ಲೈಂಗಿಕ ದೌರ್ಜನ್ಯಕ್ಕೆ ಒಳಗಾಗಿ ಗರ್ಭಿಣಿಯಾದ ಮಹಿಳೆಯ ಗರ್ಭಪಾತಕ್ಕೆ ಸುಪ್ರೀಂ ಕೋರ್ಟ್‌ ಅನುಮತಿ

ಹೊಸದಿಲ್ಲಿ: ವಿವಾಹಪೂರ್ವ ಗರ್ಭಧಾರಣೆ ಹಾನಿಕಾರ ಮತ್ತು ಒತ್ತಡಕ್ಕೆ ಕಾರಣವಾಗುತ್ತದೆ ಎಂಬ ಕಾರಣಕ್ಕೆ ಸುಪ್ರೀಂ ಕೋರ್ಟ್ ಲೈಂಗಿಕ ದೌರ್ಜನ್ಯಕ್ಕೆ ಒಳಗಾಗಿ 27 ವಾರಗಳ ಗರ್ಭಿಣಿಯಾಗಿರುವ ಸಂತ್ರಸ್ತೆಯೊಬ್ಬರಿಗೆ ವೈದ್ಯಕೀಯವಾಗಿ ಗರ್ಭಪಾತ ಮಾಡಿಕೊಳ್ಳಲು ಸೋಮವಾರ ಅನುಮತಿ ನೀಡಿದೆ.

ಸಂತ್ರಸ್ತೆಯ ವೈದ್ಯಕೀಯ ವರದಿಯನ್ನು ಪರಿಶೀಲಿಸಿ ನ್ಯಾಯಮೂರ್ತಿಗಳಾದ ಬಿ ವಿ ನಾಗರತ್ನ ಮತ್ತು ಉಜ್ಜಲ್ ಭುಯಾನ್ ಅವರ ಪೀಠವು ಗುಜರಾತ್ ಹೈಕೋರ್ಟ್ ಗೆ ಸ್ವಇಚ್ಚೆಯ ಗರ್ಭಪಾತಕ್ಕಾಗಿ ಸಲ್ಲಿಸರುವ ಮನವಿಯನ್ನು ತಿರಸ್ಕರಿಸಿರುವುದು ಸರಿಯಾದ ಕ್ರಮವಲ್ಲ ಎಂದು ಹೇಳಿದೆ.

ಭಾರತದಲ್ಲಿ ವಿವಾಹ, ಗರ್ಭಧಾರಣೆಯೆಂದರೆ ದಂಪತಿಗಳಿಗೆ ಮಾತ್ರವಲ್ಲದೆ ಕುಟುಂಬ ಮತ್ತು ಸ್ನೇಹಿತರಿಗೆ ಸಂತೋಷವುಂಟು ಮಾಡುತ್ತದೆ. ಆದರೆ ವಿವಾಹಪೂರ್ವ ಗರ್ಭಧಾರಣೆ ಅಪಾಯಕಾರಿ, ಅದರಲ್ಲೂ ಲೈಂಗಿಕ ದೌರ್ಜನ್ಯ ಪ್ರಕರಣಗಳಲ್ಲಿ ಗರ್ಭಿಣಿಯರ ದೈಹಿಕ ಮತ್ತು ಮಾನಸಿಕ ಆರೋಗ್ಯದ ಮೇಲೆ ಪರಿಣಾಮ ಬೀರಿ ಒತ್ತಡ ಮತ್ತು ಆಘಾತವನ್ನುಂಟುಮಾಡುತ್ತದೆ. ಮಹಿಳೆಯ ಮೇಲಿನ ಲೈಂಗಿಕ ದೌರ್ಜನ್ಯವೇ ದುಃಖಕರ. ಗರ್ಭಾವಸ್ಥೆಯಲ್ಲಿ ನೋವು ಇನ್ನೂ ಹೆಚ್ಚಾಗುತ್ತದೆ. ಏಕೆಂದರೆ ಇದು ಸ್ವಯಂಪ್ರೇರಿತ ಗರ್ಭಧಾರಣೆಯಲ್ಲ ಎಂದು ಸುಪ್ರೀಂ ಕೋರ್ಟ್ ಹೇಳಿದೆ

