ಅನುಮತಿಯಿಲ್ಲದೆ ನಿರ್ಬಂಧಿತ ಪ್ರದೇಶವನ್ನು ಪ್ರವೇಶಿಸಿದ ಆರೋಪದ ಮೇಲೆ 24 ವರ್ಷದ ಮೈಖೈಲೊ ವಿಕ್ಟೋರೊವಿಚ್ ಪಾಲಿಯಕೋವ್ ಎಂಬಾತನನ್ನು ಅಪರಾಧ ತನಿಖಾ ಇಲಾಖೆ ಸೋಮವಾರ ಬಂಧಿಸಿದೆ ಎಂದು ಗುರುತಿಸಲಾಗದ ಪೊಲೀಸ್ ಅಧಿಕಾರಿಗಳನ್ನು ಉಲ್ಲೇಖಿಸಿ ಸುದ್ದಿ ಸಂಸ್ಥೆ ವರದಿ ಮಾಡಿದೆ.

ಪರವಾನಗಿ ಇಲ್ಲದೆ ಉತ್ತರ ಸೆಂಟಿನೆಲ್ ದ್ವೀಪಕ್ಕೆ ಪ್ರಯಾಣಿಸುವುದನ್ನು ನಿಷೇಧಿಸಲಾಗಿದೆ. 2011 ರಲ್ಲಿ ಸುಮಾರು 40 ಜನಸಂಖ್ಯೆಯಿದ್ದ ಸೆಂಟಿನೆಲೀಸ್ ಬುಡಕಟ್ಟು ಜನಾಂಗದವರು ಹೊರಗಿನವರೊಂದಿಗೆ ಸಂಪರ್ಕವನ್ನು ವಿರೋಧಿಸುತ್ತಾರೆ ಎಂದು ತಿಳಿದುಬಂದಿದೆ.

ಪೋಲಿಯಕೋವ್ ಮಾರ್ಚ್ 26 ರಂದು ಪೋರ್ಟ್ ಬ್ಲೇರ್‌ಗೆ ಆಗಮಿಸಿದ್ದ ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ ಎಂದು ಪಿಟಿಐ ವರದಿ ಮಾಡಿದೆ. ಶನಿವಾರ ಬೆಳಗಿನ ಜಾವ 1 ಗಂಟೆ ಸುಮಾರಿಗೆ ಕುರ್ಮದೇರಾ ಬೀಚ್‌ನಿಂದ ಉತ್ತರ ಸೆಂಟಿನೆಲ್ ದ್ವೀಪಕ್ಕೆ ತೆಂಗಿನಕಾಯಿ ಮತ್ತು ಕೋಕಾ-ಕೋಲಾ ಕ್ಯಾನ್ ಅನ್ನು “ಸೆಂಟಿನಲೀಸ್‌ಗೆ ಉಡುಗೊರೆಯಾಗಿ” ತೆಗೆದುಕೊಂಡು ಹೋದ ಎಂದು ಅವರು ಹೇಳಿದರು.

ಪೋಲಿಯಕೋವ್ ಬೆಳಿಗ್ಗೆ 10 ಗಂಟೆಯ ಹೊತ್ತಿಗೆ ಉತ್ತರ ಸೆಂಟಿನೆಲ್ ದ್ವೀಪದ ಈಶಾನ್ಯ ತೀರವನ್ನು ತಲುಪಿ ಒಂದು ಗಂಟೆ ಕಾಲ ಕಡಲತೀರದಲ್ಲಿಯೇ ಇದ್ದ ಎಂದು ಪೊಲೀಸ್ ಅಧಿಕಾರಿಗಳನ್ನು ಉಲ್ಲೇಖಿಸಿ ಸುದ್ದಿ ಸಂಸ್ಥೆ ವರದಿ ಮಾಡಿದೆ. ಅವನು ಸುತ್ತಮುತ್ತ ನೋಡಿ ಶಿಳ್ಳೆ ಹೊಡೆದ, ಆದರೆ ಯಾರನ್ನೂ ನೋಡಲಿಲ್ಲ ಎಂದು ಅವನು ಹೇಳಿದ್ದಾನೆ.

ಇದಾದ ನಂತರ, ಪಾಲಿಯಕೋವ್ ಸುಮಾರು ಐದು ನಿಮಿಷಗಳ ಕಾಲ ದಡಕ್ಕೆ ಇಳಿದು ಉಡುಗೊರೆಗಳನ್ನು ಬಿಟ್ಟುಹೋದ ಎಂದು ಪೊಲೀಸರು ತಿಳಿಸಿದ್ದಾರೆ, ಅವನು ತನ್ನ ದೋಣಿಗೆ ಹಿಂತಿರುಗುವ ಮೊದಲು ಮರಳಿನ ಮಾದರಿಗಳನ್ನು ಸಂಗ್ರಹಿಸಿ ವೀಡಿಯೊವನ್ನು ರೆಕಾರ್ಡ್ ಮಾಡಿದ್ದ.

