ರಾಹುಲ್ ಗಾಂಧಿ ಪ್ರಾಮಾಣಿಕ ರಾಜಕೀಯ ನಾಯಕ:‌ ಚಿತ್ರನಟ ಸೈಫ್‌ ಅಲಿ ಖಾನ್

ಬಾಲಿವುಡ್ ನಟ ಸೈಫ್ ಅಲಿ ಖಾನ್ ಅವರು ಅವರೊಬ್ಬ ಧೈರ್ಯಶಾಲಿ ರಾಜಕಾರಣಿ ಎಂದು ಕಾಂಗ್ರೆಸ್ ನ ಹಿರಿಯ ನಾಯಕ ಹಾಗೂ ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಅವರನ್ನು ಹೊಗಳಿದ್ದಾರೆ.

ರಾಹುಲ್ ಸಾರ್ವಜನಿಕವಾಗಿ ತನ್ನ ಇಮೇಜ್ ಹೆಚ್ಚಿಸಿಕೊಳ್ಳಲು ಸಾಕಷ್ಟು ಸುಧಾರಣೆ ಮಾಡಿಕೊಂಡಿದ್ದಾರೆ ಎಂದು ಅವರು ಹೇಳಿದ್ದಾರೆ. ರಾಷ್ಟ್ರೀಯ ಮಾಧ್ಯಮವೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಸೈಫ್ ಈ ಹೇಳಿಕೆ ನೀಡಿದ್ದಾರೆ.

ಈ ಕಾರ್ಯಕ್ರಮದಲ್ಲಿ ರಾಜಕೀಯ ನಾಯಕರ ಬಗ್ಗೆ ಚರ್ಚೆ ನಡೆಯಿತು. ಈ ಸಂದರ್ಭದಲ್ಲಿ ನಿಮಗೆ ಎಂತಹ ನಾಯಕ ಎಂದರೆ ಇಷ್ಟ? ಎಂದು ಆಂಕರ್ ಕೇಳಿದಾಗ, ಧೈರ್ಯಶಾಲಿ ಮತ್ತು ಪ್ರಾಮಾಣಿಕ ರಾಜಕೀಯ ನಾಯಕರನ್ನು ನಾನು ಇಷ್ಟಪಡುತ್ತೇನೆ ಎಂದು ಸೈಫ್ ಉತ್ತರಿಸಿದರು. ಆಗ ನಿರೂಪಕ ಕೆಲವರ ಹೆಸರು ಪ್ರಸ್ತಾಪಿಸಿದರು. ಪ್ರಧಾನಿ ಮೋದಿ, ದೆಹಲಿಯ ಮಾಜಿ ಮುಖ್ಯಮಂತ್ರಿ ಕೇಜ್ರಿವಾಲ್ ಮತ್ತು ರಾಹುಲ್ ಗಾಂಧಿ ನಡುವೆ ಯಾರನ್ನು ಆಯ್ಕೆ ಮಾಡುತ್ತೀರಿ ಎಂದು ಪ್ರಶ್ನಿಸಿದರು.

ಮತ್ತು, ಇದಕ್ಕೆ ಪ್ರತಿಕ್ರಿಯಿಸಿದ ಸೈಫ್ ಅಲಿಖಾನ್, ಇವರೆಲ್ಲಾ ಕೆಚ್ಚೆದೆಯ ರಾಜಕಾರಣಿಗಳು. ಆದರೆ ರಾಹುಲ್ ಗಾಂಧಿ ಅವರ ಸ್ಟೈಲ್ ನನಗೆ ಸ್ವಲ್ಪ ಹೆಚ್ಚು ಮೆಚ್ಚುಗೆ. ಈ ಹಿಂದೆ ಕೆಲವರು ಅವರ ನಡೆ, ನುಡಿಗಳಿಗೆ ಅಗೌರವ ತೋರಿದ್ದರು. ಅಂತಹ ಪರಿಸ್ಥಿತಿಯಿಂದ ರಾಹುಲ್‌ ತನ್ನ ಇಮೇಜನ್ನು ಸಂಪೂರ್ಣ ಬದಲಾಯಿಸಿಕೊಂಡಿದ್ದಾರೆ. ಜನಬೆಂಬಲ ಪಡೆಯಲು ರಾಹುಲ್ ಗಾಂಧಿ ತುಂಬಾ ಶ್ರಮಿಸಿದ್ದಾರೆ. ಅವರ ರಾಜಕೀಯ ಪಯಣ ಕುತೂಹಲಕಾರಿಯಾಗಿದೆ ಎಂದರು. ಇದಕ್ಕೆ ಸಂಬಂಧಿಸಿದ ವಿಡಿಯೋ ಸದ್ಯ ವೈರಲ್ ಆಗುತ್ತಿದೆ.

ಸೈಫ್ ಅಲಿಖಾನ್ ಇತ್ತೀಚಿನ ‘ದೇವರ’ ಚಿತ್ರದಲ್ಲಿ ಭೈರನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದು, ತಮ್ಮ ಪಾತ್ರದಿಂದಾಗಿ ಈಗ ಮತ್ತೆ ಸುದ್ದಿಯಲ್ಲಿದ್ದಾರೆ.