“ಕಾಂಗ್ರೆಸ್‌ನ ಪ್ರಣಾಳಿಕೆಯು ಪ್ರತಿಯೊಂದು ಅಂಶದಲ್ಲೂ ತುಷ್ಟೀಕರಣ, ಓಲೈಕೆಗಳನ್ನು ಮಾಡಲಾಗಿದೆ. ಇಂದು ನಾನು ನಿಮಗೆ ಅವರ ಪ್ರಣಾಳಿಕೆಯ ಬಗ್ಗೆ ಹೇಳುತ್ತೇನೆ ಅದು ನಿಮಗೆ ಆಘಾತವಾಗಬಹುದು. ಈಗ ಸರ್ಕಾರಿ ಟೆಂಡರ್‌ಗಳಿಗೆ ಅಲ್ಪಸಂಖ್ಯಾತರಿಗೆ, ಮುಸ್ಲಿಮರಿಗೆ ಕೋಟಾವನ್ನು ನಿಗದಿಪಡಿಸಲಾಗುವುದು ಎಂದು ಲಿಖಿತವಾಗಿ ಹೇಳಿದ್ದಾರೆ. ಹಾಗಾದರೆ ಇನ್ಮುಂದೆ ಸರ್ಕಾರಿ ಗುತ್ತಿಗೆಗಳನ್ನು ಧರ್ಮದ ಆಧಾರದಲ್ಲಿ ನೀಡಲಾಗುವುದೇ? ಮತ್ತು ಅದಕ್ಕಾಗಿ ಮೀಸಲಾತಿಯನ್ನು ಪರಿಚಯಿಸಲಾಗಿದೆಯೇ?” ಎಂದು ಮೋದಿ ಹೇಳಿದ್ದರು.

ಮೋದಿ ಹೇಳಿದ್ದು ಸತ್ಯವೇ?ಅದಕ್ಕೆ ಆಧಾರವೇನು? 

2024 ರ ಲೋಕಸಭಾ ಚುನಾವಣೆಯ ಕಾಂಗ್ರೆಸ್ ಪ್ರಣಾಳಿಕೆಯಲ್ಲಿ ನಿಜವಾಗಿಯೂ ಮುಸ್ಲಿಮರಿಗೆ ಸರ್ಕಾರಿ ಕೋಟಾಗಳನ್ನು ನೀಡುವುದಾಗಿ ಕಾಂಗ್ರೇಸ್‌ ಹೇಳಿದೆಯೇ?

ಇದಕ್ಕೆ ಇರುವ ಉತ್ತರ: ಮೋದಿ ಹೇಳಿದ್ದು ಹಸಿಹಸಿ ಸುಳ್ಳು!

ಕಾಂಗ್ರೆಸ್ ಪ್ರಣಾಳಿಕೆಯಲ್ಲಿ ಎರಡು ಕಡೆ “ಸಾರ್ವಜನಿಕ ಕಾಮಗಾರಿಗಳ ಗುತ್ತಿಗೆ” ಬಗ್ಗೆ ಹೇಳಲಾಗಿದೆ.

1. ಪರಿಶಿಷ್ಟ ಜಾತಿಗಳು, ಪರಿಶಿಷ್ಟ ಪಂಗಡಗಳು ಮತ್ತು ಇತರ ಹಿಂದುಳಿದ ವರ್ಗಗಳಿಗೆ ಸಂಬಂಧಿಸಿದ ‘ಸಮಾನತೆ’ ವಿಭಾಗದಲ್ಲಿ: “ಎಸ್‌ಸಿ ಮತ್ತು ಎಸ್‌ಟಿ ಸಮುದಾಯಗಳಿಗೆ ಸೇರಿದ ಗುತ್ತಿಗೆದಾರರಿಗೆ ಹೆಚ್ಚಿನ ಸಾರ್ವಜನಿಕ ಕಾಮಗಾರಿ ಗುತ್ತಿಗೆಗಳನ್ನು ನೀಡಲು ಸಾರ್ವಜನಿಕ ಸಂಗ್ರಹಣೆ ನೀತಿಯ ವ್ಯಾಪ್ತಿಯನ್ನು ವಿಸ್ತರಿಸಲಾಗುವುದು .” (ಪುಟ 6, ಪ್ಯಾರಾ 8:)
2. ಎರಡನೆಯದು ‘ಧಾರ್ಮಿಕ ಮತ್ತು ಭಾಷಾ ಅಲ್ಪಸಂಖ್ಯಾತರು’ ವಿಭಾಗದಲ್ಲಿ: “ಅಲ್ಪಸಂಖ್ಯಾತರು ಶಿಕ್ಷಣ, ಆರೋಗ್ಯ, ಸಾರ್ವಜನಿಕ ಉದ್ಯೋಗ, ಸಾರ್ವಜನಿಕ ಕಾರ್ಯಗಳ ಒಪ್ಪಂದಗಳು , ಕೌಶಲ್ಯ ಅಭಿವೃದ್ಧಿ, ಕ್ರೀಡೆ ಮತ್ತು ಸಾಂಸ್ಕೃತಿಕ ಚಟುವಟಿಕೆಗಳಲ್ಲಿ ತಾರತಮ್ಯವಿಲ್ಲದೆ ಅವರ ನ್ಯಾಯಯುತ ಪಾಲನ್ನು ಪಡೆಯುವುದನ್ನು ನಾವು ಖಚಿತಪಡಿಸುತ್ತೇವೆ .” (ಪುಟ 8, ಪ್ಯಾರಾ 6)