ಅವನು ಮಧ್ಯಾಹ್ನ 1 ಗಂಟೆಗೆ ಕುರ್ಮದೇರಾ ಬೀಚ್‌ಗೆ ಹಿಂತಿರುಗಲು ಪ್ರಾರಂಭಿಸಿದ ಮತ್ತು ಸಂಜೆ 7 ಗಂಟೆಗೆ ಬಂದಾಗ ಮೀನುಗಾರರು ಅವನನ್ನು ನೋಡಿದರು ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.

ಶನಿವಾರ ಕುರ್ಮದೇರಾ ಬೀಚ್ ಬಳಿ ಸಣ್ಣ ಎಂಜಿನ್ ಹೊಂದಿದ ಗಾಳಿ ತುಂಬಬಹುದಾದ ಒಂದೇ ಸೀಟ್‌ ಇರುವ ದೋಣಿಯೊಂದಿಗೆ ಪಾಲಿಯಕೋವ್ ಕೊನೆಯ ಬಾರಿಗೆ ಕಾಣಿಸಿಕೊಂಡಿರುವುದು ಪತ್ತೆಯಾದ ನಂತರ ಕ್ರಮ ತೆಗೆದುಕೊಳ್ಳಲು ಅಧಿಕಾರಿಗಳು ಮುಂದಾದರು ಎಂದು ಇನ್ನೋರ್ವ ಪೊಲೀಸ್ ಅಧಿಕಾರಿ ಇಂಡಿಯನ್ ಎಕ್ಸ್‌ಪ್ರೆಸ್‌ಗೆ ತಿಳಿಸಿದ್ದಾರೆ.

“ಅವನ ಬಗ್ಗೆ ಮತ್ತು ಮೀಸಲು ಬುಡಕಟ್ಟು ಪ್ರದೇಶಕ್ಕೆ ಭೇಟಿ ನೀಡುವ ಅವನ ಉದ್ದೇಶದ ಬಗ್ಗೆ ನಮಗೆ ಹೆಚ್ಚಿನ ವಿವರಗಳು ಸಿಗುತ್ತಿವೆ. ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳಲ್ಲಿ ಅವನು ಉಳಿದುಕೊಂಡಿದ್ದಾಗ ಬೇರೆ ಎಲ್ಲಿಗೆ ಭೇಟಿ ನೀಡಿದ್ದ ಎಂಬುದನ್ನು ಕಂಡುಹಿಡಿಯಲು ನಾವು ಪ್ರಯತ್ನಿಸುತ್ತಿದ್ದೇವೆ,” ಎಂದು ಪೊಲೀಸ್ ಮಹಾನಿರ್ದೇಶಕ ಎಚ್.ಎಸ್. ಧಲಿವಾಲ್ ಹೇಳಿದ್ದಾರೆ.

ಆತ ತಂಗಿದ್ದ ಪೋರ್ಟ್ ಬ್ಲೇರ್‌ನಲ್ಲಿರುವ ಹೋಟೆಲ್ ಸಿಬ್ಬಂದಿಯನ್ನು ಪೊಲೀಸರು ವಿಚಾರಣೆ ನಡೆಸುತ್ತಿದ್ದಾರೆ ಎಂದು ಧಲಿವಾಲ್ ಹೇಳಿದರು.

ಪಾಲಿಯಕೋವ್ ಬಳಿ ದೊರೆತ ಕ್ಯಾಮೆರಾ ದೃಶ್ಯಾವಳಿಗಳು ಅವರು ಉತ್ತರ ಸೆಂಟಿನೆಲ್ ದ್ವೀಪದಲ್ಲಿ ಇಳಿದಿರುವುದನ್ನು ತೋರಿಸಿವೆ ಎಂದು ಪೊಲೀಸ್ ಅಧಿಕಾರಿಗಳು ಪಿಟಿಐಗೆ ತಿಳಿಸಿದ್ದಾರೆ.

ಅವನ ವಿರುದ್ಧ 1946 ರ ವಿದೇಶಿಯರ ಕಾಯ್ದೆಯಡಿಯಲ್ಲಿ ಎಫ್‌ಐಆರ್ ದಾಖಲಿಸಲಾಗಿದೆ, ಜೊತೆಗೆ ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳ ಮೂಲನಿವಾಸಿ ಬುಡಕಟ್ಟು ಜನಾಂಗಗಳ ರಕ್ಷಣೆ ತಿದ್ದುಪಡಿ ನಿಯಂತ್ರಣ, 2012 ರ ಸೆಕ್ಷನ್‌ಗಳ ಅಡಿಯಲ್ಲಿಯೂ ಸಹ ದೂರು ದಾಖಲಾಗಿದೆ.

ತಿರೂರಿನ ಬುಡಕಟ್ಟು ಕಲ್ಯಾಣ ಅಧಿಕಾರಿ ಪ್ರಣಬ್ ಸಿರ್ಕಾರ್ ಅವರು ಓಗ್ರಬ್ರಾಜ್ ಪೊಲೀಸ್ ಠಾಣೆಯಲ್ಲಿ ದಾಖಲಿಸಿದ ದೂರಿನ ಆಧಾರದ ಮೇಲೆ ಅವನ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ ಎಂದು ಪಿಟಿಐ ವರದಿ ಮಾಡಿದೆ.

