ಮುಂದುವರಿದ ವಿಮಾನ ಸೇವೆಗಳ ರದ್ದತಿ: ಇಂಡಿಗೋ ಸಿಇಒಗೆ ಸಮನ್ಸ್ ಜಾರಿ ಮಾಡಿದ ಡಿಜಿಸಿಎ!

ದೇಶದ ಅತಿದೊಡ್ಡ ವಿಮಾನಯಾನ ಸಂಸ್ಥೆಯಾದ ಇಂಡಿಗೋ (IndiGo) ಪ್ರಸ್ತುತ ಮೊದಲ ಬಾರಿಗೆ ಸಂಕಷ್ಟದ ಪರಿಸ್ಥಿತಿಯನ್ನು ಎದುರಿಸುತ್ತಿದೆ. ಅದರ ಇತಿಹಾಸದಲ್ಲಿ ಹಿಂದೆಂದೂ ಇಲ್ಲದ ರೀತಿಯಲ್ಲಿ ಸೇವೆಗಳ ಮೇಲೆ ಪರಿಣಾಮ ಬೀರಿದೆ.

ದೊಡ್ಡ ಪ್ರಮಾಣದಲ್ಲಿ ವಿಮಾನಗಳು ರದ್ದುಗೊಳ್ಳುವುದು ಮತ್ತು ಮರು-ವೇಳಾಪಟ್ಟಿ (Re-schedule) ಯಾಗುವುದರಿಂದ ಪ್ರಯಾಣಿಕರು ತೀವ್ರ ತೊಂದರೆಗಳನ್ನು ಎದುರಿಸುತ್ತಿದ್ದಾರೆ. ಈಗಾಗಲೇ ವಿಮಾನಯಾನ ಸಚಿವಾಲಯವು ವಿಮಾನಗಳ ಕಡಿತದ ನಿರ್ಧಾರವನ್ನು ತೆಗೆದುಕೊಂಡಿದೆ.

ಇದೀಗ, ಡಿಜಿಸಿಎ (DGCA – ನಾಗರಿಕ ವಿಮಾನಯಾನ ಮಹಾ ನಿರ್ದೇಶನಾಲಯ) ಸಮನ್ಸ್ ಜಾರಿ ಮಾಡಿದೆ. ಗುರುವಾರ ಮಧ್ಯಾಹ್ನ 3 ಗಂಟೆಯೊಳಗೆ ಸೇವೆಗಳ ಅಡಚಣೆಯ ಬಗ್ಗೆ ಸಮಗ್ರ ಡೇಟಾ ಮತ್ತು ನವೀಕೃತ ಮಾಹಿತಿಯನ್ನು ಒದಗಿಸುವಂತೆ ಇಂಡಿಗೋ ಸಿಇಒಗೆ ಡಿಜಿಸಿಎ ಆದೇಶಿಸಿದೆ.

ಇಂಡಿಗೋ ಸಂಕಷ್ಟವು ಬುಧವಾರವೂ ಮುಂದುವರೆಯಿತು. ದೇಶಾದ್ಯಂತ ಹಲವು ನಗರಗಳಲ್ಲಿ ವಿಮಾನಗಳು ರದ್ದುಗೊಂಡಿವೆ. ಬೆಂಗಳೂರಿನಲ್ಲಿ 61 ವಿಮಾನಗಳು ರದ್ದುಗೊಂಡಿವೆ.

ಆದರೆ, ಮಂಗಳವಾರ ಇಂಡಿಗೋ ಸಿಇಒ ಪೀಟರ್ ಎಲ್ಬರ್ಸ್ ಅವರು ವಿಮಾನಯಾನ ಸೇವೆಗಳು ಪ್ರಸ್ತುತ ಸಾಮಾನ್ಯವಾಗಿವೆ ಮತ್ತು ವಿಮಾನಗಳು ಮೊದಲಿನಂತೆ ಸಂಚರಿಸಲಿವೆ ಎಂದು ಘೋಷಿಸಿದ್ದರು. ಈ ಹಿನ್ನೆಲೆಯಲ್ಲಿ, ಇದೀಗ ಡಿಜಿಸಿಎ ಹೊಸ ಆದೇಶಗಳನ್ನು ನೀಡಿದೆ. ಸಂಬಂಧಪಟ್ಟ ಎಲ್ಲಾ ವಿಭಾಗಗಳ ಹಿರಿಯ ಅಧಿಕಾರಿಗಳೊಂದಿಗೆ ಸಭೆಗೆ ಹಾಜರಾಗುವಂತೆ ಸಿಇಒಗೆ ಆದೇಶಿಸಲಾಗಿದೆ ಎಂದು ಡಿಜಿಸಿಎ ತಿಳಿಸಿದೆ.

