ಸೆಪ್ಟೆಂಬರ್‌ನಲ್ಲಿ 67 ಕಳಪೆ ಔಷಧಗಳು ಪತ್ತೆ!

ಬೆಂಗಳೂರು: ಸೆಪ್ಟೆಂಬರ್‌ನಲ್ಲಿ ಔಷಧ ನಿಯಂತ್ರಣ ಅಧಿಕಾರಿಗಳು ನಡೆಸಿದ ಮಾದರಿ ಪರೀಕ್ಷೆಯಲ್ಲಿ 67 ಔಷಧಿಗಳು ‘ಉತ್ತಮ ಗುಣಮಟ್ಟದಲ್ಲಿಲ್ಲ’ ಎಂಬುದು ಕಂಡುಬಂದಿವೆ. ಕೇಂದ್ರ ಸರ್ಕಾರದ ಔಷಧ ನಿಯಂತ್ರಕ ಸಂಸ್ಥೆ, ಸೆಂಟ್ರಲ್ ಡ್ರಗ್ಸ್ ಸ್ಟ್ಯಾಂಡರ್ಡ್ಸ್ ಕಂಟ್ರೋಲ್ ಆರ್ಗನೈಸೇಶನ್ (CDSCO) ನ ಪ್ರಯೋಗಾಲಯಗಳು 49 ಔಷಧಗಳನ್ನು ಕಳಪೆ ಎಂದು ಹೇಳಿದೆ. ರಾಜ್ಯಗಳ ಪ್ರಯೋಗ ಶಾಲೆಗಳು ಇಂತಹ 18 ಔಷಧಿಗಳನ್ನು ಪಟ್ಟಿ ಮಾಡಿವೆ.

ಎಎನ್‌ಐ, ದೂರದರ್ಶನ ಮತ್ತು ಎನ್‌ಡಿಟಿವಿ ಜೊತೆಗಿನ ವಿಶೇಷ ಪತ್ರಿಕಾ ಸಂವಾದದಲ್ಲಿ, ಡ್ರಗ್ ಕಂಟ್ರೋಲರ್ ಜನರಲ್ ಆಫ್ ಇಂಡಿಯಾ (ಡಿಜಿಸಿಐ) ರಾಜೀವ್ ರಘುವಂಶಿ ಅವರು ಸೆಪ್ಟೆಂಬರ್‌ನಲ್ಲಿ ಪರೀಕ್ಷೆಗಾಗಿ 3,000 ಮಾದರಿಗಳನ್ನು ಸಿಡಿಎಸ್‌ಸಿಒ ಸಂಗ್ರಹಿಸಿದೆ ಎಂದು ಹೇಳಿದ್ದರು. ಈ ಮಾದರಿಗಳ ಮೇಲೆ ನಡೆಸಿದ ಪ್ರಯೋಗಗಳ ಫಲಿತಾಂಶಗಳನ್ನು ಅಕ್ಟೋಬರ್ 25, ಶುಕ್ರವಾರ ಬಿಡುಗಡೆ ಮಾಡಲಾಗಿದೆ.

NSQ – Not of Standard Quality ಔಷಧಿಗಳ ಎರಡು ಪಟ್ಟಿಗಳಲ್ಲಿ ಒಂದನ್ನು CDSCO ತಯಾರಿಸುತ್ತದೆ ಮತ್ತು CDSCO ನಿಂದ ರಾಜ್ಯ ಔಷಧ ನಿಯಂತ್ರಣ ಪ್ರಾಧಿಕಾರಗಳ ಪಟ್ಟಿಗಳಿಂದ ಇನ್ನೊಂದನ್ನು ತಯಾರಿಸಲಾಗುತ್ತದೆ. ಪ್ರತಿ ತಿಂಗಳು ಇದು ಬಿಡುಗಡೆಯಾಗುತ್ತದೆ.

ಆಗಸ್ಟ್ ಮತ್ತು ಸೆಪ್ಟೆಂಬರ್‌ನ ಪಟ್ಟಿಗಳ ವಿಶ್ಲೇಷಣೆಯು ಎರಡೂ ತಿಂಗಳುಗಳಲ್ಲಿ ಆರು ಕಂಪನಿಗಳ ಹೆಸರುಗಳು ಕಾಣಿಸಿಕೊಂಡಿರುವುದನ್ನು ತೋರಿಸಿದೆ.