ಸುದ್ದಿ ಸಂಸ್ಥೆಯ ಪ್ರಕಾರ, 24 ವರ್ಷದ ಯುವಕ ಹೆಚ್ಚಿನ ವಿಚಾರಣೆಗಾಗಿ ನ್ಯಾಯಾಲಯದ ನಿರ್ದೇಶನದ ಮೇರೆಗೆ ಪ್ರಸ್ತುತ ಪೊಲೀಸ್ ಕಸ್ಟಡಿಯಲ್ಲಿದ್ದಾನೆ.

ಅವರ ಬಂಧನದ ಬಗ್ಗೆ ಗೃಹ ಸಚಿವಾಲಯಕ್ಕೆ ಮಾಹಿತಿ ನೀಡಲಾಗಿದ್ದು, ಅವರು ಅದನ್ನು ಅಮೆರಿಕ ರಾಯಭಾರ ಕಚೇರಿಗೆ ತಿಳಿಸಿದ್ದಾರೆ ಎಂದು ದಿ ಇಂಡಿಯನ್ ಎಕ್ಸ್‌ಪ್ರೆಸ್ ವರದಿ ಮಾಡಿದೆ.

ಪೊಲ್ಯಕೋವ್ ಈ ಹಿಂದೆ ಎರಡು ಬಾರಿ ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳಿಗೆ ಭೇಟಿ ನೀಡಿದ್ದ.

ಅಕ್ಟೋಬರ್‌ನಲ್ಲಿ ಅವರ ಮೊದಲ ಭೇಟಿಯ ಸಮಯದಲ್ಲಿ, ಆತ ಗಾಳಿ ತುಂಬಬಹುದಾದ ಕಯಾಕ್‌ನಲ್ಲಿ ಉತ್ತರ ಸೆಂಟಿನೆಲ್ ದ್ವೀಪಕ್ಕೆ ಪ್ರಯಾಣಿಸಲು ಪ್ರಯತ್ನಿಸಿದ, ಆದರೆ ಹೋಟೆಲ್ ಸಿಬ್ಬಂದಿ ಅವನನ್ನು ತಡೆದರು ಎಂದು ಪತ್ರಿಕೆ ವರದಿ ಮಾಡಿದೆ.

ಜನವರಿ 18 ರಂದು, ಆತ ಮತ್ತೊಮ್ಮೆ ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳಿಗೆ ಭೇಟಿ ನೀಡಿದ ಮತ್ತು ತನ್ನ ದೋಣಿಗೆ ಮೋಟಾರ್ ಖರೀದಿಸಲು ಪ್ರಯತ್ನಿಸಿದ ಎಂದು ಪಿಟಿಐ ವರದಿ ಮಾಡಿದೆ.

“ಅವನು ಬರಾಟಾಂಗ್ ದ್ವೀಪಗಳಿಗೆ ಭೇಟಿ ನೀಡಿದ, ಜರಾವಾ ಬುಡಕಟ್ಟು ಜನಾಂಗದವರನ್ನು ಅಕ್ರಮವಾಗಿ ವೀಡಿಯೊ ಚಿತ್ರೀಕರಣ ಮಾಡಿದ ಮತ್ತು ಜನವರಿ 27 ರಂದು ಹೊರಡುವ ಮೊದಲು ಪೋರ್ಟ್ ಬ್ಲೇರ್‌ನ ವಿವಿಧ ಸ್ಥಳಗಳಿಗೆ ಹೋಗಿದ್ದ” ಎಂದು ಪೊಲೀಸ್ ಅಧಿಕಾರಿಯೊಬ್ಬರು ಹೇಳಿರುವುದಾಗಿ ಟೈಮ್ಸ್ ಆಫ್ ಇಂಡಿಯಾ ವರದಿ ಮಾಡಿದೆ.

2018 ರಲ್ಲಿ, ಜಾನ್ ಅಲೆನ್ ಚೌ ಎಂಬ ಅಮೇರಿಕನ್ ಮಿಷನರಿ ಉತ್ತರ ಸೆಂಟಿನೆಲ್ ದ್ವೀಪಕ್ಕೆ ಅಕ್ರಮವಾಗಿ ಪ್ರವೇಶಿಸಲು ಪ್ರಯತ್ನಿಸಿ, ನಂತರ ಸೆಂಟಿನೆಲೀಸ್ ಬುಡಕಟ್ಟು ಜನಾಂಗದವರಿಂದ ಕೊಲ್ಲಲ್ಪಟ್ಟ.

ಅಮೇರಿಕಾದ ಡಿಪಾರ್ಟ್ಮೆಂಟ್ ಆಫ್ ಹೋಮ್ಲ್ಯಾಂಡ್ ಸೆಕ್ಯುರಿಟಿ (DHS) ಹೊರಡಿಸಿದ ಪತ್ರಿಕಾ ಹೇಳಿಕೆಯು ಇಮ್ಮಿಗ್ರೇಷನ್ ಮತ್ತು ಕಸ್ಟಮ್ಸ್ ಎನ್ಫೋರ್ಸ್ಮೆಂಟ್ (ICE) “ಕಾನೂನಾತ್ಮಕವಾಗಿ ಅಮೇರಿಕಾದಲ್ಲಿ ಉಳಿಯದ ಭಾರತೀಯ ನಾಗರಿಕರನ್ನು  ಭಾರತಕ್ಕೆ ವಾಪಾಸ್‌ ಕಳುಹಿಸಲು ಅಕ್ಟೋಬರ್ 22 ರಂದು ದೊಡ್ಡ ಚಾರ್ಟರ್ ರಿಮೂವಲ್ ಫ್ಲೈಟ್ ಹಾರಾಟವನ್ನು ನಡೆಸಿದ್ದೇವೆ” ಎಂದು ಹೇಳಿದೆ. 