ನಾವು ಸ್ಪಷ್ಟವಾಗಿರುವಂತೆ, ಎಸ್‌ಸಿ ಮತ್ತು ಎಸ್‌ಟಿಗಳ ವಿಷಯದಲ್ಲಿ, “ಎಸ್‌ಸಿ ಮತ್ತು ಎಸ್‌ಟಿ ಸಮುದಾಯಗಳಿಗೆ ಸೇರಿದ ಗುತ್ತಿಗೆದಾರರಿಗೆ ಹೆಚ್ಚಿನ ಲೋಕೋಪಯೋಗಿ ಗುತ್ತಿಗೆಗಳನ್ನು ನೀಡುವುದಾಗಿ ಕಾಂಗ್ರೆಸ್ ಹೇಳುತ್ತದೆ. ಮತ್ತು ಅಲ್ಪಸಂಖ್ಯಾತರ ವಿಷಯದಲ್ಲಿ, ಪಕ್ಷವು “ಅಲ್ಪಸಂಖ್ಯಾತರು ತಮ್ಮ ನ್ಯಾಯಯುತವಾದ ಅವಕಾಶಗಳನ್ನು… ಸಾರ್ವಜನಿಕ ಕಾರ್ಯಗಳ ಒಪ್ಪಂದಗಳಲ್ಲಿ… ತಾರತಮ್ಯವಿಲ್ಲದೆ ಪಡೆಯುತ್ತಾರೆ” ಎಂದು ಖಚಿತಪಡಿಸುತ್ತದೆ ಎಂದು ಹೇಳುತ್ತದೆ.

ಮೋದಿ ಹೇಳಿಕೊಂಡಂತೆ ಅಲ್ಪಸಂಖ್ಯಾತರಿಗೆ ಅಥವಾ ಮುಸ್ಲಿಮರಿಗೆ ನಿಗದಿತ ಕೋಟಾದ ಬಗ್ಗೆ ಪ್ರಣಾಳಿಕೆಯಲ್ಲಿ ಎಲ್ಲಿಯೂ ಹೇಳಿಲ್ಲ. ಅಲ್ಪಸಂಖ್ಯಾತರಿಗೆ ‘ತಾರತಮ್ಯವಿಲ್ಲದೆ’ ‘ನ್ಯಾಯಯುತವಾದ ಪಾಲು’ ಖಾತ್ರಿಪಡಿಸುತ್ತದೆ ಎಂದು ಅದು ಭರವಸೆ ನೀಡುತ್ತದೆ. ಇನ್ನೊಂದು ಪ್ಯಾರಾಗ್ರಾಫ್‌ನಲ್ಲಿ, ವಾಸ್ತವವಾಗಿ, “ಬ್ಯಾಂಕ್‌ಗಳು ಅಲ್ಪಸಂಖ್ಯಾತರಿಗೆ ತಾರತಮ್ಯವಿಲ್ಲದೆ ಸಾಂಸ್ಥಿಕ ಸಾಲವನ್ನು ಒದಗಿಸುತ್ತವೆ ಎಂದು ಖಚಿತಪಡಿಸಿಕೊಳ್ಳಲು” ಇದು ಭರವಸೆ ನೀಡುತ್ತದೆ.

ಭಾರತದ ಬ್ಯಾಂಕುಗಳಲ್ಲಿ ಮುಸ್ಲಿಮರು ಸಾಲ ಪಡೆಯುವಲ್ಲಿ ಸಮಸ್ಯೆಗಳನ್ನು ಎದುರಿಸುತ್ತಾರೆ. ಇದರ ಅರಿವು ಕಾಂಗ್ರೇಸಿಗೆ ಇರುವುದರಿಂದ ಇದನ್ನು ಪ್ರಣಾಳಿಕೆಯಲ್ಲಿ ಪ್ರಸ್ತಾಪ ಮಾಡಿದೆ. ಹಾಗಾಗಿ ಸುಳ್ಳು ಹೇಳುವ ಮೋದಿಜಿಗೆ ಕನಿಷ್ಟ ಭಾಷಣದಲ್ಲಿ ಕಾಂಗ್ರೆಸ್ “ಬ್ಯಾಂಕ್ ಸಾಲಗಳಿಗೆ ಕೋಟಾ” ಕೂಡ ಭರವಸೆ ನೀಡುತ್ತಿದೆ ಎಂದಾದರೂ ಹೇಳಿ ನೈತಿಕತೆ ಉಳಿಸಿಕೊಳ್ಳಬೇಕಿತ್ತು.

ಉದ್ಯೋಗ, ಶಿಕ್ಷಣ, ವಸತಿ ಮತ್ತು ಹಣಕಾಸಿನಲ್ಲಿ ಮುಸ್ಲಿಮರು ತಾರತಮ್ಯವನ್ನು ಎದುರಿಸುತ್ತಿದ್ದಾರೆ ಎಂಬ ಅಂಶವನ್ನು 2006 ರಲ್ಲಿ ಸಾಚಾರ್ ಸಮಿತಿ ಮತ್ತು ಅಕ್ಟೋಬರ್ 2014 ರಲ್ಲಿ ಮೋದಿ ಸರ್ಕಾರಕ್ಕೆ ಪ್ರೊ ಅಮಿತಾಬ್ ಕುಂದು ಸಲ್ಲಿಸಿದ ಫಾಲೋಅಪ್ ವರದಿಯು ಉತ್ತಮವಾಗಿ ದಾಖಲಿಸಿದೆ .

ಕೋಟಾಗಳು “ಸಮಾಜದಲ್ಲಿ ವ್ಯಾಪಕವಾಗಿರುವ, ವ್ಯವಸ್ಥಿತವಾಗಿರುವ ತಾರತಮ್ಯವನ್ನು ಪರಿಹರಿಸುವ ಹಲವಾರು ಸಾಧನಗಳಲ್ಲಿ ಒಂದಾಗಿದೆ” ಮತ್ತು “ವೈವಿಧ್ಯತೆಯ ಪ್ರಚಾರ ಮತ್ತು ತಾರತಮ್ಯ ವಿರೋಧಿಸಲು ಸರ್ಕಾರವು “ಮೀಸಲಾತಿಗಳನ್ನು ಮೀರಿ” ಕೆಲಸ ಮಾಬೇಕು ಎಂದು ಕುಂದು ಸಮಿತಿ ಹೇಳಿದೆ.

