ರಾಜ್ಯದ ಹೆಣ್ಣು ಮಕ್ಕಳಿಗೆ ಮತ್ತೊಂದು ಗುಡ್ ನ್ಯೂಸ್ : ಶುಚಿ ಯೋಜನೆಗೆ ಮರುಚಾಲನೆ

ನಾಲ್ಕು ವರ್ಷಗಳಿಂದ ಸ್ಥಗಿತಗೊಂಡಿದ್ದ ರಾಜ್ಯದ ಹೆಣ್ಣು ಮಕ್ಕಳ ಸುರಕ್ಷತೆ ಮತ್ತು ಶುಚಿತ್ವಕ್ಕೆ ಹೆಚ್ಚು ಒತ್ತು ನೀಡುವ “ಶುಚಿ ಯೋಜನೆ’ಗೆ ಈಗ ರಾಜ್ಯ ಸರ್ಕಾರ ಮರುಜೀವ ನೀಡಿದೆ. ಮುಂದಿನ ಹದಿನೈದು ದಿನದೊಳಗೆ ಸ್ಯಾನಿಟರಿ ನ್ಯಾಪ್‌ಕಿನ್‌ಗಳನ್ನು ರಾಜ್ಯದ ಹೆಣ್ಣು ಮಕ್ಕಳ ಕೈ ಸೇರಿಸಲು ಸರ್ಕಾರ ಎಲ್ಲಾ ರೀತಿಯ ಕ್ರಮ ಕೈಗೊಳ್ಳಲು ಮುಂದಾಗಿದೆ.

“ಶುಚಿ ಯೋಜನೆ”ಯಿಂದ ಸ್ಯಾನಿಟರಿ ನ್ಯಾಪ್ಕಿನ್ ಗಳು ರಾಜ್ಯದ 17.45 ಲಕ್ಷ ಹೆಣ್ಮಕ್ಕಳ ಕೈ ಸೇರುವ ನಿರೀಕ್ಷೆ ಇದೆ. ವಿಶೇಷವಾಗಿ ಗ್ರಾಮೀಣ ಪ್ರದೇಶಗಳಲ್ಲಿ ಮುಟ್ಟಿನ ಸ್ರಾವದ ನಿರ್ವಹಣೆಗೆ ಹಳೆಯ ಬಟ್ಟೆ ಬಳಸುವುದು ಮತ್ತು ಅವೈಜ್ಞಾನಿಕ ವಿಧಾನಗಳನ್ನು ಅನುಸರಿಸುತ್ತಿರುವುದರಿಂದ ಅನಾರೋಗ್ಯಕ್ಕೆ ಒಳಗಾಗುವುದು ಸಾಮಾನ್ಯವಾಗಿತ್ತು. ಆದರೆ “ಶುಚಿ ಯೋಜನೆ” ಮೂಲಕ ರಾಜ್ಯ ಸರ್ಕಾರ ಇವೆಲ್ಲಕ್ಕೂ ಬ್ರೇಕ್ ಹಾಕುವ ಚಿಂತನೆ ನಡೆಸಿ, ಮತ್ತೊಮ್ಮೆ ಯೋಜನೆ ಜಾರಿಗೊಳಿಸಿದೆ. ವಿಶೇಷವಾಗಿ ರಾಜ್ಯ ಸರ್ಕಾರ ಆರೋಗ್ಯ ಇಲಾಖೆ ಸಹಯೋಗದಲ್ಲಿ ಪ್ರೌಢಶಾಲೆ ಹಾಗೂ ಪದವಿ ಪೂರ್ವ ಕಾಲೇಜುಗಳ ಹೆಣ್ಣು ಮಕ್ಕಳಿಗೆ ಸ್ಯಾನಿಟರಿ ನ್ಯಾಪಕಿನ್‌ ವಿತರಿಸಲಾಗುತ್ತಿದೆ.