ಭಾರತದಲ್ಲಿ ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರು ಬಾಂಗ್ಲಾದೇಶಿ ವಲಸಿಗರನ್ನು ಉಲ್ಲೇಖಿಸಲು “ಟರ್ಮಿಟ್ಸ್” ಪದವನ್ನು ಬಳಸಿದ್ದಾರೆ, ಅವರು ಮತ್ತು ಇತರ ಮಂತ್ರಿಗಳು ಆ ದೇಶದಿಂದ ಬರುವ ದಾಖಲೆರಹಿತ ವಲಸಿಗರನ್ನು “ಒಳನುಸುಳುವವರು” ಎಂದು ಉಲ್ಲೇಖಿಸುತ್ತಾರೆ. ಆದರೆ ಅಮೇರಿಕಾ ತನ್ನ ದೇಶದಲ್ಲಿ ಕಾನೂನಿಗೆ ವಿರುದ್ಧವಾಗಿ ಬಂದಿರುವ ವಲಸಿಗ ಭಾರತೀಯರನ್ನು “Indian nationals who did not establish legal basis to remain in the United States” ಎಂದು ಕರೆದಿದೆ.

ಈ ಚಾರ್ಟರ್ ಫ್ಲೈಟ್ ಅನ್ನು ಭಾರತ ಸರ್ಕಾರದ ಸಹಾಯದಿಂದ ಮಾಡಲಾಗಿದೆ. “ಈ ವಾರದ ಹಾರಾಟವು ಅನಿಯಮಿತ ವಲಸೆಯನ್ನು ಕಡಿಮೆ ಮಾಡಲು ಮತ್ತು ತಡೆಯಲು ಮತ್ತು ಮಾನವ ಕಳ್ಳಸಾಗಣೆಯನ್ನು ಎದುರಿಸಲು ಜಂಟಿಯಾಗಿ ಕೆಲಸ ಮಾಡಲು ಭಾರತ ಸರ್ಕಾರ ಮತ್ತು ಇತರ ಅಂತರರಾಷ್ಟ್ರೀಯ ಪಾಲುದಾರರೊಂದಿಗೆ ನಿರಂತರ ಸಹಕಾರವನ್ನು ಮುಂದುವರಿಸಲು ಇಲಾಖೆಯ ನಿರಂತರ ಬದ್ಧತೆಯನ್ನು ಪ್ರದರ್ಶಿಸುತ್ತದೆ” ಎಂದು DHS ಹೇಳಿಕೆ ತಿಳಿಸಿದೆ.

DHS ನ ಹಂಗಾಮಿ ಉಪ ಕಾರ್ಯದರ್ಶಿ, ಕ್ರಿಸ್ಟಿ ಎ. ಕೆನೆಗಲ್ಲೊ, “ಯುನೈಟೆಡ್ ಸ್ಟೇಟ್ಸ್‌ನಲ್ಲಿ ಉಳಿಯಲು ಕಾನೂನು ಆಧಾರವಿಲ್ಲದ ಭಾರತೀಯ ಪ್ರಜೆಗಳನ್ನು ಶೀಘ್ರವಾಗಿ ತೆಗೆದುಹಾಕಲಾಗುತ್ತದೆ ಮತ್ತು ಉದ್ದೇಶಿತ ವಲಸಿಗರು ಬೇರೆ ರೀತಿಯಲ್ಲಿ ಕಳ್ಳಸಾಗಣೆದಾರರ ಸುಳ್ಳಿಗೆ ಬಲಿಯಾಗಬಾರದು,” ಎಂದು ಹೇಳಿದ್ದಾರೆ.

ಅಮೇರಿಕಾ ಹಲವಾರು ವರ್ಷಗಳಿಂದ ಇಂತಹ ಗಡೀಪಾರುಗಳನ್ನು ನಡೆಸಿದೆ ಎಂದು ಸೂಚಿಸಿದ ಭಾರತೀಯ ಅಧಿಕೃತ ಮೂಲಗಳು, ಈ ಬಾರಿ ಮಾಡಿದಂತೆಯೇ ಗಡೀಪಾರು ಮಾಡುವಿಕೆಯನ್ನು ಡಿಹೆಚ್‌ಎಸ್ ಪ್ರಚಾರ ಮಾಡಿರುವುದು ಉತ್ತಮ ಬೆಳವಣಿಗೆ ಎಂದು ಹೇಳಿದೆ.

