ಮೆಟಾ ಕಂಪನಿಯಲ್ಲಿ 15,000 ಉದ್ಯೋಗಕ್ಕೆ ಕೋಕ್‌ – AI ಕಾರಣ ಅಂತಿದ್ದಾರೆ ಮಾಲೀಕರು

ನ್ಯೂಯಾರ್ಕ್: ಫೇಸ್‌ಬುಕ್, ಇನ್‌ಸ್ಟಾಗ್ರಾಮ್ ಮತ್ತು ವಾಟ್ಸಾಪ್‌ನ ಮಾತೃಸಂಸ್ಥೆಯಾದ ‘ಮೆಟಾ’ (Meta), ತನ್ನ ಇತಿಹಾಸದಲ್ಲೇ ಅತ್ಯಂತ ದೊಡ್ಡ ಉದ್ಯೋಗ ಕಡಿತಕ್ಕೆ (Lay off) ಮುಂದಾಗಿದೆ.

ಕೃತಕ ಬುದ್ಧಿಮತ್ತೆ (Artificial Intelligence – AI) ತಂತ್ರಜ್ಞಾನದ ಮೇಲೆ ಭಾರಿ ಪ್ರಮಾಣದ ಹೂಡಿಕೆ ಮಾಡುತ್ತಿರುವ ಹಿನ್ನೆಲೆಯಲ್ಲಿ, ವೆಚ್ಚವನ್ನು ಸರಿದೂಗಿಸಲು ಸುಮಾರು 15,000ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ವಜಾಗೊಳಿಸಲು ಕಂಪನಿ ಯೋಚಿಸುತ್ತಿದೆ.

AI ಮೇಲೆ ಭಾರೀ ಹೂಡಿಕೆ
ವರದಿಗಳ ಪ್ರಕಾರ, ಮಾರ್ಕ್ ಜುಕರ್‌ಬರ್ಗ್ ನೇತೃತ್ವದ ಮೆಟಾ ಕಂಪನಿಯು 2028ರ ವೇಳೆಗೆ AI ಮೂಲಸೌಕರ್ಯಗಳಿಗಾಗಿ ಸುಮಾರು 600 ಶತಕೋಟಿ ಡಾಲರ್ ಹೂಡಿಕೆ ಮಾಡಲು ಉದ್ದೇಶಿಸಿದೆ. ಸೂಪರ್ ಇಂಟೆಲಿಜೆನ್ಸ್ ಲ್ಯಾಬ್ಸ್ (MSL) ಸ್ಥಾಪನೆ, ಡೇಟಾ ಸೆಂಟರ್‌ಗಳ ನಿರ್ಮಾಣ ಮತ್ತು ಹೊಸ AI ಸ್ಟಾರ್ಟ್‌ಅಪ್‌ಗಳ ಖರೀದಿಗೆ ಕಂಪನಿ ಹಣವನ್ನು ಧಾರೆ ಎರೆಯುತ್ತಿದೆ. ಈ ಭಾರಿ ವೆಚ್ಚವನ್ನು ಸರಿದೂಗಿಸಲು ಉದ್ಯೋಗಿಗಳ ಸಂಖ್ಯೆಯನ್ನು ಕಡಿತಗೊಳಿಸುವುದು ಅನಿವಾರ್ಯವಾಗಿದೆ ಎಂದು ಹೇಳಲಾಗುತ್ತಿದೆ.

