ಸಾರ್ವಜನಿಕ ಸುವ್ಯವಸ್ಥೆಗೆ ಭಂಗ | ಸಾವಿರಾರು ಪೋಸ್ಟ್‌ಗಳನ್ನು ತೆಗೆದುಹಾಕುವಂತೆ X ವೇದಿಕೆಗೆ ನೋಟಿಸ್‌ ಕಳುಹಿಸಿದ ಗೃಹ ಸಚಿವಾಲಯ

ಕೇಂದ್ರ ಗೃಹ ಸಚಿವಾಲಯವು ಮಾರ್ಚ್ 2024 ರಿಂದ ಈವರೆಗೆ ‘ಎಕ್ಸ್’ (ಟ್ವಿಟ್ಟರ್) ಸಂಸ್ಥೆಗೆ ಕನಿಷ್ಠ 91 ಟೇಕ್‌ಡೌನ್ ನೋಟಿಸ್‌ಗಳನ್ನು ನೀಡಿದ್ದು, ವಿವಿಧ ಕಾನೂನುಗಳ ಉಲ್ಲಂಘನೆಯ ಆಧಾರದ ಮೇಲೆ 1,100 ಕ್ಕೂ ಹೆಚ್ಚು ಯುಆರ್‌ಎಲ್‌ಗಳ (URL) ಮೇಲೆ ಕ್ರಮ ಕೈಗೊಳ್ಳುವಂತೆ ಸೂಚಿಸಿದೆ.

‘ದ ಇಂಡಿಯನ್ ಎಕ್ಸ್‌ಪ್ರೆಸ್’ ವರದಿಯ ಪ್ರಕಾರ, ಈ ನೋಟಿಸ್‌ಗಳನ್ನು ಐಟಿ ಕಾಯ್ದೆಯ ಸೆಕ್ಷನ್ 79(3)(b) ಅಡಿಯಲ್ಲಿ ಇಂಡಿಯನ್ ಸೈಬರ್ ಕ್ರೈಮ್ ಕೋಆರ್ಡಿನೇಷನ್ ಸೆಂಟರ್ (I4C) ಮೂಲಕ ಜಾರಿಗೊಳಿಸಲಾಗಿದೆ.

ಒಟ್ಟು 91 ನೋಟಿಸ್‌ಗಳಲ್ಲಿ 58 ನೋಟಿಸ್‌ಗಳನ್ನು 2024ರಲ್ಲಿ ನೀಡಲಾಗಿದ್ದು, ಇವುಗಳಲ್ಲಿ 24 ನೋಟಿಸ್‌ಗಳು ‘ಸಾರ್ವಜನಿಕ ಶಾಂತಿ ಭಂಗ ಮತ್ತು ದ್ವೇಷ ಹರಡುವಿಕೆ’ಗೆ ಸಂಬಂಧಿಸಿವೆ. ಕೇವಲ 14 ನೋಟಿಸ್‌ಗಳು ಮಾತ್ರ ಬೆಟ್ಟಿಂಗ್ ಆ್ಯಪ್‌ಗಳ ಪ್ರಚಾರ, ಸರ್ಕಾರಿ ಖಾತೆಗಳ ನಕಲು ಮತ್ತು ಮಕ್ಕಳ ಲೈಂಗಿಕ ಶೋಷಣೆಯಂತಹ ನೇರ ಅಪರಾಧ ಚಟುವಟಿಕೆಗಳಿಗೆ ಸಂಬಂಧಿಸಿವೆ.

ಒಟ್ಟು ಗುರುತಿಸಲಾದ ಲಿಂಕ್‌ಗಳಲ್ಲಿ ಅರ್ಧಕ್ಕಿಂತ ಹೆಚ್ಚು (566) ಯುಆರ್‌ಎಲ್‌ಗಳನ್ನು ‘ಸಾರ್ವಜನಿಕ ಸುವ್ಯವಸ್ಥೆ ಭಂಗ’ದ ಕಾರಣಕ್ಕಾಗಿ ತೆಗೆದುಹಾಕಲು ಸೂಚಿಸಲಾಗಿದೆ. ವಿಶೇಷವಾಗಿ 2024ರ ಲೋಕಸಭಾ ಚುನಾವಣೆಯ ಅವಧಿಯಲ್ಲೇ 761 ಯುಆರ್‌ಎಲ್‌ಗಳನ್ನು ಗುರಿಯಾಗಿಸಲಾಗಿತ್ತು.

ಈ ವಿಷಯವು ಈಗ ಕಾನೂನು ಹೋರಾಟಕ್ಕೆ ತಿರುಗಿದೆ. ಕೇಂದ್ರ ಸರ್ಕಾರವು ದೆಹಲಿ ಹೈಕೋರ್ಟ್‌ಗೆ ಸಲ್ಲಿಸಿದ ಅಫಿಡವಿಟ್‌ನಲ್ಲಿ, ಎಕ್ಸ್ ಸಂಸ್ಥೆಯು ಅಕ್ರಮ ವಿಷಯಗಳನ್ನು ತೆಗೆದುಹಾಕುವ ಆದೇಶಗಳ ವಿರುದ್ಧ ಸತತವಾಗಿ ಆಕ್ಷೇಪ ವ್ಯಕ್ತಪಡಿಸುತ್ತಿದೆ ಎಂದು ದೂರಿದೆ. ಇನ್ನೊಂದೆಡೆ, ಎಕ್ಸ್ ಸಂಸ್ಥೆಯು ಕೇರಳ ಹೈಕೋರ್ಟ್‌ನಲ್ಲಿ ಸರ್ಕಾರದ ‘ಸಹಯೋಗ್ ಪೋರ್ಟಲ್’ನ ಸಿಂಧುತ್ವವನ್ನು ಪ್ರಶ್ನಿಸಿದೆ.

ಸರ್ಕಾರದ ಇಂತಹ ಆದೇಶಗಳು ಐಟಿ ಕಾಯ್ದೆಯ ಸೆಕ್ಷನ್ 69A ಅಡಿಯಲ್ಲಿ ಮಾತ್ರ ಬರಬೇಕು ಎಂಬುದು ಎಕ್ಸ್ ಸಂಸ್ಥೆಯ ವಾದವಾಗಿದೆ. ಸೆಕ್ಷನ್ 79(3)(b) ಅಡಿಯಲ್ಲಿ ನೋಟಿಸ್ ನೀಡುವುದು ಸರಿಯಾದ ಪ್ರಕ್ರಿಯೆಯನ್ನು ಪಾಲಿಸದೆ ವಿಷಯಗಳನ್ನು ನಿರ್ಬಂಧಿಸುವ ವ್ಯಾಪ್ತಿಯನ್ನು ಹೆಚ್ಚಿಸುತ್ತದೆ ಎಂದು ಸಂಸ್ಥೆ ವಾದಿಸುತ್ತಿದೆ.

ಮಾರ್ಚ್ 2024 ರಿಂದ ಜೂನ್ 2025 ರ ನಡುವೆ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ಎಕ್ಸ್ ಸಂಸ್ಥೆಗೆ ಸುಮಾರು 1,400 ಪೋಸ್ಟ್ ಅಥವಾ ಖಾತೆಗಳನ್ನು ತೆಗೆದುಹಾಕಲು ಆದೇಶ ನೀಡಿವೆ ಎಂಬುದು ಇಲ್ಲಿ ಗಮನಾರ್ಹವಾಗಿದೆ.