ಭಾರತದ ಉತ್ಪಾದನಾ ವಲಯಕ್ಕೆ ಯುದ್ಧದ ಬಿಸಿ: 45 ತಿಂಗಳ ಕನಿಷ್ಠ ಮಟ್ಟಕ್ಕೆ ಕುಸಿತ

ಅಮೆರಿಕದ ಯುದ್ಧೋನ್ಮಾದ ಮತ್ತು ಹೆಚ್ಚಿನ ಸುಂಕದ ದರಗಳು ಭಾರತದ ತಯಾರಿಕಾ ವಲಯದ ಮೇಲೆ ತೀವ್ರ ಪರಿಣಾಮ ಬೀರುತ್ತಿವೆ. ವಿಶೇಷವಾಗಿ ಪಶ್ಚಿಮ ಏಷ್ಯಾದಲ್ಲಿನ ಸಂಘರ್ಷದ ಹಿನ್ನೆಲೆಯಲ್ಲಿ ಮಾರ್ಚ್ ತಿಂಗಳ ತಯಾರಿಕಾ ವಲಯದ ಪಿಎಂಐ ಸೂಚ್ಯಂಕವು 53.9ಕ್ಕೆ ಕುಸಿದಿದೆ ಎಂದು ಎಚ್‌ಎಸ್‌ಬಿಸಿ ಇಂಡಿಯಾ ಮ್ಯಾನುಫ್ಯಾಕ್ಚರಿಂಗ್ ಪರ್ಚೇಸಿಂಗ್ ಮ್ಯಾನೇಜರ್ಸ್ ಇಂಡೆಕ್ಸ್ (PMI) ವರದಿ ಬಹಿರಂಗಪಡಿಸಿದೆ.

ಫೆಬ್ರವರಿಯಲ್ಲಿ 56.9 ಪಾಯಿಂಟ್‌ಗಳಿದ್ದ ಈ ಸೂಚ್ಯಂಕವು ಮಾರ್ಚ್ ವೇಳೆಗೆ ಏಕಾಏಕಿ ಕುಸಿಯುವ ಮೂಲಕ ನಾಲ್ಕು ವರ್ಷಗಳ ಕನಿಷ್ಠ ಮಟ್ಟಕ್ಕೆ ತಲುಪಿದೆ. ಜೂನ್ 2022ರ ನಂತರ ದಾಖಲಾದ ಅತ್ಯಂತ ಕಡಿಮೆ ಉತ್ಪಾದನಾ ಪ್ರಮಾಣ ಇದಾಗಿದ್ದು, ತಯಾರಿಕಾ ವಲಯದಲ್ಲಿ ಆತಂಕ ಮೂಡಿಸಿದೆ. ಸಾಮಾನ್ಯವಾಗಿ ಪಿಎಂಐ 50ಕ್ಕಿಂತ ಹೆಚ್ಚಿದ್ದರೆ ವಲಯವು ಸುಧಾರಣೆಯ ಹಾದಿಯಲ್ಲಿದೆ ಎಂದು ಮತ್ತು 50ಕ್ಕಿಂತ ಕಡಿಮೆ ಇದ್ದರೆ ಹಿನ್ನಡೆಯಲ್ಲಿದೆ ಎಂದು ಪರಿಗಣಿಸಲಾಗುತ್ತದೆ.

ಕಳೆದ ಎರಡು ವರ್ಷಗಳಲ್ಲಿ ಎಂದೂ ಕಾಣದ ರೀತಿಯಲ್ಲಿ ಹೊಸ ಆರ್ಡರ್‌ಗಳು ಮತ್ತು ಉತ್ಪಾದನಾ ಸಾಮರ್ಥ್ಯವು ಮಂದಗತಿಯಲ್ಲಿ ಸಾಗಿರುವುದು ಈ ಕುಸಿತಕ್ಕೆ ಪ್ರಮುಖ ಕಾರಣವಾಗಿದೆ. ಇದರ ಜೊತೆಗೆ ಮುಡಿ ಅಥವಾ ಕಚ್ಚಾ ವಸ್ತುಗಳ ಬೆಲೆಗಳು ಕಳೆದ ಮೂರೂವರೆ ವರ್ಷಗಳ ಗರಿಷ್ಠ ಮಟ್ಟಕ್ಕೆ ತಲುಪಿರುವುದು ತಯಾರಿಕಾ ಕಂಪನಿಗಳ ಮೇಲೆ ಭಾರಿ ಹೊರೆ ಹೊರಿಸಿದೆ.

