“ಎತ್ತಿಗೆ ಜ್ವರ, ಎಮ್ಮೆಗೆ ಬರೆ” : ಟ್ರಂಪ್-ಪುಟಿನ್ ಮಾತುಕತೆ ಸರಿಯಾಗಿದ್ದರೆ ಭಾರತಕ್ಕೆ ಮತ್ತಷ್ಟು ಸುಂಕದ ಹೊರೆ

ಈ ವಾರಾಂತ್ಯದಲ್ಲಿ ಅಮೇರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ನಡುವೆ ಹಲವಾರು ವಿಚಾರಗಳ ಬಗ್ಗೆ ಮಾತುಕತೆಯಲ್ಲಿ ಒಮ್ಮತದ ನಿರ್ಧಾರ ಕೈಗೊಳ್ಳದಿದ್ದರೆ, ಭಾರತದ ಮೇಲಿನ ಎರಡನೇ ಬಾರಿಯ ಸುಂಕವನ್ನು ವಾಷಿಂಗ್ಟನ್ ಹೆಚ್ಚಿಸಬಹುದು ಎಂದು ಅಮೆರಿಕದ ಖಜಾನೆ ಕಾರ್ಯದರ್ಶಿ ಸ್ಕಾಟ್ ಬೆಸೆಂಟ್ ಬುಧವಾರ ಎಚ್ಚರಿಕೆ ನೀಡಿದ್ದಾರೆ.

ಫೆಬ್ರವರಿ 2022 ರಲ್ಲಿ ರಷ್ಯಾದ ಪೂರ್ಣ ಪ್ರಮಾಣದ ಆಕ್ರಮಣದಿಂದ ಪ್ರಚೋದಿಸಲ್ಪಟ್ಟ ಉಕ್ರೇನ್‌ನಲ್ಲಿ ಯುದ್ಧವನ್ನು ಕೊನೆಗೊಳಿಸುವ ಪ್ರಯತ್ನದಲ್ಲಿ ಟ್ರಂಪ್ ಮತ್ತು ಪುಟಿನ್ ಆಗಸ್ಟ್ 15 ರ ಶುಕ್ರವಾರ ಅಲಾಸ್ಕಾದಲ್ಲಿ ಮಾತುಕತೆ ನಡೆಸಲಿದ್ದಾರೆ. ಈ ಸಂದರ್ಭದಲ್ಲಿ ಪುಟಿನ್ ನಮ್ಮ ಮಾತನ್ನು ಪುರಸ್ಕರಿಸದಿದ್ದರೆ ಭಾರತ ಮತ್ತೊಮ್ಮೆ ಸುಂಕದ ಹೊರೆ ಎದುರಿಸಬೇಕಾದೀತು ಎಂಬ ಎಚ್ಚರಿಕೆ ನೀಡಿದ್ದಾರೆ.

ಗುರುವಾರ ಬ್ಲೂಮ್‌ಬರ್ಗ್ ಟಿವಿಗೆ ನೀಡಿದ ಸಂದರ್ಶನದಲ್ಲಿ, ಬೆಸೆಂಟ್, “ರಷ್ಯಾದ ತೈಲವನ್ನು ಖರೀದಿಸುವುದಕ್ಕಾಗಿ ಭಾರತೀಯರ ಮೇಲೆ ನಾವು ಈಗಾಗಲೇ ದ್ವಿತೀಯ ಸುಂಕಗಳನ್ನು ವಿಧಿಸಿದ್ದೇವೆ. ಮತ್ತು ಮಾತುಕತೆ ಸರಿಯಾಗಿ ನಡೆಯದಿದ್ದರೆ, ಹಲವು ನಿರ್ಬಂಧಗಳು ಅಥವಾ ದ್ವಿತೀಯ ಹಂತದ ಸುಂಕದ ಏರಿಕೆ ಕಂಡುಬರಬಹುದು” ಎಂದು ಹೇಳಿದರು.

ಆರಂಭದಲ್ಲಿ, ಟ್ರಂಪ್ ಭಾರತೀಯ ಸರಕುಗಳ ಮೇಲೆ ಶೇ.25 ರಷ್ಟು ಸುಂಕ ವಿಧಿಸಿದ್ದರು. ಆದರೆ, ಆಗಸ್ಟ್ 7 ರಂದು, ಅಮೆರಿಕ ಅಧ್ಯಕ್ಷರು ರಷ್ಯಾದಿಂದ ತೈಲ ಖರೀದಿಗೆ ದೇಶದ ಮೇಲೆ ಶೇ.25 ರಷ್ಟು ಹೆಚ್ಚುವರಿ ಸುಂಕ ವಿಧಿಸಿದರು, ಇದರಿಂದಾಗಿ ಒಟ್ಟು ಲೆವಿ ದರವು ಶೇ.50 ಕ್ಕೆ ತಲುಪಿತು.

ಉಕ್ರೇನ್‌ನಲ್ಲಿ ನಡೆಯುತ್ತಿರುವ ಯುದ್ಧವನ್ನು ನಿಲ್ಲಿಸದಿದ್ದರೆ ತುಂಬಾ ತೀವ್ರ ಪರಿಣಾಮಗಳನ್ನು ಎದುರಿಸಬೇಕಾಗುತ್ತದೆ ಎಂದು ಟ್ರಂಪ್ ರಷ್ಯಾಕ್ಕೆ ಎಚ್ಚರಿಕೆ ನೀಡಿದರು. ಅಲಾಸ್ಕಾದಲ್ಲಿ ಪುಟಿನ್ ಅವರೊಂದಿಗಿನ ಭೇಟಿಯ ನಂತರ ರಷ್ಯಾ ತನ್ನ ಸಂಘರ್ಷವನ್ನು ನಿಲ್ಲಿಸಲು ಒಪ್ಪದಿದ್ದರೆ ರಷ್ಯಾ ಸೇರಿದಂತೆ ಅದರೊಂದಿಗೆ ವ್ಯವಹರಿಸುವ ದೇಶಗಳ ಮೇಲೂ ಕ್ರಮ ಕೈಗೊಳ್ಳಲಾಗುವುದು ಎಂದು ಅವರು ಸುದ್ದಿಗಾರರಿಗೆ ತಿಳಿಸಿದರು.

ಸಧ್ಯ ಅಮೇರಿಕಾದ ಈ ನಡೆ ಭಾರತಕ್ಕೆ ತೀವ್ರ ದುಬಾರಿ ಆಗಲಿದೆ ಎಂಬ ಮುನ್ಸೂಚನೆ ನೀಡಿದೆ. ಅದರಂತೆ ಈ ಬೆಳವಣಿಗೆಯನ್ನು ಭಾರತ ಯಾವ ರೀತಿ ಎದುರಿಸಲಿದೆ ಎಂಬುದಷ್ಟೇ ಈಗ ಕೌತುಕದ ವಿಚಾರವಾಗಿದೆ.