ಭಾರತ ಸರ್ಕಾರವು ಅಕ್ರಮ ವಲಸೆಯನ್ನು ಬೆಂಬಲಿಸುವುದಿಲ್ಲ ಎಂದು ಪ್ರತಿಪಾದಿಸುತ್ತಾ, ಪ್ರಚಾರದ ಮೂಲಕ ಅಂತಹ ಪ್ರಯತ್ನಗಳನ್ನು ತಡೆಯುವುದು ಭಾರತೀಯ ವೃತ್ತಿಪರರಿಗೆ ಕಾನೂನುಬದ್ಧ ವಲಸೆಯನ್ನು ಉತ್ತೇಜಿಸಲು ವಿದೇಶಿ ಸರ್ಕಾರಗಳೊಂದಿಗೆ ಸಂಬಂಧ ಬೆಳೆಸಲು ಸಹಾಯ ಮಾಡುತ್ತದೆ ಎಂದು ಮೂಲಗಳು ತಿಳಿಸಿವೆ.

160,000 ವ್ಯಕ್ತಿಗಳನ್ನು ಹಿಂತಿರುಗಿಸಲಾಗಿದೆ ಮತ್ತು ಭಾರತ ಸೇರಿದಂತೆ 145 ಕ್ಕೂ ಹೆಚ್ಚು ದೇಶಗಳಿಗೆ 495 ಕ್ಕೂ ಹೆಚ್ಚು ಅಂತರಾಷ್ಟ್ರೀಯ ವಾಪಸಾತಿ ವಿಮಾನಗಳನ್ನು ನಿರ್ವಹಿಸಲಾಗಿದೆ ಎಂದು DHS ರೀಡೌಟ್ ಹೇಳಿಕೊಂಡಿದೆ.

US ಕಸ್ಟಮ್ಸ್ ಮತ್ತು ಬಾರ್ಡರ್ ಪ್ರೊಟೆಕ್ಷನ್ (CBP) ಯ ಇತ್ತೀಚಿನ ಅಂಕಿಅಂಶಗಳ ಪ್ರಕಾರ, ಅಕ್ಟೋಬರ್ 1, 2023 ಮತ್ತು ಸೆಪ್ಟೆಂಬರ್ 30, 2024 ರ ನಡುವೆ ಅಕ್ರಮ ವಲಸೆಗಾಗಿ 90,415 ಭಾರತೀಯ ಪ್ರಜೆಗಳನ್ನು ಬಂಧಿಸಲಾಗಿದೆ, ಇದು ಹಿಂದಿನ ವರ್ಷಕ್ಕಿಂತ ಸ್ವಲ್ಪ ಕಡಿಮೆಯಾಗಿದೆ. ಒಟ್ಟಾರೆಯಾಗಿ, ಈ ಅವಧಿಯಲ್ಲಿ US ಅಧಿಕಾರಿಗಳು 2.9 ಮಿಲಿಯನ್ ವಿದೇಶಿ ಪ್ರಜೆಗಳನ್ನು ಅಕ್ರಮ ವಲಸೆ ಆರೋಪದ ಮೇಲೆ ಬಂಧಿಸಿದ್ದಾರೆ.

ಸಿಕ್ಕಿಬಿದ್ದ ಭಾರತೀಯ ಪ್ರಜೆಗಳಲ್ಲಿ “50%” ಗುಜರಾತ್‌ನವರು. ಇದಲ್ಲದೆ, ಸುಮಾರು ಅರ್ಧದಷ್ಟು ಭಾರತೀಯರು ಕೆನಡಾದ ಉತ್ತರ ಗಡಿಯಲ್ಲಿ ಸಿಕ್ಕಿಬಿದ್ದರು. ಇದಕ್ಕೆ ವ್ಯತಿರಿಕ್ತವಾಗಿ, ಹಿಂದಿನ ವರ್ಷಕ್ಕೆ ಹೋಲಿಸಿದರೆ ಈ ವರ್ಷ ಮೆಕ್ಸಿಕೊ ಗಡಿಯಲ್ಲಿ ಬಂಧಿತ ಭಾರತೀಯರ ಸಂಖ್ಯೆ ತೀವ್ರ ಕುಸಿತ ಕಂಡಿದೆ.

ಮೆಕ್ಸಿಕನ್ನರೇ ಅಮೇರಿಕಾ ಗಡಿಯೊಳಗೆ ಒಳನುಸುಳಲು ದೊಡ್ಡ ಗುಂಪುಗಳಾಗಿ ಉಳಿದಿರುವಾಗ, ಇಂತಹ ಭಾರತೀಯರ ಭಾರತೀಯರ ಸಂಖ್ಯೆ ಕೂಡ ಇತ್ತೀಚಿನ ವರ್ಷಗಳಲ್ಲಿ ಹೆಚ್ಚುತ್ತಿದೆ.

Customs and Border Protection agency ಮಾಹಿತಿಯ ಪ್ರಕಾರ, 41,770 ಭಾರತೀಯ ನಾಗರಿಕರು ದಕ್ಷಿಣದ ಗಡಿಯಿಂದ ಯುನೈಟೆಡ್ ಸ್ಟೇಟ್ಸ್‌ಗೆ ಅಕ್ರಮವಾಗಿ ಪ್ರವೇಶಿಸಿದ್ದಾರೆ, ಹಿಂದಿನ ವರ್ಷದ ಇದೇ ಅವಧಿಯಲ್ಲಿ ಮಾಡಿದ ಸಂಖ್ಯೆಗಿಂತ ಎರಡು ಪಟ್ಟು ಹೆಚ್ಚು.