ಮೋದಿಯವರು ಸುರೇಂದ್ರನಗರದ ಭಾಷಣದಲ್ಲಿ ಸರ್ಕಾರದ ಗುತ್ತಿಗೆಗಳನ್ನು ‘ಕೋಟಾ ಮೂಲಕ’ ನೀಡಲು ನಿಯಮಗಳನ್ನು ಉಲ್ಲಂಘಿಸಲಾಗಿದೆ ಎಂದು ಕಾಂಗ್ರೇಸ್‌ ಮೇಲೆ ಆರೋಪಿಸಿದ್ದಾರೆ. ಆದರೆ ಅವರದೇ ಸರ್ಕಾರ 2018 ರಲ್ಲಿ ಆರು ವಿಮಾನ ನಿಲ್ದಾಣಗಳನ್ನು ಖಾಸಗೀಕರಣಗೊಳಿಸುವಾಗ ಅನೇಕ ನಿಯಮಗಳನ್ನು ಸಡಿಲ ಮಾಡಿತ್ತು, ಈ ಕ್ಷೇತ್ರದಲ್ಲಿ ಯಾವುದೇ ಅನುಭವವಿಲ್ಲದ ಕಂಪನಿಗಳಿಗೆ ಬಿಡ್ ಮಾಡಲು ಅವಕಾಶ ನೀಡಿತು. ಮೋದಿಯವರು ತಮ್ಮ ಕಾರ್ಪೊರೇಟ್ ಸ್ನೇಹಿತರಿಗಾಗಿ ಭಾರತದಲ್ಲಿ ಮತ್ತು ವಿದೇಶಗಳಲ್ಲಿಯೂ ಸಹ ಒಪ್ಪಂದಗಳು ಮತ್ತು ನೀತಿ ಬದಲಾವಣೆಗಳನ್ನು ಮಾಡುತ್ತಿದೆ ಎಂದು ಆರೋಪಿಸಲಾಗಿದೆ. (ಇಲ್ಲಿ ನೋಡಿ ಕಲ್ಲಿದ್ದಲು ಗಣಿಗಳು . ಸ್ಪೆಕ್ಟ್ರಮ್ .  ಧಾರಾವಿ . ಶ್ರೀಲಂಕಾ . ಬಾಂಗ್ಲಾದೇಶ​ ಗ್ರೀಸ್)​

ಹೀಗೆ ಮೋದಿಯವರು ಜನರ ಹಾದಿ ತಪ್ಪಿಸುವಂತೆ ತಮ್ಮ ರಾಜಸ್ಥಾನ ಭಾಷಣದಲ್ಲಿ ಅಲ್ಪಸಂಖ್ಯಾತರ ವಿರುದ್ಧ ಮಾಡಿದ ಅತ್ಯಂತ ಹೀನಾಯವಾದ ಹೇಳಿಕೆಯಂತೆ, ಸುರೇಂದ್ರನಗರದ ಭಾಷಣದಲ್ಲೂ ಕಾಂಗ್ರೇಸ್‌ ಪ್ರಣಾಳಿಕೆಯ ಬಗ್ಗೆ ಹಸಿಹಸಿಯಾದ ಸುಳ್ಳನ್ನು ಹೇಳಿದ್ದಾರೆ. ಚರಿತ್ರೆಯಲ್ಲಿ ತಾವು ಅತ್ಯಂತ ಹೆಚ್ಚು ಸುಳ್ಳುಗಳನ್ನು ಹೇಳಿದ ಭಾರತದ ಪ್ರಧಾನಿಯಾಗಿ ದಾಖಲಾಗುತ್ತಾರೆ.

ಚುನಾವಣೆ ಸಮಯದಲ್ಲಿ ಚುನಾವಣಾ ಆಯೋಗ ಸುದ್ದಿಯ ಬಹುತೇಕ ನಿರ್ವಾತವನ್ನು ಅಕ್ರಮಿಸಿ ವ್ಯಾಪಿಸಿಕೊಂಡು ಬಿಗಿ ಕ್ರಮಗಳು ಮತ್ತು ಕಟ್ಟು ನಿಟ್ಟಿನ ಆದೇಶಗಳಿಂದ ರಾಜಕೀಯ ಪಕ್ಷಗಳ ಆಟಾಟೋಪಗಳಿಗೆ ನಿಯಂತ್ರಣ ಹೇರಿ ಅಕ್ರಮಗಳಿಗೆ ಕಡಿವಾಣ ಹಾಕಿ ದ್ವೇಷ ಭಾಷಣ ಜಾತಿ ಧರ್ಮ ಹಣ ಹೆಂಡಕ್ಕೆ ಅಂಕುಶಗಳನ್ನು ಬಿಗಿದು ಹದ್ದು ಬಸ್ತಿನಲ್ಲಿಟ್ಟು ಚುನಾವಣೆಗಳನ್ನು ನಡೆಸಿ ಸರ್ಕಾರಗಳನ್ನು ಸ್ಥಾಪಿಸಿಕೊಡುವ ಜವಾಬ್ದಾರಿ ಮತ್ತು ಹೊಣೆಗಾರಿಕೆ ಚುನಾವಣಾ ಆಯೋಗದ್ದು.

ಆದರೆ ವಿರೋಧ ಪಕ್ಷಗಳ ಸದ್ದಡಗಿಸಿ ಸದ್ದು ಮಾಡುತ್ತಿರುವುದು ಮಾತ್ರ ED (ಜಾರಿ ನಿರ್ದೇಶನಾಲಯ). ನಾವುಗಳು ಸ್ಪರ್ಧಾತ್ಮಕ ಪರೀಕ್ಷೆಯ ಸಿದ್ಧತೆ ನಡೆಸುವಾಗ EDಯ ಬಗ್ಗೆ ತಿಳಿದುಕೊಂಡಿದ್ದು ತುಂಬಾ ಸಂಕ್ಷಿಪ್ತ ಮಾಹಿತಿ ಅದರ ನೈಜ ಕಾರ್ಯ ಸ್ವರೂಪ ವ್ಯಾಪ್ತಿ ಅಧಿಕಾರ ಮತ್ತು ಕಾರ್ಯಗಳು ತುಂಬಾ ಸೀಮಿತವಾಗಿತ್ತು.

