ಕತಾರ್‌ನಲ್ಲಿ ಮರಣದಂಡನೆ ಶಿಕ್ಷೆಗೆ ಗುರಿಯಾಗಿದ್ದ 8 ಭಾರತೀಯ ನೌಕಾಪಡೆಯ ಮಾಜಿ ಅಧಿಕಾರಿಗಳ ಬಿಡುಗಡೆ

ಕತಾರ್‌ನಲ್ಲಿ ಬೇಹುಗಾರಿಕೆ ಆರೋಪದ ಮೇಲೆ ಮರಣದಂಡನೆಯನ್ನು ಎದುರಿಸುತ್ತಿರುವ ಎಂಟು ಮಾಜಿ ಭಾರತೀಯ ನೌಕಾಪಡೆ ಅಧಿಕಾರಿಗಳನ್ನು ದೇಶವು ಬಿಡುಗಡೆ ಮಾಡಿದೆ ಎಂದು ಭಾರತದ ವಿದೇಶಾಂಗ ವ್ಯವಹಾರಗಳ ಸಚಿವಾಲಯ ಹೇಳಿಕೆಯಲ್ಲಿ ತಿಳಿಸಿದೆ.

ಅವರಲ್ಲಿ ಏಳು ಮಂದಿ ಸೋಮವಾರ ಮುಂಜಾನೆ ಭಾರತವನ್ನು ತಲುಪಿದ್ದಾರೆ ಎಂದು ಅದು ಬಹಿರಂಗಪಡಿಸಿದೆ.

ನೌಕಾಪಡೆಯ ಮಾಜಿ ಅಧಿಕಾರಿಗಳ ಬಿಡುಗಡೆಗೆ ಭಾರತದ ವಿದೇಶಾಂಗ ಸಚಿವಾಲಯ ಸಂತಸ ವ್ಯಕ್ತಪಡಿಸಿದೆ. ‘‘ದಹ್ರಾ ಗ್ಲೋಬಲ್ ಕಂಪನಿಯಲ್ಲಿ ಕೆಲಸ ಮಾಡುತ್ತಿರುವ ಭಾರತೀಯರನ್ನು ಕತಾರ್ ಜೈಲಿನಿಂದ ಬಿಡುಗಡೆ ಮಾಡಿರುವುದನ್ನು ಭಾರತ ಸರಕಾರ ಸ್ವಾಗತಿಸುತ್ತದೆ. ಎಂಟರಲ್ಲಿ ಏಳು ಮಂದಿ ಭಾರತವನ್ನು ತಲುಪಿದ್ದಾರೆ. “ಅಧಿಕಾರಿಗಳನ್ನು ಬಿಡುಗಡೆ ಮಾಡಲು ಕತಾರ್ ಅಮೀರ್ ತೆಗೆದುಕೊಂಡ ನಿರ್ಧಾರಕ್ಕೆ ಧನ್ಯವಾದಗಳು” ಎಂದು ಭಾರತೀಯ ವಿದೇಶಾಂಗ ಸಚಿವಾಲಯ ಹೇಳಿದೆ ಎಂದು ಎಎನ್‌ಐ ಸುದ್ದಿ ಸಂಸ್ಥೆ ಬಹಿರಂಗಪಡಿಸಿದೆ.

