ಲಾರಿ ಕ್ಯಾಬಿನ್ನಿನಲ್ಲಿ ಹವಾನಿಯಂತ್ರಣ ವ್ಯವಸ್ಥೆ ಕಡ್ಡಾಯ: ಕರಡು ಅನುಮೋದಿಸಿದ ಕೇಂದ್ರ ಸರ್ಕಾರ

ಇನ್ನು ಮುಂದೆ N2 ಮತ್ತು N3 ವರ್ಗಗಳಿಗೆ ಸೇರಿದ ಲಾರಿಗಳ ಕ್ಯಾಬಿನ್ನಿನಲ್ಲಿ ಎಸಿ ಆಳವಡಿಸುವುದು ಕಡ್ಡಾಯವಾಗಲಿದ್ದು ಈ ಕುರಿತು ಕೇಂದ್ರ ಸರಕಾರ ಕರಡು ಮಸೂದೆ ತಯಾರಿಸಿದೆ

ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ್ ಗಡ್ಕರಿ ಅವರು ಕೆಲ ದಿನಗಳ ಹಿಂದೆ ಈ ಬಗ್ಗೆ ಮಾಹಿತಿ ನೀಡಿದ್ದರು. ಇದೀಗ ಹವಾನಿಯಂತ್ರಣ ವ್ಯವಸ್ಥೆಯನ್ನು ಕಡ್ಡಾಯಗೊಳಿಸುವ ಕರಡು ಅಧಿಸೂಚನೆಗೂ ಸರ್ಕಾರದ ಒಪ್ಪಿಗೆ ಸಿಕ್ಕಿದೆ. ಈ ಮಾಹಿತಿಯನ್ನು ನಿತಿನ್ ಗಡ್ಕರಿ ಟ್ವೀಟ್ ಮಾಡಿದ್ದಾರೆ.

ರಸ್ತೆ ಸುರಕ್ಷತೆಯಲ್ಲಿ ಟ್ರಕ್ ಚಾಲಕರ ಪಾತ್ರ ದೊಡ್ಡದು, ಎಸಿ ಕ್ಯಾಬಿನ್ ಇದ್ದರೆ ಚಾಲಕರಿಗೆ ನೆಮ್ಮದಿ: ಗಡ್ಕರಿ

ಕೇಂದ್ರ ಸಚಿವ ನಿತಿನ್ ಗಡ್ಕರಿ ತಮ್ಮ ಟ್ವೀಟಿನಲ್ಲಿ, “ಎನ್2 ಮತ್ತು ಎನ್3 ವರ್ಗದ ಟ್ರಕ್‌ಗಳ ಕ್ಯಾಬಿನ್‌ನಲ್ಲಿ ಹವಾನಿಯಂತ್ರಣ ವ್ಯವಸ್ಥೆಯನ್ನು ಕಡ್ಡಾಯವಾಗಿ ಅಳವಡಿಸಲು ಕರಡು ಅಧಿಸೂಚನೆಗೆ ಅನುಮೋದನೆ ನೀಡಲಾಗಿದೆ. ರಸ್ತೆ ಸುರಕ್ಷತೆಯನ್ನು ಖಾತ್ರಿಪಡಿಸುವಲ್ಲಿ ಟ್ರಕ್ ಚಾಲಕರು ಪ್ರಮುಖ ಪಾತ್ರ ವಹಿಸುತ್ತಾರೆ. ಈ ನಿರ್ಧಾರವು ಟ್ರಕ್ ಡ್ರೈವರ್‌ಗಳಿಗೆ ಆರಾಮದಾಯಕ ಕೆಲಸದ ಪರಿಸ್ಥಿತಿಗಳನ್ನು ಒದಗಿಸುವಲ್ಲಿ ಪ್ರಮುಖ ಮೈಲಿಗಲ್ಲಾಗಿದೆ, ಇದು ಅವರ ದಕ್ಷತೆಯನ್ನು ಹೆಚ್ಚಿಸುತ್ತದೆ ಮತ್ತು ಡ್ರೈವಿಂಗ್‌ ಮಾಡುವಾಗಿನ ಆಯಾಸದ ಸಮಸ್ಯೆಯನ್ನು ಪರಿಹರಿಸುತ್ತದೆ.” ಎಂದಿದ್ದಾರೆ.

2025ರ ವೇಳೆಗೆ ಟ್ರಕ್ ಕ್ಯಾಬಿನ್‌ನಲ್ಲಿ ಎಸಿ ಕಡ್ಡಾಯ

ಇತ್ತೀಚೆಗೆ ಸಭೆಯೊಂದರಲ್ಲಿ ಲಾರಿಗಳು 2025ರೊಳಗೆ ಎಸಿ ಆಳವಡಿಸಿಕೊಳ್ಳುವುದು ಕಡ್ಡಾಯವಾಗಲಿದೆ ಎಂದಿದ್ದರು.

ಟ್ರಕ್ ಕ್ಯಾಬಿನ್‌ನಲ್ಲಿ ಎಸಿ ವೆಚ್ಚ ಹೆಚ್ಚಳಕ್ಕೆ ವಿರೋಧ: ಗಡ್ಕರಿ

ಕಾರ್ಯಕ್ರಮದಲ್ಲಿ ಟ್ರಕ್ ಚಾಲಕರ ಬಗ್ಗೆ ಕಳವಳ ವ್ಯಕ್ತಪಡಿಸಿದ ನಿತಿನ್ ಗಡ್ಕರಿ, ‘ನಮ್ಮ ಚಾಲಕರು 43.47 ಡಿಗ್ರಿಯಷ್ಟು ಕಠಿಣ ತಾಪಮಾನದಲ್ಲಿ ವಾಹನಗಳನ್ನು ಓಡಿಸುತ್ತಾರೆ. ಇಂತಹ ಪರಿಸ್ಥಿತಿಯಲ್ಲಿ ವಾಹನ ಚಲಾಯಿಸುವ ಚಾಲಕರ ಸ್ಥಿತಿಯನ್ನು ನಾವೇ ಊಹಿಸಿಕೊಳ್ಳಬೇಕು. ಸಚಿವನಾದ ಕೂಡಲೇ ನಾನು ಎಸಿ ಕ್ಯಾಬಿನ್‌ಗಳನ್ನು ಪರಿಚಯಿಸಲು ಉತ್ಸುಕನಾಗಿದ್ದೆ. ಆದರೆ ಟ್ರಕ್‌ಗಳ ಬೆಲೆ ಹೆಚ್ಚಾಗುತ್ತದೆ ಎಂದು ಕೆಲವರು ಇದನ್ನು ವಿರೋಧಿಸಿದರು. ಇಂದು ಎಲ್ಲಾ ಲಾರಿಗಳ ಕ್ಯಾಬಿನ್‌ ಎಸಿ ಕ್ಯಾಬಿನ್‌ ಆಗಿರಬೇಕೆನ್ನುವ ನಿರ್ಧಾರಕ್ಕೆ ನಾನು ಸಹಿ ಮಾಡಿದ್ದೇನೆʼ ಎಂದು ಹೇಳಿದ್ದಾರೆ.