ಅಕ್ರಮ ಹಣ ವರ್ಗಾವಣೆ, ಹವಾಲಾ ದಂದೆ ಬಗ್ಗೆ ನಿಗಾವಣೆ ವಹಿಸಿ PMLA, FEMA FEOA ಕಾಯ್ದೆಗಳನ್ನು ಅನುಷ್ಠಾನಗೊಳಿಸುವ ಕಾನೂನು ಜಾರಿ ಮತ್ತು ಆರ್ಥಿಕ ವ್ಯವಹಾರಗಳ ಮಾಹಿತಿ ಸಂಗ್ರಹಿಸುವ ಗುಪ್ತದಳವಾಗಿ ED ಕೆಲಸ ಮಾಡುವುದಿದೆ.

ಆದರೆ ED ಸಂಸ್ಥೆ ಇತ್ತೀಚಿಗೆ ವಿಶೇಷವಾಗಿ ರಾಜಕೀಯ ಕಾರ್ಯಗಳತ್ತ ತನ್ನ ಕಾರ್ಯ ವೈಖರಿಯ ಸ್ವಭಾವ ಪ್ರಭಾವವನ್ನು ಮಾರ್ಪಾಡು ಮಾಡಿಕೊಂಡಂತಿದೆ.

ಸದ್ಯಕ್ಕೆ ED ಸಂಸ್ಥೆಯು ಚುನಾಯಿತ ಜನಾದೇಶ ಸರ್ಕಾರಗಳನ್ನು ಅಸ್ಥಿರಗೊಳಿಸಿ, ಕೆಡವಿ ಲೂಟಿಕೋರ ಜನಪ್ರತಿನಿಧಿಗಳನ್ನು ಹೆದರಿಸಿ, ಬೆದರಿಸಿ ಒಂದೆಡೆ ಗುಡ್ಡೆ ಹಾಕಿ ಅದರಲ್ಲೂ ವಿಶೇಷವಾಗಿ ವಿರೋಧಪಕ್ಷಗಳ ನಾಯಕರನ್ನು ಗುರಿ ಮಾಡಿ ದಾಳಿ ಮಾಡಿ ದೇಶದಾದ್ಯಂತ ‘ಒಂದು’ ರಾಜಕೀಯ ಪಕ್ಷದ ಅಧಿಕಾರ ಸಾಮ್ರಾಜ್ಯವನ್ನು ವಿಸ್ತರಣೆ ಮಾಡುತ್ತಿರುವ ಪ್ರಬಲ ಶಸ್ತ್ರ ರಹಿತ ಸೇನಾಪಡೆಯಾಗಿದೆ.

ಸಧ್ಯಕ್ಕೆ ED ಸಂಸ್ಥೆ ನವಭಾರತದ “The most powerful armless army”.

ಅಕ್ರಮ ಸಂಪಾದನೆ ತೆರಿಗೆಗಳ್ಳರನ್ನು ಲೂಟಿಕೊರರನ್ನು ಬಂಧಿಸುವುದು ಶಿಕ್ಷಿಸುವುದು ತಪ್ಪಲ್ಲ, ಒಂದು ದಿಟ್ಟ ಕ್ರಮವೇ ಸರಿ. ಆದರೆ ಒಂದು ಪಕ್ಷದಿಂದ ಇನ್ನೊಂದು ಪಕ್ಷಕ್ಕೆ ಪಕ್ಷಾಂತರ ಮಾಡಿದ ಮೇಲೆ ಅವರ ಆರೋಪಗಳ ವಿರುದ್ದ ಯಾವುದೇ ತಾರ್ಕಿಕ ಅಂತ್ಯ ಕಾಣಿಸದೇ ನಿಷ್ಕ್ರಿಯವಾಗಿ ಬಿಟ್ಟರೆ ಹೇಗೆ?

ಅಷ್ಟಕ್ಕೂ ಜನಸಾಮಾನ್ಯರೊಂದಿಗೆ ಹೆಚ್ಚು ನಿಕಟವಾಗಿರುವ ಚುನಾವಣಾ ಆಯೋಗಕ್ಕೆ ಚುನಾವಣೆ ಪೂರ್ವ ಅಭ್ಯರ್ಥಿಗಳ ಪೂರ್ವ ಪರದ ಬಗ್ಗೆ ಲಭ್ಯವಾಗದ ಮಾಹಿತಿ ಅಭ್ಯರ್ಥಿಗಳು ಚುನಾವಣೆ ಗೆದ್ದ ನಂತರ ED ಗೆ ಸಿಗುವುದು ಹೇಗೆ?

ಒಂದು ವೇಳೆ ಈ ಕಳ್ಳಕಾಕರ ಲೂಟಿಕೋರರ ಮಾಹಿತಿ ಮೊದಲೇ ಇದ್ದರೆ ಅವರಿಗೆ ಚುನಾವಣೆಗೆ ಸ್ಪರ್ಧಿಸಲು ಅವಕಾಶ ನೀಡುವುದಾದರೂ ಏಕೆ?

ಹಾಗಾದರೆ ED ಉದ್ದೇಶವೇನು? ಭ್ರಷ್ಟರು ಲೂಟಿಕೋರರು ಬೇರೆ ಬೇರೆ ಪಕ್ಷಗಳಲ್ಲಿ ಇರುವುದಕ್ಕಿಂತ ಎಲ್ಲರೂ ಒಂದೇ ಪಕ್ಷದಲ್ಲಿ ಇದ್ದರೆ ಒಳಿತೆಂದು ಅರ್ಥವೇ?

