ಕೇರಳದಲ್ಲಿ ಭೀಕರ ರಸ್ತೆ ಅಪಘಾತ: ಐವರು ಪ್ರಯಾಣಿಕರ ಸಾವು

ಕೇರಳದ ಮಲಪ್ಪುರಂನಲ್ಲಿ ಭೀಕರ ರಸ್ತೆ ಅಪಘಾತ ಸಂಭವಿಸಿದೆ. ಕರ್ನಾಟಕದ ಶಬರಿಮಲೆ ಯಾತ್ರಾರ್ಥಿಗಳನ್ನು ಕರೆದೊಯ್ಯುತ್ತಿದ್ದ ಬಸ್ ಮತ್ತು ಆಟೋ ಡಿಕ್ಕಿ ಹೊಡೆದಿದೆ. ಅಪಘಾತದಲ್ಲಿ ಆಟೋ ಚಾಲಕ ಸೇರಿ ಐವರು ಸಾವನ್ನಪ್ಪಿದ್ದಾರೆ.

ಆಟೋ ಚಾಲಕನ ಜೊತೆಗೆ ಇಬ್ಬರು ಮಹಿಳೆಯರು ಮತ್ತು ಇಬ್ಬರು ಮಕ್ಕಳು ಸಹ ಸಾವನ್ನಪ್ಪಿದ್ದಾರೆ. ಇವರೆಲ್ಲರೂ ಆಟೋದಲ್ಲಿ ಪ್ರಯಾಣಿಸುತ್ತಿದ್ದರು. ಅಪಘಾತದಲ್ಲಿ ಕೆಲವರಿಗೆ ಗಾಯಗಳಾಗಿದ್ದು, ಆಸ್ಪತ್ರೆಗೆ ದಾಖಲಿಸಲಾಗಿದೆ. ಸದ್ಯ ಅವರು ಅಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಈ ಅಪಘಾತದ ನಂತರ ದುರಂತದ ದೃಶ್ಯ ಕಂಡುಬಂದಿದೆ. ದೊಡ್ಡ ಜನಸಮೂಹ ನೆರೆದಿತ್ತು. ಶುಕ್ರವಾರ ಸಂಜೆ 6 ಗಂಟೆ ಸುಮಾರಿಗೆ ಅಪಘಾತ ಸಂಭವಿಸಿದೆ ಎಂದು ವರದಿಯಾಗಿದೆ. ಆದರೆ, ಅಪಘಾತಕ್ಕೆ ಬಸ್ ಅಥವಾ ಆಟೋ ಚಾಲಕ ಕಾರಣವೇ ಅಥವಾ ಇನ್ನಾವುದೇ ಕಾರಣದಿಂದ ಅಪಘಾತ ಸಂಭವಿಸಿದೆಯೇ ಎಂಬುದು ಇನ್ನೂ ತಿಳಿದುಬಂದಿಲ್ಲ. ಸಾರಿಗೆ ಇಲಾಖೆಯ ಸಹಾಯದಿಂದ ಪೊಲೀಸರು ಅಪಘಾತದ ತನಿಖೆ ನಡೆಸಲಿದ್ದಾರೆ ಎಂದು ಮಲಪ್ಪುರಂ ಜಿಲ್ಲಾ ಪೊಲೀಸ್ ಮುಖ್ಯಸ್ಥ ಶಶಿಧರನ್ ಎಸ್ ತಿಳಿಸಿದ್ದಾರೆ.

ಆಟೋಡ್ರೈವರ್ ತಾಣಿಪರ ಪುತ್ತುಪರಂಬಂ ಅಬ್ದುಲ್ ಮಜೀದ್ (50), ಕರುವಾರಕುಂದ ವಳಯೂರಿನ ಪತ್ನಿ ತಸ್ನೀಮಾ (33), ಮಕ್ಕಳಾದ ರಿಂಷಾ ಫಾತಿಮಾ (12), ರೈಹಾ ಫಾತಿಮಾ (4), ತಸ್ನೀಮಾ ಅವರ ಸಹೋದರಿ, ಕುಟ್ಟಿಪರ ಹಮೀದ್ ಅವರ ಪತ್ನಿ ಮುಹ್ಸಿನಾ (35) ಮೃತರು. ಗಾಯಗೊಂಡ ಐವರ ಪೈಕಿ ತಸ್ನೀಮಾ ಅವರ ಮಗ ಮೊಹಮ್ಮದ್ ರೇಯಾನ್ ಸ್ಥಿತಿ ಗಂಭೀರವಾಗಿದೆ. ತಸ್ನೀಮಾ ಅವರ ತಾಯಿ ಸಾಬಿರಾ (58) ಮತ್ತು ಮುಹ್ಸಿನಾ ಅವರ ಮಕ್ಕಳು ಫಾತಿಮಾ ಹಸನ್, ಮಹಮ್ಮದ್ ಹಸನ್ ಮತ್ತು ಮುಹಮ್ಮದ್ ಮಿಶಾದ್ ಅವರು ಮಂಚಿರಿ ಮತ್ತು ಕೋಝಿಕ್ಕೋಡ್ ವೈದ್ಯಕೀಯ ಕಾಲೇಜು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಬಸ್ಸಿನಲ್ಲಿ 22 ಮಂದಿ ಪ್ರಯಾಣಿಕರಿದ್ದು, ಯಾರಿಗೂ ಗಾಯಗಳಾಗಿಲ್ಲ. ಬಸ್ಸಿನ ಮುಂಭಾಗಕ್ಕೆ ಹಾನಿಯಾಗಿದೆ.