ವಿಮಾನಗಳ ಸೇವೆಗಳ ಪುನರಾರಂಭ, ಪೈಲಟ್‌ಗಳು ಮತ್ತು ಸಿಬ್ಬಂದಿಯ ನೇಮಕಾತಿ ಯೋಜನೆ, ರದ್ದಾದ ವಿಮಾನಗಳ ಸಂಖ್ಯೆ ಮತ್ತು ಇಲ್ಲಿಯವರೆಗೆ ಪಾವತಿಸಲಾದ ಮರುಪಾವತಿಗೆ (Refund) ಸಂಬಂಧಿಸಿದ ಮಾಹಿತಿಯನ್ನು ಸಲ್ಲಿಸುವಂತೆ ಏರ್‌ಲೈನ್ಸ್‌ಗೆ ಆದೇಶಿಸಿದೆ.

ಇಂಡಿಗೋ ದಿನಕ್ಕೆ ಸುಮಾರು 2,300 ಹಾರಾಟಗಳನ್ನು ನಿರ್ವಹಿಸುತ್ತದೆ ಮತ್ತು ವಿಮಾನಯಾನ ಮಾರುಕಟ್ಟೆಯಲ್ಲಿ 60% ಕ್ಕಿಂತ ಹೆಚ್ಚು ಪಾಲನ್ನು ಹೊಂದಿದೆ. ಸಂಕಷ್ಟದಿಂದಾಗಿ ಮಾರುಕಟ್ಟೆ ಮೌಲ್ಯ ಸುಮಾರು 21 ಸಾವಿರ ಕೋಟಿ ರೂ. ಕುಸಿದಿದೆ. ಪರಿಸ್ಥಿತಿ ಸುಧಾರಿಸಿದೆ ಎಂದು ಏರ್‌ಲೈನ್ಸ್ ಹೇಳುತ್ತಿದ್ದರೂ, ದೇಶಾದ್ಯಂತ ಇನ್ನೂ ವಿಮಾನಗಳ ರದ್ದು ಮುಂದುವರಿದಿದೆ.

ದೇಶಾದ್ಯಂತ ಕಳೆದ ಒಂಬತ್ತು ದಿನಗಳಿಂದ ಮುಂದುವರಿದಿರುವ ಈ ಸಂಕಷ್ಟಕ್ಕೆ ಮುಖ್ಯ ಕಾರಣವೆಂದರೆ ಡಿಸೆಂಬರ್ 1 ರಿಂದ ಇಂಡಿಗೋ ಸಾವಿರಾರು ವಿಮಾನಗಳನ್ನು ರದ್ದು ಮಾಡಿದ್ದೇ ಆಗಿದೆ. ಡಿಜಿಸಿಎ ಜಾರಿ ಮಾಡಿದ ಹೊಸ ಸುರಕ್ಷತಾ ನಿಯಮಗಳ (FDTL) ಅನ್ವಯ, ಏರ್‌ಲೈನ್ಸ್ ಸರಿಯಾದ ಯೋಜನೆಗಳನ್ನು ರೂಪಿಸುವಲ್ಲಿ ವಿಫಲವಾಗಿದೆ. ಇದು ಕಾರ್ಯಾಚರಣೆಗಳಲ್ಲಿ ಗೊಂದಲಕ್ಕೆ ಕಾರಣವಾಗಿದೆ.

ಪ್ರಯಾಣಿಕರು ತೀವ್ರ ತೊಂದರೆಗಳನ್ನು ಎದುರಿಸಿದಾಗ, ಇದನ್ನೇ ಅವಕಾಶವಾಗಿ ಬಳಸಿಕೊಂಡ ಸ್ಪರ್ಧಾತ್ಮಕ ವಿಮಾನಯಾನ ಸಂಸ್ಥೆಗಳು ಟಿಕೆಟ್ ದರಗಳನ್ನು ಭಾರೀ ಪ್ರಮಾಣದಲ್ಲಿ ಹೆಚ್ಚಿಸಿದವು. ನಂತರ ಕೇಂದ್ರ ಸರ್ಕಾರವು ಮಧ್ಯಪ್ರವೇಶಿಸಿ ಶುಲ್ಕಗಳನ್ನು ನಿಯಂತ್ರಿಸುವ ಆದೇಶಗಳನ್ನು ಹೊರಡಿಸಿತು.

ಅದೇ ಸಮಯದಲ್ಲಿ, ಡಿಜಿಸಿಎ ಇಂಡಿಗೋದ ಚಳಿಗಾಲದ ವಿಮಾನ ವೇಳಾಪಟ್ಟಿಯನ್ನು ಶೇ. 10 ರಷ್ಟು ಕಡಿತಗೊಳಿಸಲು ಆದೇಶಿಸಿತು. ಇದರಿಂದ 220 ವಿಮಾನಗಳು ಕಡಿಮೆಯಾಗಲಿವೆ. ಸಚಿವ ರಾಮ್ಮೋಹನ್ ನಾಯ್ಡು ಅವರು ಇಂಡಿಗೋ ಕಾರ್ಯಾಚರಣೆಗಳನ್ನು ಸ್ಥಿರಗೊಳಿಸಲು ಮತ್ತು ರದ್ದಾದ ವಿಮಾನಗಳ ಸಂಖ್ಯೆಯನ್ನು ಕಡಿಮೆ ಮಾಡಲು ಈ ಕ್ರಮಗಳು ಅಗತ್ಯವೆಂದು ಹೇಳಿದರು.