ನಡತೆಗೆಟ್ಟ ರಾಜಕಾರಣಿಗಳಿಂದ ಪರಮ ಪವಿತ್ರ ಜವಾಬ್ದಾರಿಯ ಕಾರ್ಯವಾದ “ರಾಜನೀತಿ” ಇಂದು ನೀತಿಗೆಟ್ಟಿದೆ. ಓಟಿಗಾಗಿ ನೋಟು ಹಂಚಿ ಗೆದ್ದ ನಂತರ ಲೂಟಿಗೆ ಇಳಿಯುತ್ತಿದ್ದಾರೆ. ಇದರಿಂದ ಶ್ರೇಷ್ಠ ಆಡಳಿತ ವ್ಯವಸ್ಥೆ ಪ್ರಜಾಪ್ರಭುತ್ವದ ಚಾರಿತ್ಯಕ್ಕೆ ಧಕ್ಕೆ ಬಂದು ರಾಜಕಾರಣ ದಿಕ್ಕು ತಪ್ಪಿ ಜನಸಾಮಾನ್ಯರು ರಾಜಕಾರಣದ ಬಗ್ಗೆ ಅಸಹ್ಯ ಪಟ್ಟು ರಾಜಕೀಯ ಕ್ಷೇತ್ರವನ್ನು ಸಾಮಾನ್ಯ ಹಿನ್ನೆಲೆಯವರಿಗೆ ಕೈಗೆಟುಕದ ಕ್ಷೇತ್ರವನ್ನಾಗಿಸುತ್ತಿದ್ದಾರೆ.

ಹೀಗೆಯೇ ವಿರೋಧ ಪಕ್ಷಗಳನ್ನು ರಾಜಕೀಯ ವಿರೋಧಿಗಳನ್ನು ಹತ್ತಿಕ್ಕಲು ತನಿಖಾ ಸಂಸ್ಥೆಗಳ ದುರುಪಯೋಗ ಸ್ಪಷ್ಟವಾಗಿ ಕಣ್ಣಿಗೆ ಗೋಚರಿಸುತ್ತಿದ್ದರೂ ಪ್ರಜೆಗಳು ಮೂಕ ಪ್ರೇಕ್ಷಕರಾದರೆ ಭವಿಷ್ಯದ ಪೀಳಿಗೆಗೆ ಈ ವ್ಯವಸ್ಥೆ ಉಳಿಯುವುದೇ ಅನುಮಾನ.

ನೆನಪಿರಲಿ, ಪ್ರಜಾಪ್ರಭುತ್ವದಲ್ಲಿ ವಿರೋಧಪಕ್ಷಗಳು ಮಾಧ್ಯಮಗಳು ಮತ್ತು ಸಾಂವಿಧಾನಿಕ ಸಂಸ್ಥೆಗಳು ವಿಫಲವಾದಾಗ ಪ್ರಜಾಪ್ರಭುತ್ವ ಸಂವಿಧಾನವನ್ನು ಉಳಿಸಿಕೊಳ್ಳುವಲ್ಲಿ ನಾಗರಿಕ ಸಮಾಜದ ಪಾಲ್ಗೊಳ್ಳುವಿಕೆ ವ್ಯಕ್ತಿಗತ ಕೂಗು ಅತ್ಯವಶ್ಯಕ.

“correctness and relevance” ಗಾಗಿ ಪುಸ್ತಕಗಳನ್ನು ಪರಿಶೀಲಿಸಲು ಬಯಸಿರುವುದಾಗಿ ಚುನಾವಣಾ ಆಯೋಗ ತಿಳಿಸಿದ್ದು, ಸದ್ಯದ ಪಠ್ಯಪುಸ್ತಕಗಳನ್ನು “ನೈತಿಕ ಮತದಾನದ ನಿರ್ಧಾರಗಳನ್ನು” ತೆಗೆದುಕೊಳ್ಳುವಂತೆ ವಿದ್ಯಾರ್ಥಿಗಳನ್ನು ರೂಪಿಸಲು ಸಿದ್ಧಪಡಿಸುವುದಿಲ್ಲ ಎಂದು ಹೇಳಿದೆ.

2022 ರಲ್ಲಿ ಚುನಾವಣಾ ಆಯೋಗವು ತಿದ್ದುಪಡಿ ಮಾಡಲು ಸೂಚಿಸಿದ ಅಧ್ಯಾಯಗಳನ್ನು ರಾಷ್ಟ್ರೀಯ ಶೈಕ್ಷಣಿಕ ಸಂಶೋಧನೆ ಮತ್ತು ತರಬೇತಿ ಮಂಡಳಿ (NCERT) 6 ನೇ ತರಗತಿ ಮತ್ತು 10 ನೇ ತರಗತಿ ಪಠ್ಯಪುಸ್ತಕಗಳಿಂದ ತೆಗೆದುಹಾಕಿದೆ. ಇದಕ್ಕೆ  ಕೋವಿಡ್-19  ಸಂದರ್ಭದಲ್ಲಿ ವಿದ್ಯಾರ್ಥಿಗಳ ಮೇಲಿನ ಶೈಕ್ಷಣಿಕ ಹೊರೆಯನ್ನು ಕಡಿಮೆ ಮಾಡಲು ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂದು ಹೇಳಿತ್ತು.   

ಡಿಲಿಟ್‌ ಮಾಡಲಾದ ಅಧ್ಯಾಯಗಳು: 6 ನೇ ತರಗತಿಯ “ಪ್ರಜಾಪ್ರಭುತ್ವದ ಸರ್ಕಾರದ ಪ್ರಮುಖ ಅಂಶಗಳು” ಮತ್ತು 10 ನೇ ತರಗತಿಯ “ಜನಪ್ರಿಯ ಹೋರಾಟಗಳು ಮತ್ತು ಚಳುವಳಿಗಳು”.

