ನಕಲಿ ಪಿಹೆಚ್.ಡಿ ಪ್ರಮಾಣ ಪತ್ರ ಹಾಸನ ಜಿಲ್ಲೆಯ 20ಕ್ಕೂ ಹೆಚ್ಚು ಅತಿಥಿ ಉಪನ್ಯಾಸಕರ ವಿರುದ್ಧ ಕಠಿಣ ಕ್ರಮ

ಹಾಸನ : ಅಮಾನ್ಯ ಪಿಹೆಚ್.ಡಿ ಪ್ರಮಾಣ ಪತ್ರ ಸಲ್ಲಿಸಿದ ಆರೋಪದ ಹಿನ್ನೆಲೆಯಲ್ಲಿ ರಾಜ್ಯ ಸರ್ಕಾರ ಅತಿಥಿ ಉಪನ್ಯಾಸಕರ ವಿರುದ್ಧ ಕಠಿಣ ಕ್ರಮ ಕೈಗೊಂಡಿದೆ.

ಕಾಲೇಜು ಶಿಕ್ಷಣ ಇಲಾಖೆಯ ಆಯುಕ್ತರು ಹೊರಡಿಸಿರುವ ಆದೇಶದಂತೆ, 2025–26ನೇ ಶೈಕ್ಷಣಿಕ ವರ್ಷದಲ್ಲಿ ನಕಲಿ ಅಥವಾ ಅಮಾನ್ಯ ಪಿಹೆಚ್.ಡಿ ಪ್ರಮಾಣ ಪತ್ರ ಸಲ್ಲಿಸಿರುವ ಅತಿಥಿ ಉಪನ್ಯಾಸಕರನ್ನು ಮುಂದಿನ ಎಲ್ಲಾ ಶೈಕ್ಷಣಿಕ ವರ್ಷಗಳ ಅತಿಥಿ ಉಪನ್ಯಾಸಕರ ಆಯ್ಕೆ ಪ್ರಕ್ರಿಯೆಯಿಂದ ಶಾಶ್ವತವಾಗಿ ಹೊರಗಿಡಲಾಗಿದೆ.

ಇದರ ಜೊತೆಗೆ, ಸರ್ಕಾರಕ್ಕೆ ಸುಳ್ಳು ದಾಖಲೆಗಳನ್ನು ನೀಡಿ ವಂಚನೆ ಎಸಗಲು ಯತ್ನಿಸಿರುವ ಆರೋಪದಡಿ ಸಂಬಂಧಪಟ್ಟ ಉಪನ್ಯಾಸಕರ ವಿರುದ್ಧ ಭಾರತ ನ್ಯಾಯ ಸಂಹಿತೆ (BNS) ಅನ್ವಯ ಕ್ರಿಮಿನಲ್ ಮೊಕದ್ದಮೆ ದಾಖಲಿಸುವಂತೆ ಪ್ರಾಂಶುಪಾಲರಿಗೆ ಸೂಚಿಸಲಾಗಿದೆ.

ಪ್ರಕರಣ ದಾಖಲಿಸಿದ ಬಳಿಕ ಒಂದು ವಾರದೊಳಗೆ ವರದಿಯನ್ನು ಕಾಲೇಜು ಶಿಕ್ಷಣ ಇಲಾಖೆಗೆ ಸಲ್ಲಿಸುವಂತೆ ಹಾಗೂ ಇಲಾಖೆಯ EMIS ಪೋರ್ಟಲ್‌ನಲ್ಲಿ ಅಪ್‌ಲೋಡ್ ಮಾಡುವಂತೆ ಆದೇಶಿಸಲಾಗಿದೆ.

ಹಾಸನ ಜಿಲ್ಲೆಯ ಹಲವು ಕಾಲೇಜುಗಳ ಉಪನ್ಯಾಸಕರ ಹೆಸರು ಪಟ್ಟಿಯಲ್ಲಿ
ಸರ್ಕಾರದ ಆದೇಶದ ಅನುಬಂಧಗಳಲ್ಲಿ ಹಾಸನ ಜಿಲ್ಲೆಯ ವಿವಿಧ ಸರ್ಕಾರಿ ಕಾಲೇಜುಗಳ ಅತಿಥಿ ಉಪನ್ಯಾಸಕರ ಹೆಸರೂ ಸೇರಿದೆ.