“ನಾವು ಭಾರತಕ್ಕೆ ಹಿಂತಿರುಗಲು 18 ತಿಂಗಳುಗಳಿಂದ ಕಾಯುತ್ತಿದ್ದೆವು. ನಾವು ಇಂದು ನಮ್ಮ ದೇಶಕ್ಕೆ ಮರಳಲು ಸಾಧ್ಯವಾಯಿತು. ಅದಕ್ಕಾಗಿ ನಾವು ಪ್ರಧಾನಿ ನರೇಂದ್ರ ಮೋದಿಯವರಿಗೆ ಧನ್ಯವಾದ ಹೇಳುತ್ತೇವೆ. ಅವರ ವೈಯಕ್ತಿಕ ಹಸ್ತಕ್ಷೇಪ ಮತ್ತು ಕತಾರ್‌ನೊಂದಿಗೆ ಸಮಾಲೋಚನೆಯಿಂದ ಮಾತ್ರ ಇದು ಸಾಧ್ಯವಾಯಿತು. ಭಾರತ ಸರ್ಕಾರಕ್ಕೆ ಹೃತ್ಪೂರ್ವಕವಾಗಿ ಕೃತಜ್ಞತೆ ಸಲ್ಲಿಸುತ್ತೇನೆ, ಸರ್ಕಾರದ ಮಧ್ಯಸ್ಥಿಕೆ ಇಲ್ಲದಿದ್ದರೆ ಇಂದು ಇದು ಸಾಧ್ಯವಾಗುತ್ತಿರಲಿಲ್ಲ” ಎಂದು ಕತಾರ್‌ನಿಂದ ಭಾರತಕ್ಕೆ ಆಗಮಿಸಿದ ಪಾಕಲಾ ಸುಗುಣಾಕರ್ ಮಾಧ್ಯಮಗಳೊಂದಿಗೆ ಮಾತನಾಡುತ್ತಾ ಹೇಳಿದರು.

ಎಂಟು ಮಾಜಿ ಭಾರತೀಯ ನೌಕಾಪಡೆ ಅಧಿಕಾರಿಗಳನ್ನು 2022ರ ಅಕ್ಟೋಬರ್‌ನಲ್ಲಿ ಬೇಹುಗಾರಿಕೆ ಪ್ರಕರಣಗಳಲ್ಲಿ ಬಂಧಿಸಲಾಯಿತು. ಕತಾರ್ ನ್ಯಾಯಾಲಯವು ಅವರಿಗೆ ಮರಣದಂಡನೆ ವಿಧಿಸಿತು. ನಂತರ ಅದನ್ನು ಜೀವಾವಧಿ ಶಿಕ್ಷೆಯಾಗಿ ಬದಲಾಯಿಸಲಾಗಿತ್ತು.

ಹಲವಾರು ತಿಂಗಳುಗಳಿಂದ, ಈ ಮಾಜಿ ಅಧಿಕಾರಿಗಳನ್ನು ಬಿಡುಗಡೆ ಮಾಡಿಸುವಂತೆ ಭಾರತ ಸರ್ಕಾರದ ಮೇಲೆ ಒತ್ತಡವಿತ್ತು. ತೀರ್ಪಿನ ಹಿನ್ನೆಲೆಯಲ್ಲಿ ಈ ವಿಷಯವನ್ನು ‘ಅತ್ಯಂತ ಆದ್ಯತೆ’ ಎಂದು ಪರಿಗಣಿಸುವುದಾಗಿ ವಿದೇಶಾಂಗ ವ್ಯವಹಾರಗಳ ಇಲಾಖೆ ಈ ಹಿಂದೆ ಹೇಳಿತ್ತು.

ಸೆಪ್ಟೆಂಬರ್ 2022ರಲ್ಲಿ, ಕತಾರ್ ಸರ್ಕಾರವು ಈ ಎಂಟು ಜನರನ್ನು ಬಂಧಿಸಿತು. ನಂತರ ಮಾರ್ಚ್‌ನಲ್ಲಿ ಅವರ ವಿರುದ್ಧ ಬೇಹುಗಾರಿಕೆ ಆರೋಪವನ್ನು ದಾಖಲಿಸಲಾಗಿತ್ತು.

ಅವರು ಈ ಹಿಂದೆ ಕತಾರ್‌ನ ಖಾಸಗಿ ಭದ್ರತಾ ಸಂಸ್ಥೆ ‘ಝಹೀರಾ ಅಲ್ ಅಲಾಮಿ’ಯಲ್ಲಿ ಕೆಲಸ ಮಾಡುತ್ತಿದ್ದರು.