ಇವರಲ್ಲಿ, 33,800 ಕ್ಕೂ ಹೆಚ್ಚು ಒಂಟಿ ವಯಸ್ಕರು ಮತ್ತು ಸುಮಾರು 7,250 ಮಂದಿ ಕುಟುಂಬ ಜೊತೆಗೆ, ಸುಮಾರು 700 ಮಂದಿ ಜೊತೆಗೆ ಯಾರೂ ಇಲ್ಲದ ಮಕ್ಕಳು, ಅಪ್ರಾಪ್ತರು ಸೇರಿದ್ದಾರೆ

ಅಕ್ಟೋಬರ್ 2022 ಮತ್ತು ಈ ವರ್ಷದ ಸೆಪ್ಟೆಂಬರ್ ನಡುವೆ, ಪ್ರತಿ ತಿಂಗಳು ಸುಮಾರು 2,000 ರಿಂದ 4,000 ಭಾರತೀಯರು ಯುನೈಟೆಡ್ ಸ್ಟೇಟ್ಸ್ ಅನ್ನು ಅಕ್ರಮವಾಗಿ ಪ್ರವೇಶಿಸಿದ್ದಾರೆ. ಏಪ್ರಿಲ್‌ನಲ್ಲಿ ಈ ಸಂಖ್ಯೆ 8,000 ಕ್ಕೆ ಏರಿತ್ತು.

ಸೆಪ್ಟೆಂಬರ್‌ನಲ್ಲಿ, ಕೆನಡಾದ ಗಡಿಯಿಂದ ಯುನೈಟೆಡ್ ಸ್ಟೇಟ್ಸ್‌ಗೆ ಅಕ್ರಮವಾಗಿ ಪ್ರವೇಶಿಸಿದ್ದಕ್ಕಾಗಿ 3,000 ಕ್ಕೂ ಹೆಚ್ಚು ಭಾರತೀಯರನ್ನು ಬಂಧಿಸಲಾಗಿದೆ.

ಸೆಪ್ಟೆಂಬರ್ 20 ರಂದು Advancing Religious Freedom within the US – India Bilateral Relationship ನ ಸಂದರ್ಭದಲ್ಲಿ USCIRF ಭಾರತದಲ್ಲಿ “ಧಾರ್ಮಿಕ ಅಲ್ಪಸಂಖ್ಯಾತರ ವಿರುದ್ಧದ ತಾರತಮ್ಯ ನೀತಿಗಳ” ಜಾರಿಯನ್ನು ಎತ್ತಿ ತೋರಿಸಿ ಪತ್ರಿಕಾ ಹೇಳಿಕೆಯನ್ನು ನೀಡಿದೆ.

USCIRF  ವಿದೇಶಗಳಲ್ಲಿರುವ ಧಾರ್ಮಿಕ ಸ್ವಾತಂತ್ರ್ಯವನ್ನು ವಿಶ್ಲೇಷಿಸಿ ವರದಿ ಮಾಡಲು ಯುನೈಟೆಡ್‌ ಸ್ಟೇಟ್‌ ಕಾಂಗ್ರೆಸ್ ಸ್ಥಾಪಿಸಿರುವ ಸ್ವತಂತ್ರ ಹಾಗೂ ಉಭಯಪಕ್ಷೀಯ ಫೆಡರಲ್ ಸರ್ಕಾರಿ ಸಂಸ್ಥೆಯಾಗಿದೆ. ಮತೀಯ ಹಿಂಸಾಚಾರ ತಡೆಯಲು ಮತ್ತು ಧರ್ಮ ಹಾಗೂ ನಂಬಿಕೆಯ ಸ್ವಾತಂತ್ರ್ಯವನ್ನು ರಕ್ಷಿಸುವ ಉದ್ದೇಶದಿಂದ ಇದು ಅಧ್ಯಕ್ಷರು, ರಾಜ್ಯ ಕಾರ್ಯದರ್ಶಿ ಮತ್ತು ಕಾಂಗ್ರೆಸ್‌ಗೆ ವಿದೇಶಾಂಗ ನೀತಿ ಶಿಫಾರಸುಗಳನ್ನು ಮಾಡುತ್ತದೆ.

ಸೆಪ್ಟೆಂಬರ್ 20 ರಂದು ನಡೆದ  “ಧಾರ್ಮಿಕ ಅಲ್ಪಸಂಖ್ಯಾತರನ್ನು ಗುರಿಯಾಗಿಸಿಕೊಂಡು ಜಾರಿಗೊಂಡ ತಾರತಮ್ಯ ನೀತಿಗಳ” ಬಗೆಗಿನ ಚರ್ಚೆಯಲ್ಲಿ ಹರಿಯಾಣದ ನುಹ್‌ನಲ್ಲಿನ ಇತ್ತೀಚಿಗೆ ನಡೆದ ಹಿಂಸಾಚಾರ ಮತ್ತು ಮಣಿಪುರ ಹಿಂಸಾಚಾರಗಳ ಬಗ್ಗೆ ವಿಚಾರಣೆ ನಡೆಸಲಾಯಿತು.  ಇದರಲ್ಲಿ ಭಾಗವಹಿಸಿದವರು ಭಾರತದಲ್ಲಿ ಧಾರ್ಮಿಕ ಸ್ವಾತಂತ್ರ್ಯವನ್ನು ಮತ್ತು ಮಾನವ ಹಕ್ಕುಗಳ ಕಾಪಾಡಲು  ದೇಶದಲ್ಲಿ ಕೆಲಸ ಮಾಡಲು ಯುನೈಟೆಡ್‌ ಸ್ಟೇಟ್‌ಗೆ ನೀತಿಗಳನ್ನು ನೀಡಿದರು.