ಉತ್ಪಾದನಾ ವೆಚ್ಚಗಳು ಗಗನಕ್ಕೇರುತ್ತಿದ್ದರೂ, ಮಾರುಕಟ್ಟೆಯಲ್ಲಿನ ತೀವ್ರ ಪೈಪೋಟಿಯನ್ನು ಎದುರಿಸಲು ಕಂಪನಿಗಳು ತಮ್ಮ ಸಿದ್ಧ ವಸ್ತುಗಳ ಮಾರಾಟದ ಬೆಲೆಯನ್ನು ಹೆಚ್ಚಿಸಲು ಸಾಧ್ಯವಾಗುತ್ತಿಲ್ಲ. ಇದರಿಂದಾಗಿ ಕಂಪನಿಗಳ ಲಾಭದ ಪ್ರಮಾಣವು ಕ್ರಮೇಣವಾಗಿ ಕ್ಷೀಣಿಸುತ್ತಿದೆ. ಬೇಡಿಕೆಯಲ್ಲಿನ ಕುಸಿತ ಮತ್ತು ಜಾಗತಿಕ ಮಾರುಕಟ್ಟೆಯಲ್ಲಿನ ಅನಿಶ್ಚಿತತೆಯು ಭಾರತದ ಕೈಗಾರಿಕಾ ಪ್ರಗತಿಯ ವೇಗವನ್ನು ಪ್ರಶ್ನಾರ್ಥಕ ಮಾಡಿದೆ ಎಂದು ಎಚ್‌ಎಸ್‌ಬಿಸಿ ವಿಶ್ಲೇಷಿಸಿದೆ.

ಮಾರುಕಟ್ಟೆಯಲ್ಲಿನ ತೀವ್ರ ಪೈಪೋಟಿ ಮತ್ತು ಅಂತರರಾಷ್ಟ್ರೀಯ ಮಟ್ಟದ ಅನಿಶ್ಚಿತತೆಯಿಂದಾಗಿ ಹೊಸ ಆರ್ಡರ್‌ಗಳ ಹರಿವು ನಿಧಾನವಾಗಿದೆ ಎಂದು ಎಚ್‌ಎಸ್‌ಬಿಸಿ ಇಂಡಿಯಾದ ಮುಖ್ಯ ಅರ್ಥಶಾಸ್ತ್ರಜ್ಞೆ ಪ್ರಾಂಜಲ್ ಭಂಡಾರಿ ತಿಳಿಸಿದ್ದಾರೆ. ವಿಶೇಷವಾಗಿ ಅಲ್ಯೂಮಿನಿಯಂ, ರಾಸಾಯನಿಕಗಳು, ಇಂಧನ, ಸೆಣಬು, ಚರ್ಮ, ಜವಳಿ ಮತ್ತು ಉಕ್ಕಿನಂತಹ ವಸ್ತುಗಳ ಬೆಲೆಗಳು ಕಳೆದ ಮೂರು ವರ್ಷಗಳಲ್ಲಿ ಎಂದೂ ಇಲ್ಲದಷ್ಟು ಏರಿಕೆಯಾಗಿವೆ. ಇದರಿಂದ ತಯಾರಕರ ಮೇಲೆ ಬಂಡವಾಳದ ಹೊರೆ ಹೆಚ್ಚಾಗಿದ್ದರೂ, ಗ್ರಾಹಕರಿಗೆ ತಲುಪುವ ಅಂತಿಮ ವಸ್ತುಗಳ ಬೆಲೆಯನ್ನು ಕಂಪನಿಗಳು ಸದ್ಯಕ್ಕೆ ನಿಯಂತ್ರಣದಲ್ಲೇ ಇರಿಸಿವೆ. ಯುದ್ಧದ ಕಾರಣದಿಂದಾಗಿ ಅಂತರರಾಷ್ಟ್ರೀಯ ಪೂರೈಕೆ ಸರಪಳಿ ಹದಗೆಟ್ಟಿರುವುದು ಮತ್ತು ಮಾರುಕಟ್ಟೆ ಪರಿಸ್ಥಿತಿಗಳು ಸವಾಲಾಗಿ ಪರಿಣಮಿಸಿರುವುದು ಭಾರತೀಯ ಕೈಗಾರಿಕೆಗಳನ್ನು ಸಂಕಷ್ಟಕ್ಕೆ ತಳ್ಳಿದೆ.