6 ನೇ ತರಗತಿಯ ಪಠ್ಯಪುಸ್ತಕದ ಅಧ್ಯಾಯದಲ್ಲಿ ಚುನಾವಣಾ ಆಯೋಗವು “ಈ ಎಳಸು ವಯಸ್ಸಿನ ಮಕ್ಕಳಿಗೆ ಸಂಘರ್ಷ ಇತಿಹಾಸವನ್ನು ವಿಸ್ತರಿಸಿ ಪಾಠ ಮಾಡುವುದು ತೀರ ಅನಗತ್ಯ” ಎಂದು ಹೇಳಿದೆ. 10 ನೇ ತರಗತಿ ಪುಸ್ತಕದಲ್ಲಿನ ಅಧ್ಯಾಯಕ್ಕೆ ಸಂಬಂಧಿಸಿದಂತೆ, “ಘರ್ಷಣೆಗಳು, ಹೋರಾಟಗಳು, ಜನಪ್ರಿಯ ಚಳುವಳಿಗಳು, ಆಂದೋಲನಗಳ” ಬಗ್ಗೆ ಹೆಚ್ಚು ಮಾತನಾಡಿದೆಯೇ ಹೊರತು, “ಚುನಾವಣಾ ಭಾಗವಹಿಸುವಿಕೆಗಾಗಿ ಪೌರತ್ವ ಅಭಿವೃದ್ಧಿ – citizenship development for electoral participation” ಬಗ್ಗೆ ಯುವಜನರಿಗೆ ಹೆಚ್ಚು ಪಠ್ಯ ನೀಡಿಲ್ಲ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದೆ.

6 ನೇ ತರಗತಿ ಪುಸ್ತಕದ ಅಧ್ಯಾಯವು ಸಮಾನತೆ ಮತ್ತು ತಾರತಮ್ಯದ ಪರಿಕಲ್ಪನೆಗಳ ಬಗ್ಗೆ ಮಾತನಾಡಿದೆ ಮತ್ತು ದಕ್ಷಿಣ ಆಫ್ರಿಕಾದಲ್ಲಿ ವರ್ಣಭೇದ ನೀತಿ ಮತ್ತು ದಲಿತರು, ಆದಿವಾಸಿಗಳು ಮತ್ತು ಅಲ್ಪಸಂಖ್ಯಾತರ ನೇತೃತ್ವದ ಚಳುವಳಿಗಳ ಬಗ್ಗೆ ಉಲ್ಲೇಖಿಸಿದೆ. 10 ನೇ ತರಗತಿ ಪುಸ್ತಕದಿಂದ  ಕಾರ್ಯಕರ್ತೆ ಮೇಧಾ ಪಾಟ್ಕರ್ ನೇತೃತ್ವದ ಪೀಪಲ್ಸ್ ಮೂವ್‌ಮೆಂಟ್‌ಗಳ ರಾಷ್ಟ್ರೀಯ ಒಕ್ಕೂಟ ಮತ್ತು ನೇಪಾಳದಲ್ಲಿ ರಾಜಪ್ರಭುತ್ವ ವಿರೋಧಿ ಪ್ರತಿಭಟನೆಗಳ ಬಗ್ಗೆ ಇರುವ ಮಾಹಿತಿಗಳನ್ನು ತೆಗೆದುಹಾಕಲಾಗಿದೆ.

ಪಠ್ಯಪುಸ್ತಕಗಳಿಗೆ ತಿದ್ದುಪಡಿಗಳನ್ನು ಸೂಚಿಸುವ ಪ್ರಸ್ತಾವನೆಗೆ ಸಂಬಂಧಿಸಿದಂತೆ ಚುನಾವಣಾ ಆಯೋಗವು 2016 ರಿಂದ ಮಾನವ ಸಂಪನ್ಮೂಲ ಅಭಿವೃದ್ಧಿ ಸಚಿವಾಲಯದ ಜೊತೆಗೆ ಪತ್ರವ್ಯವಹಾರ ನಡೆಸುತ್ತಿದೆ. 2020 ರಲ್ಲಿ, ಮಾನವ ಸಂಪನ್ಮೂಲ ಅಭಿವೃದ್ಧಿ ಸಚಿವಾಲಯವನ್ನು ಶಿಕ್ಷಣ ಸಚಿವಾಲಯ ಎಂದು ಮರುನಾಮಕರಣ ಮಾಡಲಾಯಿತು.

ಮುಖ್ಯ ಚುನಾವಣಾ ಆಯುಕ್ತರು ಮತ್ತು ಇತರ ಚುನಾವಣಾ ಆಯುಕ್ತರ ನೇಮಕಾತಿ ಮಸೂದೆ – The Chief Election Commissioner and Other Election Commissioners (Appointment, Conditions of Service and Term of Office) Bill, 2023 ಬಗ್ಗೆ ಈಗಾಗಲೇ ದೇಶದಾದ್ಯಂತ ಚರ್ಚೆಗಳು ನಡೆಯುತ್ತಿದ್ದು, ಇದರ ಮಧ್ಯೆ ಈ ಬೆಳವಣಿಗೆ ನಡೆದಿದೆ.

ಈ ಹೊಸ ಮಸೂದೆಯಲ್ಲಿ ಸಿಇಸಿಯ ನೇಮಕಾತಿಗೆ ಪ್ರಧಾನ ಮಂತ್ರಿ ನೇತೃತ್ವದ ಆಯ್ಕೆ ಸಮಿತಿಯನ್ನು ರಚಿಸುವ ಪ್ರಸ್ತಾಪವಿದ್ದು, ಹಿಂದೆ ಸಮಿತಿಯಲ್ಲಿದ್ದ ಸುಪ್ರೀಂ ಕೋರ್ಟ್‌ನ ಮುಖ್ಯ ನ್ಯಾಯಮೂರ್ತಿಗಳನ್ನು ತೆಗೆದುಹಾಕಿ ಪ್ರಧಾನಿ ಸೂಚಿಸುವ ಒಬ್ಬ ಕೇಂದ್ರ ಸಚಿವ ಹಾಗೂ ವಿರೋಧ ಪಕ್ಷದ ನಾಯಕ ಸದಸ್ಯರಾಗಿರುತ್ತಾರೆ.

