“ನನಗೇನೂ ಗೊತ್ತೇ ಇಲ್ಲ” ; ‘Me too’ ಬಗ್ಗೆ ಬೇಜವಾಬ್ದಾರಿ ಹೇಳಿಕೆ ಕೊಟ್ಟರಾ ರಜನಿಕಾಂತ್?

ಇಡೀ ಭಾರತೀಯ ಚಿತ್ರರಂಗವೇ ಮಲಯಾಳಂ ಚಲನಚಿತ್ರೋದ್ಯಮದ “Me too” ವಿವಾದದ ಬಗ್ಗೆ ಮಾತನಾಡಿಕೊಳ್ಳುತ್ತಿರುವಾಗ ಇತ್ತ “ಸೂಪರ್ ಸ್ಟಾರ್” ಬಿರುದಾಂಕಿತ ರಜನಿಕಾಂತ್ ಅತ್ಯಂತ ಬೇಜವಾಬ್ದಾರಿ ಹೇಳಿಕೆ ನೀಡಿದ್ದು ಅಭಿಮಾನಿಗಳು ಮತ್ತು ಚಿತ್ರರಂಗದ ಮಂದಿಯೇ ಹುಬ್ಬೇರಿಸುವಂತೆ ಪ್ರತಿಕ್ರಿಯೆ ನೀಡಿದ್ದಾರೆ.

ಮಲಯಾಳಂ ಚಿತ್ರರಂಗದ ಅನೇಕ ನಟಿಯರು ತಮಗಾಗಿರುವ ಲೈಂಗಿಕ ಕಿರುಕುಳದ ಬಗ್ಗೆ ಎಲ್ಲೆಡೆ ಹೇಳಿಕೊಳ್ಳುತ್ತಿರುವಾಗ, ಇದೇ ಪ್ರಕರಣದ ಬಗ್ಗೆ ಹೇಮಾ ಸಮಿತಿ ನೀಡಿದ ವರದಿ (Hema Committee Report) ಬಗ್ಗೆ ಇದೀಗ ದೇಶದೆಲ್ಲೆಡೆ ಚರ್ಚೆ ಆಗ್ತಿದೆ. ಈ ವಿಚಾರದಲ್ಲಿ ಇಡೀ ಕೇರಳದಲ್ಲಿ ದೊಡ್ಡ ಬಿರುಗಾಳಿಯೇ ಎದ್ದಿರುವಾಗ ನಟ ರಜನಿಕಾಂತ್ “ಈ ಬಗ್ಗೆ ನನಗೆ ಗೊತ್ತೇ ಇಲ್ಲ” ಎಂದು ಹೇಳಿಕೆ ನೀಡಿದ್ದಾರೆ.

ಭಾನುವಾರ ಹೇಮಾ ಸಮಿತಿ ವರದಿ ಕುರಿತು ತಮಿಳುನಾಡಿನ ಸೂಪರ್ ಸ್ಟಾರ್ ರಜನಿಕಾಂತ್ ಅವರನ್ನು ಸುದ್ದಿಗಾರರು ಪ್ರಶ್ನಿಸಿದ್ದಾರೆ. ಆದರೆ ನಟ ರಜನಿಕಾಂತ್ ಈ ಬಗ್ಗೆ ನನಗೆ ಯಾವುದೂ ಗೊತ್ತಿಲ್ಲ, ನನಗೇನೂ ತಿಳಿದಿಲ್ಲ ಎಂದಿದ್ದಾರೆ. ಅಲ್ಲದೇ ತಮಿಳು ಚಿತ್ರರಂಗಕ್ಕೂ ಇಂತಹದ್ದೊಂದು ಕಮಿಟಿ ಅಗತ್ಯವಿದೆಯೋ? ಇಲ್ಲವೋ? ಅನ್ನೋದು ಕೂಡ ನನಗೆ ತಿಳಿದಿಲ್ಲ ಎಂದಿರುವುದು ತೀವ್ರ ಚರ್ಚೆಗೆ ಗ್ರಾಸವಾಗಿದೆ.

ಇನ್ನೊಂದು ಕಡೆ ತೆಲುಗು ಚಿತ್ರರಂಗದ ಬಗ್ಗೆ ನಟಿ ಸಮಂತಾ, ತಮಿಳು ಚಿತ್ರರಂಗದ ಬಗ್ಗೆ ನಟ ವಿಶಾಲ್ ಅವರು ನಮ್ಮ ನಮ್ಮ ಚಿತ್ರರಂಗಕ್ಕೂ ಇಂತಹದ್ದೊಂದು ಕಮಿಟಿ ಅಗತ್ಯವಿದೆ ಎಂದು ದನಿಗೂಡಿಸಿದ್ದಾರೆ. ಚಿತ್ರರಂಗದಲ್ಲಿ ಹೆಣ್ಣು ಮಕ್ಕಳು ಅನುಭವಿಸುತ್ತಿರುವ ಸಂಕಷ್ಟಗಳು ಮತ್ತು ಲೈಂಗಿಕ ಕಿರುಕುಳದ ಬಗ್ಗೆ ಸಮಿತಿ ರಚನೆಯಾಗಬೇಕು ಎಂದು ಎಂದು ದೊಡ್ಡ ಕೂಗು ಎದ್ದಿದ್ದು, ಇದರ ಬಗ್ಗೆ ರಜನಿಕಾಂತ್ ತೀರಾ ಬೇಜವಾಬ್ದಾರಿ ಹೇಳಿಕೆ ನೀಡಿದ್ದಾರೆ.

ನಟಿಯರಾದ ರಾಧಿಕಾ ಶರತ್​ ಕುಮಾರ್​, ಖುಷ್ಬೂ, ರಂಜನಿ, ಅಮಲಾಪಾಲ್, ಸಮಂತಾ ಕೂಡ ಈ ವರದಿಯ ಬಗ್ಗೆ ತಮ್ಮ ಅಭಿಪ್ರಾಯಗಳನ್ನು ಹಂಚಿಕೊಂಡಿದ್ದಾರೆ. ಆದ್ರೆ, ಕೇರಳದ ಹಿರಿಯ ನಟರಾದ ಮೋಹನ್ ಲಾಲ್ ಮತ್ತು ಮಮ್ಮುಟ್ಟಿ ಈ ವಿಷಯದ ಬಗ್ಗೆ ಮೌನವಾಗಿದ್ದವರು, ತೀವ್ರ ಟೀಕೆಗಳು ಬಂದ ಬಳಿಕ ಒಬ್ಬರ ಹಿಂದೆ ಒಬ್ಬರಂತೆ ಮೋಹನ್ ಲಾಲ್ ಮತ್ತು ಮಮ್ಮುಟ್ಟಿ ಹೇಮಾ ಸಮಿತಿ ವರದಿಯಲ್ಲಿ ತಮ್ಮ ಅಭಿಪ್ರಾಯಗಳನ್ನು ಹಂಚಿಕೊಂಡಿದ್ದಾರೆ.