ಕಳೆದ ವಾರ ಸುಪ್ರೀಂ ಕೋರ್ಟ್‌ ಕೂಡ ಬೀದಿ ನಾಯಿಗಳಿಗೆ ಶೆಲ್ಟರ್‌ ನಿರ್ಮಾಣ ಮಾಡಿ ನಾಯಿಗಳನ್ನು ಅಲ್ಲಿಗೆ ಸ್ಥಳಾಂತರ ಮಾಡಿ ಎಂದು ಎಲ್ಲಾ ರಾಜ್ಯಗಳಿಗೂ ಸೂಚಿಸಿತ್ತು. ಸರ್ಕಾರಿ ಕಚೇರಿ.. ಶಿಕ್ಷಣ ಸಂಸ್ಥೆಗಳು, ಸ್ಟೇಡಿಯಂ ಸೇರಿದಂತೆ ಜನನಿಬಿಡ ಪ್ರದೇಶಗಳಿಂದ ಬೀದಿ ನಾಯಿಗಳನ್ನು ಸ್ಥಳಾಂತರ ಮಾಡಿ ಅಂತ ಅದೇಶ ನೀಡಲಾಗಿತ್ತು. ಇದೀಗ ಸುಪ್ರೀಂ ಕೋರ್ಟ್‌ ಅದೇಶದ ಅನ್ವಯ ಬೀದಿ ನಾಯಿಗಳಿಗೆ ಶೆಲ್ಟರ್‌ ನಿರ್ಮಾಣ ಮಾಡಿ ನಿತ್ಯ ಎರಡು ಬಾರಿ ಚಿಕನ್‌ ಊಟ‍ ನೀಡೋದಕ್ಕೆ ಜಿಬಿಎ ಅಧಿಕಾರಿಗಳು ತೀರ್ಮಾನಿಸಿದ್ದಾರೆ. ಒಂದು ನಾಯಿಗೆ ಒಂದು ಬಾರಿಯ ಊಟಕ್ಕೆ 25 ರೂ ನಿಗದಿ ಮಾಡಲಾಗಿದೆ. ಹೀಗಾಗಿ ಬೀದಿ ನಾಯಿಗೆ ಪ್ರತಿನಿತ್ಯ 50 ರೂ. ಖರ್ಚು ಮಾಡಬೇಕಾಗಿದೆ. ಊಟದಲ್ಲಿ 150 ಗ್ರಾಂ ಅಕ್ಕಿ, 100 ಗ್ರಾಂ ಚಿಕನ್‌ ಸೇರಿರುತ್ತದೆ. ಈಗಾಗಲೇ ಸುಪ್ರೀಂ ಕೋರ್ಟ್‌ ಸೂಚನೆಯಂತೆ ಬೆಂಗಳೂರು ನಗರದಲ್ಲಿಯೇ 2,206 ಬೀದಿ ನಾಯಿಗಳನ್ನು ಗುರುತು ಮಾಡಲಾಗಿದ್ದು, ಈ ನಾಯಿಗಳ ನಿರ್ವಹಣೆಗೆ ಪ್ರತಿ ತಿಂಗಳು ಸುಮಾರು 67 ಲಕ್ಷ ರೂ.ಗಳನ್ನು ಖರ್ಚು ಮಾಡಬೇಕಿದೆ.

ಬೀದಿನಾಯಿಗಳಿಗೆ ಬಾಡೂಟದ ಬಿಬಿಎಂಪಿ ಕ್ರಮಕ್ಕೆ ಟೀಕಿಸಿದ್ದ ಬಿಜೆಪಿ:  ಕಳೆದ ಜೂನ್‌ ತಿಂಗಳಲ್ಲಿ ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆಯ ಆರೋಗ್ಯ ಇಲಾಖೆಯ ವಿಶೇಷ ಆಯುಕ್ತರು ಬಿಬಿಎಂಪಿ ವ್ಯಾಪ್ತಿಯಲ್ಲಿರುವ ಬೀದಿ ನಾಯಿಗಳ ಪೈಕಿ 5 ಸಾವಿರ ಬೀದಿ ನಾಯಿಗಳಿಗೆ ಪ್ರತಿ ನಿತ್ಯ ಮಾಂಸಹಾರಿ ಊಟವನ್ನು ಒದಗಿಸುವ ಸಂಬಂಧ 2.8 ಕೋಟಿ ರೂ. ಮೊತ್ತದ ಟೆಂಡ‌ರ್ ಅನ್ನು ಆಹ್ವಾನಿಸಿದ್ದರು. ಈ ಸಂಬಂಧ ಸಾರ್ವಜನಿಕ ವಲಯದಿಂದ ತೀವ್ರ ಆಕ್ಷೇಪಗಳು ವ್ಯಕ್ತವಾಗಿತ್ತು.