ಈ ಅಧಿವೇಶನದಲ್ಲಿ ಪತ್ರಿಕೆ ಮತ್ತು ನಿಯತಕಾಲಿಕಗಳ ನೋಂದಣಿ ಮಸೂದೆ  2023  (The Press and Registration of Periodicals Bill, 2023) ಕೂಡ ಮಂಡನೆಯಾಗಲಿದೆ. ಈ ಮಸೂದೆಗೆ ಈಗಾಗಲೇ ಎಡಿಟರ್ಸ್‌ ಗಿಲ್ಡ್ ಆಫ್ ಇಂಡಿಯಾದ ಟೀಕೆಯನ್ನು ವ್ಯಕ್ತಪಡಿಸಿತ್ತು. ಈ ಬಿಲ್‌ ಸದ್ಯ ಇರುವ Press and Registration of Books Act, 1867 (PRB) ಅನ್ನು ಬದಲಿಸಿದೆ. ಅಲ್ಲದೇ, ಈ ಮಸೂದೆ ಆಗಸ್ಟ್ 3, ಗುರುವಾರದಂದು ಪ್ರತಿಪಕ್ಷಗಳ ಅನುಪಸ್ಥಿತಿಯಲ್ಲಿ ಧ್ವನಿ ಮತದ ಮೂಲಕ ರಾಜ್ಯಸಭೆಯಲ್ಲಿ ಅಂಗೀಕರವಾಗಿತ್ತು. ಈ ಹೊಸ ಮಸೂದೆ ಪತ್ರಿಕಾ ಸ್ವಾತಂತ್ರ್ಯದ ಮೇಲೆ ಸವಾರಿ ಮಾಡಲಿದೆ ಎಂದು ಎಡಿಟರ್ಸ್‌ ಗಿಲ್ಡ್ ಆಫ್ ವಿರೋಧ ವ್ಯಕ್ತಪಡಿಸಿತ್ತು.

ಬುಲ್ಲೆಟಿನ್‌ ಬಿಡುಗಡೆಯಾದಂತೆ ಟ್ವೀಟ್‌ ಮಾಡಿರುವ ಕಾಂಗ್ರೆಸ್ ಸಂಸದ ಜೈರಾಮ್ ರಮೇಶ್, “ಕೊನೆಗೂ ಸೋನಿಯಾ ಗಾಂಧಿಯವರು ಪ್ರಧಾನಿಗಳಿಗೆ ಪತ್ರ ಬರೆದು ಒತ್ತಡ ಹಾಕಿದ್ದಕ್ಕಾಗಿ ಸೆಪ್ಟೆಂಬರ್ 18ರಿಂದ ಪ್ರಾರಂಭವಾಗುವ ಸಂಸತ್ತಿನ ವಿಶೇಷ 5 ದಿನಗಳ ಅಧಿವೇಶನದ ಕಾರ್ಯಸೂಚಿಯನ್ನು ಮೋದಿ ಸರ್ಕಾರ ಬಿಡುಗಡೆ ಮಾಡಿದೆ. ಈಗ ಪ್ರಕಟಿಸಲಾಗಿರುವ ಕಾರ್ಯಸೂಚಿ ಗೊಂದಲದಿಂದ ಕೂಡಿದೆ.  ನವೆಂಬರ್‌ನ ಚಳಿಗಾಲದ ಅಧಿವೇಶನದವರೆಗೆ ಕಾಯಬಹುದಿತ್ತು. ಶಾಸಕಾಂಗದ ಗ್ರೆನೇಡ್‌ಗಳನ್ನು ಎಂದಿನಂತೆ ಕೊನೆಯ ಗಳಿಗೆಯಲ್ಲಿ ಎಸೆಯಲು ತಮ್ಮ ತೋಳುಗಳ ಮೇಲೆ ಇಟ್ಟುಕೊಂಡಿದ್ದಾರೆ. ಪರ್ದೇ ಕೆ ಪೀಚೆ ಕುಚ್ ಔರ್ ಹೈ ( ಏನೋ ಹಿಡನ್ ಅಜೆಂಡಾ ಇದೆ)! ಅದೇನೇ ಇರಲಿ, INDIA ಮೈತ್ರಿಕೂಟ  ಈ ಕಪಟ CEC ಮಸೂದೆಯನ್ನು ವಿರೋಧಿಸುತ್ತದೆ,”ಎಂದು ಹೇಳಿದ್ದಾರೆ.

ಈ ಅಧಿವೇಶನದಲ್ಲಿ  “ಸಂವಿಧಾನ ಸಭೆಯಿಂದ ಆರಂಭವಾಗಿ 75 ವರ್ಷಗಳ ಸಂಸತ್ತಿನ ಪಯಣ – ಸಾಧನೆಗಳು, ಅನುಭವಗಳು, ನೆನಪುಗಳು ಮತ್ತು ಕಲಿಕೆಗಳು” ಬಗ್ಗೆ ಚರ್ಚೆ ಮಾಡಲಾಗುವುದು ಎಂದು ಬುಲೆಟಿನ್‌ನಲ್ಲಿ ತಿಳಿಸಲಾಗಿದೆ.

