ ಪರಿಣಾಮ ಬೀರಬಹುದು. ಇದರಲ್ಲಿ ಆ್ಯಂಡ್ರಾಯ್ಡ್‌ ಫೋನ್‌ಗಳು ಮತ್ತು ಐಫೋನ್‌ಗಳೂ ಸೇರಿವೆ.

ಆದರೆ, ನಿಯಮಗಳನ್ನು ಆಯಾ ಆ್ಯಪ್‌ಗಳು ಹೇಗೆ ಜಾರಿಗೆ ತರುತ್ತವೆ ಎಂಬುದರ ಮೇಲೆ ನಿಖರವಾದ ಪರಿಣಾಮ ಅವಲಂಬಿತವಾಗಿರುತ್ತದೆ. ಸಿಮ್‌ ಕಾರ್ಡ್‌ ಮತ್ತು ಮೆಸೇಜಿಂಗ್‌ ಖಾತೆಯ ನಡುವಿನ ಸಂಬಂಧವನ್ನು ಪರಿಶೀಲಿಸುವ ವ್ಯವಸ್ಥೆಯು ಬಳಕೆದಾರರ ಪ್ರಸ್ತುತ ಬಳಕೆಯ ವಿಧಾನದಲ್ಲಿ ಬದಲಾವಣೆ ತರಬಹುದು.

ಬಹು ಸಾಧನಗಳಲ್ಲಿ ಖಾತೆ ಬಳಸುವವರಿಗೆ ಸವಾಲು

ಒಂದೇ ವಾಟ್ಸ್‌ಆ್ಯಪ್‌ ಅಥವಾ ಟೆಲಿಗ್ರಾಮ್‌ ಖಾತೆಯನ್ನು ಹಲವು ಸಾಧನಗಳಲ್ಲಿ ಬಳಸುವವರು ಹೊಸ ನಿಯಮಗಳು ತಮ್ಮ ಬಳಕೆಯ ಮೇಲೆ ಹೇಗೆ ಪರಿಣಾಮ ಬೀರುತ್ತವೆ ಎಂಬುದನ್ನು ಪರಿಶೀಲಿಸಬೇಕಾಗಬಹುದು.

ಐಫೋನ್‌ಗಳಲ್ಲಿ ಸಿಮ್‌ ಬಾಂಡಿಂಗ್‌ ವ್ಯವಸ್ಥೆಗೆ ಬೆಂಬಲ ನೀಡುವ ನಿಟ್ಟಿನಲ್ಲಿ ಆ್ಯಪಲ್‌ ಐಒಎಸ್‌ ಸಾಫ್ಟ್‌ವೇರ್‌ ನವೀಕರಣ ಮಾಡಿದೆ ಎಂದು ವರದಿ ತಿಳಿಸಿದೆ.

ಬಳಕೆದಾರರು ಏನು ಮಾಡಬೇಕು?

ಹೊಸ ನಿಯಮಗಳ ನಿಖರ ಅನುಷ್ಠಾನ ಮತ್ತು ತಮ್ಮ ಸಾಧನಗಳಿಗೆ ಸಂಬಂಧಿಸಿದ ಪರಿಣಾಮಗಳ ಕುರಿತು ಬಳಕೆದಾರರು ಅಧಿಕೃತ ಪ್ರಕಟಣೆಗಳನ್ನು ಗಮನಿಸಬೇಕು. ವಿಶೇಷವಾಗಿ, ವೈ-ಫೈ ಮೂಲಕ ಮಾತ್ರ ಆ್ಯಪ್‌ ಬಳಸುವವರು ಅಥವಾ ಹಲವು ಸಾಧನಗಳಲ್ಲಿ ಒಂದೇ ಖಾತೆಯನ್ನು ಬಳಸುವವರು ಸಂಬಂಧಿತ ಸೇವೆಗಳ ಮಾರ್ಗಸೂಚಿಗಳನ್ನು ಪರಿಶೀಲಿಸುವುದು ಸೂಕ್ತ.