ವಿಡಿಯೋ: U.S. Commission on International Religious Freedom Hearing

“ಇತ್ತೀಚಿನ ವರ್ಷಗಳಲ್ಲಿ ಭಾರತದಲ್ಲಿ ಧಾರ್ಮಿಕ ಸ್ವಾತಂತ್ರ್ಯದ ಪರಿಸ್ಥಿತಿಗಳು ಗಮನಾರ್ಹವಾಗಿ ಕುಸಿದಿವೆ” ಎಂದು USCIRF ಅಧ್ಯಕ್ಷ ಅಬ್ರಹಾಂ ಕೂಪರ್ ಹೇಳಿದ್ದಾರೆ. “ಮುಸ್ಲಿಮರು, ಸಿಖ್ಖರು, ಕ್ರಿಶ್ಚಿಯನ್ನರು, ದಲಿತರು ಮತ್ತು ಆದಿವಾಸಿಗಳು ಹೆಚ್ಚಿದ ಮಟ್ಟದ ದಾಳಿಗಳು ಮತ್ತು ಬೆದರಿಕೆ ಮೊದಲಾದ ಕೃತ್ಯಗಳನ್ನು ಎದುರಿಸುತ್ತಿದ್ದಾರೆ. ಅಧಿಕಾರ ಹೊಂದಿರುವವರು ಅಲ್ಪಸಂಖ್ಯಾತರ ಧ್ವನಿಗಳನ್ನು ಮತ್ತು ಅವರ ಪರವಾಗಿ ವಕಾಲತ್ತು ವಹಿಸುವವರನ್ನು ಹತ್ತಿಕ್ಕುವ ಕೆಲಸವನ್ನು ಮುಂದುವರೆಸಿದ್ದಾರೆ. ಈ ಪ್ರವೃತ್ತಿ ಅಮೇರಿಕಾದ ವಿದೇಶಾಂಗ ನೀತಿಯ ಮೇಲೆ ಬೀರುವ ಪರಿಣಾಮಗಳನ್ನು ನಿರ್ಲಕ್ಷಿಸಲಾಗದು,” ಎಂದಿದ್ದಾರೆ.

ಭಾರತದಲ್ಲಿನ ಧಾರ್ಮಿಕ ಕಾರಣಗಳಿಗೆ ಬಂಧನಕ್ಕೆ ಒಳಗಾದವರನ್ನು ಬಿಡುಗಡೆ ಮಾಡುವಂತೆ USನ ಈ ಸಂಸ್ಥೆ ಕರೆ ನೀಡಿದೆ. USCIRF ನ Frank R. Wolf Freedom of Religion or Belief Victims Listನ ಡೇಟಾಬೇಸ್ ಪ್ರಕಾರ, ಅನ್ಯ ನಂಬಿಕೆಗಳನ್ನು ಹೊಂದಿರುವ ಒಟ್ಟು 37 ವ್ಯಕ್ತಿಗಳನ್ನು  ಜೈಲಿಗೆ ಹಾಕಲಾಗಿದೆ.

ಈ ಚರ್ಚೆಯಲ್ಲಿ ಧಾರ್ಮಿಕ ಸ್ವಾತಂತ್ರ್ಯದ ಹದಗೆಡುತ್ತಿರುವುದನ್ನು ವಿರೋಧಿಸಿ ಜೈಲು ಪಾಲಾಗಿರುವ ಮೀರಾನ್ ಹೈದರ್ ಮತ್ತು ರೂಪೇಶ್ ಸಿಂಗ್ ಅವರ ಬಗ್ಗೆ ಚರ್ಚೆ ನಡೆಸಲಾಗಿದೆ.  

ವಿಚಾರಣೆಯನ್ನು ಇಲ್ಲಿ ಓದಿ: Advancing Religious Freedom within the U.S. – India Bilateral Relationship

