ಧಾರ್ಮಿಕ ಘೋಷಣೆಗಳನ್ನು ಕ್ರೀಡಾಂಗಣಕ್ಕೆ ತಂದವರು, ಪನೌತಿಯಂತಹ ಮೂಢನಂಬಿಕೆಗಳನ್ನು ಸಹ ಹೆಗಲಿಗೇರಿಸಿಕೊಳ್ಳಲೇಬೇಕು: ಹುಲಿ ಕಿಶೋರ್

ಗುಜರಾತಿನ ಅಹ್ಮದಾಬಾದ್‌ನಲ್ಲಿ ನಡೆದ ವಿಶ್ಪಕಪ್‌ ಕ್ರಿಕೆಟ್‌ ಪಂದ್ಯಾವಳಿಯ ಫೈನಲ್‌ ಮ್ಯಾಚಿನಲ್ಲಿ ಭಾರತ ಸೋತ ನಂತರ ಸೋಷಿಯಲ್‌ ಮೀಡಿಯಾಗಳಲ್ಲಿ ಪ್ರಧಾನಿ ನರೇಂದ್ರ ಮೋದಿಯವರನ್ನು ಪನೌತಿ ಎಂದು ಕರೆಯಲಾಗುತ್ತಿದೆ. ಈ ಕುರಿತು ಪರ-ವಿರೋಧ ಚರ್ಚೆಗಳೂ ದೊಡ್ಡ ಮಟ್ಟದಲ್ಲಿ ನಡೆಯುತ್ತಿವೆ.

ಚಂದ್ರಯಾನ ಎರಡರ ಸಮಯದಲ್ಲಿ ಮೊದಲ ಬಾರಿಗೆ ಪ್ರಧಾನಮಂತ್ರಿಯವರನ್ನು ಕಾಂಗ್ರೆಸ್‌ ಬೆಂಬಲಿಗರು ಪನೌತಿ ಎಂದು ಕರೆದಿದ್ದರು. ಮೋದಿ ಅಂದು ಸ್ಥಳದಲ್ಲಿದ್ದ ಕಾರಣದಿಂದಾಗಿ ಚಂದ್ರಯಾನ ವಿಫಲವಾಗಿತ್ತು ಎಂದು ಸೋಷಿಯಲ್‌ ಮೀಡಿಯಾ ವೇದಿಕೆಗಳಲ್ಲಿ ಚರ್ಚೆ ನಡೆದಿತ್ತು.

ಅದಾದ ನಂತರ ಪ್ರಧಾನಿ ವಿಶ್ವಕಪ್‌ ಪಂದ್ಯಕ್ಕೆ ಹೋಗಲಿದ್ದಾರೆನ್ನುವ ಸುದ್ದಿ ಹರಡುತ್ತಿದ್ದಂತೆ ಮತ್ತೆ ಪನೌತಿ ಎನ್ನುವ ಶಬ್ಧ ಮುನ್ನೆಲೆಗೆ ಬಂದು ವಿಶ್ವಕಪ್‌ ಮುಗಿಯುವ ವೇಳೆಗೆ ಅದು ಟ್ವಿಟರ್‌ (ಈಗಿನ ಎಕ್ಸ್)‌ ವೇದಿಕೆ ಟ್ರೆಂಡಿಂಗಿನಲ್ಲಿತ್ತು. ರಾಹುಲ್‌ ಗಾಂಧಿ ಕೂಡಾ ಮೋದಿಯ ಹೆಸರನ್ನು ಬಳಸದೆ “ಪಂದ್ಯಕ್ಕೆ ಪನೌತಿಗಳು ಹೋಗಿದ್ದರಿಂದ ಪಂದ್ಯದಲ್ಲಿ ಸೋಲಾಯಿತು” ಎಂದು ಹೇಳಿದ ನಂತರವಂತೂ ಈ ಪದ ಇನ್ನಷ್ಟು ವೈರಲ್‌ ಆಗತೊಡಗಿತು ಮತ್ತು ಘಟಾನುಘಟಿಗಳು ಈ ಪದವನ್ನು ಬಳಸಿ ಟ್ವೀಟ್‌ ಮಾಡತೊಡಗಿದರು. ಇದರೊಂದಿಗೆ ಬಹುತೇಕೆ ಈ ಪದ ಸೋಷಿಯಲ್‌ ಮೀಡಿಯಾವನ್ನು ಎರಡು ಮೂರು ದಿನಗಳ ಕಾಲ ಆಳಿತು.

