ಸಾವಯವ ಆಹಾರಗಳು ಜನಪ್ರಿಯವಾಗುತ್ತಿರುವುದರಿಂದ ಸಾವಯವ ಡೈರಿ ಉತ್ಪನ್ನಗಳು ಹೆಚ್ಚು ಹೆಚ್ಚು ಮಾರುಕಟ್ಟೆಗೆ ಬರುತ್ತಿರುವುದನ್ನು ನಾವು ನೋಡುತ್ತಿದ್ದೇವೆ. ಕೆಲವು ವರ್ಷಗಳಿಂದ, ಆರೋಗ್ಯ, ಫಿಟ್‌ನೆಸ್ ಮತ್ತು ಸಾವಯವವು ಪೌಷ್ಟಿಕಾಂಶ ಮತ್ತು ಆಹಾರದ ಪ್ರಪಂಚಕ್ಕೆ ಸಮಾನಾರ್ಥಕವಾಗಿದೆ. ಸಾಂಕ್ರಾಮಿಕ ರೋಗವು ಆರೋಗ್ಯಕರ ಜೀವನಶೈಲಿ ಮತ್ತು ಆಹಾರದ ಆಯ್ಕೆಗಳನ್ನು ಮಾಡುವ ಮಹತ್ವದ ಅರಿವನ್ನು ಖಂಡಿತವಾಗಿಯೂ ಹೆಚ್ಚಿಸಿದೆ. ಇತ್ತೀಚೆಗೆ ವರದಿಯಾದ ಮಾಹಿತಿಯ ಪ್ರಕಾರ, ಕಳೆದ ಕೆಲವು ವರ್ಷಗಳಿಂದ ನಿರಂತರವಾಗಿ ಹೆಚ್ಚುತ್ತಿರುವ ಸಾವಯವ ವಸ್ತುಗಳ ಬೇಡಿಕೆಯು ಸಾಂಕ್ರಾಮಿಕ ರೋಗದ ಹಿನ್ನೆಲೆಯಲ್ಲಿ ತೀವ್ರ ಇಳಿಕೆಯನ್ನು ಕಂಡಿದೆ. ಸಾವಯವ ಆಹಾರಗಳು ರಾಷ್ಟ್ರದಾದ್ಯಂತ ಹೆಚ್ಚೆಚ್ಚು ಜನಪ್ರಿಯತೆಯನ್ನು ಗಳಿಸಿ ಕೊಳ್ಳುತ್ತಿರುವುದರಿಂದ ನಮ್ಮ ದೈನಂದಿನ ಆಹಾರ ಮತ್ತು ಪೌಷ್ಟಿಕಾಂಶದ ಸೇವನೆಯ ದೊಡ್ಡ ಭಾಗವಾಗಿರುವ ಸಾವಯವ ಡೈರಿ ಉತ್ಪನ್ನಗಳ ಬೇಡಿಕೆಯು ಹೆಚ್ಚುತ್ತಿರುವುದು ಮಾತ್ರವಲ್ಲದೆ ಅವುಗಳು ದೊಡ್ಡಮಟ್ಟದಲ್ಲಿ ಹೊರಬರುತ್ತಿರುವುದನ್ನು ನಾವು ನೋಡುತ್ತಿದ್ದೇವೆ.

ಸಾವಯವ ಹಾಲು ಸಾಂಪ್ರದಾಯಿಕ ಹಾಲಿಗಿಂತ ಆರೋಗ್ಯಕರ

ಸಾವಯವ ಹಾಲು ಸಾಂಪ್ರದಾಯಿಕ ಹಾಲಿಗಿಂತ ಆರೋಗ್ಯಕರವಾಗಿದೆ. ಏಕೆಂದರೆ ಇಲ್ಲಿ ಹಸುಗಳು ಸಾವಯವ ಆಹಾರದ ಮೇವನ್ನು ತಿನ್ನುತ್ತವೆ. ಮತ್ತು ಒತ್ತಡ-ಮುಕ್ತ ವಾತಾವರಣವನ್ನು ಹೊಂದಿರುತ್ತವೆ. ಸಾವಯವ ಹಾಲು ಒಮೆಗಾ-3 ಕೊಬ್ಬಿನಾಮ್ಲಗಳು ಮತ್ತು ರೋಗ-ಹೋರಾಟದ ಉತ್ಕರ್ಷಣ ನಿರೋಧಕ (Antioxidant)ಗಳ ಹೆಚ್ಚಿನ ಸಂಯೋಜನೆಯನ್ನು ಹೊಂದಿರುತ್ತದೆ. ಒಮೆಗಾ-6 ಮತ್ತು ಒಮೆಗಾ-3 ಕೊಬ್ಬಿನಾಮ್ಲಗಳ ಕಡಿಮೆ ಅನುಪಾತದ ಪರಿಣಾಮವಾಗಿ, ಸಾವಯವ ಹಾಲು ಸಾಮಾನ್ಯ ಹಾಲಿಗಿಂತ ಆರೋಗ್ಯಕರವಾಗಿರುತ್ತದೆ. ಒಮೆಗಾ -6 ಕೊಬ್ಬಿನಾಮ್ಲಗಳು ಹೃದ್ರೋಗದೊಂದಿಗೆ ಸಂಬಂಧಿಸಿವೆ ಎಂಬುದಕ್ಕೆ ಸಾಕಷ್ಟು ಪುರಾವೆಗಳಿವೆ, ಜೊತೆಗೆ ಹೆಚ್ಚಿನ ಪ್ರಮಾಣದಲ್ಲಿ ಸೇವಿಸಿದಾಗ ಕ್ಯಾನ್ಸರ್, ಉರಿಯೂತ ಮತ್ತು ಸ್ವಯಂ ನಿರೋಧಕ ಅಸ್ವಸ್ಥತೆಗಳು (Autoimmune disorders) ಕಾಣಿಸಿಕೊಳ್ಳುವ ಸಾಧ್ಯತೆ ಹೆಚ್ಚಿದೆ.

ನಿಯಮಿತ ಹಾಲಿನ ಉತ್ಪಾದನೆಯ ಸಮಯದಲ್ಲಿ ಹಸುಗಳಿಗೆ ಹಾರ್ಮೋನ್‌ಗಳೊಂದಿಗೆ ಚಿಕಿತ್ಸೆ ನೀಡಲಾಗುತ್ತದೆ. ಇದು ಮಕ್ಕಳ ಮೇಲೆ ಗಮನಾರ್ಹ ಪರಿಣಾಮ ಬೀರುತ್ತದೆ. ಇದು ಆರಂಭಿಕ ಪ್ರೌಢಾವಸ್ಥೆಗೆ ಕಾರಣವಾಗುತ್ತದೆ ಮತ್ತು ದೀರ್ಘಾವಧಿಯಲ್ಲಿ ಆರೋಗ್ಯದ ಅಪಾಯಗಳನ್ನು ಉಂಟು ಮಾಡುತ್ತದೆ. ಸಾವಯವವಲ್ಲದ ಹಾಲಿಗೆ ಹೋಲಿಸಿದರೆ, ಸಾವಯವ ಹಾಲಿನಲ್ಲಿ ಕಬ್ಬಿಣ, ವಿಟಮಿನ್ ಇ, ಸೆಲೆನಿಯಮ್ ಮತ್ತು ಕ್ಯಾರೊಟಿನಾಯ್ಡ್‌ಗಳು ಸೇರಿದಂತೆ ಪೌಷ್ಟಿಕಾಂಶದ ಖನಿಜಗಳು ಹೆಚ್ಚಾಗಿರುತ್ತವೆ. ಈ ಪೋಷಕಾಂಶಗಳು ಸ್ವತಂತ್ರ ರಾಡಿಕಲ್‌ಗಳ ವಿರುದ್ಧದ ಹೋರಾಟದಲ್ಲಿ ಸಹಾಯ ಮಾಡುತ್ತವೆ. ಉದಾಹರಣೆಗೆ, ನಮ್ಮ ಜೀವಕೋಶಗಳಲ್ಲಿನ ಆಕ್ಸಿಡೇಟಿವ್ ಹಾನಿ, ಪರಿಧಮನಿಯ ಕಾಯಿಲೆ(Coronary Artery Disease) ಮತ್ತು ಕೆಲವು ಸಂದರ್ಭಗಳಲ್ಲಿ ಕ್ಯಾನ್ಸರ್‌ಗೆ ಕಾರಣವಾಗಬಹುದು. ಸಾವಯವ ಹಾಲಿನಲ್ಲಿ ಸಂಯೋಜಿತ ಲಿನೋಲಿಯಿಕ್ ಆಸಿಡ್ (ಸಿಎಲ್‌ಎ) ಅಧಿಕವಾಗಿದೆ. ಇದು ಕೊಬ್ಬಿನಾಮ್ಲವಾಗಿದೆ. ಇದು ಆರೋಗ್ಯಕರ ಪ್ರತಿರಕ್ಷಣಾ ವ್ಯವಸ್ಥೆಯ (Immune system) ಬೆಳವಣಿಗೆಗೆ ಸಹಾಯ ಮಾಡುತ್ತದೆ ಮತ್ತು ಬೊಜ್ಜು, ಆಸ್ಟಿಯೊಪೊರೋಸಿಸ್, ಕ್ಯಾನ್ಸರ್ ಮತ್ತು ಇತರ ಕಾಯಿಲೆಗಳ ಅಪಾಯವನ್ನು ಕಡಿಮೆ ಮಾಡುತ್ತದೆ.

ಹೆಚ್ಚುವರಿಯಾಗಿ, ಸಾವಯವ ಡೈರಿ ಉತ್ಪಾದನೆಯಲ್ಲಿ ಆಂಟಿಬಯೋಟಿಕ್ ಗಳನ್ನು ನಿಷೇಧಿಸಲಾಗಿದೆ ಮತ್ತು ಉತ್ತಮ ಕಾರಣಕ್ಕಾಗಿ ಪ್ರಾಣಿಗಳಿಗೆ ಬಳಸುವ ಆಂಟಿಬಯೋಟಿಕ್ ಗಳು ಮಾನವರಲ್ಲಿ ಆಂಟಿಬಯೋಟಿಕ್ ಪ್ರತಿರೋಧಕ್ಕೆ ಕಾರಣವಾಗಿ ರೋಗಗಳಿಗೆ ಕಾರಣವಾಗಬಹುದು. ಇದು ಜನರಿಗೆ ಹರಡುತ್ತದೆ. ಆಂಟಿಬಯೋಟಿಕ್ ಪ್ರತಿರೋಧವನ್ನು ನಮ್ಮ ದಿನದ ಅತ್ಯಂತ ತುರ್ತು ಮಾನವ ಆರೋಗ್ಯ ಸಮಸ್ಯೆಗಳಲ್ಲಿ ಒಂದೆಂದು ಕರೆಯಲಾಗಿದೆ. ಇದು ಪ್ರತಿ ವರ್ಷ ಸಾವಿರಾರು ಸಾವುಗಳಿಗೆ ಕಾರಣವಾಗುತ್ತದೆ. ಸಾವಯವ ಕೃಷಿ ವ್ಯವಸ್ಥೆಗಳು ಆರೋಗ್ಯಕರ ಆಹಾರದ ಸುಸ್ಥಿರ ಉತ್ಪಾದನೆಗೆ ಕೊಡುಗೆ ನೀಡುತ್ತವೆ ಎಂದು ಸಂಶೋಧನೆ ತೋರಿಸುತ್ತದೆ. 

