ಜ್ವರಕ್ಕೆ ಪ್ರಮುಖ ಕಾರಣವಾಗುತ್ತಿದೆ ಸ್ಕ್ರಬ್ ಟೈಫಸ್ ಕೀಟ. ಹತ್ತು ಜನರಲ್ಲಿ ಒಬ್ಬರಿಗೆ ಈ ಸೋಂಕು: ಸಂಶೋಧನೆಯಲ್ಲಿ ಬಹಿರಂಗ

ದೆಹಲಿ: ದೇಶದ ಗ್ರಾಮೀಣ ಜನಸಂಖ್ಯೆಯ ಸುಮಾರು ಹತ್ತನೇ ಒಂದು ಭಾಗದಷ್ಟು ಜನರು ಪ್ರತಿ ವರ್ಷ ‘ಸ್ಕ್ರಬ್ ಟೈಫಸ್’ ಸೋಂಕಿನಿಂದ ಬಳಲುತ್ತಿದ್ದಾರೆ ಮತ್ತು ಬ್ಯಾಕ್ಟೀರಿಯಾದಿಂದ ಸೋಂಕಿತ ಲಾರ್ವಾ ಮಿಟೆ (ಚಿಗ್ಗರ್) ಕಡಿತದ ಮೂಲಕ ಹರಡುವ ಈ ಸೋಂಕು ಜ್ವರಕ್ಕೆ ಪ್ರಮುಖ ಕಾರಣವಾಗಿದೆ ಎಂದು ಅಧ್ಯಯನವೊಂದು ಹೇಳಿದೆ.

ಆದಾಗ್ಯೂ, ಜ್ವರದಿಂದ ಬಳಲುತ್ತಿರುವ ಜನರು ಕಡಿಮೆ ಸಂಖ್ಯೆಯಲ್ಲಿ ಆಸ್ಪತ್ರೆಗಳಿಗೆ ದಾಖಲಾಗುತ್ತಿರುವುದರಿಂದ ಮತ್ತು ಸೋಂಕಿನ ಪರೀಕ್ಷಾ ಸೌಲಭ್ಯಗಳು ಕೆಲವೇ ಪ್ರಮುಖ ಆಸ್ಪತ್ರೆಗಳಲ್ಲಿ ಇರುವುದರಿಂದ ಈ ಪ್ರಕರಣಗಳು ಬೆಳಕಿಗೆ ಬರುತ್ತಿಲ್ಲ ಎಂದು ಅಧ್ಯಯನವು ಹೇಳಿದೆ. ವೆಲ್ಲೂರಿನ ಕ್ರಿಶ್ಚಿಯನ್ ವೈದ್ಯಕೀಯ ಕಾಲೇಜು ಮತ್ತು ಲಂಡನ್ ಸ್ಕೂಲ್ ಆಫ್ ಹೈಜೀನ್ ಅಂಡ್ ಟ್ರಾಪಿಕಲ್ ಮೆಡಿಸಿನ್ (LSHTM) ಈ ಅಧ್ಯಯನವನ್ನು ನಡೆಸಿದ್ದು, ತಮಿಳುನಾಡಿನ 37 ಹಳ್ಳಿಗಳಿಂದ 32,000 ಜನರನ್ನು ಒಳಗೊಂಡಿತ್ತು. ಇದರ ಫಲಿತಾಂಶಗಳನ್ನು ನ್ಯೂ ಇಂಗ್ಲೆಂಡ್ ಜರ್ನಲ್ ಆಫ್ ಮೆಡಿಸಿನ್‌ನಲ್ಲಿ ಪ್ರಕಟಿಸಲಾಗಿದೆ.

ಏಷ್ಯಾದ ಗ್ರಾಮೀಣ ಪ್ರದೇಶಗಳಲ್ಲಿ ಹುಲ್ಲು, ಸಸ್ಯ ಭಗ್ನಾವಶೇಷ ಮತ್ತು ಮಣ್ಣಿನಲ್ಲಿ ಇವು ಕಂಡುಬರುತ್ತವೆ. ಸ್ಕ್ರಬ್ ಟೈಫಸ್ ರಿಕೆಟ್ಸಿಯಾ ಕುಟುಂಬಕ್ಕೆ ಸೇರಿದ ಓರಿಯೆಂಟಿಯಾ ಸುಟ್ಸುಗಮುಶಿ ಬ್ಯಾಕ್ಟೀರಿಯಾದಿಂದ ಉಂಟಾಗುತ್ತದೆ. ಈ ಸೋಂಕು ತೀವ್ರ ಅನಾರೋಗ್ಯ, ಎಕ್ಯೂಟ್ ರೆಸ್ಪಿರೇಟರಿ ಡಿಸ್ಟ್ರೆಸ್ ಸಿಂಡ್ರೋಮ್ (ARDS), ಮೆನಿಂಜೈಟಿಸ್ ಮತ್ತು ಮೂತ್ರಪಿಂಡ ವೈಫಲ್ಯಕ್ಕೆ ಕಾರಣವಾಗಬಹುದು. ‌

ಆಗ್ನೇಯ ಏಷ್ಯಾ, ಇಂಡೋನೇಷ್ಯಾ, ಚೀನಾ, ಜಪಾನ್ ಮತ್ತು ಭಾರತದ ಗ್ರಾಮೀಣ ಪ್ರದೇಶಗಳು ಹೆಚ್ಚು ಇದರ ಪರಿಣಾಮವನ್ನು ಎದುರಿಸುತ್ತಿವೆ. ಈ ಸೋಂಕುಗಳು ಸಾಮಾನ್ಯವಾಗಿ ಆಗಸ್ಟ್ ಮತ್ತು ಫೆಬ್ರವರಿ ನಡುವೆ ತಗಲುತ್ತವೆ ಎಂದು ಪ್ರಮುಖ ಸಂಶೋಧಕ ಮತ್ತು LSHTM ಪ್ರಾಧ್ಯಾಪಕ ವುಲ್ಫ್-ಪೀಟರ್ ಸ್ಮಿತ್ ಹೇಳಿದ್ದಾರೆ.

ಸೋಂಕು ತಗುಲಿದ ಹತ್ತು ದಿನಗಳ ನಂತರ ಜ್ವರ, ತಲೆನೋವು, ದೇಹದ ನೋವು ಮತ್ತು ದದ್ದುಗಳಂತಹ ಲಕ್ಷಣಗಳು ಕಾಣಿಸಿಕೊಳ್ಳಲು ಪ್ರಾರಂಭಿಸುತ್ತವೆ ಎಂದು ಅವರು ಹೇಳಿದರು.