ಕಂಪನಿಯು ಕತಾರ್ ನೌಕಾಪಡೆಯ ಜಲಾಂತರ್ಗಾಮಿ ಕಾರ್ಯಕ್ರಮಕ್ಕಾಗಿ ಕೆಲಸ ಮಾಡುತ್ತದೆ.

ರೇಡಾರ್ ಪತ್ತೆಯನ್ನು ತಪ್ಪಿಸಲು ಸುಧಾರಿತ ಇಟಾಲಿಯನ್ ತಂತ್ರಜ್ಞಾನವನ್ನು ಹೊಂದಿರುವ ಜಲಾಂತರ್ಗಾಮಿ ನೌಕೆಗಳನ್ನು ಖರೀದಿಸುವುದು ಕಾರ್ಯಕ್ರಮದ ಉದ್ದೇಶವಾಗಿದೆ.

ಈ ಕಂಪನಿಯಲ್ಲಿ 75 ಭಾರತೀಯ ನಾಗರಿಕರು ಉದ್ಯೋಗದಲ್ಲಿದ್ದಾರೆ. ಅವರಲ್ಲಿ ಹೆಚ್ಚಿನವರು ಭಾರತೀಯ ನೌಕಾಪಡೆಯ ಮಾಜಿ ಅಧಿಕಾರಿಗಳು.

ಕಂಪನಿಯು ಮೇ 31, 2022ರಿಂದ ಕಾರ್ಯಾಚರಣೆಯನ್ನು ನಿಲ್ಲಿಸುವುದಾಗಿ ಘೋಷಿಸಿದೆ.

ಮಾಧ್ಯಮ ವರದಿಗಳ ಪ್ರಕಾರ, ಜಹೀರಾ ಅಲ್ ಅಲಾಮಿ ಮುಖ್ಯಸ್ಥ ಖಾಮಿಸ್ ಅಲ್ ಅಝಾಮಿ ಮತ್ತು ಎಂಟು ಭಾರತೀಯ ಉದ್ಯೋಗಿಗಳ ವಿರುದ್ಧದ ಕೆಲವು ಆರೋಪಗಳು ಸಾಮಾನ್ಯವಾಗಿದ್ದರೆ, ಇತರವು ನಿರ್ದಿಷ್ಟವಾಗಿವೆ.

ಬೇಹುಗಾರಿಕೆ ಆರೋಪದ ಮೇಲೆ ಬಂಧಿತರಾದ ಈ ಎಂಟು ಮಂದಿಯನ್ನು ಸಂಘಟನೆಯಿಂದ ವಜಾಗೊಳಿಸಲಾಗಿದೆ. ಅವರ ವೇತನವೂ ಇತ್ಯರ್ಥವಾಗಿದೆ.

ಕತಾರ್ ಸರ್ಕಾರವು ಕಂಪನಿಯನ್ನು ಮೇ 2022ರಲ್ಲಿ ಮುಚ್ಚಲು ಮತ್ತು ಸರಿಸುಮಾರು 70 ಉದ್ಯೋಗಿಗಳು ಮೇ 2023ರೊಳಗೆ ದೇಶವನ್ನು ತೊರೆಯುವಂತೆ ಆದೇಶಿಸಿದೆ.

ಮಾಧ್ಯಮ ವರದಿಗಳ ಪ್ರಕಾರ- ಈಗ ಮರಣದಂಡನೆಗೆ ಗುರಿಯಾಗಿರುವ ಭಾರತೀಯರು ಕತಾರ್ ಬಗ್ಗೆ ನಿರ್ಣಾಯಕ ಮಾಹಿತಿಯನ್ನು ಇಸ್ರೇಲ್‌ಗೆ ರವಾನಿಸಿದ್ದಾರೆ ಎಂದು ಆರೋಪಿಸಲಾಗಿದೆ.