“ವೈದ್ಯಕೀಯ ವರದಿಯ ದೃಷ್ಟಿಯಿಂದ ಮೇಲ್ಮನವಿದಾರರಿಗೆ ಸಂತ್ರಸ್ತೆಯ ಗರ್ಭಪಾತ ಮಾಡಲು ನಾವು ಅನುಮತಿ ನೀಡುತ್ತೇವೆ. ನಾವು ಆಕೆಯನ್ನು ನಾಳೆ ಆಸ್ಪತ್ರೆಯಲ್ಲಿ ಹಾಜರುಪಡಿಸುವಂತೆ ನಿರ್ದೇಶಿಸುತ್ತೇವೆ, ಇದರಿಂದ ಗರ್ಭಪಾತದ ಕಾರ್ಯವಿಧಾನವನ್ನು ಕೈಗೊಳ್ಳಬಹುದು, ”ಎಂದು ಪೀಠ ಹೇಳಿದೆ.

ಭ್ರೂಣವು ಜೀವಂತವಾಗಿರುವುದು ಕಂಡುಬಂದರೆ, ಭ್ರೂಣವು ಬದುಕುಳಿಯಲು ಬೇಕಾದ ಇನ್‌ಕ್ಯುಬೇಶನ್ ಸೇರಿದಂತೆ ಎಲ್ಲಾ ಅಗತ್ಯ ಸಹಾಯವನ್ನು ಆಸ್ಪತ್ರೆ ನೀಡಬೇಕು ಎಂದು ಸುಪ್ರೀಂ ಕೋರ್ಟ್ ಹೇಳಿದೆ.

ಮಗು ಬದುಕುಳಿದರೆ ಮಗುವನ್ನು ಕಾನೂನಿನ ಪ್ರಕಾರ ದತ್ತು ತೆಗೆದುಕೊಳ್ಳಲು ರಾಜ್ಯವು ಕ್ರಮಗಳನ್ನು ತೆಗೆದುಕೊಳ್ಳುತ್ತದೆ ಎಂದು ಸುಪ್ರೀಂ ಕೋರ್ಟ್ ಹೇಳಿದೆ.

ಶನಿವಾರ ಗುಜರಾತ್ ಹೈಕೋರ್ಟ್ ತನ್ನ ವೈದ್ಯಕೀಯ ರೀತಿಯ ಗರ್ಭಪಾತಕ್ಕಾಗಿ ಸಂತ್ರಸ್ತೆ ಸಲ್ಲಿಸಿರುವ ಮನವಿಯನ್ನು ಮುಂದೂಡುವುದರ ಬಗ್ಗೆ ಅಸಮಾಧಾನವನ್ನು ವ್ಯಕ್ತಪಡಿಸಿರುವ ಸರ್ವೋಚ್ಚ ನ್ಯಾಯಾಲಯ ಈಗಾಗಲೇ “ಅಮೂಲ್ಯವಾದ ಸಮಯ” ಕಳೆದುಹೋಗಿದೆ ಎಂದು ಹೇಳಿದೆ.

ಮೆಡಿಕಲ್ ಟರ್ಮಿನೇಷನ್ ಆಫ್ ಪ್ರೆಗ್ನೆನ್ಸಿ (MTP) ಕಾಯಿದೆಯಡಿಯಲ್ಲಿ, ವಿವಾಹಿತ ಮಹಿಳೆಯರಿಗೆ, ಅತ್ಯಾಚಾರದಿಂದ ಬದುಕುಳಿದವರು ಮತ್ತು ವಿಕಲಚೇತನರು ಮತ್ತು ಅಪ್ರಾಪ್ತ ವಯಸ್ಕರು ಸೇರಿದಂತೆ ಇತರ ದುರ್ಬಲ ಮಹಿಳೆಯರು ಸೇರಿದಂತೆ ವಿಶೇಷ ವರ್ಗಗಳಿಗೆ ಗರ್ಭಧಾರಣೆಯ ಮುಕ್ತಾಯದ ಗರಿಷ್ಠ ಮಿತಿ 24 ವಾರಗಳು.