AI ಪರಿಣಾಮ : ಗೂಗಲ್ ನಿಂದ ಮತ್ತಷ್ಟು ಉದ್ಯೋಗ ಕಡಿತ

ಟೆಕ್ ಕ್ಷೇತ್ರದ ದಿಗ್ಗಜ ಗೂಗಲ್ ನಲ್ಲಿ ಮತ್ತೆ ಉದ್ಯೋಗ ಕಡಿತದ ಪರ್ವ ಮುಂದುವರಿದಿದೆ. ಆಲ್ಫಾಬೆಟ್-ಮಾಲೀಕತ್ವದ ಗೂಗಲ್ ತನ್ನ ಧ್ವನಿ-ಸಕ್ರಿಯ ಗೂಗಲ್ ಅಸಿಸ್ಟೆಂಟ್ ಸಾಫ್ಟ್‌ವೇರ್, ಜ್ಞಾನ ಮತ್ತು ಮಾಹಿತಿ ಉತ್ಪನ್ನ ತಂಡಗಳಿಂದ ಪ್ರಾಥಮಿಕವಾಗಿ ನೂರಾರು ಉದ್ಯೋಗಿಗಳನ್ನು ವಜಾಗೊಳಿಸಲು ನಿರ್ಧರಿಸಿದೆ.

ಮುಖ್ಯವಾಗಿ ಈ ಉದ್ಯೋಗ ಕಡಿತದ ಪರ್ವ ಕೃತಕ ಬುದ್ಧಿಮತ್ತೆ (AI) ಪರಿಣಾಮದಿಂದ ಎಂದು ತಿಳಿದು ಬಂದಿದೆ. AI ತಂತ್ರಜ್ಞಾನವನ್ನು ಅದರ ಉತ್ಪನ್ನಗಳಲ್ಲಿ ಸಂಯೋಜಿಸುವ ಮೂಲಕ ಗೂಗಲ್ ಅಸಿಸ್ಟೆಂಟ್ ಅನ್ನು ವರ್ಧಿಸುವ ಗುರಿಯನ್ನು ಹೊಂದಿದೆ ಎಂದು ಗೂಗಲ್ ಸಂಸ್ಥೆಯ ವಕ್ತಾರರು ತಿಳಿಸಿದ್ದಾರೆ.

AI ತಂತ್ರಜ್ಞಾನದ ಪರಿಣಾಮ ಈಗ ಟೆಕ್ ಕ್ಷೇತ್ರದ ಎಲ್ಲಾ ವಲಯಗಳನ್ನೂ ಚಾಚಿರುವ ಹಿನ್ನೆಲೆಯಲ್ಲಿ IT ವಲಯದಲ್ಲಿ ಇನ್ನು ಅತಿ ಹೆಚ್ಚು ಉದ್ಯೋಗ ಕಡಿತದ ನಿರೀಕ್ಷೆ ಮಾಡಬಹುದು ಎಂದು ಊಹಿಸಲಾಗಿದೆ. ಗೂಗಲ್ ಕೂಡಾ ಈ ಹಿಂದೆ AI ತಂತ್ರಜ್ಞಾನದ ಬಳಕೆ ಹಿನ್ನೆಲೆಯಲ್ಲಿ ಸಾವಿರಾರು ಉದ್ಯೋಗಿಗಳನ್ನು ತನ್ನ ಸಂಸ್ಥೆಯಿಂದ ಹೊರಗಿಟ್ಟಿತ್ತು.

ಈಗ ಮತ್ತೊಮ್ಮೆ ಉದ್ಯೋಗ ಕಡಿತ ನಡೆದಿದ್ದು, ಬೇರೆ ಬೇರೆ ಸಂಸ್ಥೆಗಳಲ್ಲೂ ಇದೇ ಮಾದರಿಯಲ್ಲಿ ಉದ್ಯೋಗ ಕಡಿತ ಆಗುವುದಕ್ಕೆ ಗೂಗಲ್ ಸಂಸ್ಥೆ ಮುನ್ನುಡಿ ಬರೆದಿದೆ.

ಗೂಗಲ್ ಅಸಿಸ್ಟೆಂಟ್ನ ಪರಿಷ್ಕೃತ ಆವೃತ್ತಿಯನ್ನು ಅಭಿವೃದ್ಧಿಪಡಿಸಲು ಗೂಗಲ್ ತನ್ನ ಉತ್ಪಾದನಾ ಎಐ ಚಾಟ್ಬಾಟ್ ಬಾರ್ಡ್ ಅನ್ನು ಬಳಸಿಕೊಳ್ಳಲು ಯೋಜಿಸಿದೆ ಎಂದು ಅದು ಹೇಳಿದೆ. ಈ ನವೀಕರಿಸಿದ ಆವೃತ್ತಿಯು “ಧ್ವನಿಯನ್ನು ಮೀರಿ ವಿಸ್ತರಿಸುತ್ತದೆ, ಬಳಕೆದಾರರನ್ನು ಅರ್ಥಮಾಡಿಕೊಳ್ಳುತ್ತದೆ ಮತ್ತು ಹೊಂದಿಕೊಳ್ಳುತ್ತದೆ ಮತ್ತು ವೈಯಕ್ತಿಕ ಕಾರ್ಯಗಳನ್ನು ಹೊಸ ರೀತಿಯಲ್ಲಿ ನಿರ್ವಹಿಸುತ್ತದೆ” ಎಂದು ನಿರೀಕ್ಷಿಸಲಾಗಿದೆ.