ಭಾರತೀಯ ಮತ್ತು ವಿಶ್ವ ಮಾಧ್ಯಮ ವರದಿಗಳ ಪ್ರಕಾರ, ಸುಧಾರಿತ ಇಟಾಲಿಯನ್ ಜಲಾಂತರ್ಗಾಮಿ ನೌಕೆಗಳ ಖರೀದಿಗೆ ಸಂಬಂಧಿಸಿದಂತೆ ಈ ಮಾಜಿ ನೌಕಾಪಡೆ ಅಧಿಕಾರಿಗಳು ಇಸ್ರೇಲ್‌ಗೆ ಗುಪ್ತಚರ ಮಾಹಿತಿಯನ್ನು ರವಾನಿಸಿದ್ದಾರೆ ಎಂದು ಕತಾರ್ ಸರ್ಕಾರ ಆರೋಪಿಸಿದೆ.

ಕತಾರ್ ಗುಪ್ತಚರ ಸಂಸ್ಥೆಯು ಇಸ್ರೇಲ್‌ಗಾಗಿ ಬೇಹುಗಾರಿಕೆ ನಡೆಸಲು ‘ಎಲೆಕ್ಟ್ರಾನಿಕ್ ಆಧಾರವನ್ನು’ ಹೊಂದಿದೆ ಎಂದು ಹೇಳಿದೆ.

ಬಂಧಿತ ಮಾಜಿ ಅಧಿಕಾರಿಗಳು ಜಹೀರಾ ಅಲ್ ಅಲಾಮಿ ಪರವಾಗಿ ಕತಾರ್ ನೌಕಾಪಡೆಗೆ ವಿವಿಧ ತರಬೇತಿ ಕಾರ್ಯಕ್ರಮಗಳನ್ನು ನಡೆಸಿದರು.

ಆ ಸಮಯದಲ್ಲಿ ಕತಾರ್ ಮತ್ತು ಭಾರತದ ನಡುವಿನ ಒಪ್ಪಂದದ ಭಾಗವಾಗಿ ಈ ನೇಮಕಾತಿಗಳನ್ನು ಮಾಡಲಾಗಿದೆ.

ಜಹೀರಾ ಅಲ್ ಅಲಾಮಿ ತನ್ನ ವೆಬ್‌ಸೈಟ್‌ನಲ್ಲಿ ಕತಾರ್‌ನ ರಕ್ಷಣಾ ಸಚಿವಾಲಯ, ಭದ್ರತೆ ಮತ್ತು ಇತರ ಸರ್ಕಾರಿ ಏಜೆನ್ಸಿಗಳಿಗೆ ಸ್ಥಳೀಯ ವ್ಯಾಪಾರ ಪಾಲುದಾರ ಎಂದು ಹೇಳುತ್ತದೆ. ತಾನು ರಕ್ಷಣಾ ಸಾಧನಗಳ ನಿರ್ವಹಣೆ ಮತ್ತು ದುರಸ್ತಿಯಲ್ಲಿ ಅವರು ಪ್ರವೀಣ ಎಂದು ಅದು ಹೇಳಿದೆ.

ವೆಬ್‌ಸೈಟ್‌ನಲ್ಲಿ ಹಿರಿಯ ಅಧಿಕಾರಿಗಳು ಮತ್ತು ಅವರ ಹುದ್ದೆಗಳ ವಿವರಗಳ ಸಂಪೂರ್ಣ ಮಾಹಿತಿ ಇದೆ. ಈ ಪಟ್ಟಿಯಲ್ಲಿ ಹಲವು ಭಾರತೀಯರಿದ್ದಾರೆ.

ಅದರ ಲಿಂಕ್ಡ್‌ಇನ್ ಪುಟದ ಪ್ರಕಾರ, ಕಂಪನಿಯು ಕತಾರ್‌ನಲ್ಲಿ ರಕ್ಷಣಾ ಸಾಧನಗಳ ನಿರ್ವಹಣೆ ಮತ್ತು ದುರಸ್ತಿಯಲ್ಲಿ ಮುಂಚೂಣಿಯಲ್ಲಿದೆ.