ಈ ಆರೋಗ್ಯ ಮತ್ತು ಸುಸ್ಥಿರ ಉತ್ಪಾದನಾ ಪ್ರಯೋಜನಗಳ ಪರಿಣಾಮವಾಗಿ ಸಾವಯವ ಹಾಲು ಮತ್ತು ಇತರ ಡೈರಿ ಉತ್ಪನ್ನಗಳು ಹೆಚ್ಚು ಜನಪ್ರಿಯವಾಗುತ್ತಿವೆ. ಸಾವಯವ ಮತ್ತು ಸಾಂಪ್ರದಾಯಿಕ ಹಾಲನ್ನು ಹೋಲಿಸುವ ಕೆಲವು ಅಧ್ಯಯನಗಳು ನಡೆದಿವೆಯಾದರೂ, ಅವುಗಳ ದೀರ್ಘಕಾಲೀನ ಆರೋಗ್ಯದ ಪರಿಣಾಮಗಳನ್ನು ನಿರ್ಧರಿಸಲು ಹೆಚ್ಚಿನ ಅಧ್ಯಯನದ ಅಗತ್ಯವಿದೆ. ಒಟ್ಟಾರೆ ಪೌಷ್ಟಿಕಾಂಶದ ಪ್ರೊಫೈಲ್‌ಗಳ ಕಾರಣದಿಂದಾಗಿ ಸಾವಯವ ಆಹಾರಗಳು ಹೆಚ್ಚು ಪೌಷ್ಟಿಕವಾಗಿವೆ. ಇದಲ್ಲದೆ, ದೇಶದ ಆರ್ಥಿಕ ಬೆಳವಣಿಗೆ ಮತ್ತು ಗ್ರಾಹಕರಲ್ಲಿ ಹೆಚ್ಚುತ್ತಿರುವ ಆದಾಯವು ಸಾವಯವ ಪರ್ಯಾಯಗಳ ಅಳವಡಿಕೆಯನ್ನು ವೃದ್ಧಿಸಿದೆ.

ಹಾಲು ಮಾನವ ಹೆಚ್ಚು ಬಳಕೆ ಮಾಡುವ ಆಹಾರ ವಸ್ತುವಾಗಿದೆ. ಗುಣಮಟ್ಟದ ಹಾಲು ಉತ್ಪಾದನೆಯು ಹಸುವಿನ ಆರೋಗ್ಯವನ್ನು ಅವಲಂಬಿಸಿರುತ್ತದೆ, ಹಸುಗಳು ಆರೋಗ್ಯವಾಗಿರಬೇಕಾದರೆ ಎಲ್ಲಾ ಪೋಷಕಾಂಶಗಳನ್ನೊಳಗೊಂಡ ಸಮತೋಲನ ಆಹಾರ ನೀಡುವುದು ಅತ್ಯವಶ್ಯಕವಾಗಿರುತ್ತದೆ. ಹಸು ತಿನ್ನುವ ಆಹಾರದಲ್ಲಿರುವ ಅಂಶಗಳು ಹಾಲಿನಲ್ಲಿ ಬರುವುದರಿಂದ ಹಸುವಿಗೆ ನೀಡುವ ಆಹಾರವು ಗುಣಮಟ್ಟದಿಂದ ಕೂಡಿರುವುದು ಅವಶ್ಯಕ. ಅಕ್ಷಯಕಲ್ಪವು ರೈತರ, ಗ್ರಾಹಕರ ಮತ್ತು ಹಸುವಿನ ಆರೋಗ್ಯವನ್ನು ಗಮನದಲ್ಲಿಟ್ಟುಕೊಂಡು ಆಂಟಿಬಯೋಟಿಕ್, ಅಫ್ಲಾಟಾಕ್ಸಿನ್‌ ಹಾಗು ಬ್ರುಸೆಲ್ಲಾ ಮುಕ್ತ ಹಾಲು ಒದಗಿಸುತ್ತದೆ.

ಆಂಟಿಬಯೋಟಿಕ್  ಮುಕ್ತ ಹಾಲು

ಪ್ರಸ್ತುತ ದಿನಗಳಲ್ಲಿ, ಜಾನುವಾರುಗಳ ಚಿಕಿತ್ಸೆಗಾಗಿ ಮತ್ತು ರೋಗನಿರೋಧಕ ಉದ್ದೇಶಗಳಿಗಾಗಿ ಪಶುವೈದ್ಯಕೀಯ ವಲಯದಲ್ಲಿ ವಿವೇಚನಾ ರಹಿತವಾಗಿ ವಿವಿಧ ರೀತಿಯ 60,000 ಟನ್ ಗಳಿಗೂ ಅಧಿಕ ಆಂಟಿಬಯೋಟಿಕ್ (ಪ್ರತಿಜೀವಕ) ಗಳನ್ನು ಪ್ರತಿ ವರ್ಷ ಪ್ರಪಂಚದಾದ್ಯಂತ ಬಳಸಲಾಗುತ್ತಿದೆ. ಇವುಗಳ ಬಳಕೆಯಿಂದಾಗಿ ಜಾಗತಿಕವಾಗಿ, ಔಷಧ-ನಿರೋಧಕ ಕಾಯಿಲೆಗಳು ಪ್ರತಿ ವರ್ಷ 7,00,000 ಜನರನ್ನು ಬಲಿ ತೆಗೆದುಕೊಳ್ಳುತ್ತಿವೆ. WHO ಪ್ರಕಾರ, “ಔಷಧ-ನಿರೋಧಕ ಕಾಯಿಲೆಗಳ ವಿರುದ್ಧ ಯಾವುದೇ ಕ್ರಮವನ್ನು ತೆಗೆದು ಕೊಳ್ಳದಿದ್ದರೆ, 2050 ರ ವೇಳೆಗೆ ಪ್ರತಿ ವರ್ಷ 10 ಮಿಲಿಯನ್ ಸಾವುಗಳನ್ನು ಉಂಟು ಮಾಡಬಹುದು ಎಂದು ಅಂದಾಜಿಸಲಾಗಿದೆ. ಆರೋಗ್ಯ ವೆಚ್ಚಗಳು ಹೆಚ್ಚಾಗುವುದರಿಂದ ಜಾಗತಿಕ ಆರ್ಥಿಕತೆಗೆ ಹಾನಿಯಾಗಬಹುದು.”ಇತ್ತೀಚೆಗೆ ಮಾನವರಿಗೆ ಹೋಲಿಸಿದರೆ ಪ್ರಾಣಿಗಳಲ್ಲಿ ಆ್ಯಂಟಿಬಯೋಟಿಕ್ ಗಳ ಜಾಗತಿಕ ಬಳಕೆಯು ದ್ವಿಗುಣವಾಗಿದೆ, ಭಾರತದಲ್ಲಿ ಇದರ ಪರಿಸ್ಥಿತಿ ಭಿನ್ನವಾಗೇನಿಲ್ಲ. 

ಜಾನುವಾರುಗಳ ರೋಗಗಳಿಗೆ ಚಿಕಿತ್ಸೆ ನೀಡುವಲ್ಲಿ, ಹಾಲು ಬತ್ತಿಸುವ ವಿಧಾನದಲ್ಲಿ ಮತ್ತು ಕೆಚ್ಚಲ ಬಾವುಗಳ ಚಿಕಿತ್ಸೆಯಲ್ಲಿ ಆಂಟಿಬಯೋಟಿಕ್ ಗಳನ್ನು ವಿವೇಚನಾ ರಹಿತವಾಗಿ ಬಳಸುವುದರಿಂದ ಅವುಗಳ ಅವಶೇಷಗಳು ಜಾನುವಾರುಗಳ ಅಂಗಾಂಶಗಳಲ್ಲಿ ಸಂಗ್ರಹವಾಗುತ್ತವೆ. ಜಾನುವಾರುಗಳಿಗೆ ಆಂಟಿಬಯೋಟಿಕ್ ಗಳನ್ನು ನೀಡಿದ ನಂತರ, ಹೆಚ್ಚಿನ ಔಷಧಗಳು ಜೀರ್ಣಕ್ರಿಯೆಯ ಮೂಲಕ ಮೂತ್ರದಲ್ಲಿ ಮತ್ತು ಸ್ವಲ್ಪ ಮಟ್ಟಿಗೆ ಮಲದಿಂದ ಹೊರಹಾಕಲ್ಪಡುತ್ತವೆ. ಆದಾಗ್ಯೂ, ಔಷಧಿಗಳ ಭಾಗವು ಹಾಲು ಮತ್ತು ಮಾಂಸದಲ್ಲಿ ನಿರ್ದಿಷ್ಟ ಅವಧಿಯವರೆಗೆ ಅವಶೇಷಗಳಾಗಿ ಉಳಿಯುತ್ತವೆ. ಹಾಲಿನಲ್ಲಿರುವ ಆ್ಯಂಟಿಬಯೋಟಿಕ್ ಅವಶೇಷಗಳನ್ನು ಪತ್ತೆ ಹಚ್ಚುವ ಕಳಪೆ ಸೌಲಭ್ಯಗಳು ಮತ್ತು ಸರಿಯಾದ ಮೇಲ್ವಿಚಾರಣಾ ವ್ಯವಸ್ಥೆಯ ಕೊರತೆಯಿಂದಾಗಿ ಅವು ಮಾನವನ ದೇಹವನ್ನು ಸೇರಿ ಆರೋಗ್ಯದ ಮೇಲೆ ಹಾನಿಕಾರಕ ಪರಿಣಾಮಗಳನ್ನು ಬೀರುತ್ತವೆ. 

ಜಾನುವಾರುಗಳಲ್ಲಿ ಹಾನಿಕಾರಕ ಬ್ಯಾಕ್ಟೀರಿಯಾಗಳು ದೇಹದ ರಕ್ಷಣೆಯನ್ನು ಭೇದಿಸಿ ಸೋಂಕನ್ನು ಉಂಟುಮಾಡುತ್ತವೆ. ಆ್ಯಂಟಿಬಯೋಟಿಕ್ ಗಳನ್ನು ಬಳಸಿ ಅಂತಹ ಬ್ಯಾಕ್ಟೀರಿಯಾಗಳನ್ನು ಕೊಲ್ಲಲಾಗುತ್ತದೆ. ಆದರೆ ಕಡಿಮೆ ಸಂಖ್ಯೆಯ ಆ್ಯಂಟಿಬಯೋಟಿಕ್ ಗಳು ಸ್ವಾಭಾವಿಕವಾಗಿ ಔಷಧ-ನಿರೋಧಕವಾಗಿರುತ್ತವೆ. ಹೀಗೆ ಚಿಕಿತ್ಸೆ ಮತ್ತು ಆಹಾರದ ಮೂಲಕ ಕಡಿಮೆ ಪ್ರಮಾಣದ ಆ್ಯಂಟಿಬಯೋಟಿಕ್ ಗಳು ದಿನೇ ದಿನೇ  ಹಸುಗಳ ದೇಹವನ್ನು ಸೇರಿ ಹೆಚ್ಚು ಹೆಚ್ಚು ಔಷಧಿ ನಿರೋಧಕ ಶಕ್ತಿಯನ್ನು ಬೆಳೆಸಿಕೊಳ್ಳುತ್ತವೆ. ಹೀಗೆ ವಿವಿಧ ರೀತಿಯ ಆ್ಯಂಟಿಬಯೋಟಿಕ್ ಗಳನ್ನು ವಿವೇಚನಾ ರಹಿತವಾಗಿ ಪದೇ ಪದೇ ಬಳಸಿದಾಗ ಔಷಧ-ನಿರೋಧಕ ಬ್ಯಾಕ್ಟೀರಿಯಾಗಳ ಸಂಖ್ಯೆ ಹೆಚ್ಚಾಗುತ್ತವೆ. ಹಸುಗಳ ದೇಹದಲ್ಲಿ ಈ ರೀತಿಯ ಔಷಧ-ನಿರೋಧಕ ಬ್ಯಾಕ್ಟೀರಿಯಾಗಳ ಸಂಖ್ಯೆ ಹೆಚ್ಚಾದಾಗ, ಯಾವುದೇ ಕಾಯಿಲೆಗಳು ಬಂದಾಗ ಯಾವುದೇ ಆ್ಯಂಟಿಬಯೋಟಿಕ್ ಗಳನ್ನು ನೀಡಿದರು ಸಹ ಅವು ಪರಿಣಾಮ ಬೀರುವುದಿಲ್ಲ. ಹೀಗಾಗಿ ಮುಂದೊಂದು ದಿನ ಹಸುಗಳಿಗೆ ಯಾವುದೇ ರೀತಿಯ ಕಾಯಿಲೆಗಳು ಬಂದು  ಆ್ಯಂಟಿಬಯೋಟಿಕ್ ಗಳನ್ನು ನೀಡಿದರೂ ಅವು  ಕಾರ್ಯನಿರ್ವಹಿಸದೇ ಮರಣ ಹೊಂದುತ್ತವೆ. 

