ಆಸ್ಪತ್ರೆಯಲ್ಲಿ ಕಾರ್ಮಿಕರ ವಾರ್ಡ್‌ ಒಂದರಿಂದಲೇ ಪ್ರತಿದಿನ 10-15 ಮೊಬೈಲ್‌ಗಳು ಕಳ್ಳತನ ಆಗುತ್ತಿದ್ದು, ಕಳೆದ ಎರಡು ತಿಂಗಳಲ್ಲಿ 120ಕ್ಕೂ ಹೆಚ್ಚು ಮೊಬೈಲ್‌ಗಳು ಆಸ್ಪತ್ರೆಯಲ್ಲಿ ಕಳ್ಳತನವಾಗಿವೆ.

ಈ ಕುರಿತು ಪ್ರಜಾ ಪರಿವರ್ತನಾ ವೇದಿಕೆಯ ಅಧ್ಯಕ್ಷ ಬಸಯ್ಯ ನಂದಿಕೋಲ್ಮಠ ಅವರು ಆತಂಕ ವ್ಯಕ್ತಪಡಿಸಿದ್ದು, ಕೆಲ ಕಿಡಿಗೇಡಿಗಳು ಕಾರ್ಮಿಕರು ಮತ್ತು ಇತರೆ ವಾರ್ಡ್‌ಗಳನ್ನು ಗುರಿಯನ್ನಾಗಿಸಿ ಮೊಬೈಲ್‌ ಪೋನ್‌ ಮತ್ತು ನಗದು ಹಣ ದೋಚುತ್ತಿದ್ದಾರೆ. ಇದರಿಂದ ಬೆಲೆಬಾಳುವ ವಸ್ತುಗಳಿಗೆ ಸೂಕ್ತ ಭದ್ರತೆ ಇಲ್ಲದಿರುವ ಕಾರಣ ಜನರು ಆಸ್ಪತ್ರೆಗೆ ಭೇಟಿ ನೀಡಲು ಭಯಪಡುತ್ತಿದ್ದಾರೆ ಎಂದು ಹೇಳಿದರು.

ಆಸ್ಪತ್ರೆಯಲ್ಲಿ ಸಾಕಷ್ಟು ಸಿಸಿಟಿವಿ ಕ್ಯಾಮೆರಾಗಳಿದ್ದರೂ ಈ ಕಳ್ಳತನವನ್ನು ತಡೆಗಟ್ಟುವಲ್ಲಿ ಆಸ್ಪತ್ರೆಯ ಅಧಿಕಾರಿಗಳು ವಿಫಲರಾಗಿದ್ದಾರೆ. ಆಸ್ಪತ್ರೆಯಲ್ಲಿನ ಭದ್ರತಾ ಸಿಬ್ಬಂದಿಗಳ ನಿರ್ಲಕ್ಷದ ಕಾರಣ ಬಹುತೇಕ ಸಿಸಿಟಿವಿ ಕ್ಯಾಮೆರಗಳು ನಿಷ್ಕ್ರಿಯಗೊಂಡಿದ್ದು, ಅವುಗಳನ್ನು ಪರಿಶೀಲಿಸದಿರುವುದು ಇದಕ್ಕೆ ಕಾರಣವಾಗುತ್ತಿದೆ ಎಂದು ದೂರಿದರು.

ಈ ಹಿನ್ನಲೆಯಲ್ಲಿ ಕೆಲವು ಆಸ್ಪತ್ರೆ ಸಿಬ್ಬಂದಿಗಳು ಕಳ್ಳತನದಲ್ಲಿ ಭಾಗಿಯಾಗಿರುವ ಶಂಕೆ ಇರುವುದರಿಂದ ಈ ಬಗ್ಗೆ ಸೂಕ್ತ ತನಿಖೆಗೆ ಆದೇಶಿಸಬೇಕು ಎಂದು ಬಸಯ್ಯ ನಂದಿಕೋಲ್ಮಠ ಅವರು ಒತ್ತಾಯಿಸಿದರು.