ಪ್ರಸ್ತುತ ಚಿತ್ರನಟ ಹುಲಿ ಕಿಶೋರ್‌ ಅವರು ವಿಷಯಕ್ಕೆ ಪ್ರತಿಕ್ರಿಯಿಸುವುದರೊಂದಿಗೆ ಮತ್ತೊಮ್ಮೆ ಪನೌತಿ ಪದ ಮುನ್ನೆಲೆಗೆ ಬಂದಿದೆ. ಸಾಮಾನ್ಯವಾಗಿ ಸಾಮಾಜಿಕ ಮತ್ತು ರಾಜಕೀಯ ವಿಷಯಗಳಿಗೆ ಪ್ರತಿಕ್ರಿಯಿಸುವ ಕೆಲವೇ ನಟರಲ್ಲಿ ಒಬ್ಬರಾದ ಕಿಶೋರ್‌ ಈ ಕುರಿತು ತಮ್ಮ ಫೇಸ್ಬುಕ್ ಖಾತೆಯಲ್ಲಿ‌ ಬರೆದುಕೊಂಡಿದ್ದಾರೆ.

ಈ ಕುರಿತು ಪೋಸ್ಟ್‌ ಮಾಡಿರುವ ಅವರು, ” ಪನೌತಿಯಿಂದ ಸೋಲುವುದು ಎಷ್ಟು ಸುಳ್ಳೊ….
ಜೈಶ್ರೀರಾಮನಿಂದ ಗೆಲ್ಲುವುದೂ ಅಷ್ಟೇ ಸುಳ್ಳು..
ಆದರೆ ಇಂದಿನ ವ್ಯವಸ್ಥೆಯ ವ್ಯಂಗ್ಯವೇನೆಂದರೆ ಸಜ್ಜನರ ಆಟ ಎಂದು ಕರೆಯಲ್ಪಡುವ ಕ್ರಿಕೆಟ್ಟಿನಲ್ಲೂ, ಪ್ರೇಕ್ಷಕರನ್ನು ಜೈ ಶ್ರೀರಾಮ್ ಎಂದು ಧಾರ್ಮಿಕ ಘೋಷಣೆಗಳನ್ನು ಕೂಗುವ ಮಟ್ಟಕ್ಕೆ ತಂದಿಟ್ಟವರು ಪನೌತಿಯ ಪ್ರಭಾವವನ್ನೂ ಹೆಗಲಿಗೇರಿಸಿಕೊಳ್ಳಲೇಬೇಕು..
ಹೊಲಸು ಧರ್ಮಾಂಧ ರಾಜಕಾರಣದಿಂದ ಮೂಢನಂಬಿಕೆಯ ಕೂಪದಲ್ಲಿ ತಳ್ಳಲ್ಪಟ್ಟು ಮೂರ್ಖರಾದ ನಾವು ತಿಳಿದುಕೊಳ್ಳಬೇಕಿರುವುದು .. ನಿಜವಾದ ಪನೌತಿ ಈ ದೇಶವನ್ನು ವಿನಾಶದಂಚಿಗೆ ತಳ್ಳುತ್ತಿರುವ ಧರ್ಮಾಂಧತೆ, ಮೂಢನಂಬಿಕೆ, ಬಡತನ, ಅಸಮಾನತೆ, ನಿರುದ್ಯೊಗ ಮತ್ತು ಭ್ರಷ್ಟಾಚಾರಗಳು ಎಂದು….” ಎಂದು ಬರದಿದ್ದಾರೆ.

https://www.facebook.com/story.php?story_fbid=pfbid02wPMer5tRWz5MJ7vBYCk6KpvdLpCpb1R66kM5GrT3DxE3GNNrmLkkPucjexFT8SQ3l&id=1655906036&mibextid=Nif5oz

ಈ ಕುರಿತು ಈಗಾಗಲೇ ಪರ-ವಿರೋಧ ಕಮೆಂಟುಗಳ ಸುರಿಮಳೆ ಅವರ ಪೋಸ್ಟಿನಲ್ಲಿ ಆರಂಭಗೊಂಡಿದೆ.