ಕದನ ವಿರಾಮ ಜಾರಿಯಾದರೂ ಬದಲಾಗದ ಬದುಕು | ಕತ್ತಲೆಯಲ್ಲಿಯೇ ದಿನ ದೂಡುತ್ತಿರುವ ಗಾಜಾ ನಿವಾಸಿಗಳು

ಗಾಜಾ: ಇಸ್ರೇಲ್ ಮತ್ತು ಹಮಾಸ್ ನಡುವೆ ಕಳೆದ ತಿಂಗಳು ಕದನ ವಿರಾಮ (Ceasefire) ಜಾರಿಯಾದರೂ, ಗಾಜಾದಲ್ಲಿರುವ ಪ್ಯಾಲೆಸ್ತೀನ್ ನಿವಾಸಿಗಳ ಬದುಕಿನಲ್ಲಿ ಯಾವುದೇ ಬದಲಾವಣೆಯಾಗಿಲ್ಲ.

ವಿದ್ಯುತ್ ಪೂರೈಕೆಯನ್ನು ಪುನಃಸ್ಥಾಪಿಸದ ಕಾರಣ, 31 ವರ್ಷದ ಹನನ್ ಅಲ್-ಜೋಜೋ ಅವರು ತಮ್ಮ ಮೂವರು ಮಕ್ಕಳಿಗೆ ಫ್ಲ್ಯಾಶ್‌ಲೈಟ್ (Flashlight) ಬೆಳಕಿನಲ್ಲಿ ಆಹಾರ ನೀಡುತ್ತಿದ್ದಾರೆ. ವಿದ್ಯುತ್ ಇಲ್ಲದ ಕಾರಣ ಹಲವೆಡೆ ಫ್ಲ್ಯಾಶ್‌ಲೈಟ್‌ಗಳು ಸಹ ಕೆಲಸ ಮಾಡುತ್ತಿಲ್ಲ. “ನಾವು ಕತ್ತಲೆಯಲ್ಲಿ ದಿನ ದೂಡುತ್ತಿದ್ದೇವೆ. ಸೂರ್ಯಾಸ್ತವಾದಾಗ ಪ್ರಾರ್ಥನೆ ಮಾಡುತ್ತೇವೆ. ಫ್ಲ್ಯಾಶ್‌ಲೈಟ್‌ನಲ್ಲಿ ಬ್ಯಾಟರಿ ಇದ್ದರೆ ಅದನ್ನು ಉರಿಸುತ್ತೇವೆ, ಇಲ್ಲದಿದ್ದರೆ ಊಟ ಮಾಡದೆಯೇ ಮಲಗುತ್ತೇವೆ” ಎಂದು ಅವರು ಹೇಳಿದ್ದಾರೆ.

ಎರಡು ವರ್ಷಗಳ ಹಿಂದೆ ಯುದ್ಧ ಪ್ರಾರಂಭವಾಗಿದ್ದು, ಅಂದಿನಿಂದ ಅವರ ಕುಟುಂಬಕ್ಕೆ ವಿದ್ಯುತ್ ಸೌಲಭ್ಯವೇ ಇಲ್ಲದಂತಾಗಿದೆ. ಅವರು ಮೊದಲು ಗಾಜಾದಿಂದ ರಫಾ ನಗರಕ್ಕೆ ತಲುಪಿದ್ದರು. ಅಲ್ಲಿಯೂ ಸಹ ಅವರಿಗೆ ಮೇಣದಬತ್ತಿಗಳೇ ಆಶ್ರಯವಾಗಿತ್ತು.

“ಕೊನೆಗೂ ಒಂದು ಎಲ್‌ಇಡಿ ಬಲ್ಬ್ ಹಾಕಿಕೊಂಡೆವು. ಆದರೆ ಅದು ಒಡೆದುಹೋಯಿತು. ಹೊಸದನ್ನು ಖರೀದಿಸಲು ನಮ್ಮ ಬಳಿ ಹಣವಿಲ್ಲ. ಬ್ಯಾಟರಿಯನ್ನು ತರಲು ಪ್ರಯತ್ನಿಸಿದೆವು, ಆದರೆ ಅದರ ಬೆಲೆ ಹೆಚ್ಚಾಗಿದೆ ಮತ್ತು ಅದು ಲಭ್ಯವಿಲ್ಲ,” ಎಂದು ಅಲ್-ಜೋಜೋ ಹೇಳಿದ್ದಾರೆ.