ಈ ಸಂಸ್ಥೆಗಳೆಂದರೆ ಹಿಂದೂಸ್ತಾನ್ ಆಂಟಿಬಯೋಟಿಕ್ಸ್, ಲೈಫ್ ಮ್ಯಾಕ್ಸ್ ಕ್ಯಾನ್ಸರ್ ಲ್ಯಾಬೋರೇಟರೀಸ್, ಅಲ್ಕೆಮ್ ಹೆಲ್ತ್ ಸೈನ್ಸಸ್, ಡಿಜಿಟಲ್ ವಿಷನ್ , ನೆಸ್ಟರ್ ಫಾರ್ಮಾಸ್ಯುಟಿಕಲ್ಸ್ ಮತ್ತು ಕೇರಳ ಮೆಡಿಕಲ್ ಸರ್ವಿಸಸ್ ಕಾರ್ಪೊರೇಷನ್.

Zee ಲ್ಯಾಬೊರೇಟರೀಸ್, ANG ಲೈಫ್‌ಸೈನ್ಸ್ ಇಂಡಿಯಾ, ಹಿಮಾಲಯ ಮೆಡಿಟೆಕ್ ಮತ್ತು ಪ್ರೊಟೆಕ್ ಟೆಲಿಲಿಂಕ್ಸ್ – I ನಾಲ್ಕು ಕಂಪನಿಗಳು ಸೆಪ್ಟೆಂಬರ್‌ನಲ್ಲಿ ಮಾತ್ರ NSQ ಪಟ್ಟಿಯಲ್ಲಿ ಕಾಣಿಸಿಕೊಂಡಿವೆ, ಆದರೆ ಆ ತಿಂಗಳು ಅವರ ಒಂದಕ್ಕಿಂತ ಹೆಚ್ಚು ಉತ್ಪನ್ನಗಳು ಕಳಪೆಯೆಂದು ಪರಿಗಣಿಸಲ್ಪಟ್ಟಿವೆ.

ಕಳಪೆ ಔಷಧಗಳು ಯಾವುವು ?

ಡ್ರಗ್ಸ್ ಮತ್ತು ಕಾಸ್ಮೆಟಿಕ್ಸ್ ಆಕ್ಟ್, 1940 ರ ಪ್ರಕಾರ, ಬಳಕೆಗೆ ಯೋಗ್ಯವಲ್ಲದ ಔಷಧಿಗಳನ್ನು ಮೂರು ಗುಂಪುಗಳಾಗಿ ವಿಂಗಡಿಸಲಾಗಿದೆ:

1. ಕಲುಷಿತ ಅಥವಾ ಕಲಬೆರಕೆ ಔಷಧಗಳು. ವಿಷಕಾರಿ ಕಲಬೆರಕೆಯಿಂದಾಗಿ ಇದರಿಂದ ಸಾವು ಸೇರಿದಂತೆ ಗಂಭೀರವಾದ ಹಾನಿಯಾಗಬಹುದು.

2. ನಕಲಿ ಔಷಧಗಳು. ಆ ಔಷಧಿಗಳನ್ನು ತಯಾರಿಸದ ನಿರ್ದಿಷ್ಟ ಔಷಧೀಯ ಕಂಪನಿಯ ಲೇಬಲ್ ಅನ್ನು ಅಂಟಿಸಿ ಮಾರುವ ನಕಲಿ ಔಷಧಗಳಿವು.

3. ಕಳಪೆ ದರ್ಜೆಯ ಅಥವಾ NSQ ಔಷಧಿಗಳು. ಅದರಲ್ಲಿ ಒಂದು ನಿರ್ದಿಷ್ಟ ಘಟಕಾಂಶವು ಇರಬೇಕಾದ ಪ್ರಮಾಣದಲ್ಲಿ ಇರುವುದಿಲ್ಲ. ಇದರಿಂದ ನಿರ್ದಿಷ್ಟ ರೋಗಕ್ಕೆ ನೀಡುವ ಈ ಔಷಧ ಪರಿಣಾಮಕಾರಿಯಾಗಿರುವುದಿಲ್ಲ. ಇದರಿಂದ ರೋಗ ಉಲ್ಬಣವಾಗಬಹುದು. ಆದರೆ ಕಲಬೆರಕೆ ಔಷಧಿಗಿಂತ ಭಿನ್ನವಾಗಿ, ಕಳಪೆ ಔಷಧಗಳಿಂದ ಸಾವು ಸಂಭವಿಸುವುದಿಲ್ಲ .