ಹಾಲಿನಲ್ಲಿರುವ ಆಂಟಿಬಯೋಟಿಕ್ ಅವಶೇಷಗಳ ನಿಯಂತ್ರಣವು ಬಹು ಮುಖ್ಯವಾಗಿದೆ. ರಾಸುಗಳ ಚಿಕಿತ್ಸೆಗಿಂತ ಅವುಗಳಿಗೆ ಕಾಯಿಲೆ ಬರದಂತೆ ನೋಡಿಕೊಳ್ಳುವುದು ಉತ್ತಮ.  ಈ ನಿಟ್ಟಿನಲ್ಲಿ ಅಕ್ಷಯಕಲ್ಪ ಸಂಸ್ಥೆಯು ತನ್ನ ರೈತರಿಗೆ ಪಶುವೈದ್ಯಕೀಯ ಸೇವೆಯನ್ನು ಒದಗಿಸುತ್ತಿದ್ದು, ಆ್ಯಂಟಿಬಯೋಟಿಕ್ ಬಳಕೆ ಮತ್ತು ಹಾಲು ಹಿಂತೆಗೆದುಕೊಳ್ಳುವ ಅವಧಿ ಬಗ್ಗೆ ಮಾಹಿತಿ ನೀಡುತ್ತಿದೆ. ಪ್ರಾಥಮಿಕವಾಗಿ ರೈತರು ಹಸುಗಳ ಚಿಕಿತ್ಸೆಯಲ್ಲಿ ಮನೆ ಮದ್ದು ಬಳಕೆ ಮಾಡುವುದರ ಬಗ್ಗೆ ತರಬೇತಿ ನೀಡುತ್ತಿದೆ. ಹಾಲಿನಲ್ಲಿ  ಆ್ಯಂಟಿಬಯೋಟಿಕ್ ಅಂಶಗಳು ಸೇರದಂತೆ ನೋಡಿಕೊಳ್ಳುವ ಮಹತ್ತರವಾದ ಜವಾಬ್ದಾರಿ ರೈತರ ಮೇಲಿದೆ. 

 ಬ್ರುಸೆಲ್ಲಾ ಮುಕ್ತ ಹಾಲು

ಬ್ರೂಸೆಲೋಸಿಸ್ ಜಾಗತಿಕವಾಗಿ ಪ್ರಪಂಚದಾದ್ಯಂತ ಕಂಡುಬರುತ್ತಿರುವ, ಹೆಚ್ಚಿನ ದೇಶಗಳಲ್ಲಿ ವರದಿಯಾಗುತ್ತಿರುವ ರೋಗವಾಗಿದೆ. ಬ್ರುಸೆಲ್ಲಾ ರೋಗವು ಪ್ರಾಣಿಜನ್ಯ ರೋಗವಾಗಿದ್ದು, ವಿವಿಧ ಬ್ರುಸೆಲ್ಲಾ ಜಾತಿಯಾ ಬ್ಯಾಕ್ಟೀರಿಯಾಗಳಿಂದ ಹರಡುವ ರೋಗವಾಗಿದೆ. ರೋಗಗ್ರಸ್ತ ಪ್ರಾಣಿಗಳ ಸಂಪರ್ಕದಲ್ಲಿರುವ ಮನುಷ್ಯರಿಗೆ ಅವುಗಳ ಉಸಿರಾಟ, ಜೊಲ್ಲು ಮತ್ತು ಹಾಲನ್ನು ಸೇವಿಸುವುದರ ಮೂಲಕ ರೋಗ ಹರಡುತ್ತದೆ. ಬ್ರೂಸೆಲೋಸಿಸ್ ಮಾನವರ ಸಂತಾನೋತ್ಪತ್ತಿ ವ್ಯವಸ್ಥೆ, ಹೃದಯ, ಯಕೃತ್ತು ಮತ್ತು ಕೇಂದ್ರ ನರಮಂಡಲ ಸೇರಿದಂತೆ ದೇಹದ ಯಾವುದೇ ಭಾಗದ ಮೇಲೆ ಪರಿಣಾಮ ಬೀರಬಹುದು. ಪುರುಷರಿಗೆ ಪುರುಷತ್ವ ನಾಶವಾಗಬಹುದು, ಮಹಿಳೆಯರಿಗೆ ಗರ್ಭಪಾತವಾಗಬಹುದು. ವಯಸ್ಸಾದವರಿಗೆ ಮೂಳೆ ಅಥವಾ ಸಂಧಿ ನೋವು ಕಾಣಿಸಿಕೊಳ್ಳಬಹುದು. ಈ ರೋಗವು ಅನೇಕ ವಿಲಕ್ಷಣ ರೂಪಗಳಲ್ಲಿ ಕಂಡು ಬರಬಹುದು, ಅನೇಕ ರೋಗಿಗಳಲ್ಲಿ ರೋಗ ಲಕ್ಷಣಗಳು ಸೌಮ್ಯವಾಗಿರುತ್ತವೆ. ಅದರಿಂದಾಗಿ ರೋಗ ನಿರ್ಣಯವನ್ನು ಮಾಡುವುದು ಕಷ್ಟಸಾಧ್ಯವಾಗುತ್ತದೆ. ದೀರ್ಘಕಾಲದ ಬ್ರೂಸೆಲೋಸಿಸ್ ದೇಹದಾದ್ಯಂತ ತೊಡಕುಗಳನ್ನು ಉಂಟು ಮಾಡಬಹುದು. ಹಸಿ ಹಾಲನ್ನು ಕುಡಿಯುವುದರಿಂದ ಈ ಕಾಯಿಲೆ ಬರುತ್ತದೆ, ಹಾಲನ್ನು ಚೆನ್ನಾಗಿ ಕಾಯಿಸಿ ಕುಡಿಯುವುದರಿಂದ ಬರುವುದಿಲ್ಲ. 

ಜಾನುವಾರುಗಳಲ್ಲಿ ಬ್ರೂಸೆಲೋಸಿಸ್ ಒಂದು ವ್ಯಾಪಕವಾದ ಸಂತಾನೋತ್ಪತ್ತಿ ಕಾಯಿಲೆಯಾಗಿದ್ದು, ಸಾಮಾನ್ಯವಾಗಿ ಗರ್ಭಧರಿಸಿದ ಹಸುಗಳಲ್ಲಿ 7 ಅಥವಾ 8 ನೇ ತಿಂಗಳಿನಲ್ಲಿ ಗರ್ಭಪಾತವಾಗುವುದು, ಕಂದು ಕರು ಹಾಕುವುದು, ದುರ್ಬಲ ಕರುಗಳ ಜನನ, ವಿಳಂಬವಾಗಿ ಕರು ಹಾಕುವಿಕೆ, ಕರು ಹಾಕಿದಾಗ ಸರಿಯಾಗಿ ಸತ್ತೆ ಬೀಳದಿರುವುದು, ಹಸುವಿನ ಕಾಲಿನ ಗೆಣ್ಣುಗಳಲ್ಲಿ ಊತ ಕಾಣಿಸಿಕೊಳ್ಳುವುದು ಮತ್ತು ಹಾಲಿನ ಇಳುವರಿಯಲ್ಲಿ ಗಮನಾರ್ಹ ಇಳಿಕೆಯಾಗುತ್ತದೆ. ಗರ್ಭಧರಿಸಿದ ಹಸುವಿನ ಹೊಕ್ಕುಳ ಭಾಗದಲ್ಲಿ ಗೋಚರ ಊತ ಮತ್ತು ಯೋನಿಯಿಂದ ರಕ್ತಸ್ರಾವವು ಸಾಮಾನ್ಯವಾಗಿರುತ್ತದೆ. ಬ್ರೂಸೆಲೋಸಿಸ್ ರೋಗ ಒಂದು ಬಾರಿ ಮನುಷ್ಯರಿಗೆ ಅಥವಾ ಪ್ರಾಣಿಗಳಿಗೆ ಬಂತೆಂದರೆ ರೋಗವನ್ನು ಗುಣಪಡಿಸಲು ಸಾಧ್ಯವಿಲ್ಲ ಮತ್ತು ಈ ರೋಗಕ್ಕೆ ಯಾವುದೇ ಚಿಕಿತ್ಸೆಯಿಲ್ಲ. ಬ್ರೂಸೆಲೋಸಿಸ್ ರೋಗವನ್ನು ತಡೆಗಟ್ಟಲು ಪ್ರಮುಖವಾಗಿ ನಿರಂತರ ತಪಾಸಣೆ ಮತ್ತು ಲಸಿಕೆಯನ್ನು ನೀಡುವುದರಿಂದ ಸಾಧ್ಯವಾಗುತ್ತದೆ. 

ರೈತರು ಹೋರಿ ಕೊಡಿಸುವುದರಿಂದ ಬ್ರೂಸೆಲೋಸಿಸ್ ರೋಗ ಹರಡುವುದರಿಂದ, ಹೋರಿ ಸಂಪರ್ಕವನ್ನು ಹಸುಗಳಿಗೆ ತಪ್ಪಿಸಬೇಕು. ರೈತರು ತನ್ನ ಫಾರ್ಮ್ ಗಳಿಗೆ ಹೊಸ ಹಸುಗಳನ್ನು ಖರೀದಿಸುವಾಗ ಮೊದಲು ಹಸುಗಳನ್ನು ಪ್ರತ್ಯೇಕವಾಗಿರಿಸಬೇಕು, ನಂತರ ಅಕ್ಷಯಕಲ್ಪ ಪಶುವೈದ್ಯರ ಸಹಾಯದಿಂದ ಹಸುವಿನ ರಕ್ತದ ಮಾದರಿಯನ್ನು ಲ್ಯಾಬೋರೇಟರಿಯಲ್ಲಿ ಪರೀಕ್ಷಿಸಿ ಬ್ರುಸೆಲ್ಲಾ ರೋಗವಿಲ್ಲವೆಂದು ವರದಿ ಬಂದ ನಂತರ ಫಾರ್ಮ್ ಗೆ ಸೇರ್ಪಡೆ ಮಾಡಿಕೊಳ್ಳಬೇಕು. ಅಕ್ಷಯಕಲ್ಪವು ಗ್ರಾಹಕರ ಮತ್ತು ರೈತರ ಹಿತದೃಷ್ಟಿಯಿಂದ ಪ್ರತಿಯೊಂದು ಹಸುವನ್ನು ಬ್ರುಸೆಲ್ಲಾ ರಹಿತವೆಂದು ಖಚಿತ ಪಡಿಸಿಕೊಂಡ ನಂತರ ಹಾಲನ್ನು ರೈತರಿಂದ ಖರೀದಿಸಿ ಮಾರುಕಟ್ಟೆಗೆ ಒದಗಿಸುತ್ತದೆ. ಇಡೀ ಭಾರತದಲ್ಲಿ ಬ್ರುಸೆಲ್ಲಾ ರಹಿತ ಹಾಲು ಉತ್ಪಾದಿಸುತ್ತಿರುವುದು ಅಕ್ಷಯಕಲ್ಪ ಸಂಸ್ಥೆ ಮಾತ್ರ ಎಂದು ಅದು ಹೆಮ್ಮೆಯಿಂದ ಹೇಳುತ್ತದೆ.