ಶೇ. 20ರಷ್ಟು ಉದ್ಯೋಗಿಗಳಿಗೆ ಸಂಕಷ್ಟ: ಪ್ರಸ್ತುತ ಮೆಟಾ ಕಂಪನಿಯಲ್ಲಿ ಸುಮಾರು 79,000 ಉದ್ಯೋಗಿಗಳಿದ್ದು, ಈ ಪೈಕಿ ಶೇ. 20ರಷ್ಟು ಅಂದರೆ ಸುಮಾರು 15,000ಕ್ಕೂ ಹೆಚ್ಚು ಜನರನ್ನು ಮನೆಗೆ ಕಳುಹಿಸುವ ಸಾಧ್ಯತೆಯಿದೆ. ಇದು ಕಂಪನಿಯ 2022-23ರ “ಕಾರ್ಯಕ್ಷಮತೆಯ ವರ್ಷ” (Year of Efficiency) ಅವಧಿಯಲ್ಲಿ ನಡೆದ 11,000 ಉದ್ಯೋಗಿಗಳ ವಜಾಕ್ಕಿಂತಲೂ ದೊಡ್ಡದಾಗಿರಲಿದೆ.

ರಿಯಾಲಿಟಿ ಲ್ಯಾಬ್ಸ್ ಮೇಲೂ ಪರಿಣಾಮ: ಕಂಪನಿಯು ಈ ಹಿಂದೆ ಮೆಟಾವರ್ಸ್ (Metaverse) ಮೇಲೆ ಹೆಚ್ಚಿನ ಗಮನಹರಿಸಿತ್ತು. ಆದರೆ ಈಗ ಆದ್ಯತೆ ಬದಲಾಗಿದ್ದು, ‘ರಿಯಾಲಿಟಿ ಲ್ಯಾಬ್ಸ್’ ವಿಭಾಗದಲ್ಲೂ ಉದ್ಯೋಗ ಕಡಿತದ ಪ್ರಕ್ರಿಯೆ ಈಗಾಗಲೇ ಆರಂಭವಾಗಿದೆ ಎನ್ನಲಾಗಿದೆ. ವರ್ಚುವಲ್ ರಿಯಾಲಿಟಿಗಿಂತ AI ಚಾಲಿತ ವೇರಬಲ್ಸ್ (Wearables) ಮತ್ತು ಮೊಬೈಲ್ ಫೀಚರ್‌ಗಳಿಗೆ ಕಂಪನಿ ಹೆಚ್ಚು ಪ್ರಾಮುಖ್ಯತೆ ನೀಡುತ್ತಿದೆ.

ತಜ್ಞರ ಅಭಿಪ್ರಾಯ: ತಂತ್ರಜ್ಞಾನ ಲೋಕದಲ್ಲಿ AI ಕ್ರಾಂತಿ ನಡೆಯುತ್ತಿರುವಾಗ, ಮಾನವ ಶಕ್ತಿಯ ಅವಶ್ಯಕತೆ ಕಡಿಮೆಯಾಗುತ್ತಿದೆ ಎಂದು ಜುಕರ್‌ಬರ್ಗ್ ಈ ಹಿಂದೆಯೇ ಸುಳಿವು ನೀಡಿದ್ದರು. “ಹಿಂದೆ ದೊಡ್ಡ ತಂಡಗಳು ಬೇಕಾಗಿದ್ದ ಕೆಲಸಗಳನ್ನು ಈಗ ಒಬ್ಬ ಪ್ರದಕ್ಷ ನೌಕರನು AI ಸಹಾಯದಿಂದ ಮಾಡಲು ಸಾಧ್ಯವಿದೆ” ಎಂದು ಅವರು ಹೇಳಿದ್ದರು.

ಅಮೆಜಾನ್, ಆಕ್ಸೆಂಚರ್ ಮತ್ತು ಮೈಕ್ರೋಸಾಫ್ಟ್‌ನಂತಹ ಇತರ ದೈತ್ಯ ಕಂಪನಿಗಳು ಕೂಡ AI ಹೂಡಿಕೆಯ ಭಾಗವಾಗಿ ಉದ್ಯೋಗ ಕಡಿತದ ಹಾದಿ ಹಿಡಿದಿವೆ. ಮೆಟಾದ ಈ ನಿರ್ಧಾರವು ಐಟಿ ವಲಯದಲ್ಲಿ ಮತ್ತೊಮ್ಮೆ ಆತಂಕದ ವಾತಾವರಣ ಸೃಷ್ಟಿಸಿದೆ