ಹಾಸನ ಮಹಿಳಾ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜುಯ ಜೀವನ್ ಕುಮಾರ್ ಸಿ.ಎಂ., ಡಾ. ರೋಹಿ ತಾಜ್, ಶೃತಿ ಎ.ವಿ., ದರ್ಶನ್ ವೈ., ಡಾ. ಧರಣೇಂದ್ರ ಕುಮಾರ್, ಡಾ. ಭರತ್ ಜಿ.ಜಿ., ಡಾ. ಅಂಜುಮ್ ಅರಾ ಆರ್., ಮೊಹಮ್ಮದ್ ಪಾಷಾ ಹಾಗೂ ವಾಸು ಡಿ.ಆರ್. ಅವರ ಹೆಸರುಗಳು ಪಟ್ಟಿಯಲ್ಲಿವೆ.

ಹಾಸನ ಸರ್ಕಾರಿ ಸೈನ್ಸ್ ಕಾಲೇಜುದ ಓಂಕಾರ ಮೂರ್ತಿ, ಡಾ. ಚೂಡಾಮಣಿ ಟಿ., ಹೇಮಾವತಿ ಹಾಗೂ ಪವಿತ್ರ ಎಂ.ಜೆ. ಅವರ ಹೆಸರುಗಳೂ ಸೇರಿವೆ.
ಹಾಸನ ಸರ್ಕಾರಿ ಕಲಾ ಕಾಲೇಜುದ ಮಾಲತಿ ಬಿ.ಆರ್., ಮಾನಸ ಎ.ಎಂ. ಹಾಗೂ ಡಾ. ಮೇಘ ಅವರ ಹೆಸರುಗಳೂ ಆದೇಶದಲ್ಲಿವೆ.

ಇದಲ್ಲದೆ, ಹಾಸನ ಸರ್ಕಾರಿ ಸೈನ್ಸ್ ಕಾಲೇಜುದ ಚಂದ್ರಶೇಖರ್ ಎಂ.ಬಿ., ಬಾಣಾವರ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜುದ ಪ್ರದೀಪ್ ಟಿ.ಎನ್. ಮತ್ತು ಡಾ. ಉಮೇಶ್, ಹೊಳೆನರಸೀಪುರ ಮಹಿಳಾ ಪ್ರಥಮ ದರ್ಜೆ ಕಾಲೇಜುದ ಎಂ.ಆರ್. ಬಾಬು, ಗಂಧದಕೋಟೆ ಸರ್ಕಾರಿ ಮಹಿಳಾ ಪ್ರಥಮ ದರ್ಜೆ ಕಾಲೇಜುದ ಡಾ. ಇಂದಿರಾ ಮಣಿ ಹಾಗೂ ಡಾ. ಮಂಜುನಾಥ ಎ.ಕೆ. ಅವರ ಹೆಸರೂ ಪಟ್ಟಿಯಲ್ಲಿದೆ.

ಕಾಲೇಜು ಮಟ್ಟದ ಸಮಿತಿಗಳು, ಕೇಂದ್ರ ಕಚೇರಿಯ ಪರಿಶೀಲನಾ ಸಮಿತಿಯ ವರದಿ ಹಾಗೂ ವಿಶ್ವವಿದ್ಯಾಲಯಗಳಿಂದ ಪಡೆದ ದಾಖಲೆಗಳ ನೈಜತೆ ಪರಿಶೀಲನೆಯ ಆಧಾರದ ಮೇಲೆ ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಕಾಲೇಜು ಶಿಕ್ಷಣ ಇಲಾಖೆ ಸ್ಪಷ್ಟಪಡಿಸಿದೆ.

ಬಾಕ್ಸ್:
ಮೇಲಿನ ಹೆಸರುಗಳು ಕರ್ನಾಟಕ ಸರ್ಕಾರದ ಕಾಲೇಜು ಶಿಕ್ಷಣ ಇಲಾಖೆಯ ಆದೇಶದ ಅನುಬಂಧದಲ್ಲಿ ಉಲ್ಲೇಖವಾಗಿರುವ ಪಟ್ಟಿಯನ್ನು ಆಧರಿಸಿವೆ. ಈ ಆದೇಶದ ವಿರುದ್ಧ ಸಂಬಂಧಪಟ್ಟವರು ಕಾನೂನುಬದ್ಧ ಮೇಲ್ಮನವಿ ಅಥವಾ ನ್ಯಾಯಾಂಗ ಪರಿಹಾರವನ್ನು ಪಡೆಯುವ ಹಕ್ಕು ಹೊಂದಿರುತ್ತಾರೆ.