ಅಫ್ಲಾಟಾಕ್ಸಿನ್‌ ಮುಕ್ತ ಹಾಲು

ಅಫ್ಲಾಟಾಕ್ಸಿನ್‌ ಎಂಬುದು ವಿಷಕಾರಿ ಅಂಶವಾಗಿದ್ದು, ಆಹಾರ  ಮತ್ತು ಮೇವಿನ ಬೆಳೆಗಳ ಉತ್ಪಾದನೆ, ಕೊಯ್ಲು, ಶೇಖರಣೆ ಮತ್ತು ಸಂಸ್ಕರಣೆ ಸಮಯದಲ್ಲಿ ಶಿಲೀಂಧ್ರಗಳ ಕ್ರಿಯೆಯಿಂದ ಅಫ್ಲಾಟಾಕ್ಸಿನ್ ಉತ್ಪತ್ತಿಯಾಗುತ್ತದೆ. ಅಫ್ಲಾಟಾಕ್ಸಿನ್ ಯುಕ್ತ ಕಲುಷಿತ ಮೇವು ಮತ್ತು ಆಹಾರವನ್ನು ಸೇವಿಸುವ ಹಸುಗಳಲ್ಲಿ ಜೀರ್ಣಕ್ರಿಯೆಯ ಮೂಲಕ ಅವುಗಳ ದೇಹವನ್ನು ಸೇರಿ ಅರೋಗ್ಯ ಮತ್ತು ಹಾಲಿನ ಇಳುವರಿಯ ಮೇಲೆ ಗಮನಾರ್ಹ ಪರಿಣಾಮ ಬೀರುತ್ತದೆ. ಹಸುಗಳಲ್ಲಿ, ಅಫ್ಲಾಟಾಕ್ಸಿನ್‌ ಗಳ ಪರಿಣಾಮದಿಂದ ಯಕೃತ್ತಿನ ಕಾರ್ಯವನ್ನು ದುರ್ಬಲಗೊಳಿಸುತ್ತದೆ, ಪ್ರತಿರಕ್ಷಣಾ ಕಾರ್ಯವನ್ನು ದುರ್ಭಲಗೊಳಿಸಿ  ರೋಗಗಳಿಗೆ ಒಳಗಾಗುವಿಕೆಯನ್ನು ಹೆಚ್ಚಿಸುತ್ತದೆ. ಇದರ ಜೊತೆಗೆ, ಹೋರಿಗಳ ವೀರ್ಯದ  ಕಾರ್ಯಸಾಧ್ಯತೆ  ಕಡಿಮೆ ಮಾಡುವ ಮೂಲಕ ಸಂತಾನೋತ್ಪತ್ತಿ ಕಾರ್ಯವನ್ನು ದುರ್ಬಲಗೊಳಿಸಬಹುದು ಮತ್ತು ಗರ್ಭವಾಸ್ಥೆಯಲ್ಲಿರುವ ಹಸುಗಳ ಭ್ರೂಣಕ್ಕೆ ಹಾನಿಯನ್ನುಂಟುಮಾಡುತ್ತದೆ. 

ಮಾನವನು ಅಫ್ಲಾಟಾಕ್ಸಿನ್ ಯುಕ್ತ ಹಾಲು ಮತ್ತು ಆಹಾರ ಸೇವನೆಯಿಂದ ತೀವ್ರವಾದ ಅನಾರೋಗ್ಯ ಮತ್ತು ಸಾವಿಗೆ ಕಾರಣವಾಗಬಹುದು. ಮಾನವರ ದೇಹದಲ್ಲಿ ಹೆಚ್ಚು ಅಫ್ಲಾಟಾಕ್ಸಿನ್ ಅಂಶ ಸಂಗ್ರಹವಾದಾಗ ತೀವ್ರವಾದ ಪಿತ್ತಜನಕಾಂಗದ ಸೋಂಕನ್ನುಂಟುಮಾಡುತ್ತವೆ, ತೀವ್ರವಾದ ಪಿತ್ತಜನಕಾಂಗದ ವೈಫಲ್ಯವು ಜ್ವರ, ವಾಂತಿ, ಕಿಬ್ಬೊಟ್ಟೆಯ ನೋವು, ರಕ್ತಸ್ರಾವ, ಜೀರ್ಣಕ್ರಿಯೆಯ ತೊಂದರೆಗಳು, ಮಾನಸಿಕ ಬದಲಾವಣೆಗಳು ಮತ್ತು ಕೋಮಾದಂತಹ ಪರಿಸ್ಥಿತಿಗಳಿಗೆ ಕಾರಣವಾಗಬಹುದು. ದೀರ್ಘಕಾಲದ ಅಫ್ಲಾಟಾಕ್ಸಿನ್ ಯುಕ್ತ ಆಹಾರ ಸೇವನೆಯಿಂದ ದೇಹದಲ್ಲಿ ರೋಗನಿರೋಧಕ ಶಕ್ತಿ ಕಡಿಮೆಯಾಗುತ್ತದೆ ಮತ್ತು ಕ್ಯಾನ್ಸರ್ ನಂತಹ ಅಪಾಯಗಳಿಗೆ ಕಾರಣವಾಗುತ್ತವೆ. ಪ್ರಪಂಚದ ಸುಮಾರು 25% ಬೆಳೆ ಮೈಕೋಟಾಕ್ಸಿನ್‌ನಿಂದ ಪ್ರಭಾವಿತವಾಗಿರುತ್ತದೆ ಮತ್ತು ಅದರಲ್ಲಿ ಬಹುಪಾಲು ಅಫ್ಲಾಟಾಕ್ಸಿನ್ ಗಳಾಗಿವೆ. ಸಾಮಾನ್ಯವಾಗಿ ಹಸುಗಳಿಗೆ ಮೇವುಗಳನ್ನು ನೀಡುತ್ತೇವೆ, ಈ ಮೇವು ಗುಣಮಟ್ಟದಿಂದ ಕೂಡಿಲ್ಲದಿದ್ದರೆ ಹಸುಗಳ ಅರೋಗ್ಯ ಹಾಳಾಗುತ್ತದೆ. ಅಸಮರ್ಪಕವಾಗಿ ಸಂಗ್ರಹಿಸಲಾದ ಜೋಳ, ಗೋಧಿ, ರಾಗಿ, ಕಡಲೆಕಾಯಿ, ಮತ್ತು ಭತ್ತಗಳಲ್ಲಿ ನಿಯಮಿತವಾಗಿ ಕಂಡುಬರುತ್ತವೆ. ಆಸ್ಪರ್ಜಿಲ್ಲಸ್ ಪ್ರಭೇದಗಳು ಬೆಳೆಗಳ ಬೆಳವಣಿಗೆ ಸಮಯದಲ್ಲಿ ಸೋಂಕು ತರುತ್ತವೆ ಹಾಗು ಮಳೆಗಾಲದ ಪರಿಸ್ಥಿತಿಗಳಲ್ಲಿ ಅಥವಾ ತೀವ್ರ ಬೇಸಿಗೆ ಕಾಲದಲ್ಲಿ ಮೇವಿನ, ಕೊಯ್ಲು ಸಾಗಾಣಿಕೆ ಮತ್ತು ಸಂಗ್ರಹಣೆ ಸಮಯದಲ್ಲಿ ಮಲಿನಗೊಳ್ಳುತ್ತವೆ. ಹಸಿರು ಮೇವು, ಹಿಂಡಿ ಮತ್ತು ಜೋಳದ ನುಚ್ಚನ್ನು ತೇವಾಂಶವಿರದ ಸ್ಥಳಗಳಲ್ಲಿ ಶೇಖರಣೆ ಮಾಡಬೇಕು, ಇಲ್ಲದಿದ್ದರೆ ಅಪ್ಲೋಟೊಕ್ಸಿನ್ ಎಂಬ ಶಿಲೀಂದ್ರದಿಂದ ಬರುವ ವಿಷಕಾರಿ ಅಂಶ ಬೆಳವಣಿಗೆಯಾಗುತ್ತದೆ. ಇಂತಹ ಆಹಾರವನ್ನು ಹಸುಗಳು ತಿಂದಾಗ ಜೀರ್ಣಕ್ರಿಯೆ ವ್ಯತ್ಯಾಸವಾಗಿ ಅರೋಗ್ಯ ಹಾಳಾಗುತ್ತದೆ. 

 ಅಕ್ಷಯಕಲ್ಪ ಸಂಸ್ಥೆಯು ರೈತರಿಗೆ ಅಪ್ಲೋಟೊಕ್ಸಿನ್ ಬಗ್ಗೆ ಮಾಹಿತಿಯನ್ನು ಮಾಹಿತಿ ನೀಡಿ ಅರಿವು ಮೂಡಿಸುತ್ತಿದೆ. ರೈತರು ಹಸುಗಳಿಗೆ ನೀಡಲು ಖರೀದಿಸಿ ಸಂಗ್ರಹಿಸುವ ಮೆಕ್ಕೆಜೋಳದ ನುಚ್ಚು ಮತ್ತು ಹಿಂಡಿಗಳನ್ನು ಅಕ್ಷಯಕಲ್ಪ ಪಶುವೈದ್ಯರು ನಿಯಮಿತವಾಗಿ ಪರೀಕ್ಷೆಗೆ ಒಳಪಡಿಸುತ್ತಾರೆ, ಪರೀಕ್ಷೆಯಲ್ಲಿ ಅಪ್ಲೋಟೊಕ್ಸಿನ್ ಅಂಶ ಕಂಡುಬಂದರೆ ಅಂತಹ ಮೇವನ್ನು ಹಸುಗಳಿಗೆ ನೀಡದಂತೆ ರೈತರಿಗೆ ಅದರ ಬಗ್ಗೆ ತಿಳುವಳಿಕೆ ನೀಡಲಾಗುತ್ತದೆ. 

ಮಂಜುನಾಥ ಹೊಳಲು

ಕೃಷಿ ಬರಹಗಾರರರು.