CDSCO ನ ಡ್ರಗ್ಸ್ ಕನ್ಸಲ್ಟೇಟಿವ್ ಕಮಿಟಿ (DCC) ಕೆಳದರ್ಜೆಯ ಔಷಧಗಳಲ್ಲಿ minor ಮತ್ತು grossly substandard ಎಂಬ ಎರಡು ರೀತಿಯ ದೋಷಗಳನ್ನು ನಿರ್ದಿಷ್ಟಪಡಿಸುತ್ತದೆ. ಒಂದು ಕೆಳದರ್ಜೆಯದ್ದಾಗಿದ್ದರೆ, ಇನ್ನೊಂದು ಸಂಪೂರ್ಣವಾಗಿ ಕಳಪೆ ಮಟ್ಟದ್ದಾಗಿದೆ.

ಔಷಧಗಳು ಪ್ರಮಾಣಿತ ಪರೀಕ್ಷೆಯಲ್ಲಿ ವಿಫಲವಾಗಿವೆ

ಸೆಪ್ಟೆಂಬರ್ ಪಟ್ಟಿಗಳಲ್ಲಿ ಉಲ್ಲೇಖಿಸಲಾದ 67 ಔಷಧಿಗಳಲ್ಲಿ ಹೆಚ್ಚಿನವು ಟೆಲ್ಮಿಸಾರ್ಟನ್‌ನಂತಹ ಅಧಿಕ ರಕ್ತದೊತ್ತಡದ ಔಷಧಗಳಾಗಿವೆ; ಮೆಟ್ರೋನಿಡಜೋಲ್, ಜೆಂಟಾಮೈಸಿನ್ ಮತ್ತು ಸೆಫ್ಟ್ರಿಯಾಕ್ಸೋನ್‌ನಂತಹ ಪ್ರತಿಜೀವಕಗಳು; ಕ್ಯಾಲ್ಸಿಯಂ ಮತ್ತು ವಿಟಮಿನ್ ಪೂರಕಗಳು; ಪ್ಯಾಂಟೊಪ್ರಜೋಲ್ನಂತಹ ಆಂಟಾಸಿಡ್ಗಳು; ಗ್ಲಿಮೆಪಿರೈಡ್ ಮತ್ತು ಮೆಟ್‌ಫಾರ್ಮಿನ್‌ನಂತಹ ಮಧುಮೇಹ ವಿರೋಧಿಗಳು; ಕೆಮ್ಮು ಸಿರಪ್ಗಳು; ರಕ್ತ ಹೆಪ್ಪುಗಟ್ಟುವಿಕೆಯನ್ನು ತಡೆಗಟ್ಟಲು ಔಷಧಗಳು; ಮತ್ತು ನೋವು ನಿವಾರಕ ಔಷಧಿಗಳಾದ ಡಿಕ್ಲೋಫೆನಾಕ್ ಮತ್ತು ನಿಮೆಸುಲೈಡ್ ಜೊತೆಗೆ ಪ್ಯಾರಸಿಟಮಾಲ್.

ಸೆಪ್ಟೆಂಬರ್‌ನಲ್ಲಿ CDSCO ಯಿಂದ NSQ ಎಂದು ಪರಿಗಣಿಸಲ್ಪಟ್ಟಿರುವ ಔಷಧಿಗಳ ಸಂಪೂರ್ಣ ಪಟ್ಟಿಯನ್ನು ಇಲ್ಲಿ ನೋಡಿ ಮತ್ತು ರಾಜ್ಯ ಪ್ರಯೋಗಾಲಯಗಳು ಇಲ್ಲಿ ನೋಡಿ .

ಸೆಪ್ಟೆಂಬರ್‌ನ ರಾಜ್ಯ ಪಟ್ಟಿಯಲ್ಲಿ ಏಳು ರಾಜ್ಯಗಳು ಅಥವಾ ಕೇಂದ್ರಾಡಳಿತ ಪ್ರದೇಶಗಳ ಫಲಿತಾಂಶಗಳು ಮಾತ್ರ ಇರುವುದನ್ನು ಇಲ್ಲಿ ಗಮನಿಸಬೇಕು.

