ಹೊಸದಿಲ್ಲಿ, ಸೆಪ್ಟೆಂಬರ್ 23: ನಮಗೆ ಯಾವುದಾದರೂ ಕಾಯಿಲೆ ಬಂದರೆ, ದೇಹದ ಆಂತರಿಕ ಅಂಗಗಳಿಗೆ ಸೋಂಕು ತಗುಲಿದರೆ, ‘ಆ್ಯಂಟಿಬಯೋಟಿಕ್’ಗಳು ನಮ್ಮನ್ನು ಅವುಗಳಿಂದ ಪಾರು ಮಾಡುತ್ತವೆ.
ಆದರೆ, ಈ ಔಷಧಗಳ ಅತಿಯಾದ ಬಳಕೆಯಿಂದಾಗಿ ಔಷಧಗಳು ಸಮಯಕ್ಕೆ ಸರಿಯಾಗಿ ಕೆಲಸ ಮಾಡದಂತಹ ಪರಿಸ್ಥಿತಿ ಉಂಟಾಗಿದೆ ಎಂದು ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿ (ಐಸಿಎಂಆರ್) ಇತ್ತೀಚಿನ ವರದಿ ಬಹಿರಂಗಪಡಿಸಿದೆ.
ಆ್ಯಂಟಿಬಯೋಟಿಕ್ ಔಷಧಿಗಳ ದುರುಪಯೋಗವು ರೋಗಕಾರಕಗಳ ಸಾಮರ್ಥ್ಯವನ್ನು ಹೆಚ್ಚಿಸಿದೆ. ಈ ಹಿನ್ನೆಲೆಯಲ್ಲಿ ಮೂತ್ರನಾಳದ ಸೋಂಕುಗಳು, ರಕ್ತನಾಳಗಳ ಸೋಂಕುಗಳು, ಟೈಫಾಯಿಡ್ ಮತ್ತು ನ್ಯುಮೋನಿಯಾಗಳಿಗೆ ಸಾಮಾನ್ಯ ಆ್ಯಂಟಿಬಯೋಟಿಕ್ ಔಷಧಿಗಳು ಕೆಲಸ ಮಾಡುವುದಿಲ್ಲ.
ರೋಗಕಾರಕಗಳಲ್ಲಿ ಔಷಧ ಪ್ರತಿರೋಧ ಗುಣ ಬೆಳೆದಿದೆ ಎಂದು ವರದಿ ಹೇಳುತ್ತದೆ. ಈ ಕಾಯಿಲೆಗಳನ್ನು ಗುಣಪಡಿಸುವುದು ಮುಂದಿರುವ ಸವಾಲಾಗಿದೆ ಎಂದು ವರದಿ ತಿಳಿಸಿದೆ. ದೇಶದಲ್ಲಿ ಆ್ಯಂಟಿಬಯೋಟಿಕ್ ಬಗ್ಗೆ ICMR ಕಡೆಯಿಂದ ಇದು 7 ನೇ ವರದಿ.