17 ಲಕ್ಷ ಫಲಾನುಭವಿಗಳು
ಕರ್ನಾಟಕ ರಾಜ್ಯ ವೈದ್ಯಕೀಯ ಸರಬರಾಜು ನಿಗಮ ಕೊನೆಯ ಹಂತದ ತಪಾಸಣೆ ಪೂರ್ಣಗೊಳಿಸಲಿದೆ. ಮುಂದಿನ ಹದಿನೈದು ದಿನಗಳಲ್ಲಿ ಅಂದರೆ ಜ.26ರೊಳಗೆ ಶುಚಿ ಯೋಜನೆಗೆ ಮರುಚಾಲನೆ ಸಿಗುವ ನಿರೀಕ್ಷೆ ಇದೆ. ಮೈಸೂರು ವಿಭಾಗದಲ್ಲಿ 3.24 ಲಕ್ಷ, ಕಲಬುರಗಿ 31.52 ಲಕ್ಷ, ಬೆಂಗಳೂರು ವಿಭಾಗ 48.55 ಲಕ್ಷ, ಬೆಳಗಾವಿ ವಿಭಾಗದಲ್ಲಿ 62.3 ಲಕ್ಷ ಸಹಿತ ಒಟ್ಟು 17.45 ಲಕ್ಷ ಅರ್ಹ ಫ‌ಲಾನುಭವಿಗಳಿದ್ದಾರೆ. ಒಬ್ಬರಿಗೆ 8 ಶುಚಿ ಸ್ಯಾನಿಟರಿ ನ್ಯಾಪ್‌ಕಿನ್‌ ಪ್ಯಾಕ್‌ ನೀಡಲಾಗುತ್ತದೆ. ಒಂದರಲ್ಲಿ 10 ನ್ಯಾಪ್‌ಕಿನ್‌ಗಳಂತೆ 80 ನ್ಯಾಪ್‌ಕಿನ್‌ ಏಕಕಾಲಕ್ಕೆ ವಿತರಿಸಲಾಗುತ್ತದೆ. ಇದರ ಬಳಕೆಗೆ ಎರಡು ವರ್ಷದ ಅವಧಿ ಇದೆ. ಶಾಲೆಗೆ ಸ್ಯಾನಿಟರಿ ಪ್ಯಾಡ್‌ ವಿತರಿಸುವ ಕೆಲಸವನ್ನು ಟೆಂಡರ್‌ ವಹಿಸಿಕೊಂಡ ಸಂಸ್ಥೆಯೇ ಮಾಡಲಿದೆ.

40.50 ಕೋಟಿ ಮಂಜೂರು
ರಾಜ್ಯದ ಶಾಲೆ, ಪದವಿಪೂರ್ವ ಹಾಗೂ ವಸತಿ ನಿಲಯದಲ್ಲಿರುವ ಹದಿಹರೆಯದ ಹೆಣ್ಮಕ್ಕಳಿಗೆ ಶುಚಿ ಯೋಜನೆಯಡಿ ಪ್ಯಾಡ್‌ ವಿತರಿಸಲು 40.50 ಕೋಟಿ ರೂ. ಮಂಜೂರು ಆಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಒಂದು ಯೂನಿಟ್‌ (8 ಸ್ಯಾನಿಟರಿ ನ್ಯಾಪ್‌ಕಿನ್‌)ಗೆ 27.70 ರೂ. ನಿಗದಿಪಡಿಸಿದ್ದು, ಆ ಮೂಲಕ ಒಬ್ಬ ಫ‌ಲಾನುಭವಿಗೆ ಸರಕಾರ ಸುಮಾರು 222 ರೂ. ನಿಗದಿಪಡಿಸಿದೆ.

ಮೈಸೂರು ವಿಭಾಗ 8,137, ಕಲಬುರಗಿ ವಿಭಾಗ 5,036, ಬೆಂಗಳೂರು ವಿಭಾಗ 10,193, ಬೆಳಗಾವಿ ವಿಭಾಗ 9,602 ಸೇರಿ ಒಟ್ಟು 32,968 ಶಾಲೆ, ಪ್ರೌಢ ಹಾಗೂ ಪದವಿ ಪೂರ್ವ ಕಾಲೇಜು, ವಸತಿ ನಿಲಯದ ಸಂಸ್ಥೆಗಳಿಗೆ ಸ್ಯಾನಿಟರಿ ಪ್ಯಾಡ್‌ ಸರಬರಾಜಾಗಲಿದೆ.