ಆಧಾರ್ ಇದ್ದರೆ ಮಾತ್ರ ರೆಸ್ಟೋರೆಂಟ್‌, ಹೌಸಿಂಗ್‌ ಸೊಸೈಟಿಗಳಿಗೆ ಪ್ರವೇಶ?: ಶೀಘ್ರದಲ್ಲೇ ಹೊಸ ನಿಯಮ

ದೆಹಲಿ: ನಿಮ್ಮ ಸಂಬಂಧಿಕರನ್ನು ಅಥವಾ ಸ್ನೇಹಿತರನ್ನು ಭೇಟಿ ಮಾಡಲು ಯಾವುದಾದರೂ ಹೌಸಿಂಗ್‌ ಸೊಸೈಟಿಗೆ ಹೋಗಲು ಬಯಸುತ್ತೀರಾ, ಅಥವಾ ಯಾವುದಾದರೂ ರೆಸ್ಟೋರೆಂಟ್‌ನಲ್ಲಿ ನಡೆಯುವ ಲೈವ್ ಇವೆಂಟ್‌ಗೆ ಹಾಜರಾಗಲು ಬಯಸುತ್ತೀರಾ?

ಹಾಗಿದ್ದರೆ, ಆ ಸ್ಥಳಗಳಿಗೆ ಪ್ರವೇಶಿಸಲು ನೀವು ಆಯೋಜಕರಿಗೆ ಕಡ್ಡಾಯವಾಗಿ ಆಧಾರ್ ತೋರಿಸಬೇಕಾಗಬಹುದು. ಒಂದು ವೇಳೆ ನೀವು ವಿದ್ಯಾರ್ಥಿಯಾಗಿದ್ದರೆ, ಪರೀಕ್ಷೆಗೆ ಹಾಜರಾಗುವ ಮೊದಲು ಸಹ ಈ ಗುರುತಿನ ಚೀಟಿಯನ್ನು ತೋರಿಸಲು ಕೇಳಬಹುದು. ಆದರೆ, ನಾವು ನೀಡುವ ಫೋಟೋ ಕಾಪಿಗಳು ಮತ್ತು ಆಧಾರ್‌ನ ಹಾರ್ಡ್ ಕಾಪಿಗಳು ದುರ್ಬಳಕೆಯಾಗಬಹುದು ಎಂಬ ಆತಂಕ ನಮಗಿರುತ್ತದೆ.

ಇದನ್ನು ನಿವಾರಿಸಲು, ಭಾರತೀಯ ವಿಶಿಷ್ಟ ಗುರುತಿನ ಪ್ರಾಧಿಕಾರ (UIDAI) ಹೊಸ ನೀತಿಯನ್ನು ತರುತ್ತಿದೆ. ಇನ್ಮುಂದೆ, ಹೊಸ ಕಾರ್ಡ್‌ನಲ್ಲಿ ಕ್ಯೂಆರ್ ಕೋಡ್ ಮತ್ತು ನಿಮ್ಮ ಫೋಟೋ ಮಾತ್ರ ಇರುತ್ತದೆ. ಇತರ ವಿವರಗಳು ಇರುವುದಿಲ್ಲ. ಇದರಿಂದ ನಿಮ್ಮ ಆಧಾರ್ ಇನ್ನು ಮುಂದೆ ದುರ್ಬಳಕೆಯಾಗುವ ಸಾಧ್ಯತೆ ಇರುವುದಿಲ್ಲ.

ಪ್ರಸ್ತುತ ಸರ್ಕಾರವು ಹೊಸ ಆಫ್‌ಲೈನ್ ಆಧಾರ್ ವ್ಯವಸ್ಥೆಯ ಮೇಲೆ ಕಾರ್ಯನಿರ್ವಹಿಸುತ್ತಿದೆ. ಇದರ ಮೂಲಕ, ನೀವು ಯಾವುದೇ ಸಂಸ್ಥೆ ಅಥವಾ ಸ್ಥಳಕ್ಕೆ ಪ್ರವೇಶಿಸುವ ಮೊದಲು ನಿಮ್ಮ ಗುರುತನ್ನು ಆ್ಯಪ್ ಮೂಲಕ ಪರಿಶೀಲಿಸಲಾಗುತ್ತದೆ.

ಈ ಹೊಸ ಆಫ್‌ಲೈನ್ ವ್ಯವಸ್ಥೆಯು ಇನ್ನು ಮುಂದೆ ನೀವು ಆಧಾರ್ ಫೋಟೊಕಾಪಿಗಳು ಅಥವಾ ಜೆರಾಕ್ಸ್‌ಗಳನ್ನು ತೋರಿಸುವ ಅಗತ್ಯವನ್ನು ತಪ್ಪಿಸುತ್ತದೆ ಎಂದು UIDAI ತಿಳಿಸಿದೆ. ಇದು ಪ್ರಸ್ತುತ ಫೋಟೋಕಾಪಿಗಳನ್ನು ಇಟ್ಟುಕೊಳ್ಳುವ ಅಗತ್ಯವನ್ನು ತಪ್ಪಿಸುವುದಲ್ಲದೆ, ನಿಮ್ಮ ಗೌಪ್ಯತೆಯ ರಕ್ಷಣೆಗೆ ಸಹಾಯಕವಾಗುತ್ತದೆ ಎಂದು ಹೇಳಿದೆ.