ಕರ್ನಾಟಕ ಸರ್ಕಾರವು ಕೈಗಾರಿಕಾ ಅಭಿವೃದ್ಧಿಯ ಹೆಸರಲ್ಲಿ ಫಲವತ್ತಾದ ಕೃಷಿ ಭೂಮಿಯನ್ನು ಸ್ವಾಧೀನ ಪಡಿಸಿಕೊಳ್ಳುತ್ತಿರುವ ವಿಷಯ ತಮಗೆ ತಿಳಿದೇ ಇರುತ್ತದೆ. ಇದಾಗಲೇ ಸ್ವಾಧೀನ ಪಡಿಸಿಕೊಂಡಿರುವ ಭೂಮಿ ಬಹುಪಾಲು ಕೈಗಾರಿಕೆಗಳು ಬಾರದೆ ಖಾಲಿ ಉಳಿದಿರುವಾಗ ಮತ್ತು ಇರುವ ಕೈಗಾರಿಕೆಗಳೆ ಮುಚ್ಚಿಕೊಳ್ಳಿತ್ತಿರುವಾಗ ಹೊಸದಾಗಿ ರಾಜ್ಯದಾದ್ಯಂತ 50 ಸಾವಿರ ಎಕರೆ ಭೂಸ್ವಾಧೀನದ ಗುರಿ ಇದೆ ಎಂದು ಸಚಿವರಾದ ಮುರುಗೇಶ್ ನಿರಾಣಿಯವರು ಅದಕ್ಕಾಗಿ ಅತುರಾತುರವಾಗಿ ಫಲವತ್ತಾದ ಕೃಷಿ ಭೂಮಿಯ ಸ್ವಾಧೀನಕ್ಕೆ ಮುಂದಾಗಿದ್ದಾರೆ. ಇದು ಮಾತ್ರವಲ್ಲದೆ ವಸತಿ ಯೋಜನೆಗಳು ರಸ್ತೆ ಮುಂತಾದವುಗಳಿಗಾಗಿ ಕೂಡ ಭೂಸ್ವಾಧೀನ ಪ್ರಕ್ರಿಯೆ ನಡೆಯುತ್ತಿದೆ.

ಅದರಲ್ಲೂ, ಕಳೆದೆರಡು ದಶಕಗಳಿಂದ ಭೂಸ್ವಾಧಿನ ಪ್ರಕ್ರಿಯೆ ಮತ್ತು ಅದರ ಪರಿಣಾಮಗಳನ್ನು ಕಣ್ಣಾರೆ ಕಂಡಿರುವ, ಕೃಷಿಯನ್ನೆ ನಂಬಿ ಬದುಕು ಕಟ್ಟಿಕೊಂಡಿರುವ ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ರೈತರು, ಕೃಷಿ ಭೂಮಿಯ ಸ್ವಾಧೀನಕ್ಕೆ ತೀವ್ರ ವಿರೋಧ ವ್ಯಕ್ತಪಡಿಸುತ್ತಿದ್ದಾರೆ. ವಿವಿಧ ಅಭಿವೃದ್ಧಿ ಯೋಜನೆಗಳಿಗೆ ತಮ್ಮ ಭೂಮಿಯನ್ನು ಕಳೆದುಕೊಂಡ ರೈತರು ಇಂದು ದುಡಿಮೆಗಾಗಿ ಭೂಮಿ, ಕೆಲಸ ಯಾವುದೂ ಇಲ್ಲದೆ ನೆಮ್ಮದಿಯನ್ನು ಕಳೆದುಕೊಂಡು ಪರಿತಪಿಸುತ್ತಿರುವುದನ್ನು ಕಂಡಿರುವ ಈ ಭಾಗದ ರೈತರು, ಇತ್ತೀಚಿನ ಭೂ ಸ್ವಾಧೀನವನ್ನು ಗಟ್ಟಿ ಧ್ವನಿಯಲ್ಲಿ ವಿರೋಧಿಸುತ್ತಿದ್ದು, ಹೋರಾಟ ಮಾಡಿಯಾದರೂ ತಮ್ಮ ಕೃಷಿ ಭೂಮಿಯನ್ನು ಉಳಿಸಿಕೊಳ್ಳಲು ಪಟ್ಟು ಹಿಡಿದಿದ್ದಾರೆ. ಇದರ ಭಾಗವಾಗಿ, ದೇವನಹಳ್ಳಿ ತಾಲ್ಲೂಕು, ಚನ್ನರಾಯಪಟ್ಟಣ ಹೋಬಳಿಯ 13 ಗ್ರಾಮಗಳಿಗೆ ಸೇರಿದ 1777 ಎಕರೆ ಫಲವತ್ತಾದ ಕೃಷಿ ಭೂಮಿಯನ್ನು, ಕೆ.ಐ.ಎ.ಡಿ.ಬಿ ಕೈಗಾರಿಕೆಗಳ ಅಭಿವೃದ್ಧಿಯ ಹೆಸರಲ್ಲಿ ಬಲವಂತವಾಗಿ ಸ್ವಾಧೀನ ಪಡಿಸಿಕೊಳ್ಳಲು ಮುಂದಾಗಿ ನೋಟೀಸ್ ಜಾರಿಮಾಡಿದಾಗ, ರೈತರು ಕಳೆದ ಒಂದು ವರ್ಷದಿಂದ ವಿವಿಧ ರೀತಿಯ ಪ್ರತಿಭಟನೆಗಳ ಮೂಲಕ ಸರ್ಕಾರದ ಗಮನ ಸೆಳೆವ ಮತ್ತು ಒತ್ತಡ ಹಾಕುವ ಪ್ರಯತ್ನ ಮಾಡುತ್ತಿದ್ದಾರೆ.

ಸಂಬಂಧಿಸಿದ ಇಲಾಖೆ ಮತ್ತು ಮಂತ್ರಿಗಳಿಗೆ, ಎಲ್ಲ ರಾಜಕೀಯ ಪಕ್ಷಗಳ ಮುಖಂಡರಿಗೆ ಮನವಿಗಳು, ಪ್ರತಿಭಟನಾ ಧರಣಿಗಳು, ಜಿಲ್ಲಾಧಿಕಾರಿ ಕಛೇರಿಗೆ ಟ್ರಾಕ್ಟರ್ ರ್ಯಾಲಿ ಮುಂತಾದ ರೀತಿಯ ಪ್ರತಿರೋಧಗಳಿಗೆ ಸರ್ಕಾರ ಸ್ಪಂದಿಸದಿದ್ದಾಗ ರೈತರು, ಹೋಬಳಿ ಕೇಂದ್ರವಾದ ಚನ್ನರಾಯಪಟ್ಟಣದ ನಾಡ ಕಛೇರಿ ಮುಂಭಾಗದಲ್ಲಿ ದಿನಾಂಕ 04.04.2022 ರಿಂದ ಅನಿರ್ಧಿಷ್ಟಾವಧಿ ಧರಣಿ ಕುಳಿತಿದ್ದಾರೆ. ಬಿಸಿಲು ಮಳೆಯೆನ್ನದೆ ರೈತರು ನಡೆಸುತ್ತಿರುವ ಧರಣಿ 300  ದಿನಗಳನ್ನು ಸಮೀಪಿಸುತ್ತಿದೆ. ಈ ನಡುವೆ ಧರಣಿಗೆ ಪಕ್ಷಾತೀತವಾಗಿ ಎಲ್ಲ ಪಕ್ಷದ ಮುಖಂಡರುಗಳು, ರೈತ, ದಲಿತ, ಕಾರ್ಮಿಕ, ಕನ್ನಡ, ಮಹಿಳಾ ಸಂಘಟನೆಗಳ ಮುಖಂಡರುಗಳು, ಕಲಾವಿದರು, ಬರಹಗಾರರು, ಸಾಮಾಜಿಕ ಕಾರ್ಯಕರ್ತರು ಭಾಗವಹಿಸಿ ಬೆಂಬಲಿಸಿದ್ದಾರೆ. ಧರಣಿಗೆ ಎಲ್ಲ ಕಡೆಯಿಂದ ಬೆಂಬಲ ಬರುತ್ತಿರುವುದನ್ನು ಗಮನಿಸಿದ ಸರ್ಕಾರ ರೈತರನ್ನು ಒಡೆಯಲು ವಿವಿಧ ರೀತಿಯ ಕುತಂತ್ರಗಳನ್ನು ಮಾಡುತ್ತಾ ಬರುತ್ತಿದೆ. ರೈತರಲ್ಲದ ಏಜಂಟರ ಜೊತೆ ಮತ್ತು ಬಾಡಿಗೆ ಜನರ ಜೊತೆ ಸಭೆ ಮಾಡಿದ ನಿರಾಣಿಯವರು ಧರಣಿ ನಿರತರನ್ನು ಉದ್ದೇಶಿಸಿ “ಧರಣಿ ಕುಳಿತವರು ರೈತರೇ ಅಲ್ಲ, ನಿಜವಾದ ರೈತರು ಭೂಮಿಕೊಡಲು ಸಿದ್ಧರಿದ್ದಾರೆ ” ಎಂದು ಹಸಿ ಸುಳ್ಳು ಹೇಳಿದ್ದಲ್ಲದೆ, ನಂತರದ ಬೆಳವಣಿಗೆಯಲ್ಲಿ “ಒಪ್ಪಿಗೆ ನೀಡಿದ ರೈತರ ಭೂಮಿಯನ್ನು ಮಾತ್ರ ಸ್ವಾಧೀನ ಪಡಿಸಿಕೊಳ್ಳುತ್ತೇವೆ, ಬಲವಂತದ ಭೂಸ್ವಾಧೀನ ಮಾಡುವುದಿಲ್ಲ” ಎಂದು ಹೇಳಿ ರೈತರನ್ನು ಒಡೆಯಲು ಪ್ರಯತ್ನಿಸುತ್ತಿದ್ದಾರೆ ಅಲ್ಲದೆ, ಸ್ಥಳೀಯ ಭೂ ದಲ್ಲಾಳಿಗಳ ಮೂಲಕ ರೈತರನ್ನು ನಿರಂತರವಾಗಿ ‘ಒಮ್ಮೆ ನೋಟಿಫೈ ಮಾಡಿದರೆ ಹಿಂದೆ ತೆಗೆದುಕೊಳ್ಳಲು ಸಾಧ್ಯವಿಲ್ಲ’ ಎಂದು ಹೇಳಿ  ಬೆದರಿಸುತ್ತಾ ಬಂದಿದ್ದಾರೆ. ಇದೆಲ್ಲವನ್ನು ಮೆಟ್ಟಿನಿಂತು ಪ್ರತಿಭಟನಾ ಧರಣಿಯನ್ನು ಮುಂದುವರೆಸಿದ ರೈತರು, ಆಗಷ್ಟ್ 15 ರ ಸ್ವಾತಂತ್ರ್ಯ ದಿನಾಚರಣೆಯಂದು, ದೇವನಹಳ್ಳಿಯಲ್ಲಿ ಧ್ವಜಾರೋಹಣಕ್ಕೆ ಬಂದಿದ್ದ ಸಚಿವ ಡಾ. ಸುಧಾಕರ್ ರವರ ಮೂಲಕ ಸರ್ಕಾರದ ಗಮನ ಸೆಳೆಯಲು ಮೌನ ಪ್ರತಿಭಟನೆಗೆ ಮುಂದಾದಾಗ ಪೊಲೀಸರ ಮೂಲಕ ರೈತರ ಮೇಲೆ ಹಲ್ಲೆ, ದೌರ್ಜನ್ಯ ನಡೆಸಿದ್ದಲ್ಲದೆ ರೈತರ ಮೇಲೆ, ರೈತ ಮಹಿಳೆಯರು, ವಿದ್ಯಾರ್ಥಿ ಯುವಜನರ ಮೇಲೆ ಸುಳ್ಳು ಮೊಕದ್ದಮೆಯನ್ನು ದಾಖಲಿಸುವ ಮೂಲಕ ರೈತರ ನ್ಯಾಯಯುತ ಹೋರಾಟವನ್ನು ದಮನ ಮಾಡುವ ಕೆಲಸಕ್ಕೆ ಕೈ ಹಾಕಿದ್ದಾರೆ. ಇದಲ್ಲದೆ, ಕಳೆದ ಸೆಪ್ಟೆಂಬರ್ ನಲ್ಲಿ ನಡೆದ ವಿಧಾನಸಭೆಯ ಅಧಿವೇಶನದಲ್ಲಿ ಪ್ರಶ್ನೆಯೊಂದಕ್ಕೆ ಉತ್ತರಿಸಿದ ಬೃಹತ್ ಕೈಗಾರಿಕಾ ಸಚಿವರು 50% ಗಿಂತ ಹೆಚ್ಚು ರೈತರು ಒಪ್ಪಿದರೆ ಮಾತ್ರ ಭೂಮಿ ಸ್ವಾಧೀನ ಮಾಡಿಕೊಳ್ಳುವುದಾಗಿ ಹೇಳಿದರಾದರೂ ಸುಮಾರು ಶೇ 60-80 ರೈತರು ಭೂ ಸ್ವಾಧೀನ ವಿರೋಧಿಸಿ ದಾಖಲೆ ಸಮೇತ ಕೆಐಎಡಿಬಿ ಗೆ  ಮನವಿ ಮಾಡಿರುವ ಭಾಗಗಳಲ್ಲಿ ಭೂ ಸ್ವಾಧೀನ ಪ್ರಕ್ರಿಯೆ ಮುಂದುವರೆಸಿ ಮಾತು ತಪ್ಪಿದ್ದಾರೆ.