ಮೊಬೈಲ್‌ ಕಳೆದುಕೊಂಡ ರೋಗಿಯ ಸಹಾಯಕರೊಬ್ಬರು ಈ ಕುರಿತು ಮಾತನಾಡಿದ್ದು, ಇಂತಹ ಕಳ್ಳತನವನ್ನು ತಕ್ಷಣವೇ ತಡೆಯಬೇಕು ಇಲ್ಲದಿದ್ದರೆ, ದುಷ್ಕರ್ಮಿಗಳು ನವಜಾತ ಶಿಶುಗಳನ್ನೂ ಕದಿಯಲು ಪ್ರಾರಂಭಿಸುತ್ತಾರೆ ಎಂದು ಆತಂಕ ವ್ಯಕ್ತಪಡಿಸಿದರು. ಈ ಹಿನ್ನಲೆಯಲ್ಲಿ ಆಸ್ಪತ್ರೆಯ ಭದ್ರತೆಯನ್ನು ಹೆಚ್ಚಿಸಬೇಕು ಮತ್ತು ವಾರ್ಡ್‌ಗಳಿಗೆ ಭೇಟಿ ನೀಡುವವರ ಮೇಲೆ ನಿಗಾವಹಿಸಬೇಕು ಎಂದರು.

ಜಿಮ್ಸ್‌ ನಿರ್ದೇಶಕಿ ಡಾ.ರೇಖಾ ಸೋನವನೆ ಮಾತನಾಡಿ, ನಾವು ಸರ್ಕಾರದಿಂದ ಅನುಮೋದಿತ ಭದ್ರತಾ ವ್ಯಕ್ತಿಗಳನ್ನು ಹೊಂದಿಲ್ಲ, ಏಕೆಂದರೆ ಸರ್ಕಾರವು ಭದ್ರತಾ ಸಿಬ್ಬಂದಿಯನ್ನು ನೇಮಿಸಲು ಅಥವಾ ಭದ್ರತಾ ಕಾರ್ಯಗಳಿಗಾಗಿ ಯಾವುದೇ ಏಜೆನ್ಸಿಯನ್ನು ಹೊರಗುತ್ತಿಗೆ ನೀಡಲು ಇನ್ನೂ ಅನುಮೋದನೆಯನ್ನು ನೀಡಿಲ್ಲ. ಹೀಗಾಗಿ ನಾವು ಆಸ್ಪತ್ರೆಯಲ್ಲಿ ಗ್ರೂಪ್‌ ಡಿ ನೌಕರರನ್ನು ಭದ್ರತೆಗಾಗಿ ನಿಯೋಜಿಸುತ್ತಿದ್ದೇವೆ ಎಂದು ತಿಳಿಸಿದರು.

ಆಸ್ಪತ್ರೆಯಲ್ಲಿ ಮೊಬೈಲ್‌ ಕಳ್ಳತನವಾಗಿರುವ ಬಗ್ಗೆ ಗದಗ ಗ್ರಾಮಾಂತರ ಪೊಲೀಸರಿಗೆ ನಾವು ಈಗಾಗಲೇ ದೂರು ದಾಖಲಿಸಿದ್ದೇವೆ ಮತ್ತು ಭದ್ರತಾ ಕ್ರಮಗಳನ್ನು ಹೆಚ್ಚಿಸಲು ಆಸ್ಪತ್ರೆ ಸಿಬ್ಬಂದಿಗಳೊಂದಿಗೆ ಸೋಮುವಾರ ಸಭೆ ನಡೆಸುತ್ತೇವೆ. ಆಸ್ಪತ್ರೆಯಲ್ಲಿ ಹೆಚ್ಚುತ್ತಿರುವ ಮೊಬೈಲ್‌ ಕಳ್ಳತನ ಪ್ರಕರಣಗಳ ಕುರಿತು ವಿವರಣೆ ಕೋರಿ ಆಸ್ಪತ್ರೆಯ ಅಧೀಕ್ಷಕರಿಗೆ ನಾನು ಈಗಾಗಲೇ ನೋಟಿಸ್‌ ನೀಡಿದ್ದೇನೆ ಎಂದು ರೇಖಾ ಸೋನವನೆ ಹೇಳಿದರು.

ಆಸ್ಪತ್ರೆಯಲ್ಲಿ ಭದ್ರತೆ ಹೆಚ್ಚಿಸುವ ಕುರಿತು ಗದಗ ಎಸ್ಪಿ ಹಾಗೂ ಹಿರಿಯ ಅಧಿಕಾರಿಗಳೊಂದಿಗೆ ಶೀಘ್ರವೇ ಮಾತನಾಡುತ್ತೇನೆ ಎಂದು ರೇಖಾ ಸೋನವನೆ ಭರವಸೆ ನೀಡಿದರು.