ಯುದ್ಧ ಪ್ರಾರಂಭವಾಗುವ ಮೊದಲು, ಗಾಜಾ ನಿವಾಸಿಗಳು ಮುಖ್ಯವಾಗಿ ಇಸ್ರೇಲ್‌ನಿಂದ ಆಮದು ಮಾಡಿಕೊಂಡ ವಿದ್ಯುತ್ ಮೇಲೆ ಅವಲಂಬಿತರಾಗಿದ್ದರು. ಆದರೆ ಯುದ್ಧದ ಸಮಯದಲ್ಲಿ ಅದರ ಪೂರೈಕೆ ಸರಿಯಾಗಿ ನಡೆಯಲಿಲ್ಲ.

ಗಾಜಾಕ್ಕೆ ಇಸ್ರೇಲ್‌ನಿಂದ 120 ಮೆಗಾವ್ಯಾಟ್ ವಿದ್ಯುತ್ ಪೂರೈಕೆಯಾಗುತ್ತಿತ್ತು. ಗಾಜಾದಲ್ಲಿರುವ ಏಕೈಕ ವಿದ್ಯುತ್ ಸ್ಥಾವರದಲ್ಲಿ 60 ಮೆಗಾವ್ಯಾಟ್ ಉತ್ಪಾದನೆಯಾಗುತ್ತಿತ್ತು. ಆದರೆ ಯುದ್ಧ ಪ್ರಾರಂಭವಾದ ಕೆಲವೇ ದಿನಗಳಲ್ಲಿ ವಿದ್ಯುತ್ ಸ್ಥಾವರಕ್ಕೆ ಇಂಧನದ ಕೊರತೆ ಎದುರಾಯಿತು.

ಸೆಂಟ್ರಲ್ ಗಾಜಾದಲ್ಲಿ ಆಶ್ರಯ ಪಡೆದಿರುವ ಜನರು ಪ್ರಸ್ತುತ ಸೂರ್ಯಾಸ್ತಮಯದ ಮೊದಲೇ ತಮ್ಮ ಎಲ್ಲಾ ಕೆಲಸಗಳನ್ನು ಮುಗಿಸಿಕೊಳ್ಳುತ್ತಿದ್ದಾರೆ. ಕೆಲವರು ಸೌರ ವಿದ್ಯುತ್ ಮೂಲಕ ವ್ಯಾಪಾರಗಳನ್ನು ನಡೆಸುತ್ತಿದ್ದಾರೆ.

ಹಮಾಸ್‌ನ ಮೇಲಿನ ಸೇಡಿನ ಕಾರಣದಿಂದ ಗಾಜಾಕ್ಕೆ ವಿದ್ಯುತ್ ಪೂರೈಕೆಯನ್ನು ನಿಲ್ಲಿಸುವಂತೆ ಇಸ್ರೇಲ್ ಸಚಿವ ಎಲಿ ಕೊಹೆನ್ ಮಾರ್ಚ್‌ನಲ್ಲಿ ಆದೇಶ ಹೊರಡಿಸಿದ್ದರು. ಕದನ ವಿರಾಮ ಪ್ರಾರಂಭವಾದ ನಂತರವೂ, ಅಧಿಕಾರಿಗಳು ಮತ್ತು ಸಿಬ್ಬಂದಿ ಅವಶೇಷಗಳನ್ನು ತೆಗೆದುಹಾಕಲು ಅವಿರತವಾಗಿ ಶ್ರಮಿಸಬೇಕಾಗಿದೆ. ಇದರಿಂದಾಗಿ ವಿದ್ಯುತ್ ಪೂರೈಕೆಯನ್ನು ಪುನಃಸ್ಥಾಪಿಸಲು ಸಾಧ್ಯವಾಗುತ್ತಿಲ್ಲ.