ಡಿಸೆಂಬರ್ 2025: ತೆರಿಗೆದಾರರು ಮತ್ತು ಸಾರ್ವಜನಿಕರಿಗೆ 5 ಅತ್ಯಂತ ಪ್ರಮುಖ ಗಡುವುಗಳು

ಬೆಂಗಳೂರು: 2025ರ ಕೊನೆಯ ತಿಂಗಳಾದ ಡಿಸೆಂಬರ್‌ನಲ್ಲಿ ತೆರಿಗೆ, ಆಧಾರ್–ಪ್ಯಾನ್ ಲಿಂಕ್, ಪಡಿತರ ಚೀಟಿ ಇ-ಕೆವೈಸಿ ಹಾಗೂ ವಸತಿ ಯೋಜನೆಗೆ ಸಂಬಂಧಿಸಿದಂತೆ ಹಲವು ಪ್ರಮುಖ ಗಡುವುಗಳು ಸಮೀಪಿಸುತ್ತಿವೆ. ಇವುಗಳನ್ನು ನಿರ್ಲಕ್ಷಿಸಿದರೆ ಮುಂದಿನ ದಿನಗಳಲ್ಲಿ ಹಣಕಾಸು ಮತ್ತು ಸರ್ಕಾರಿ ಸೇವೆಗಳಲ್ಲಿಯೂ ತೊಂದರೆ ಎದುರಾಗುವ ಸಾಧ್ಯತೆ ಇದೆ.

ಇಲ್ಲಿದೆ ಡಿಸೆಂಬರ್ 2025ಕ್ಕೆ ಸಂಬಂಧಿಸಿದ 5 ಪ್ರಮುಖ ಗಡುವುಗಳು ಹಾಗೂ ಬದಲಾವಣೆಗಳ ವಿವರ:

1. ತೆರಿಗೆ ಲೆಕ್ಕಪರಿಶೋಧನೆಯೊಂದಿಗೆ ಐಟಿಆರ್ ಸಲ್ಲಿಕೆ ಗಡುವು ವಿಸ್ತರಣೆ
ನೇರ ತೆರಿಗೆಗಳ ಕೇಂದ್ರ ಮಂಡಳಿ (CBDT) ತೆರಿಗೆ ಲೆಕ್ಕಪರಿಶೋಧನೆಗೆ ಒಳಪಡುವ ತೆರಿಗೆದಾರರಿಗೆ ಐಟಿಆರ್ ಸಲ್ಲಿಕೆ ಗಡುವನ್ನು ಅಕ್ಟೋಬರ್ 31, 2025ರಿಂದ ಡಿಸೆಂಬರ್ 10, 2025ರವರೆಗೆ ವಿಸ್ತರಿಸಿದೆ.
ಆಡಿಟ್ ವರದಿ, ಹಣಕಾಸು ಹೇಳಿಕೆಗಳು ಹಾಗೂ ಇತರ ದಾಖಲೆಗಳನ್ನು ಸಲ್ಲಿಸಬೇಕಿರುವವರಿಗೆ ಇದು ಮಹತ್ವದ ರಿಲೀಫ್ ಆಗಿದೆ.

2. ಆಧಾರ್–ಪ್ಯಾನ್ ಲಿಂಕ್ ಮಾಡಲು ಕೊನೆಯ ದಿನ: ಡಿಸೆಂಬರ್ 31, 2025
ಅಕ್ಟೋಬರ್ 1, 2024ರಂದು ಅಥವಾ ಅದಕ್ಕೂ ಮೊದಲು ಆಧಾರ್ ಪಡೆದವರು, ತಮ್ಮ ಪ್ಯಾನ್ ಕಾರ್ಡ್ ಅನ್ನು ಡಿಸೆಂಬರ್ 31, 2025ರೊಳಗೆ ಲಿಂಕ್ ಮಾಡಬೇಕು.

ಗಡುವು ತಪ್ಪಿದರೆ:
ಪ್ಯಾನ್ ಕಾರ್ಡ್ ನಿಷ್ಕ್ರಿಯಗೊಳ್ಳಲಿದೆ
ಬ್ಯಾಂಕಿಂಗ್ ಸೇವೆಗಳಿಗೆ ಅಡ್ಡಿ
ಹೂಡಿಕೆ ಮತ್ತು ಹಣಕಾಸು ವಹಿವಾಟುಗಳಿಗೆ ತಡೆ
ಐಟಿಆರ್ ಸಲ್ಲಿಕೆಯಲ್ಲಿ ಸಮಸ್ಯೆ

