ನಟಿ ಆಶಿಕಾ ರಂಗನಾಥ್ ಮನೆಯಲ್ಲಿ ಯುವತಿ ಆತ್ಮಹತ್ಯೆ: 10 ದಿನಗಳ ನಂತರ ಬೆಳಕಿಗೆ ಬಂದ ಘಟನೆ

ಬೆಂಗಳೂರು: ಬೆಂಗಳೂರಿನಲ್ಲಿ ಸಂಬಂಧಿಕರ ಮನೆಯಲ್ಲಿ ಯುವತಿಯೊಬ್ಬಳು ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ನಡೆದಿದೆ. ಪಾಂಡುರಂಗ ನಗರದಲ್ಲಿರುವ ಸಂಬಂಧಿಕರ ಮನೆಯಲ್ಲಿ ಹಾಸನದ ನಿವಾಸಿ ಅಚಲಾ (22) ಪ್ರಾಣ ಕಳೆದುಕೊಂಡಿದ್ದಾರೆ.

ಪ್ರಸಿದ್ಧ ನಟಿ ಆಶಿಕಾ ರಂಗನಾಥ್ ಅವರಿಗೆ ಅಚಲಾ ಅವರು ಸೋದರ ಮಾವನ ಮಗಳಾಗಿದ್ದರು (ದೂರದ ಸಂಬಂಧಿ). ಅಚಲಾ ಇಂಜಿನಿಯರಿಂಗ್ ಪೂರ್ಣಗೊಳಿಸಿ ಬೆಂಗಳೂರಿನಲ್ಲಿ ಕೆಲಸ ಹುಡುಕುತ್ತಿದ್ದರು ಮತ್ತು ಆಗಾಗ್ಗೆ ಆಶಿಕಾ ಅವರ ಮನೆಗೆ ಬಂದು ಹೋಗುತ್ತಿದ್ದರು. ಈ ಸಂದರ್ಭದಲ್ಲಿ, ದೂರದ ಸಂಬಂಧಿ ಮಯಾಂಕ್ ಎಂಬ ಯುವಕನೊಂದಿಗೆ ಅಚಲಾ ಅವರಿಗೆ ಪರಿಚಯ ಬೆಳೆದಿತ್ತು.

ಮಯಾಂಕ್, ಅಚಲಾ ಅವರನ್ನು ಪ್ರೀತಿಸುತ್ತೇನೆ ಮತ್ತು ಮದುವೆಯಾಗುವುದಾಗಿ ಹೇಳಿ ಲೈಂಗಿಕವಾಗಿ ಕಿರುಕುಳ ನೀಡುತ್ತಿದ್ದನು. ಆಕೆ ವಿರೋಧಿಸಿದಾಗ, ಆಕೆಯ ಮೇಲೆ ಹಲ್ಲೆ ನಡೆಸಿ ಹೊಡೆಯುತ್ತಿದ್ದನು ಎಂದು ತಿಳಿದುಬಂದಿದೆ.

ಡ್ರಗ್ಸ್‌ಗೆ ದಾಸನಾಗಿದ್ದ ಮಯಾಂಕ್ ನಿರಂತರವಾಗಿ ಅಚಲಾ ಅವರನ್ನು ಪೀಡಿಸುತ್ತಿದ್ದ. ಇದಲ್ಲದೆ, ಮಯಾಂಕ್‌ಗೆ ಮತ್ತೊಬ್ಬ ಯುವತಿಯೊಂದಿಗೆ ಸಂಬಂಧವಿರುವ ವಿಷಯವೂ ಅಚಲಾ ಅವರಿಗೆ ತಿಳಿದುಬಂದಿದೆ. ಈ ಎಲ್ಲಾ ಬೆಳವಣಿಗೆಗಳಿಂದ ಮಾನಸಿಕವಾಗಿ ಕುಗ್ಗಿಹೋದ ಅಚಲಾ, ತನ್ನ ಜೀವನವನ್ನು ಮಯಾಂಕ್ ಹಾಳುಮಾಡಿದ್ದಾನೆ ಎಂದು ಭ್ರಮಿಸಿ, ಸುಮಾರು 10 ದಿನಗಳ ಹಿಂದೆ ಆಶಿಕಾ ರಂಗನಾಥ್ ಅವರ ಮನೆಯಲ್ಲಿ ನೇಣು ಹಾಕಿಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

ಮಾನ ನಷ್ಟವಾಗಬಹುದೆಂದು ಭಾವಿಸಿ, ಅಚಲಾ ಅವರ ಪೋಷಕರು ಮತ್ತು ಸಂಬಂಧಿಕರು ಈ ವಿಷಯವನ್ನು ಗೌಪ್ಯವಾಗಿಟ್ಟು ಅಂತ್ಯಸಂಸ್ಕಾರ ನೆರವೇರಿಸಿದ್ದಾರೆ. ಆದರೆ, ಈ ವಿಷಯವು ಭಾನುವಾರ ಒಮ್ಮೆಲೇ ಬಹಿರಂಗವಾಗಿದೆ.

ಬೆಂಗಳೂರು ಪಟ್ಟೇನಹಳ್ಳಿ ಪೊಲೀಸರು ಮಯಾಂಕ್ ಮತ್ತು ಆತನ ತಾಯಿ ಮೈನಾ ವಿರುದ್ಧ ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ. ಮಯಾಂಕ್‌ ನನ್ನು ಕೂಡಲೇ ಬಂಧಿಸಬೇಕು ಎಂದು ಅಚಲಾ ಕುಟುಂಬವು ಒತ್ತಾಯಿಸಿದೆ.