ಈ ವೇಳೆ ಮಾಧ್ಯಮಗಳ ಜೊತೆ ಮಾತನಾಡಿದ ಪೃಥ್ವಿ ರೆಡ್ಡಿಯವರು, ʼಅಕ್ರಮಗಳನ್ನು ತಡಯುವ ಉದ್ದೇಶದಿಂದ ಕೇಂದ್ರ ಚುನಾವಣಾ ಆಯೋಗವು ಇತ್ತೀಚೆಗಷ್ಟೇ ವರ್ಗಾವಣೆ ನೀತಿಯನ್ನು ಪ್ರಕಟಿಸಿದೆ. ಇದರ ಅನ್ವಯ ಒಂದೇ ಜಿಲ್ಲೆಯಲ್ಲಿ ಮೂರು ವರ್ಷಗಳಿಗಿಂತ ಹೆಚ್ಚು ಕಾಲದಿಂದ ಕಾರ್ಯನಿರ್ವಹಿಸುತ್ತಿರುವ ಅಧಿಕಾರಿಗಳು ಹಾಗೂ ಚುನಾವಣೆಯೊಂದಿಗೆ ನೇರ ಸಂಪರ್ಕ ಹೊಂದಿರುವ ಅಧಿಕಾರಿಗಳು ಬೇರೆ ಜಿಲ್ಲೆಗೆ ವರ್ಗಾವಣೆ ಆಗಬೇಕಿರುತ್ತದೆ. ಆದರೆ ರಾಜ್ಯ ಸರ್ಕಾರವು ಕುತಂತ್ರ ಮಾರ್ಗ ಅನುಸರಿಸಿ, ವರ್ಗಾವಣೆ ನೀತಿಯ ಆಶಯವನ್ನೇ ಬುಡಮೇಲೆ ಮಾಡುತ್ತಿರುವುದು ನಮ್ಮ ಗಮನಕ್ಕೆ ಬಂದಿದೆʼ ಎಂದು ಹೇಳಿದರು.

ʼರಾಜ್ಯ ಬಿಜೆಪಿ ಸರ್ಕಾರವು ಅಧಿಕಾರಿಗಳನ್ನು ಬೇರೆ ಜಿಲ್ಲೆಗೆ ತಾತ್ಕಾಲಿಕವಾಗಿ ವರ್ಗಾಯಿಸಿ, ಮತ್ತೆ ಮೊದಲಿದ್ದ ಜಿಲ್ಲೆಗೆ ಮರುವರ್ಗಾವಣೆ ಮಾಡುತ್ತಿರುವುದು ಕಂಡುಬರುತ್ತಿದೆ. ಈ ಮೂಲಕ ಅವರು ಮೂರು ವರ್ಷದಿಂದ ಒಂದೇ ಕಡೆ ಇಲ್ಲವೆಂದು ಸಾಬೀತುಪಡಿಸಿ, ಅವರನ್ನು ಮೊದಲಿದ್ದ ಜಿಲ್ಲೆಯಲ್ಲೇ ಉಳಿಸಿಕೊಳ್ಳಲು ಸರ್ಕಾರ ಮುಂದಾಗುತ್ತಿದೆ. ಸರ್ಕಾರದ ಇಂತಹ ಕುತಂತ್ರ ಮಾರ್ಗದ ಬಗ್ಗೆ ಸೂಕ್ತ ಪರಿಶೀಲನೆ ನಡೆಸಿ ಕ್ರಮ ಕೈಗೊಳ್ಳಬೇಕೆಂದು ಚುನಾವಣಾ ಆಯೋಗಕ್ಕೆ ಮನವಿ ಸಲ್ಲಿಸಲಾಗಿದೆʼ ಎಂದು ಪೃಥ್ವಿ ರೆಡ್ಡಿ ತಿಳಿಸಿದರು.

ಆಮ್‌ ಆದ್ಮಿ ಪಾರ್ಟಿ ರಾಜ್ಯ ಉಪಾಧ್ಯಕ್ಷ ಭಾಸ್ಕರ್‌ ರಾವ್‌ ಮಾತನಾಡಿ, ʼಚಿಲುಮೆ ಸಂಸ್ಥೆಯ ಮೂಲಕ ಮತದಾರರ ಪಟ್ಟಿಗೆ ಸಂಬಂಧಿಸಿ ಬಿಜೆಪಿಯು ಅಕ್ರಮ ನಡೆಸಿರುವುದು ತನಿಖೆಯಿಂದ ಸಾಬೀತಾಗುವ ಹಂತದಲ್ಲಿದೆ. ಹಣಬಲ, ತೋಳ್ಬಲ, ಅಧಿಕಾರಬಲ ಬಳಸಿಕೊಂಡು ಕೂಡ ಬಿಜೆಪಿ ಹಲವು ರೀತಿಯ ಅಕ್ರಮ ನಡೆಸುತ್ತದೆ. ಇಷ್ಟೆಲ್ಲ ಮಾಡಿಯೂ ಚುನಾವಣೆಯಲ್ಲಿ ಸೋತರೆ, ಆಪರೇಷನ್‌ ಕಮಲವೆಂದು ಮತ್ತೊಂದು ಅಕ್ರಮವನ್ನು ಬಿಜೆಪಿ ಮಾಡುತ್ತದೆ. ಈಗ ಇವುಗಳಿಗೆ ಮತ್ತೊಂದು ಸೇರ್ಪಡೆ ಎಂಬಂತೆ, ಬಿಜೆಪಿ ಸರ್ಕಾರವು ವರ್ಗಾವಣೆಯಲ್ಲಿ ಅಕ್ರಮ ಮಾಡುತ್ತಿದೆʼ ಎಂದು ಹೇಳಿದರು.

ಈ ಸಂದರ್ಭದಲ್ಲಿ ಪಕ್ಷದ ಮುಖಂಡರಾದ ಬ್ರಿಜೇಶ್‌ ಕಾಳಪ್ಪ, ಜಗದೀಶ್‌ ವಿ ಸದಂ, ಬಿ.ಟಿ.ನಾಗಣ್ಣ, ಚನ್ನಪ್ಪಗೌಡ ನೆಲ್ಲೂರು, ಸುರೇಶ್‌ ರಾಥೋಡ್‌ ಮತ್ತಿತರರು ಭಾಗವಹಿಸಿದ್ದರು.