ಈ ಹಿನ್ನೆಲೆಯಲ್ಲಿ, ತಮ್ಮ ಜೀವನಾಧಾರವಾದ ಫಲವತ್ತಾದ ಕೃಷಿ ಭೂಮಿಯನ್ನು ಉಳಿಸಿಕೊಳ್ಳಲೇಬೇಕೆಂಬ ಕಾರಣಕ್ಕೆ, ಭೂಸ್ವಾಧೀನ ಪ್ರಕ್ರಿಯೆಯಿಂದ ತಮ್ಮ ಬದುಕುವ ಅವಕಾಶವನ್ನೇ ಕಳೆದುಕೊಳ್ಳುವ ಆತಂಕದಲ್ಲಿರುವ ರೈತರು ಧಾರವಾಡ, ಮಾಗಡಿ, ಚಾಮರಾಜನಗರ, ಆನೇಕಲ್ ಸೇರಿದಂತೆ ರಾಜ್ಯದ ವಿವಿಧ ಭೂಸ್ವಾಧೀನ ವಿರೋಧಿ ಹೋರಾಟಗಳನ್ನು ಹತ್ತಿರದಿಂದ ಗಮನಿಸುತ್ತಾ ಬಂದಿರುವ ʼನಮ್ಮೂರಭೂಮಿ ನಮಗಿರಲಿ, ಅನ್ಯರಿಗಲ್ಲ’ ಬಳಗದ ಸಂಗಾತಿಗಳು, ಆತಂಕದಲ್ಲಿರುವ ರೈತರಿಗೆ ತಮ್ಮ‌ ಭೂಮಿಯನ್ನು ಉಳಿಸಿಕೊಳ್ಳುವ ಕಾನೂನಿನ ಸಾಧ್ಯತೆಗಳ ಕುರಿತಾಗಿ ತಿಳಿಸಿ ಅರಿವು ಮೂಡಿಸಲು ಪುಸ್ತಕ ಒಂದನ್ನು ಹೊರ ತರುತ್ತಿದ್ದಾರೆ.

ಕಾನೂನು ತಜ್ಞರು, ಪರಿಸರವಾದಿಗಳು, ಸಾಮಾಜಿಕ ಕಾರ್ಯಕರ್ತರು ಸೇರಿದಂತೆ ವಿಷಯ ತಜ್ಞರ ಸಲಹೆ ಸೂಚನೆಯೊಂದಿಗೆ ಮತ್ತು ಹಿಂದಿನ ಉದಾಹರಣೆಗಳ ಸಮೇತ ವಿವರಿಸಿ ರೈತರ ಪರವಾಗಿ ವಕಲತ್ತು ವಹಿಸುವಂತಿರುವ “ಭೂಸ್ವಾಧೀನದ ಒಳಸುಳಿಗಳು” ಪುಸ್ತಕವನ್ನು ದಿನಾಂಕ 17.01.2023 ರಂದು, ಚನ್ನರಾಯಪಟ್ಟಣದ ಭೂಸ್ವಾಧೀನ ವಿರೋಧಿ ಅನಿರ್ದಿಷ್ಟಾವಧಿ ಧರಣಿ ನಡೆಯುತ್ತಿರುವ ವೇದಿಕೆಯಲ್ಲಿ, ನಿವೃತ್ತ ನ್ಯಾಯಮೂರ್ತಿಗಳಾದ ನಾಗಮೋಹನ್ ದಾಸ್ ರವರು ಪುಸ್ತಕ ಬಿಡುಗಡೆ ಮಾಡಿ ಮಾತನಾಡಲಿದ್ದಾರೆ. ಪರಿಸರ ತಜ್ಞರಾದ ನಾಗೇಶ ಹೆಗಡೆ, ಚಿಂತಕರಾದ ಕೆ ಪಿ ಸುರೇಶ್ ಸೇರಿದಂತೆ ನಮ್ಮೂರ ಭೂಮಿ ನಮಗಿರಲಿ ಬಳಗದ ಗಾಯತ್ರಿ, ಜೋತಿರಾಜ್, ವತ್ಸಲ ಆನೇಕಲ್ ಮುಂತಾದವರು ಭಾಗವಹಿಸಲಿದ್ದಾರೆ. ಕಾರ್ಯಕ್ರಮಕ್ಕೆ ಸ್ಥಳಿಯ ರೈತರು, ಮಹಿಳಾ ರೈತರು, ಯುವಜನರು ತಯಾರಿಯಲ್ಲಿ ತೊಡಗಿ ಕುತೂಹಲದಿಂದ ಕಾಯುತ್ತಿರುವುದು ಅವರ ಒಂದು ವರ್ಷದ ಹೋರಾಟಕ್ಕೆ ಹೊಸ ಹುರುಪು ಸಿಕ್ಕಂತಿದೆ.

ರಮೇಶ್ ಚೀಮಾಚನಹಳ್ಳಿ 

ಭೂಸ್ವಾಧೀನ ಪ್ರಕ್ರಿಯೆಯಲ್ಲಿ  ದ್ರಾಕ್ಷಿ ಮತ್ತು ಆಹಾರ ಧಾನ್ಯಗಳನ್ನು ಬೆಳೆಯುತ್ತಿರುವ ಅಷ್ಟೂ ಭೂಮಿಯನ್ನು ಕಳೆದು ಕೊಳ್ಳುವ ಆತಂಕದಲ್ಲಿರುವ ಸ್ಥಳೀಯ ರೈತ.  ಸದ್ಯ, ಬೆಂಗಳೂರಿನ ಬದುಕು ಸೆಂಟರ್‌ ಫಾರ್‌ ಲೈವ್ಲಿಹುಡ್ ಲರ್ನಿಗ್ ನಲ್ಲಿ  ಯುವ ರೈತರೊಂದಿಗೆ ಕೆಲಸ.

ಭಾನುವಾರ ಮಿಂಡಿಗಲ್ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ನಲ್ಲರಾಳ್ಳಹಳ್ಳಿ ಕ್ರಾಸ್ ನ ವೆಂಕಟೇಶಪ್ಪ ಅವರ ಜಮೀನಿನ ಬಳಿ ಚಿಂತನಾ ಫೌಂಡೇಶನ್, ಜನಪರ ಫೌಂಡೇಶನ್  ಹಾಗೂ ಬಳ್ಳಿ ಬಳಗ ಕೃಷಿಕರ ವೇದಿಕೆ ಸಹಭಾಗಿತ್ವದಲ್ಲಿ ಆಯೋಜಿಸಿದ್ದ ಮಹಿಳಾ ರೈತ ದಿನಾಚರಣೆ ಹಾಗೂ ವಿಶ್ವ ಆಹಾರ ದಿನಾಚರಣೆ ಅಂಗವಾಗಿ ಸಿರಿಧಾನ್ಯ ಆಹಾರ ಅಭಿಯಾನದಲ್ಲಿ ಭಾಗವಹಿಸಿ ಅವರು ಮಾತನಾಡಿದರು.

ಕೃಷಿಯಲ್ಲಿ ದುಡಿಯುತ್ತಿರುವ ಮಹಿಳೆಯರಿಗೆ ರೈತರೆಂಬ ಮಾನ್ಯತೆಯೇ ಸಿಗುತ್ತಿಲ್ಲ. ಇಂದಿಗೂ ಮಹಿಳೆಯರಿಗೆ ಭೂಮಿಯ ಹಕ್ಕು ಇಲ್ಲ. ರೈತರು ಎಂದು ಹೇಳಿಕೊಳ್ಳಲು ಅವರಿಗೆ ಯಾವುದೇ ಗುರುತಿಲ್ಲ. ಹೀಗಾಗಿ, ಮಹಿಳೆಯರಿಗೆ ಭೂಮಿಯ ಹಕ್ಕು ಸಿಗುವಂತಾಗಬೇಕು. ಪುರುಷರಂತೆ ಮಹಿಳೆಯರಿಗೂ ಸಮಾನವಾದ ಸ್ಥಾನಮಾನ ನೀಡುವಂತಾಗಬೇಕು.

ಕೃಷಿಯಲ್ಲಿ ಪ್ರಧಾನವಾಗಿ ತೊಡಗಿಸಿಕೊಳ್ಳುವವರು ಮಹಿಳೆಯರು. ಕೃಷಿ ಪೂರಕ ಚಟುವಟಿಕೆಗಳು ಆರಂಭವಾದಾಗಿನಿಂದ ಆರಂಭಗೊಂಡು ಕೃಷಿ ಚಟುವಟಿಕೆಗಳು ಮುಗಿಯುವ ತನಕ ಬಿಡುವಿಲ್ಲದೆ ಕೆಲಸ ಮಾಡುತ್ತಾರೆ. ಮನೆಯಲ್ಲಿ ಅಡುಗೆ ಮಾಡುವುದು, ಮಕ್ಕಳನ್ನು ಶಾಲೆಗೆ ಕಳುಹಿಸುವುದು, ಹಸು, ಕುರಿ, ಮೇಕೆಗಳ ಕೊಟ್ಟಿಗೆ ಸ್ವಚ್ಚ ಮಾಡಿ ತಿಪ್ಪೆ ಗೆ ಹಾಕುವುದು. ಬೇಸಾಯದಲ್ಲಿ ಋತುಮಾನಕ್ಕೆ ಅನುಗುಣವಾಗಿ ಮುಂದಾಲೋಚನೆ ಮಾಡುವುದು, ಬೀಜ ಬಿತ್ತುವುದು, ಕಳೆ ತೆಗೆಯುವುದು,  ಬೆಳೆ ಕಟಾವು ಮಾಡುವುದು, ಕಣ ಮಾಡುವುದು ಸೇರಿದಂತೆ ಮುಂದಿನ ಹಂಗಾಮಿಗೆ ಬೇಕಾದ ಬೀಜಗಳನ್ನು ಮುಂಗಡವಾಗಿ ತಯಾರಿಸಿಡುವುದು ಹೀಗೆ ಅನೇಕ ಕೃಷಿ ಕಾರ್ಯಗಳಲ್ಲಿ ಮಹಿಳೆಯರ ಪಾತ್ರವು ಅಪಾರ ಎಂದು ಅವರು ನೆನಪಿಸಿಕೊಂಡರು.

