ಗುಜರಾತ್‌ನ ನವಸಾರಿಯಲ್ಲಿ ಲಘು ಭೂಕಂಪ

ಅಹಮದಾಬಾದ್: ದಕ್ಷಿಣ ಗುಜರಾತ್‌ನ ನವಸಾರಿ ಜಿಲ್ಲೆಯಲ್ಲಿ ಗುರುವಾರ ಮುಂಜಾನೆ ಲಘು ಭೂಕಂಪ ಸಂಭವಿಸಿದೆ. ರಿಕ್ಟರ್ ಮಾಪಕದಲ್ಲಿ ಇದರ ತೀವ್ರತೆ 3.4 ರಷ್ಟು ದಾಖಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಸ್ಥಳೀಯ ಮಾಹಿತಿಯ ಪ್ರಕಾರ, ಗುರುವಾರ ಮುಂಜಾನೆ 5:27 ಗಂಟೆಗೆ ವಾನ್ಸ್‌ಡಾದ ಪೂರ್ವ-ಆಗ್ನೇಯ ದಿಕ್ಕಿನಲ್ಲಿ 22 ಕಿಲೋಮೀಟರ್ ದೂರದಲ್ಲಿ ಭೂಮಿ ಕಂಪಿಸಿದೆ. ಈ ಘಟನೆಯಲ್ಲಿ ಇದುವರೆಗೆ ಯಾವುದೇ ಆಸ್ತಿ ಪಾಸ್ತಿ ಹಾನಿ ಅಥವಾ ಪ್ರಾಣಾಪಾಯ ಸಂಭವಿಸಿಲ್ಲ ಎಂದು ಜಿಲ್ಲಾಡಳಿತ ದೃಢಪಡಿಸಿದೆ.

ಗುಜರಾತ್ ರಾಜ್ಯವು ಭೌಗೋಳಿಕವಾಗಿ ಭೂಕಂಪ ಸಂಭವಿಸುವ ಹೆಚ್ಚಿನ ಸಾಧ್ಯತೆ ಇರುವ ವಲಯದಲ್ಲಿದೆ (Seismic Zone). ಗುಜರಾತ್ ರಾಜ್ಯ ವಿಪತ್ತು ನಿರ್ವಹಣಾ ಪ್ರಾಧಿಕಾರದ (GSDMA) ಅಂಕಿಅಂಶಗಳ ಪ್ರಕಾರ, ಕಳೆದ 200 ವರ್ಷಗಳಲ್ಲಿ ಈ ರಾಜ್ಯದಲ್ಲಿ 9 ಪ್ರಮುಖ ಭೂಕಂಪಗಳು ಸಂಭವಿಸಿವೆ. ಅದರಲ್ಲಿ ಅತ್ಯಂತ ಭೀಕರವಾದುದು 2001ರ ಜನವರಿ 26ರಂದು ಕಚ್ ಜಿಲ್ಲೆಯ ಭಾಚೌನಲ್ಲಿ ಸಂಭವಿಸಿದ ಭೂಕಂಪ. 6.9 ತೀವ್ರತೆಯ ಆ ಭೂಕಂಪದಿಂದಾಗಿ ಸುಮಾರು 13,800 ಜನರು ಸಾವಿಗೀಡಾಗಿದ್ದರು ಮತ್ತು 1.67 ಲಕ್ಷ ಜನರು ಗಾಯಗೊಂಡಿದ್ದರು.