3. ತಡವಾಗಿ ಹಾಗೂ ಪರಿಷ್ಕೃತ ಐಟಿಆರ್ ಸಲ್ಲಿಸಲು ಕೊನೆಯ ಅವಕಾಶ
ತಡವಾದ ಐಟಿಆರ್:
ಮೂಲ ಗಡುವು ತಪ್ಪಿಸಿದವರು ಡಿಸೆಂಬರ್ 31, 2025ರೊಳಗೆ ತಡವಾಗಿ ರಿಟರ್ನ್ ಸಲ್ಲಿಸಬಹುದು.
ದಂಡ: ಗರಿಷ್ಠ ₹5,000
₹5 ಲಕ್ಷಕ್ಕಿಂತ ಕಡಿಮೆ ಆದಾಯ ಇದ್ದರೆ: ₹1,000
ಬಾಕಿ ತೆರಿಗೆಯ ಮೇಲೆ ಬಡ್ಡಿ ಅನ್ವಯಿಸುತ್ತದೆ

ಪರಿಷ್ಕೃತ ಐಟಿಆರ್:
ಈ ಹಿಂದೆ ಸಲ್ಲಿಸಿದ ರಿಟರ್ನ್‌ನಲ್ಲಿ ದೋಷಗಳಿದ್ದರೆ, ಅವುಗಳನ್ನು ಸರಿಪಡಿಸಲು ಡಿಸೆಂಬರ್ 31, 2025 ಕೊನೆಯ ದಿನ.
ಈ ದಿನಾಂಕದ ಬಳಿಕ ಕೇವಲ ನವೀಕರಿಸಿದ ರಿಟರ್ನ್ (ITR-U) ಸಲ್ಲಿಸಬೇಕಾಗುತ್ತದೆ, ಇದಕ್ಕೆ 25%–50% ಹೆಚ್ಚುವರಿ ದಂಡ ವಿಧಿಸಲಾಗುತ್ತದೆ.
ಹೀಗಾಗಿ ಡಿಸೆಂಬರ್ 2025 ಅತ್ಯಂತ ಕಡಿಮೆ ವೆಚ್ಚದ ಮತ್ತು ಕೊನೆಯ ಅವಕಾಶವಾಗಿದೆ.

4. ಪಡಿತರ ಚೀಟಿ ಇ-ಕೆವೈಸಿ ಕಡ್ಡಾಯ
ರಾಷ್ಟ್ರೀಯ ಆಹಾರ ಭದ್ರತಾ ಕಾಯ್ದೆಯಡಿ ಪಡಿತರ ಪಡೆಯುವವರಿಗೆ ಇ-ಕೆವೈಸಿ ಕಡ್ಡಾಯ ಮಾಡಲಾಗಿದೆ.
ಉತ್ತರ ಪ್ರದೇಶ, ಬಿಹಾರ, ರಾಜಸ್ಥಾನ, ಗುಜರಾತ್ ಸೇರಿದಂತೆ ಹಲವು ರಾಜ್ಯಗಳಲ್ಲಿ ಡಿಸೆಂಬರ್ 31 ಕೊನೆಯ ಗಡುವು ನಿಗದಿಯಾಗಿದೆ.

ಗಡುವು ತಪ್ಪಿದರೆ:
ಜನವರಿ 2026ರಿಂದ ಉಚಿತ ಪಡಿತರ ನಿಲ್ಲುವ ಸಾಧ್ಯತೆ
ಫಲಾನುಭವಿಗಳ ಪಟ್ಟಿಯಿಂದ ಹೆಸರು ಕೈಬಿಡುವ ಅಪಾಯ

5. ಪ್ರಧಾನ ಮಂತ್ರಿ ಆವಾಸ್ ಯೋಜನೆಗೆ ಅರ್ಜಿ ಸಲ್ಲಿಸಲು ಡಿಸೆಂಬರ್ 31 ಕೊನೆಯ ದಿನ
ಸ್ವಂತ ಮನೆ ನಿರ್ಮಾಣ ಕನಸು ಕಂಡವರಿಗೆ ಮಹತ್ವದ ಮಾಹಿತಿ.
ಪ್ರಧಾನ ಮಂತ್ರಿ ಆವಾಸ್ ಯೋಜನೆ (ನಗರ ಮತ್ತು ಗ್ರಾಮೀಣ) ಅಡಿಯಲ್ಲಿ ಮನೆ ನಿರ್ಮಾಣಕ್ಕೆ ₹2.5 ಲಕ್ಷವರೆಗೆ ಸಹಾಯ ಪಡೆಯಲು ಅರ್ಜಿ ಸಲ್ಲಿಸುವ ಗಡುವನ್ನು ಡಿಸೆಂಬರ್ 31, 2025ರವರೆಗೆ ವಿಸ್ತರಿಸಲಾಗಿದೆ.

ಅರ್ಜಿ ಸಲ್ಲಿಸಲು ಅಗತ್ಯ ದಾಖಲೆಗಳು:
ಆದಾಯ ಪುರಾವೆ
ಆಧಾರ್ ಕಾರ್ಡ್
ನಿವಾಸ ಪುರಾವೆ
ಅರ್ಹ ಅಭ್ಯರ್ಥಿಗಳು ಅಧಿಕೃತ ಆನ್ಲೈನ್ ಪೋರ್ಟಲ್ ಮೂಲಕ ಅರ್ಜಿ ಸಲ್ಲಿಸಬಹುದು.