ಬಿಜೆಪಿ ದೇಶದ ಅತ್ಯಂತ ಶ್ರೀಮಂತ ಪಕ್ಷ! ಇದರ ಒಟ್ಟು ಆಸ್ತಿ ಎಷ್ಟು ಗೊತ್ತಾ? – ಎಡಿಆರ್‌ ವರದಿ

ಬೆಂಗಳೂರು, ಸಪ್ಟೆಂಬರ್‌.5: ಭಾರತೀಯ ಜನತಾ ಪಕ್ಷವು (BJP) ಭಾರತದ ಅತ್ಯಂತ ಶ್ರೀಮಂತ ಪಕ್ಷವಾಗಿದ್ದು, ಎಲ್ಲಾ ರಾಷ್ಟ್ರೀಯ ಪಕ್ಷಗಳ ಒಟ್ಟು ಆಸ್ತಿಯಲ್ಲಿ ಸಿಂಹಪಾಲನ್ನು ಹೊಂದಿದೆ ಎಂಬ ವರದಿಯೊಂದು ಹೊರಬಂದಿದೆ.

ಅಸೋಸಿಯೇಶನ್ ಫಾರ್ ಡೆಮಾಕ್ರಟಿಕ್ ರಿಫಾರ್ಮ್ಸ್ (Association for Democratic Reforms – ADR) ವರದಿಯ ಪ್ರಕಾರ ಬಿಜೆಪಿಯ ಆಸ್ತಿ 2021-22 ಆರ್ಥಿಕ ವರ್ಷದಲ್ಲಿ 6,046.81 ಕೋಟಿ ರುಪಾಯಿಗಳಾಗಿದ್ದು, ಹಿಂದಿನ ವರ್ಷಕ್ಕಿಂತ 1,056.615 ಕೋಟಿ ಹೆಚ್ಚಳವಾಗಿದೆ. (2020-21 ರಲ್ಲಿ 4,990.195 ಕೋಟಿ ರುಪಾಯಿ)

ದೇಶದ ಎಲ್ಲ ರಾಷ್ಟ್ರೀಯ ರಾಜಕೀಯ ಪಕ್ಷಗಳ ಆಸ್ತಿಯಲ್ಲಿಯೇ ಬಿಜೆಪಿಯ ಪಾಲು ಶೇ.68. ಈ ವರದಿಯ ಪ್ರಕಾರ, ಬಿಜೆಪಿಯ ಅರ್ಧದಷ್ಟು ಆಸ್ತಿ ಸ್ಥಿರ ಠೇವಣಿ ರೂಪದಲ್ಲಿದೆ.

2021-22ರಲ್ಲಿ ಕಾಂಗ್ರೆಸ್‌ನ ಆಸ್ತಿ 805.68 ಕೋಟಿ ರುಪಾಯಿಗಳಾಗಿದ್ದು, ಹಿಂದಿನ ವರ್ಷಕ್ಕಿಂತ 114.57 ಕೋಟಿ ರುಪಾಯಿ ಹೆಚ್ಚಳವಾಗಿದೆ.

ಈ ವರದಿಯಲ್ಲಿ ಎಡಿಆರ್ ಬಿಜೆಪಿ, ಕಾಂಗ್ರೆಸ್, ಬಹುಜನ ಸಮಾಜ ಪಕ್ಷ, ಕಮ್ಯುನಿಸ್ಟ್ ಪಾರ್ಟಿ ಆಫ್ ಇಂಡಿಯಾ (ಮಾರ್ಕ್ಸ್‌ವಾದಿ), ನ್ಯಾಷನಲ್ ಪೀಪಲ್ಸ್ ಪಾರ್ಟಿ, ನ್ಯಾಶನಲಿಸ್ಟ್ ಕಾಂಗ್ರೆಸ್ ಪಾರ್ಟಿ, ಕಮ್ಯುನಿಸ್ಟ್ ಪಾರ್ಟಿ ಆಫ್ ಇಂಡಿಯಾ ಮತ್ತು ತೃಣಮೂಲ ಕಾಂಗ್ರೆಸ್ ಸೇರಿದಂತೆ ಎಲ್ಲಾ ಎಂಟು ರಾಷ್ಟ್ರೀಯ ಪಕ್ಷಗಳ ಆಸ್ತಿಯನ್ನು ವಿಶ್ಲೇಷಿಸಿದೆ. ಆದರೆ ಕೊನೆಯ ಮೂರು ಪಕ್ಷಗಳು ಈಗ ರಾಷ್ಟ್ರೀಯ ಪಕ್ಷಗಳಾಗಿ ಉಳಿದಿಲ್ಲ.