ಕೃಷಿ ಕ್ಷೇತ್ರದಲ್ಲಿ ಮಹಿಳೆಯರ ಶ್ರಮವನ್ನು ಪರಿಗಣನೆಗೆ ತೆಗೆದುಕೊಳ್ಳುವುದಿಲ್ಲ. ಒಂದು ಕಡೆ ಮಹಿಳೆಯರಿಗೆ ಭೂಮಿಯಲ್ಲಿ ಹಕ್ಕಿಲ್ಲ, ಇನ್ನೊಂದು ಕಡೆ ನಿರ್ಧಾರಗಳನ್ನು ಕೈಗೊಳ್ಳಲು ಬಿಡುವುದಿಲ್ಲ. ಆದರೆ ಪುರುಷರೇ ನಿರ್ಧಾರ ಕೈಗೊಳ್ಳುತ್ತಾರೆ. ಇದು ಇಂದಿನ ದುಸ್ಥಿತಿ ಎಂದು ಅವರು ನುಡಿದರು.

ಇಂದಿನ ಆಧುನಿಕ ಕಾಲಘಟ್ಟದಲ್ಲಿ ಮನುಷ್ಯರ ಆಹಾರ ಪದ್ಧತಿಯು ಬಹಳಷ್ಟು ಬದಲಾಗಿದೆ. ಮಾರುಕಟ್ಟೆಯಲ್ಲಿ ಸಿಗುವ ಆಹಾರಗಳನ್ನು ಖರೀದಿಸಿ ತಂದು ಮನೆಯಲ್ಲಿ ಪ್ರಿಜ್ ನಲ್ಲಿಟ್ಟುಕೊಂಡು ಸೇವಿಸಲಾಗುತ್ತಿದೆ. ಹೊರಗಡೆಯಿಂದ ಬರುವಾಗಲೇ ಕೆಮಿಕಲ್ ಮಿಶ್ರಣಗೊಂಡು ಆಹಾರ ಪದಾರ್ಥಗಳು ನಮ್ಮ ಮನೆಗೆ ಸೇರುತ್ತಿವೆ. ಇದನ್ನು ಸೇವಿಸಿದ ಜನರು ಹಲವಾರು ರೋಗಗಳಿಗೆ ತುತ್ತಾಗುತ್ತಿದ್ದಾರೆ.  ಹೊಲದಲ್ಲಿ ಬೆಳೆದ ತಾಜ ಆಹಾರಗಳನ್ನು ಮಾರಾಟ ಮಾಡಿ ಮತ್ತೆ ಅದೆ ಉತ್ಪನ್ನಗಳು ಪಾಲೀಶ್ ಆಗಿ ಕೆಮಿಕಲ್ ಮಿಶ್ರಣವಾಗಿ ಬರುತ್ತವೆ ಅದನ್ನೆ ಶ್ರೇಷ್ಟ ಎಂದು ಬಳಸುವ ಜೀವನ ಶೈಲಿಗೆ ಜನ ಬದಲಾಗುತ್ತಿರುವುದು ವಿಷಾದಕರ ಸಂಗತಿ. ಹಾಗಾಗಿ ನಮ್ಮ ನೆಲ ಮೂಲ ಆಹಾರಗಳನ್ನು ಮರು ಬಳಸುವಂತಾಗಬೇಕು ಎಂದು ಹೇಳಿದರು.

ಸಿರಿಧಾನ್ಯ ಬೆಳೆದ ರೈತ ವೆಂಕಟೇಶಪ್ಪ ಮಾತನಾಡಿ, ಹಲವಾರು ವರ್ಷಗಳಿಂದಲೂ ನಾವು ಕೃಷಿಯನ್ನು ಮಾಡಿಕೊಂಡು ಬರುತ್ತಿದ್ದೇವೆ. ನಮ್ಮ ಹಿಂದಿನ ಕಾಲದ ಆಹಾರ ಪದ್ಧತಿಗಳಾದ ಸಾಮೆ, ನವಣೆ, ಹಾರಕ, ಸಜ್ಜೆ, ಜೋಳ ಹೀಗೆ ವಿವಿಧ ಬೆಳೆಗಳನ್ನು ಬೆಳೆದು, ಆಹಾರವಾಗಿ ಬಳಸುತ್ತಿದ್ದೆವು. ಆದರೆ, ಬಿತ್ತನೆಗೆ ಸಿರಿಧಾನ್ಯ ಬೀಜ ಇಲ್ಲದೆ ಈ ಬೆಳೆಗಳ ಬೆಳೆಯುವುದನ್ನು ಬಿಟ್ಟಿದ್ದೆವು.  ಜನಪರ ಪೌಂಡೇಷನ್ ಬೀಜ ಒದಗಿಸಿದ್ದರಿಂದ ಈ ಬಾರಿ ನಾಲ್ಕು ಎಕರೆ ಭೂಮಿಯಲ್ಲಿ ಸಾಮೆಯನ್ನು ಬೆಳೆದಿದ್ದೇವೆ. ಉತ್ತಮ ಫಸಲು ಬಂದಿದೆ. ಬಹಳ ಸಂತೋಷವಾಗಿದೆ. ಇದನ್ನು ಮುಂದುವರಿಸಿಕೊಂಡು ಹೋಗುತ್ತೇವೆ. ಅದರ ಜೊತೆಗೆ ನಾವು ಬೆಳೆದದ್ದನ್ನು ನಾವೇ ಆಹಾರವಾಗಿ ಬಳಸಿಕೊಳ್ಳುತ್ತೇವೆ ಎಂದು ನುಡಿದರು.

ಮಹಿಳಾ ಒಕ್ಕೂಟದ ಸದಸ್ಯರಾದ ಭೂಲಕ್ಷ್ಮಮ್ಮ ಮಾತನಾಡಿ, ಮಹಿಳೆಯರು ನಮ್ಮ ಕೈಯಲ್ಲಿ ಏನು ಮಾಡಲು ಸಾಧ್ಯವಿಲ್ಲ ಎಂದು ಹಿಂದಕ್ಕೆ ಹೆಜ್ಜೆಯನ್ನಿಡಬಾರದು. ಎಲ್ಲ ಕ್ಷೇತ್ರದಲ್ಲಿಯೂ ನಾವು ಬಹಳಷ್ಟು ಮುಂದುವರಿದಿದ್ದೇವೆ. ಮುಖ್ಯವಾಗಿ ಇಂದಿನ ಕೃಷಿ ಕ್ಷೇತ್ರದಲ್ಲಿ ಮಹಿಳೆಯರ ಸೇವೆಯು ಅನನ್ಯವಾದುದಾಗಿದೆ. ನಾನು ನಾಲ್ಕು ಗೋಡೆಯಿಂದ ಆಚೆ ಬಂದು ಸಮಾಜವನ್ನು ಅರ್ಥಮಾಡಿಕೊಂಡು ನಮ್ಮ ಗ್ರಾಮ ಪಂಚಾಯಿತಿ, ಸರ್ಕಾರದ ಇತರೆ ಯೋಜನೆಗಳಲ್ಲಿ ಮಹಿಳೆಯರಿಗಿರುವ ಹಕ್ಕು ಅವಕಾಶಗಳನ್ನು ಪಡೆದುಕೊಳ್ಳುತ್ತಿರುವೆ. ಹೀಗೆ ಎಲ್ಲಾ ಮಹಿಳೆಯರು ಸ್ವಯಂ ನಿರ್ಧಾರ ಕೈಗೊಳ್ಳುವ ಮೂಲಕ ಸಮಾಜದ ಮುಖ್ಯ ವಾಹಿನಿಯಲ್ಲಿ ಗುರುತಿಸಿಕೊಳ್ಳಬೇಕು ಎಂದು ಹೇಳಿದರು.

ಕಾರ್ಯಕ್ರಮದಲ್ಲಿ ನೆಲಮೂಲ ಜ್ಞಾನವನ್ನು ಜನರ ನಡುವಿನ ಅರಿವನ್ನು ಎಲ್ಲೆಡೆ ಬಿತ್ತುವ ಯುವ ತಲೆಮಾರಿಗೆ ಒದಗಿಸುವ ನಿಟ್ಟಿನಲ್ಲಿ ಜನಪರ ಫೌಂಡೇಶನ್, ಬಳ್ಳಿ ಬಳಗದ ಸಹಭಾಗಿತ್ವದಲ್ಲಿ ನೆಲದ ಮಾತು ಎಂಬ ಯೂಟ್ಯೂಬ್ ವೆಬ್ ಅನ್ನು ಚಾಲನೆಗೊಳಿಸಲಾಯಿತು.

ಈ ಸಂದರ್ಭದಲ್ಲಿ ಯುವ ಕೃಷಿಕರಾದ ಸುರೇಶ್ ಮತ್ತು ಶಿವಕುಮಾರ್, ಮಹಿಳಾ ಕೃಷಿಕರಾದ ಸಾವಿತ್ರಮ್ಮ(ದನಮಿಟ್ಟೇನಹಳ್ಳಿ),ಕದಿರಮ್ಮ(ಚೌಡದೇನಹಳ್ಳಿ), ರೈತರಾದ ವೆಂಕಟೇಶಪ್ಪ (ನಲ್ಲರಾಳ್ಳಹಳ್ಳಿ ಕ್ರಾಸ್), ನರಸಿಂಹಪ್ಪ(ದನಮಿಟ್ಟೇನಹಳ್ಳಿ) ಇವರುಗಳಿಗೆ ಸನ್ಮಾನ ಮಾಡಿ ಗೌರವಿಸಲಾಯಿತು. ಕಾರ್ಯಕ್ರಮದಲ್ಲಿ ಪಂಚಾಯಿತಿ ಸದಸ್ಯ ಚಂದ್ರಪ್ಪ, ಗ್ರಾ.ಪಂ. ಕಾಯಕಮಿತ್ರ ಶಾರದ, ಬೇರು ಬೆವರು ಕಲಾ ಬಳಗದ ಚಿ.ಮು.ಹರೀಶ್, ಚಲಪತಿ, ಬಳ್ಳಿ ಬಳಗದ ಸದಸ್ಯರಾದ ನಾಗರಾಜು, ನಾಗೇಶ್, ಅಂಬರೀಶ್, ಬಾಬುರೆಡ್ಡಿ, ಚೌಡಪ್ಪ, ನೇತ್ರಾವತಿ, ಗಡದಾಸನಹಳ್ಳಿ ಜ್ಯೋತಿ, ಯುವಯಾನ ಬಳಗದ ನಯನ್, ಗೌತಮ್, ನಳಿನಿ ಸೇರಿದಂತೆ ಮಹಿಳಾ ಸ್ವಸಹಾಯ ಸಂಘದ ಸದಸ್ಯರು, ಹಳ್ಳಿಯ ಜನರು ಉಪಸ್ಥಿತರಿದ್ದರು.

