ಬೆಂಗಳೂರು: ದರ್ಶನ್ ಜೈಲು ಪಾಲಾದ ದಿನದಿಂದಲೂ ದರ್ಶನ್ ಕೃತ್ಯದ ಕುರಿತು ಪರ ವಿರೋಧ ಚರ್ಚೆಗಳು ನಡೆಯುತ್ತಲೇ ಇವೆ. ಜನಸಾಮಾನ್ಯರ ನಡುವೆಯೂ ಈ ವಿಚಾರದಲ್ಲಿ ಎರಡು ಗುಂಪುಗಳಾಗಿದ್ದು, ಕೆಲವರು ದರ್ಶನ್ ಸರಿಯೆಂದರೆ ಇನ್ನೂ ಕೆಲವರು ದರ್ಶನ್ ಮಾಡಿದ್ದು ತಪ್ಪು ಎನ್ನುತ್ತಿದ್ದಾರೆ.
ಇತ್ತ ಚಿತ್ರರಂಗ ಮಾತ್ರ ದರ್ಶನ್ ಅವರ ಬೆಂಬಲಕ್ಕೆ ಗಟ್ಟಿಯಾಗಿ ನಿಂತಿದೆ. ಈಗಾಗಲೇ ಹಲವು ನಟಿಯರು ದರ್ಶನ್ ಪರ ಹೇಳಿಕೆ ನೀಡಿದ್ದಾರೆ. ನಟಿ ಭಾವನಾ ರಾಮಣ್ಣ ಅವರಂತೂ ಬಹಳ ಭಾವುಕರಾಗಿ ದರ್ಶನ್ ಮಾತನಾಡಿದ್ದರು. ಅವರು ದರ್ಶನ್ ಅವರೊಂದಿಗೆ ಚಿಂಗಾರಿ ಸಿನೆಮಾದಲ್ಲಿ ನಟಿಸಿದ್ದರು.
ಈ ನಡುವೆ ದರ್ಶನ್ ಅವರೊಂದಿಗೆ ಮುಖ್ಯನಟಿಯಾಗಿ ಚಿತ್ರಗಳಲ್ಲಿ ನಟಿಸಿರುವ ರಚಿತಾ ರಾಮ್ ಅವರು ಇಂದು ದರ್ಶನ್ ಅವರನ್ನು ಜೈಲಿನಲ್ಲಿ ಭೇಟಿಯಾದರು.
ಪ್ರಸ್ತುತ ಪರಪ್ಪನ ಅಗ್ರಹಾರ ಜೈಲಿನಲ್ಲಿರುವ ದರ್ಶನ್ ರೇಣುಕಾಸ್ವಾಮಿ ಎನ್ನುವ ವ್ಯಕ್ತಿಯ ಕೊಲೆ ಪ್ರಕರಣದ ಆರೋಪಿ.
ದರ್ಶನ್ ಅವರ ಭೇಟಿಯ ನಂತರ ಮಾಧ್ಯಮಗಳಿಗೆ ಪ್ರತಿಕ್ರಿಯಿಸಿದ ರಚಿತಾ ರಾಮ್ “ರಾಜನನ್ನು ರಾಜನ ಥರ ನೋಡೋಕೆ ಇಷ್ಟ. ಜೈಲಿನಲ್ಲಿ ಈ ಸ್ಥಿತಿಯಲ್ಲಿ ಅವರನ್ನು ನೋಡಲು ಕಷ್ಟವಾಗುತ್ತೆ” ಎಂದು ಹೇಳಿದರು.
“ಜೈಲಿನಲ್ಲಿ ಅವರನ್ನು ನೋಡಿದಾಕ್ಷಣ ನಾವೆಲ್ಲರೂ ಭಾವುಕರಾದೆವು. ಅವರೇ ನಮಗೆ ಸಮಾಧಾನ ಮಾಡಿದರು. ಆರಾಮವಾಗಿ, ಆರೋಗ್ಯವಾಗಿ ಇದ್ದೇನೆ ಎಂದು ದರ್ಶನ್ ಹೇಳಿದ್ದಾರೆ. ಎಲ್ಲರೂ ಅವರನ್ನು ತುಂಬಾ ಮಿಸ್ ಮಾಡಿಕೊಳ್ಳುತ್ತಿದ್ದೇವೆ. ನಾವೆಲ್ಲರೂ ನಿಮ್ಮ ಬರುವಿಕೆಗೆ ಕಾಯುತಿದ್ದೇವೆ ಎಂದು ಹೇಳಿಬಂದಿದ್ದೇನೆ. ದರ್ಶನ್ ಸರ್ ಆದಷ್ಟು ಬೇಗ ಹೊರ ಬರುತ್ತಾರೆ. ಕಾನೂನಿನ ಮೇಲೆ ವಿಶ್ವಾಸವಿದೆ” ಎಂದು ಅವರು ಹೇಳಿದರು.
ಮುಂದುವರೆದು ಮಾತನಾಡಿದ ಅವರು, “ನಾನು ದರ್ಶನ್ ಅವರ ಬ್ಯಾನರ್ ಮೂಲಕ ಚಿತ್ರರಂಗಕ್ಕೆ ಪರಿಚಯವಾದವಳು. ನನಗೆ ಇವತ್ತು ಏನೇ ಹೆಸರು ಇದ್ದರೂ ಅದು ಅವರಿಂದ ಸಿಕ್ಕಿದೆ. ಅವರು ಅವಕಾಶ ಕೊಟ್ಟಿದ್ದಕ್ಕೆ ನಾನು ಬಿಂದ್ಯಾ ರಾಮ್ ಆಗಿದ್ದವಳು ಇಂದು ರಚಿತಾ ರಾಮ್ ಆಗಿ ಬೆಳೆದಿದ್ದೇನೆ. ನಾನು ಯಾವತ್ತೂ ಅವರ ಕುಟುಂಬಕ್ಕೆ ಆಭಾರಿ” ಎಂದು ಭಾವುಕವಾಗಿ ನುಡಿದರು.
