ಹನಿಟ್ರಾಪ್ ಗೆ ಯತ್ನ ; ಶಾಸಕ ತಿಪ್ಪಾರೆಡ್ಡಿ ಕಡೆಯಿಂದ ದೂರು ದಾಖಲು

ಹನಿಟ್ರಾಪ್ ಮಾಡಲು ಯತ್ನಿಸಿದ್ದಾರೆ ಎಂದು ಆರೋಪಿಸಿ ಚಿತ್ರದುರ್ಗದ ಶಾಸಕ ತಿಪ್ಪಾರೆಡ್ಡಿ ಸೈಬರ್ ಠಾಣೆಗೆ ದೂರು ದಾಖಲಿಸಿದ್ದಾರೆ. ಅಪರಿಚಿತ ಯುವತಿಯ ಕಡೆಯಿಂದ ಬಂದ ವಿಡಿಯೋ ಕಾಲ್ ಗಮನಿಸಿದಾಗ ಹನಿಟ್ರಾಪ್ ಬಗ್ಗೆ ಅನುಮಾನ ವ್ಯಕ್ತಪಡಿಸಿ, ಶಾಸಕ ತಿಪ್ಪಾರೆಡ್ಡಿ ಸೈಬರ್ ಪೊಲೀಸರಿಗೆ ದೂರು ನೀಡಿದ್ದಾರೆ.

ಶಾಸಕರ ಮೊಬೈಲ್ ಗೆ ವಿಡಿಯೋ ಕರೆ ಮಾಡಿ ಅಶ್ಲೀಲವಾಗಿ ಯುವತಿ ಮಾತನಾಡಿದ್ದಾರೆ. ಅನಿರೀಕ್ಷಿತವಾಗಿ ಬಂದ ಈ ಕರೆಯ ಬಗ್ಗೆ ಶಾಸಕ ತಿಪ್ಪಾರೆಡ್ಡಿಗೆ ಅನುಮಾನ ಬಂದು ಕರೆ ಸ್ಥಗಿತಗೊಳಿಸಿದ್ದಾರೆ. ಆದರೆ ಆ ಕಡೆಯಿಂದ ಕರೆ ಮಾಡಿದ ಯುವತಿ ಮತ್ತೆ ಮತ್ತೆ ಮೂರು ಬಾರಿ ಕರೆ ಮಾಡಿದ್ದು, ಇದರಿಂದ ಇರಿಸುಮುರಿಸುಗೊಂಡ ಶಾಸಕರು ಕರೆಯನ್ನು ನಿರಾಕರಿಸಿದ್ದಾರೆ.

ಈ ಸಂಬಂಧ ಐಟಿ ಕಾಯ್ದೆಯ 66(ಎ) ಅಡಿಯಲ್ಲಿ ಸೈಬರ್ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಪ್ರಾಥಮಿಕ ಮಾಹಿತಿಯಂತೆ ಈ ವಿಡಿಯೋ ಕರೆಯು ರಾಜಸ್ಥಾನ ಅಥವಾ ಒಡಿಶಾ ಕಡೆಯಿಂದ ಬಂದಿರಬಹುದು ಎಂಬ ಬಗ್ಗೆ ಪೊಲೀಸರು ಅನುಮಾನ ವ್ಯಕ್ತಪಡಿಸಿದ್ದಾರೆ. ಇದನ್ನು ಶೀಘ್ರ ತನಿಖೆ ಮಾಡುವುದಾಗಿ ಪೊಲೀಸರು ತಿಳಿಸಿದ್ದಾರೆ.