ಇತರರು CDSCO ಗೆ ಡೇಟಾವನ್ನು ಸಲ್ಲಿಸಲಿಲ್ಲ. ಇವುಗಳಲ್ಲಿ ಆಂಧ್ರಪ್ರದೇಶ, ಅರುಣಾಚಲ ಪ್ರದೇಶ, ಅಸ್ಸಾಂ, ಬಿಹಾರ, ಛತ್ತೀಸ್‌ಗಢ, ಗೋವಾ, ಗುಜರಾತ್, ಹರಿಯಾಣ, ಹಿಮಾಚಲ ಪ್ರದೇಶ, ಮಣಿಪುರ, ರಾಜಸ್ಥಾನ, ಮೇಘಾಲಯ, ಮಿಜೋರಾಂ, ನಾಗಾಲ್ಯಾಂಡ್, ಒಡಿಶಾ, ಪಂಜಾಬ್, ಸಿಕ್ಕಿಂ, ತಮಿಳುನಾಡು, ಪಾಂಡಿಚೇರಿ, ತೆಲಂಗಾಣ, ದೆಹಲಿ, ಉತ್ತರಾಖಂಡ ಪಶ್ಚಿಮ ಬಂಗಾಳ, ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳು, ದಾದರ್ ಮತ್ತು ನಗರ ಹವೇಲಿ ಮತ್ತು ದಮನ್ ಮತ್ತು ದಿಯು ಮತ್ತು ಲಕ್ಷದ್ವೀಪಗಳು ಸೇರಿವೆ.

67 ಔಷಧಿಗಳ ಪೈಕಿ ಹೆಚ್ಚಿನವು ವಿಶ್ಲೇಷಣೆ ಪರೀಕ್ಷೆಯಲ್ಲಿ (ಪ್ರಸ್ತುತ ಘಟಕಾಂಶದ ಪ್ರಮಾಣವನ್ನು ಅಳೆಯಲು ಮಾಡಲಾಗುತ್ತದೆ), ವಿಸರ್ಜನೆ ಮತ್ತು ವಿಘಟನೆ ಪರೀಕ್ಷೆಗಳು ಮತ್ತು ಎಂಡೋಟಾಕ್ಸಿನ್ ಪರೀಕ್ಷೆಗಳಲ್ಲಿ ವಿಫಲವಾಗಿವೆ.

ಡಿಜಿಸಿಐ ರಘುವಂಶಿ ಪತ್ರಿಕಾಗೋಷ್ಠಿಯಲ್ಲಿ, ನಿರ್ದಿಷ್ಟ ಔಷಧದ ಹೆಸರು ಪಟ್ಟಿಯಲ್ಲಿ ಕಾಣಿಸಿಕೊಂಡರೆ, ಎಲ್ಲಾ ತಯಾರಕರು ತಯಾರಿಸಿದ ಔಷಧವನ್ನು NSQ ಎಂದು ಅರ್ಥೈಸಬಾರದು ಎಂದು ಸ್ಪಷ್ಟಪಡಿಸಿದ್ದಾರೆ.

ಹಿಂದಿನ ಮಾಸಿಕ ಪಟ್ಟಿಗಳಲ್ಲಿ ಹೆಸರು ಹೊಂದಿರುವ ಕಂಪನಿಗಳ ವಿರುದ್ಧ ಕ್ರಮ ತೆಗೆದುಕೊಳ್ಳಲಾಗಿದೆಯೇ ಎಂಬ ಪ್ರಶ್ನೆಗೆ, ರಘುವಂಶಿ ಪತ್ರಿಕಾಗೋಷ್ಠಿಯಲ್ಲಿ ನೋಟಿಸ್‌ಗಳನ್ನು ನೀಡಲಾಯಿತು ಮತ್ತು ತಮ್ಮ ಎನ್‌ಎಸ್‌ಕ್ಯೂ ಔಷಧವನ್ನು ಮಾರುಕಟ್ಟೆಯಿಂದ ಹಿಂತೆಗೆದುಕೊಳ್ಳುವಂತೆ ಹೇಳಲಾಗಿದೆ ಎಂದಿದ್ದಾರೆ.

ಈ ಸುದ್ದಿಯನ್ನು The Wire ನಲ್ಲಿ ಪ್ರಕಟವಾಗಿರುವ 67 Drugs Found Substandard in September; 6 Manufacturers Also Appeared in List For August ಭಾವಾನುವಾದವಾಗಿದೆ.