ರಾಮೊನ್ ಮ್ಯಾಗ್ಸೆಸೆ ಪ್ರಶಸ್ತಿ ವಿಜೇತರಾದ ರವೀಶ್ ಕುಮಾರ್ ಅವರು ಚಾನೆಲ್‌ನ ಪ್ರಮುಖ ವ್ಯಕ್ತಿಯಾಗಿ ಹೆಸರಾಗಿದ್ದರು. ಚಾನೆಲ್‌ನ ಪ್ರಮುಖ ವಾರದ ದಿನದ ಶೋ ಹಮ್ ಲೋಗ್, ರವೀಶ್ ಕಿ ರಿಪೋರ್ಟ್, ದೇಶ್ ಕಿ ಬಾತ್ ಮತ್ತು ಪ್ರೈಮ್ ಟೈಮ್ ಸೇರಿದಂತೆ ಹಲವಾರು ಕಾರ್ಯಕ್ರಮಗಳನ್ನು ಆಯೋಜಿಸುತ್ತಿದ್ದರು. ಪತ್ರಿಕೋದ್ಯಮದಲ್ಲಿ ಎರಡು ಬಾರಿ ರಾಮನಾಥ್ ಗೋಯೆಂಕಾ ಎಕ್ಸಲೆನ್ಸ್ ಪ್ರಶಸ್ತಿಯನ್ನು ಸಹ ಪಡೆದ ಕೀರ್ತಿ ಅವರದ್ದಾಗಿದೆ. ಕರ್ನಾಟಕದಲ್ಲಿ ಕೊಡಮಾಡುವ ʼಗೌರಿ ಲಂಕೇಶ್‌ʼಯನ್ನು ಪಡೆದ ಮೊದಲ ಪತ್ರಕರ್ತ ರವೀಶ್‌ ಕುಮಾರ್‌ ಆಗಿದ್ದಾರೆ.

ಗೌತಮ್ ಅದಾನಿ ನೇತೃತ್ವದ ಅದಾನಿ ಗ್ರೂಪ್, ವ್ಯಾಪಾರ ಹಿತಾಸಕ್ತಿಗಳನ್ನು ಹೊಂದಿರುವ ಸಂಘಟಿತ ಸಂಸ್ಥೆಯಾಗಿದ್ದು, ಆಗಸ್ಟ್ 23 ರಂದು ಚಾನೆಲ್ NDTV ಲಿಮಿಟೆಡ್‌ನಲ್ಲಿ 29.18 ರಷ್ಟು ಪಾಲನ್ನು ಸ್ವಾಧೀನಪಡಿಸಿಕೊಂಡಿತು. ಆ ಸಂದರ್ಭದಲ್ಲೇ ರವೀಶ್ ಕುಮಾರ್ ಅವರ ರಾಜೀನಾಮೆ ವದಂತಿ ಹರಿದಾಡಿತ್ತು. ನವೆಂಬರ್ 28 ಕ್ಕೆ ಅದಾನಿ ಗ್ರೂಪ್ ND TVಯ ಸಂಪೂರ್ಣ 99 ರಷ್ಟು ಷೇರು ಪಡೆದುಕೊಂಡ ನಂತರ ರವೀಶ್ ಕುಮಾರ್ ಅವರ ರಾಜೀನಾಮೆ ನಿರೀಕ್ಷಿತ ಎಂದೇ ಪತ್ರಿಕೋದ್ಯಮ ವಲಯದಲ್ಲಿ ಹರಿದಾಡಿತ್ತು. ನಿರೀಕ್ಷೆಯಂತೆ ರವೀಶ್ ಕುಮಾರ್ ರಾಜೀನಾಮೆ ನೀಡಿದ್ದಾರೆ.

ಈ ಸಂದರ್ಭದಲ್ಲಿ ಮಾತನಾಡಿರುವ ಎನ್‌ಡಿಟಿವಿ ಗ್ರೂಪ್‌ನ ಅಧ್ಯಕ್ಷೆ ಸುಪರ್ಣಾ ಸಿಂಗ್‌ ಅವರು, ʼರವೀಶ್‌ ಕುಮಾರ್‌ ಅವರು ಜನರನ್ನು ಪ್ರಭಾವಿಸಿರುವ ರೀತಿಯಲ್ಲಿ ಪ್ರಭಾವಿಸಿರುವ ಪತ್ರಕರ್ತರು ಬಹಳ ವಿರಳ. ಅವರ ಕುರಿತು ಬಂದಿರುವ ಅಭಿಪ್ರಾಯಗಳ ಮೂಲಕ ಇದು ತಿಳಿಯುತ್ತದೆ. ಅವರು ಹೋದಲ್ಲೆಲ್ಲಾ ಜನ ಸೇರುತ್ತಾರೆ. ಅವರಿಗೆ ದೊರೆತಿರುವ ಪ್ರತಿಷ್ಠಿತ ಪ್ರಶಸ್ತಿಗಳೂ ಇದಕ್ಕೆ ಸಾಕ್ಷಿಯಾಗಿವೆʼ ಎಂದಿದ್ದಾರೆ.

ಅದಾನಿ ಘಟಕವು ಪರೋಕ್ಷವಾಗಿ ನವದೆಹಲಿ ಟೆಲಿವಿಷನ್‌ ಲಿಮಿಟೆಡ್‌ (NDTV) ನಲ್ಲಿ ಶೇ 29.18 ರಷ್ಟು ಪಾಲನ್ನು ಖರೀದಿಸುತ್ತದೆ ಮತ್ತು ಶೇ 26 ರಷ್ಟನ್ನು ಮುಕ್ತ ಕೊಡುಗೆಯಾಗಿ ಸ್ವೀಕರಿಸುತ್ತದೆ. ಕಂಪನಿಯು ಬಿಡುಗಡೆ ಮಾಡಿದ ಪತ್ರಿಕಾ ಪ್ರಕಟಣೆಯ ಪ್ರಕಾರ, ಮುಕ್ತ ಕೊಡುಗೆಯು ರೂ 493 ಕೋಟಿ ಮೌಲ್ಯದ್ದಾಗಿದೆ.

ಇದಕ್ಕೂ ಮುನ್ನ ಮಂಗಳವಾರ ಅದಾನಿ ಅವರು ವಿಶ್ವಪ್ರಧಾನ್‌ ಕಮರ್ಷಿಯಲ್‌ ಪ್ರೈವೇಟ್‌ ಲಿಮಿಟೆಡ್‌ (VCPL)ನು 114 ಕೋಟಿ ರೂ.ಗೆ ಖರೀದಿಸಿರುವುದಾಗಿ ತಿಳಿಸಿದ್ದರು. VCPL, NDTV ಷೇರುದಾರ RRPR ನ ವಾರೆಂಟ್‌ಗಳನ್ನು ಹೊಂದಿದ್ದು, ಆ ವಾರೆಂಟ್‌ಗಳನ್ನು RRPRನ  ಶೇ 99.5 ರಷ್ಟು ಷೇರುಗಳಾಗಿ ಪರಿವರ್ತಿಸಲು ತನ್ನ ಹಕ್ಕುಗಳನ್ನು ಚಲಾಯಿಸಲಿದೆ.