ಶಿರೂರು ಭೂಕುಸಿತದ ಮೃತ ಅರ್ಜುನ್ ತಾಯಿಯಿಂದ ಮಂಜೇಶ್ವರ ಶಾಸಕರಿಗೆ ಕೃತಜ್ಞತಾ ಪತ್ರ; ಇದು ನನಗೆ ಈದ್ ಉಡುಗೊರೆ ಎಂದು ಬಣ್ಣಿಸಿದ ಶಾಸಕ

ಮಳೆಗಾಲದ ಸಂದರ್ಭದಲ್ಲಿ ಶಿರೂರು (ಕರ್ನಾಟಕ)ದಲ್ಲಿ ಸಂಭವಿಸಿದ ಭೂಕುಸಿತದಲ್ಲಿ ದುರಂತವಾಗಿ ಸಾವನ್ನಪ್ಪಿದ ಕೋಝಿಕ್ಕೋಡ್ ಲಾರಿ ಚಾಲಕ ಅರ್ಜುನ್ ಅವರ ತಾಯಿ ಕೆ.ಸಿ. ಶೀಲಾ ಅವರಿಂದ ಮಂಜೇಶ್ವರ ಶಾಸಕ ಎ.ಕೆ.ಎಂ. ಅಶ್ರಫ್ ಅವರಿಗೆ ಹೃದಯಪೂರ್ವಕ ಪತ್ರ ಬಂದಿದೆ . ಈದ್ ಹಬ್ಬದ ಉಡುಗೊರೆಯಾಗಿ ಶೀಲಾ ಈ ಪತ್ರವನ್ನು ಕಳುಹಿಸಿದ್ದು, ತಮ್ಮ ಕುಟುಂಬದ ದುಃಖದ ಸಮಯದಲ್ಲಿ ಶಾಸಕಿ ನೀಡಿದ ಅಚಲ ಬೆಂಬಲಕ್ಕೆ ಕೃತಜ್ಞತೆ ಸಲ್ಲಿಸಿದ್ದಾರೆ.

ಸಾಮಾಜಿಕ ಮಾಧ್ಯಮದಲ್ಲಿ ಪತ್ರವನ್ನು ಹಂಚಿಕೊಂಡ ಶಾಸಕರು, ಈ ಹಬ್ಬದ ಸಂದರ್ಭದಲ್ಲಿ ತಮಗೆ ದೊರೆತ ಅತ್ಯಂತ ಅಮೂಲ್ಯವಾದ ಈದ್ ಉಡುಗೊರೆ ಇದಾಗಿದೆ ಎಂದು ಬಣ್ಣಿಸಿದ್ದಾರೆ.

ಪತ್ರದಲ್ಲಿ ಏನಿದೆ: “ದುಃಖದ ಸಾಗರದಲ್ಲಿ ಸಿಲುಕಿದ್ದ ನಮ್ಮ ಕುಟುಂಬಕ್ಕೆ ಪರಮ ಕರುಣಾಮಯಿ ದೇವರು ಪರಿಹಾರದ ರೂಪದಲ್ಲಿ ಅನೇಕ ದೋಣಿಗಳನ್ನು ಕಳುಹಿಸಿ ಕೊಟ್ಟನು. ಆ ಭರವಸೆಯ ಕೊಂಡಿಗಳಲ್ಲಿ ನೀವೂ ಒಬ್ಬರು. ಆ ದಿನದಿಂದ ನೀವು ನಮ್ಮೊಂದಿಗೆ ನಿಂತಿದ್ದೀರಿ. ಈ ಬಾಧ್ಯತೆಗಳನ್ನು ಪದಗಳಲ್ಲಿ ತೀರಿಸಲು ಸಾಧ್ಯವಿಲ್ಲ. ನಿಮಗೆ ಶುಭ ಹಾರೈಸುತ್ತೇನೆ, ಅಮ್ಮ – ಶೀಲಾ ಕೆ.ಸಿ.”

ಜುಲೈ 16, 2024 ರಂದು ಪನ್ವೇಲ್-ಕನ್ಯಾಕುಮಾರಿ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಸಂಭವಿಸಿದ ಭೂಕುಸಿತದಲ್ಲಿ 30 ವರ್ಷದ ಅರ್ಜುನ್ ಎಂಬುವರು ಲಾರಿ ಕೊಚ್ಚಿ ಹೋಗಿ ನಾಪತ್ತೆಯಾದರು. ಬೆಳಗಾವಿಯಿಂದ ಅಕೇಶಿಯಾ ಮರದ ದಿಮ್ಮಿಗಳನ್ನು ಸಾಗಿಸಿ ಎಡವನ್ನಕ್ಕೆ ಹಿಂತಿರುಗುತ್ತಿದ್ದಾಗ ವಿಪತ್ತು ಸಂಭವಿಸಿತು. ಸೆಪ್ಟೆಂಬರ್ 25 ರಂದು ಗಂಗಾವಳಿ ನದಿಯಿಂದ ಅವರ ಅವಶೇಷಗಳು ಪತ್ತೆಯಾಗುವವರೆಗೂ ಬರೋಬ್ಬರಿ 82 ದಿನಗಳ ಕಾಲ ಕುಟುಂಬವು ಅರ್ಜುನ್ ಹಿಂತಿರುಗುವುದನ್ನು ನಿರೀಕ್ಷಿಸಿದ್ದವು. ಕೊನೆಗೂ ಅದು ಕೈಗೂಡಲಿಲ್ಲ.

ಅರ್ಜುನ್, ತನ್ನ ಕುಟುಂಬಕ್ಕೆ ಉತ್ತಮ ಭವಿಷ್ಯವನ್ನು ಭದ್ರಪಡಿಸಿಕೊಳ್ಳುವ ಭರವಸೆಯೊಂದಿಗೆ ಮನೆಯಿಂದ ಹೊರಟಿದ್ದರು. ತನ್ನ ಸಹೋದರಿಯ ಮದುವೆ, ಮನೆ ಕಟ್ಟಲು ಮತ್ತು ಮಕ್ಕಳ ವಿಧ್ಯಾಭ್ಯಾಸದ ಖರ್ಚು ಸೇರಿದಂತೆ ಪ್ರಮುಖ ಕೆಲಸಗಳಿಗೆ ಹಣ ಹೊಂದಿಸಲು ಅರ್ಜುನ್ ಅವಿರತವಾಗಿ ಕೆಲಸ ಮಾಡುತ್ತಿದ್ದರು. ಆದರೆ ದುರದೃಷ್ಟವಶಾತ್ ಭೂಕುಸಿತ ಈ ಎಲ್ಲಾ ಕನಸುಗಳನ್ನು ನುಚ್ಚು ನೂರು ಮಾಡಿತು.