ಅಪ್ಪಂದಿರ ಆಡಳಿತದಲ್ಲಿ ಮಕ್ಕಳಿಗೆ ಕೋಟಿಗಟ್ಟಲೆ ಲಾಭ: ಗಡ್ಕರಿ ಇ-20 ನೀತಿ ವಿರುದ್ಧ ಕಾಂಗ್ರೆಸ್‌ ಟೀಕೆ

ದೆಹಲಿ: ಕೇಂದ್ರ ರಸ್ತೆ ಸಾರಿಗೆ ಸಚಿವ ನಿತಿನ್ ಗಡ್ಕರಿ ಅವರು ದೇಶದಲ್ಲಿ ಜಾರಿಗೆ ತಂದ ಇಥೆನಾಲ್-ಪೆಟ್ರೋಲ್ ನೀತಿಯನ್ನು ಕಾಂಗ್ರೆಸ್ ಗುರುವಾರ ತೀವ್ರವಾಗಿ ಟೀಕಿಸಿದೆ.

ಈ ನೀತಿಯನ್ನು ತಂದೆ ಗಡ್ಕರಿ ಜಾರಿಗೆ ತಂದಿದ್ದು, ಅವರ ಮಕ್ಕಳು ಈ ಮೂಲಕ ಅಪಾರ ಲಾಭ ಪಡೆಯುತ್ತಿದ್ದಾರೆ. ಈ ವಿವಾದಾತ್ಮಕ ಲಾಭದ ಬಗ್ಗೆ ಪ್ರಧಾನಿ ನರೇಂದ್ರ ಮೋದಿ ಅವರು ತನಿಖೆಗೆ ಆದೇಶ ನೀಡಬೇಕು ಎಂದು ಕಾಂಗ್ರೆಸ್ ನಾಯಕ ಪವನ್ ಖೇರಾ ಒತ್ತಾಯಿಸಿದ್ದಾರೆ.

ಪೆಟ್ರೋಲ್‌ನಲ್ಲಿ ಶೇ. 20ರಷ್ಟು ಇಥೆನಾಲ್ ಮಿಶ್ರಣ ಮಾಡುವ ರಾಷ್ಟ್ರೀಯ ನೀತಿಯನ್ನು ಕೇಂದ್ರ ಸರ್ಕಾರ ಜಾರಿಗೆ ತಂದ ನಂತರ, ಗಡ್ಕರಿ ಅವರ ಮಕ್ಕಳಾದ ನಿಖಿಲ್ ಮತ್ತು ಸಾರಂಗ್ ಈ ಯೋಜನೆಗಳನ್ನು ಕೈಗೊಂಡಿದ್ದಾರೆ ಮತ್ತು ಅವು ಗಣನೀಯ ಪ್ರಗತಿ ಸಾಧಿಸಿವೆ ಎಂದು ಅವರು ಆರೋಪಿಸಿದ್ದಾರೆ.

ಒಂದು ವರ್ಷದ ಅವಧಿಯಲ್ಲಿ, ಅವರ ಒಂದು ಕಂಪನಿಯ ಆದಾಯ 18 ಕೋಟಿಗಳಿಂದ 523 ಕೋಟಿಗಳಿಗೆ ಮತ್ತು ಇನ್ನೊಂದು ಕಂಪನಿಯ ಆದಾಯ 37 ಕೋಟಿಗಳಿಂದ 638 ಕೋಟಿಗಳಿಗೆ ಏರಿದೆ ಎಂದು ಅವರು ಟೀಕಿಸಿದ್ದಾರೆ.