‘₹500 ಕೋಟಿ ನೀಡಿದರೆ ಸಿಎಂ ಸ್ಥಾನ’ ವಿವಾದ: ಕಾಂಗ್ರೆಸ್‌ನಿಂದ ನವ್‌ಜೋತ್ ಕೌರ್ ಅಮಾನತು

ಚಂಡೀಗಢ: ಪಂಜಾಬ್‌ನಲ್ಲಿ ‘₹500 ಕೋಟಿ ನೀಡಿದರೆ ಮುಖ್ಯಮಂತ್ರಿ ಕುರ್ಚಿ ಸಿಗುತ್ತದೆ’ ಎಂದು ಸಂಚಲನಕಾರಿ ಹೇಳಿಕೆ ನೀಡಿ ವಿವಾದ ಸೃಷ್ಟಿಸಿದ್ದ ರಾಜ್ಯ ಕಾಂಗ್ರೆಸ್ ನಾಯಕಿ ನವ್‌ಜೋತ್ ಕೌರ್ ಅವರನ್ನು ಪಕ್ಷದಿಂದ ಅಮಾನತುಗೊಳಿಸಿ ತಕ್ಷಣವೇ ಜಾರಿಗೆ ಬರುವಂತೆ ನಿರ್ಧಾರ ಕೈಗೊಳ್ಳಲಾಗಿದೆ. ಅವರನ್ನು ಪಕ್ಷದ ಪ್ರಾಥಮಿಕ ಸದಸ್ಯತ್ವದಿಂದ ವಜಾಗೊಳಿಸಲಾಗುತ್ತಿದೆ ಎಂದು ಪಿಸಿಸಿ (PCC) ಮುಖ್ಯಸ್ಥ ಅಮರಿಂದರ್ ಸಿಂಗ್ ರಾಜಾ ವಾರಿಂಗ್ ಸೋಮವಾರ ಘೋಷಿಸಿದರು.

ಕೌರ್ ಅವರ ಪ್ರತಿ-ಆರೋಪ

ಈ ಅಮಾನತಿಗೂ ಮುನ್ನವೇ, ಕೌರ್ ಅವರು ರಾಜ್ಯ ಕಾಂಗ್ರೆಸ್ ಪಕ್ಷದ ವಿರುದ್ಧ ಮತ್ತೊಂದು ಗಂಭೀರ ಆರೋಪ ಮಾಡಿದ್ದರು. ತರನ್ ತರನ್ ವಿಧಾನಸಭಾ ಕ್ಷೇತ್ರದ ಇತ್ತೀಚಿನ ಉಪಚುನಾವಣೆಯಲ್ಲಿ ಟಿಕೆಟ್‌ಗಾಗಿ ಕಾಂಗ್ರೆಸ್ ಅಭ್ಯರ್ಥಿ ಕರ್ಣಬೀರ್ ಸಿಂಗ್ ಬುರ್ಜ್ ಅವರು ಇಬ್ಬರು ಪಕ್ಷದ ನಾಯಕರಿಗೆ ₹10 ಕೋಟಿ ನೀಡಿದ್ದಾರೆ ಎಂದು ಅವರು ಆರೋಪಿಸಿದ್ದರು. ಈ ಆರೋಪವನ್ನು ಬುರ್ಜ್ ಅವರು ತಕ್ಷಣವೇ ಖಂಡಿಸಿದರು.

ಹೇಳಿಕೆ ತಿರುಚಲಾಗಿದೆ ಎಂದ ಕೌರ್

ಅಮಾನತುಗೊಂಡ ನಂತರ ಮಾತನಾಡಿದ ಕೌರ್ ಅವರು, ಪಿಸಿಸಿ ಮುಖ್ಯಸ್ಥ ವಾರಿಂಗ್ ವಿರುದ್ಧ ವಾಗ್ದಾಳಿ ನಡೆಸಿದರು. ವಾರಿಂಗ್ ಅವರಿಗೆ ಕೋರ್ಟ್, ಜನತೆ, ಬದ್ಧತೆ ಮತ್ತು ನೈತಿಕತೆಗಳ ಬಗ್ಗೆ ಕಿಂಚಿತ್ತೂ ಜವಾಬ್ದಾರಿ ಇಲ್ಲ ಎಂದು ತರಾಟೆಗೆ ತೆಗೆದುಕೊಂಡರು.

ಸಿಎಂ ಕುರ್ಚಿಗೆ ಸಂಬಂಧಿಸಿದ ತಮ್ಮ ಹೇಳಿಕೆಯನ್ನು ತಿರುಚಲಾಗಿದೆ ಎಂದು ಅವರು ಸ್ಪಷ್ಟಪಡಿಸಿದರು. “ನನ್ನ ಪತಿ (ಮಾಜಿ ಪಿಸಿಸಿ ಮುಖ್ಯಸ್ಥ ಮತ್ತು ಮಾಜಿ ರಾಜ್ಯ ಸಚಿವ ನವ್‌ಜೋತ್ ಸಿಂಗ್ ಸಿಧು) ಬೇರೆ ಯಾವುದೇ ಪಕ್ಷದಿಂದ ಸಿಎಂ ಅಭ್ಯರ್ಥಿಯಾಗುತ್ತಾರೆಯೇ ಎಂಬ ಮಾಧ್ಯಮದ ಪ್ರಶ್ನೆಗೆ, ‘ಅದಕ್ಕೆ ಬೇಕಾದ ಹಣ ನಮ್ಮ ಬಳಿ ಇಲ್ಲ ಎಂದು ಮಾತ್ರ ನಾನು ಹೇಳಿದೆ'” ಎಂದು ಅವರು ‘ಎಕ್ಸ್’ ಪೋಸ್ಟ್‌ನಲ್ಲಿ ತಿಳಿಸಿದರು. ಸತ್ಯ ಹೇಳಿದ ಕಾರಣಕ್ಕಾಗಿ ಕಾಂಗ್ರೆಸ್ ಪಕ್ಷವು ಕೌರ್ ಮೇಲೆ ‘ಫತ್ವಾ’ ಹೊರಡಿಸಿದೆ ಎಂದು ಬಿಜೆಪಿ ನಾಯಕ ಶೆಹಜಾದ್ ಪೂನಾವಾಲಾ ವ್ಯಂಗ್ಯವಾಡಿದರು.