ಷೇರು ಮಾರುಕಟ್ಟೆ ಮೇಲೆ ಯುದ್ಧದ ಪರಿಣಾಮ: ನಿಮಿಷಗಳಲ್ಲಿಯೇ ಕೋಟಿಗಟ್ಟಲೆ ರೂಪಾಯಿ ಮಂಗಮಾಯ

ಪಶ್ಚಿಮ ಏಷ್ಯಾದಲ್ಲಿ ಉಲ್ಬಣಿಸುತ್ತಿರುವ ಯುದ್ಧದ ಭೀತಿ ಮತ್ತು ಗಗನಕ್ಕೇರುತ್ತಿರುವ ಕಚ್ಚಾ ತೈಲ ಬೆಲೆಗಳು ಸೋಮವಾರ ದೇಶೀಯ ಷೇರು ಮಾರುಕಟ್ಟೆಯಲ್ಲಿ ಭಾರಿ ಕುಸಿತಕ್ಕೆ ಕಾರಣವಾಗಿವೆ. ಇದು ವಾಲ್ ಸ್ಟ್ರೀಟ್‌ನಲ್ಲಿ ತಲ್ಲಣ ಮೂಡಿಸಿದೆ. ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲ ಬೆಲೆ ಭಾರಿ ಏರಿಕೆ ಕಂಡು ಬ್ಯಾರೆಲ್‌ಗೆ 100 ಡಾಲರ್ ಗಡಿ ದಾಟಿದೆ.

ಸುಮಾರು ಮೂರೂವರೆ ವರ್ಷಗಳ ನಂತರ ತೈಲ ಬೆಲೆ ಈ ಮಟ್ಟಕ್ಕೆ ತಲುಪಿರುವುದು ಗಮನಾರ್ಹ. ಆದರೆ, ಈ ಬೆಲೆ ಏರಿಕೆ ಶಾಶ್ವತವಲ್ಲ ಎಂದು ಅಮೆರಿಕ ಅಧ್ಯಕ್ಷ ಟ್ರಂಪ್ ಪ್ರತಿಕ್ರಿಯಿಸಿದ್ದಾರೆ.

ಪ್ರಸ್ತುತ ಇರಾನ್-ಅಮೆರಿಕ-ಇಸ್ರೇಲ್ ನಡುವಿನ ಉದ್ವಿಗ್ನತೆಯು ಅಪಾಯಕಾರಿ ತಿರುವು ಪಡೆದುಕೊಂಡಿದ್ದು, ಇದು ಜಾಗತಿಕ ಆರ್ಥಿಕತೆಯ ಜೊತೆಗೆ ಸಾಮಾನ್ಯ ಜನರ ಜೇಬಿನ ಮೇಲೂ ನೇರ ಪರಿಣಾಮ ಬೀರಿದೆ.

ಸೆನ್ಸೆಕ್ಸ್ ಮತ್ತು ನಿಫ್ಟಿ ಕುಸಿದಿದ್ದು, ಎಲ್ಲೆಡೆ ಭಾರಿ ಮಾರಾಟದ ಒತ್ತಡ ಕಂಡುಬರುತ್ತಿದೆ.

ಕಳೆದ ವಾರದಿಂದಲೇ ಒತ್ತಡದಲ್ಲಿದ್ದ ಮಾರುಕಟ್ಟೆಗಳು ಇಂದು ಬೆಳಿಗ್ಗೆ ವಹಿವಾಟು ಆರಂಭವಾದ ತಕ್ಷಣ ತೀವ್ರವಾಗಿ ಕುಸಿದವು. ಬಿಎಸ್‌ಇ ಸೆನ್ಸೆಕ್ಸ್ (BSE Sensex) ಸುಮಾರು 2,400 ಪಾಯಿಂಟ್‌ಗಳನ್ನು ಕಳೆದುಕೊಂಡು 76,424 ಮಟ್ಟಕ್ಕೆ ತಲುಪಿದರೆ, ಎನ್‌ಎಸ್‌ಇ ನಿಫ್ಟಿ 50 (NSE Nifty 50) ಸೂಚ್ಯಂಕವು 700ಕ್ಕೂ ಹೆಚ್ಚು ಪಾಯಿಂಟ್‌ಗಳ ಕುಸಿತ ಕಂಡು 23,750 ಮಟ್ಟದಲ್ಲಿ ವಹಿವಾಟು ನಡೆಸಿತು.

ಮಾರುಕಟ್ಟೆ ಆರಂಭವಾದ ಕೆಲವೇ ನಿಮಿಷಗಳಲ್ಲಿ ಬಿಎಸ್‌ಇನಲ್ಲಿ ನೋಂದಾಯಿತ ಕಂಪನಿಗಳ ಒಟ್ಟು ಮಾರುಕಟ್ಟೆ ಮೌಲ್ಯದಲ್ಲಿ ಸುಮಾರು 12.39 ಲಕ್ಷ ಕೋಟಿ ರೂಪಾಯಿಗಳು ನಷ್ಟವಾಗಿವೆ.

ಸೆನ್ಸೆಕ್ಸ್‌ನ ಎಲ್ಲಾ ಪ್ರಮುಖ ಕಂಪನಿಗಳ ಷೇರುಗಳು ನಷ್ಟದತ್ತ ಮುಖ ಮಾಡಿವೆ. ಇಂಡಿಗೋ (IndiGo) ಷೇರು ಸುಮಾರು 8 ಪ್ರತಿಶತದಷ್ಟು ಕುಸಿದಿದೆ. ಹಾಗೆಯೇ ಟಾಟಾ ಸ್ಟೀಲ್ (Tata Steel), ಲಾರ್ಸೆನ್ ಅಂಡ್ ಟೂಬ್ರೊ (L&T), ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI), ಮಾರುತಿ ಸುಜುಕಿ ರೀತಿಯ ಪ್ರಮುಖ ಕಂಪನಿಗಳ ಷೇರುಗಳು ಸಹ ಸುಮಾರು 5 ಪ್ರತಿಶತದಷ್ಟು ನಷ್ಟ ಅನುಭವಿಸಿವೆ.

ವಿವಿಧ ವಲಯಗಳಲ್ಲಿಯೂ ತೀವ್ರ ಒತ್ತಡ ಕಂಡುಬಂದಿದೆ. ನಿಫ್ಟಿ ಪಿಎಸ್‌ಯು ಬ್ಯಾಂಕ್ ಇಂಡೆಕ್ಸ್ (Nifty PSU Bank Index) ಶೇಕಡಾ ಐದಕ್ಕಿಂತ ಹೆಚ್ಚು ಕುಸಿಯುವ ಮೂಲಕ ಭಾರಿ ನಷ್ಟ ದಾಖಲಿಸಿದೆ. ನಿಫ್ಟಿ ಆಟೋ ಇಂಡೆಕ್ಸ್ (Nifty Auto Index) ಸುಮಾರು ನಾಲ್ಕು ಪ್ರತಿಶತದಷ್ಟು ಕಡಿಮೆಯಾಗಿದ್ದರೆ, ನಿಫ್ಟಿ ರಿಯಾಲ್ಟಿ ಇಂಡೆಕ್ಸ್ (Nifty Realty Index) ಮತ್ತು ನಿಫ್ಟಿ ಪ್ರೈವೇಟ್ ಬ್ಯಾಂಕ್ ಇಂಡೆಕ್ಸ್ (Nifty Private Bank Index) ಶೇಕಡಾ ಮೂರಕ್ಕಿಂತ ಹೆಚ್ಚು ಕುಸಿದಿವೆ.