ಜಾಮಿಯಾ ಮಿಲಿಯಾ ಇಸ್ಲಾಮಿಯಾ ವಿದ್ಯಾರ್ಥಿ ಮತ್ತು ರಾಷ್ಟ್ರೀಯ ಜನತಾ ದಳ (ಆರ್‌ಜೆಡಿ) ಯುವ ನಾಯಕ ಮೀರಾನ್ ಹೈದರ್‌ರನ್ನು ಫೆಬ್ರವರಿ 2020 ರಂದು ಈಶಾನ್ಯ ದೆಹಲಿಯಲ್ಲಿ ನಡೆದ ಹಿಂಸಾಚಾರದಲ್ಲಿ ಭಾಗಿಯಾಗಿದ್ದಾರೆ ಎಂಬ ಆರೋಪದ ಮೇಲೆ ದೆಹಲಿ ಪೊಲೀಸರು ಬಂಧಿಸಿದ್ದರು. ರೂಪೇಶ್ ಸಿಂಗ್ ಎಂಬ ಸ್ವತಂತ್ರ ಪತ್ರಕರ್ತನನ್ನು ಕಾನೂನುಬಾಹಿರವಾಗಿ ಕಮ್ಯುನಿಸ್ಟ್ ಪಾರ್ಟಿ ಆಫ್ ಇಂಡಿಯಾ (ಮಾವೋವಾದಿ) ನೊಂದಿಗೆ ಸಂಪರ್ಕ ಹೊಂದಿದ್ದಕ್ಕಾಗಿ ಜುಲೈ 17, 2022 ರಂದು ಜಾರ್ಖಂಡ್ ಪೊಲೀಸರು ಬಂಧಿಸಿದ್ದರು.

“ಪೌರತ್ವ ತಿದ್ದುಪಡಿ ಕಾಯ್ದೆ (ಸಿಎಎ) ವಿರುದ್ಧ ಶಾಂತಿಯುತ ಪ್ರತಿಭಟನೆಗಳಲ್ಲಿ ಭಾಗಿಯಾಗಿದ್ದ ಹೈದರ್‌ರನ್ನು ಕಾನೂನುಬಾಹಿರ ಚಟುವಟಿಕೆಗಳು (ತಡೆ) ಕಾಯ್ದೆಯ (Unlawful Activities (Prevention) Act- UAPA) ಅಡಿಯಲ್ಲಿ ಬಂಧಿಸಲಾಗಿದೆ. ರಾಜ್ಯದಲ್ಲಿ ನಡೆಯುತ್ತಿದ್ದ ಹಿಂಸಾಚಾರ ಮತ್ತು ಆದಿವಾಸಿಗಳ ವಿರುದ್ಧದ ತಾರತಮ್ಯದ ಬಗ್ಗೆ ವರದಿ ಮಾಡಿ ಸಿಂಗ್‌ ಹೆಸರನ್ನು ಗಳಿಸಿದ್ದರು.  ಜುಲೈ 2022 ರಿಂದ ಅವರನ್ನು ಯುಎಪಿಎ ಅಡಿಯಲ್ಲಿ ಬಂಧಿಸಲಾಗಿದೆ” ಎಂದು USCIRF ಉಪಾಧ್ಯಕ್ಷ ಫ್ರೆಡ್ರಿಕ್ ಎ ಡೇವಿ ಹೇಳಿದ್ದಾರೆ.

ಇದನ್ನೂ ಓದಿ: ಸಾಲು ಸಾಲು ಪತ್ರಕರ್ತರ ಮನೆಗಳ ಮೇಲೆ ದಾಳಿ – ಬಂಧನ! ಏನಾಗುತ್ತಿದೆ?

USCIRF ಈ ಪ್ರಕರಣಗಳನ್ನು ತನಿಖೆ ನಡೆಸಿ, ಎಲ್ಲಾ ಕೈದಿಗಳನ್ನು ಮತ್ತು ಅವರ ಧರ್ಮ ಅಥವಾ ನಂಬಿಕೆಯನ್ನು ಶಾಂತಿಯುತವಾಗಿ ವ್ಯಕ್ತಪಡಿಸಿದ್ದಕ್ಕಾಗಿ ಬಂಧಿತರಾದವರನ್ನು ಬಿಡುಗಡೆ ಮಾಡಲು ಭಾರತ ಸರ್ಕಾರಕ್ಕೆ ಕರೆ ನೀಡಿದೆ ಎಂದು.

ಜೂನ್ 2020 ರಿಂದ  USCIRF ಮೋದಿ ಸರ್ಕಾರದ ಅವಧಿಯಲ್ಲಿ ನಡೆಯುತ್ತಿರುವ ಧಾರ್ಮಿಕ ಸ್ವಾತಂತ್ರ್ಯದ ಅತಿರೇಕದ ಉಲ್ಲಂಘನೆಗಳಿಗಾಗಿ ಭಾರತವನ್ನು “ನಿರ್ದಿಷ್ಟ ಕಾಳಜಿಯ ದೇಶ – Country of Particular Concern ” ಎಂದು ಗುರುತಿಸಲು ಅಧ್ಯಕ್ಷ ಜೋ ಬಿಡನ್ ಅವರಿಗೆ ಕರೆ ನೀಡುತ್ತಾ ಬಂದಿದೆ. ಈ ವರ್ಷ ಮೇ ತಿಂಗಳಲ್ಲಿ, ಸತತ ನಾಲ್ಕನೇ ವರ್ಷಕ್ಕೆ ಅಮೇರಿಕಾ ಭಾರತವನ್ನು ‘ನಿರ್ದಿಷ್ಟ ಕಾಳಜಿಯ ದೇಶ’ ಎಂದು ಗುರುತಿಸಬೇಕು  ಎಂಬ ಸಲಹೆಯನ್ನು ನೀಡಿದೆ.