ಈ ವರದಿಯಲ್ಲಿ ಬಳಸಲಾದ ಡೇಟಾವನ್ನು ರಾಜಕೀಯ ಪಕ್ಷಗಳು ಆದಾಯ ತೆರಿಗೆ ಇಲಾಖೆ ಮತ್ತು ಭಾರತದ ಚುನಾವಣಾ ಆಯೋಗಕ್ಕೆ ಸಲ್ಲಿಸಿದ ಆಡಿಟ್‌ ಎಕೌಂಟ್‌ಗಳಿಂದ ಪಡೆಯಲಾಗಿದೆ ಎಂದು ಎಡಿಆರ್ ಹೇಳಿದೆ.

ಬಿಜೆಪಿಯನ್ನು ಹೊರತುಪಡಿಸಿ ಇತರೆ ರಾಷ್ಟ್ರೀಯ ಪಕ್ಷಗಳ ಆಸ್ತಿ 2,800 ಕೋಟಿ ರೂ. – ಸಿಪಿಐ(ಎಂ) 735 ಕೋಟಿ, ಬಿಎಸ್‌ಪಿ 690 ಕೋಟಿ ಮತ್ತು ತೃಣಮೂಲ ಕಾಂಗ್ರೆಸ್‌ 458 ಕೋಟಿ ರುಪಾಯಿ ಹಾಗೂ ಕಾನ್ರಾಡ್ ಸಂಗ್ಮಾ ಅವರ ಎನ್‌ಪಿಪಿ 1.8 ಕೋಟಿ ರುಪಾಯಿ. 2004-05 ರಿಂದ 2021-22 ರ ನಡುವೆ ಬಿಜೆಪಿ ಸೇರಿದಂತೆ ಎಲ್ಲಾ ರಾಷ್ಟ್ರೀಯ ಪಕ್ಷಗಳ ಒಟ್ಟು ಆಸ್ತಿ 431.33 ಕೋಟಿ ರುಪಾಯಿ ಇತ್ತು.

2016-17 ರಿಂದ ರಾಷ್ಟ್ರೀಯ ಪಕ್ಷಗಳ ಲೈಯೇಬಿಲಿಟಿ ಸತತವಾಗಿ ಕುಸಿದಿದ್ದು, 2021 ಮತ್ತು 2022 ರ ನಡುವಿನ ಒಟ್ಟು ಲೈಯೇಬಿಲಿಟಿಗಳು 103 ಕೋಟಿ ರುಪಾಯಿಗಳಿಂದ 62 ಕೋಟಿ ರುಪಾಯಿಗೆ ಕುಸಿದಿದೆ.

ಭಾರತೀಯ ಚಾರ್ಟರ್ಡ್ ಅಕೌಂಟೆಂಟ್ಸ್ ಇನ್ಸ್ಟಿಟ್ಯೂಟ್ (Institute of Chartered Accountants of India -ICAI) ಹೊರಡಿಸಿರುವ ಮಾರ್ಗಸೂಚಿಗಳನ್ನು ರಾಷ್ಟ್ರೀಯ ಪಕ್ಷಗಳು ಉಲ್ಲಂಘಿಸುತ್ತಾ ಬಂದಿವೆ ಎಂದನ್ನು ಈ ವರದಿ ಗಮನಿಸಿದೆ.