ಪುಂಡಿ ನಾರಿನ ಕುಂಚದಿಂದ ಬುಟ್ಟಿಯ ಸುತ್ತಲೂ ಗೆರೆಗಳ ಚಿತ್ತಾರಗಳು ಅನಾವರಣಗೊಳ್ಳುತ್ತವೆ. ಅಲ್ಲಿ ಕೃಷಿ ಪರಿಕರಗಳು, ಭತ್ತದ ಸಸಿ, ಭತ್ತದ ಬಣವೆ, ಜೋಗಿ ಜಡೆ, ತೆಂಗಿನ ಮರ, ಗೂಡಿನ ಹಕ್ಕಿ, ಸೀತೆ ಮುಡಿ, ನೇಗಿಲು ಉಳುಮೆ, ಭೂಮಣ್ಣಿ ಬುಟ್ಟಿ ಹೊತ್ತುಕೊಂಡು ಹೊರಟ ಗಂಡಸು, ಹೆಂಗಸು ಮಕ್ಕಳು, ಹೀಗೆ ಬಿಳಿ ರೇಖೆಯ  ನಾನಾ ಚಿತ್ತಾರಗಳು ರೂಪುಗೊಳ್ಳುತ್ತವೆ. ಆ ಎಲ್ಲಾ ಚಿತ್ತಾರಗಳೂ ಬುಟ್ಟಿಯ ತುಂಬಾ ರೇಖೆಗಳಿಂದ ರಚಿಸಿದ ಚೌಕಗಳ ನಡುವೆ ಬರೆಯಲ್ಪಟ್ಟಿರುತ್ತವೆ. ಅಂದು ಹೆಣ್ಣುಮಕ್ಕಳು ರಾತ್ರಿ ಇಡೀ ಎಚ್ಚರವಿದ್ದು ತಯಾರಿಸಿಟ್ಟ ಸಿಹಿತಿಂಡಿ, ಕಡುಬು, ಕಜ್ಜಾಯ, ಮೊಸರು ಬುತ್ತಿ, ಮೀನು ಸಾರು, ಹೀಗೆ ವಿವಿಧ ತಿನಿಸುಗಳನ್ನು ಬೂಮಣ್ಣಿ ಬುಟ್ಟಿಯಲ್ಲಿ ತುಂಬಿಕೊಂಡು ಹೊಲಗಳಿಗೆ, ತೋಟಗಳಿಗೆ ಹೊತ್ತೊಯ್ದು ಕುಟುಂಬದ ಎಲ್ಲಾ ಸದಸ್ಯರು, ಸಸಿ ಪೂಜೆ ಮಾಡುವುದೇ ಒಂದು ವಿಶೇಷ.

ಹೊಡೆಗೆ ಬಂದ ಸಸಿಗಳೆಂದರೆ ಗರ್ಭವತಿಯಾದ ಹೆಣ್ಣೆಂದು ಕಲ್ಪಿಸಿಕೊಂಡು ಆಕೆಗೆ ಬಯಕೆ ತೀರಿಸುವುದೇ ಈ ಹಬ್ಬದ ವಿಶಿಷ್ಟತೆ. ಸಸಿ ಎಡೆ, ಇಲಿ ಎಡೆ, ಗೂಳಿ ಎಡೆ ಎಂದು ಬಾಳೆ ಎಲೆಯಲ್ಲಿ ಇಟ್ಟ ಎಡೆಗಳನ್ನು ಪೂಜೆ ಮಾಡುತ್ತಾರೆ. ಪೂಜೆಗೆ ಮೊದಲು ಎರಡು ಸಸಿಗಳಿಗೆ ತೋರಣ ಕಟ್ಟಿ ಮನೆಯ ಯಜಮಾನಿ ತನ್ನ ತಾಳಿಸರವನ್ನು ಕಟ್ಟಿ, ಹೂ ಮುಡಿಸಿ, ಪೂಜೆ ಮಾಡುತ್ತಾಳೆ. ನಂತರ ಗೂಳಿ ಎಡೆಯನ್ನು ಹೊಲದಲ್ಲೇ ಅಷ್ಟು ದೂರ ಹೋಗಿ ಕರೆದು ದೂರದಲ್ಲಿ ಇಟ್ಟು ಬರುತ್ತಾರೆ. ಗೂಳಿ ಎಂದರೆ ದೆವ್ವಕಾಗೆ ಎಂದು ಕರೆಯಲಾಗುವ ಕಾಗೆಗಳು. ʼನಮ್ಮ ಹಿರಿಯರು ಕಾಗೆಗಳ ರೂಪದಲ್ಲಿ ಈ ಹಬ್ಬಕ್ಕೆ ವಿಶೇಷ ಅಡುಗೆ ತಿನ್ನಲು ಬರುತ್ತಾರೆ ಎಂದು ನಂಬುಗೆ. ಆ ಕಾಗೆಗಳು ಬಂದು ಆ ಎಡೆಯಲ್ಲಿರುವ ತಿನಿಸುಗಳನ್ನು ತಿನ್ನುವವರೆಗೂ ಮನೆಮಂದಿ ಯಾರೂ ಊಟ ಮಾಡುವುದಿಲ್ಲ. ನಂತರ ಹೊಲದಲ್ಲಿಯೇ ಊಟ ಮಾಡಿ ಮನೆಗೆ ತೆರಳುತ್ತಾರೆ.

ಅಂದು ಬೆಳಕು ಹರಿಯುವುದರೊಳಗೆ ಹಚ್ಚಂಬಲಿಯನ್ನು ತಮ್ಮ ಎಲ್ಲಾ ಹೊಲಗದ್ದೆ, ತೋಟ, ಹಿತ್ತಲುಗಳಿಗೆ ಬೀರುವುದು ಒಂದು ಸಂಪ್ರದಾಯ. ಈ ಹಚ್ಚಂಬಲಿ ಎಂದರೆ ʼಚರಗʼ ಎಂದೂ ಕರೆಯುತ್ತಾರೆ. ಹಿತ್ತಲಲ್ಲಿ ಬೆಳೆದ ವಿವಿಧ ತರಕಾರಿ, ಸೊಪ್ಪುಗಳನ್ನು ಸೇರಿಸಿ ಅದಕ್ಕೆ ಅಕ್ಕಿಯನ್ನು ಹಾಕಿ ಮಿಶ್ರಣ ಮಾಡಿ ಬೇಯಿಸುವುದೇ ಹಚ್ಚಂಬಲಿ. ಈ ಹಚ್ಚಂಬಲಿ ಅಥವಾ ಚರಗವನ್ನು ಒಯ್ಯಲು ಇನ್ನೊಂದು ಚಿಕ್ಕ ಬುಟ್ಟಿ ಇದ್ದು ಅದನ್ನೂ ಚಿತ್ತಾರಗಳಿಂದ ಸಿಂಗರಿಸಲಾಗಿರುತ್ತದೆ. ಅದರಲ್ಲಿ ಮನೆಯ ಗಂಡಸರು ಬೆಳಕು ಹರಿಯುವುದರೊಳಗೆ ಚರಗ ಬೀರಿ ಬರುತ್ತಾರೆ. ಚರಗದಲ್ಲಿ ಅಮಟೆ ಕಾಯಿಯನ್ನು ಬೇಯಿಸಿ ಬೆರೆಸುವುದು ವಿಶೇಷ. ಹೀಗೆ ಬೀರುವಾಗ, “ಹಚ್ಚಂಬಲಿ ಹರಿವೆ ಸೊಪ್ಪು, ಹಿತ್ಲಾಗಿದ್ದ ಧಾರೆ ಹೀರೇಕಾಯಿ, ಹೋಯ್‌ ಹೊಯ್‌ ಹೊಯ್‌ ಹೊಯ್”‌ ಎಂದು ಕೂಗಿಹೇಳುವುದು ವಾಡಿಕೆ. ಚರಗ ಬೀರಿದಾಗ ಮಣ್ಣು ಹೆಚ್ಚು ಸಾರವಾಗಿ ಬೆಳೆ ಹುಲುಸಾಗುವುದು ಎಂಬ ನಂಬಿಕೆ ಜನಪದರಲ್ಲಿದೆ. ಆನಂತರ ಚಿತ್ತಾರದ ದೊಡ್ಡ ಬುಟ್ಟಿಯಲ್ಲಿ ಮನೆಯಲ್ಲಿ ಮಾಡಿದ ತಿಂಡಿ, ತಿನಿಸು ಹೊತ್ತುಕೊಂಡು ಹೋಗಿ ಭೂಮ್ಕ್ಯವ್ವಳಿಗೆ ಅಂದರೆ ಭೂಮಿತಾಯಿಗೆ ಬಯಕೆ ತೀರಿಸುವುದೇ ಈ ಹಬ್ಬದ ಆಚರಣೆ. ಈಗಲೂ ಸಂಭ್ರಮದಿಂದ ನಡೆದುಕೊಂಡು ಬಂದಿದೆ. ಹಬ್ಬದ ಊಟ ಮಾಡಿದ ನಂತರ ಕೈಗೆ ಮನೆ ಮಂದಿಯೆಲ್ಲ ಹಂಗು ನೂಲು ಕಟ್ಟಿಕೊಳ್ಳುತ್ತಾರೆ. ಭೂಮ್ಕ್ಯವ್ವಳ ಹಂಗು ತಮ್ಮ ಮೇಲಿದೆ ಎಂಬ ಸಂಕೇತ ಇದಿರಬಹುದು. ಮುಂದೆ ಸುಗ್ಗಿಯ ಸಮಯದಲ್ಲಿ ಭತ್ತ ಕುಯ್ದು ಕಣದಲ್ಲಿ ಬಣವೆ ಹಾಕಿದಾಗ ಈ ಹಂಗು ನೂಲನ್ನು ಬಿಚ್ಚಿ ಬಣವೆ ಮೇಲಿಡುತ್ತಾರೆ.

ಕೃಷಿ ಸಮುದಾಯಗಳು ಭೂಮಿಯನ್ನು ತಾಯಿ ಎಂದು ಬಗೆಯುವ ಪರಿಪಾಠ ಇಂದು ನೆನ್ನೆಯದಲ್ಲ. ಸುಮಾರು ಹನ್ನೊಂದು ಸಾವಿರ ವರ್ಶಗಳ ಹಿಂದೆ ಭಾರತದ ಭೂಖಂಡದಲ್ಲಿ ದ್ರಾವಿಡ ಸಮುದಾಯಗಳು ಆರಂಭಿಸಿದ ಕೃಷಿ ಸಂಸ್ಕೃತಿಯಲ್ಲೇ ಈ ತತ್ವದ ಬೇರುಗಳನ್ನು ಕಾಣಬಹುದು. ಪ್ರಾಚೀನ ಕಾಲದಲ್ಲಿ ಜಗತ್ತಿನಲ್ಲೇ ಅತಿ ದೊಡ್ಡ ಕೃಷಿ ನಾಗರಿಕತೆಯಾಗಿದ್ದ ಸಿಂಧೂ ಬಯಲಿನ ಹರಪ್ಪಾ ನಾಗರಿಕತೆಯಲ್ಲಿ ಈ ಮಾತೃ ಪ್ರಧಾನ ಸಂಸ್ಕೃತಿಯ ಬೇರುಗಳನ್ನು ಗುರುತಿಸಲಾಗಿದೆ. ನಾಡಿನ ಉದ್ದಗಲಕ್ಕೂ ಇರುವ ಗ್ರಾಮ ದೇವತೆಗಳು, ಸ್ತ್ರೀ ಭೂತಗಳು, ತುಳುನಾಡ ಸಿರಿಗಳು ಸಹ ಇಂತಹ ಒಂದು ದ್ರಾವಿಡ ಮಾತೃಪ್ರಧಾನ ಸಂಸ್ಕೃತಿಯ ಭಾಗವೇ ಆಗಿವೆ.

– ಎನ್‌ ಶಿವಾನಂದ ಕುಗ್ವೆ, ಸಾಮಾಜಿಕ ಚಿಂತಕರು ಸಾಗರ