ದೆಹಲಿ: ಸುಪ್ರೀಂ ಕೋರ್ಟ್ ರಕ್ಷಣೆ ನೀಡಿದ ಪತ್ರಕರ್ತರಿಗೆ ಅಸ್ಸಾಂ ಪೊಲೀಸರು ಸಮನ್ಸ್ ನೀಡಿರುವುದು ಪತ್ರಿಕಾ ಸ್ವಾತಂತ್ರ್ಯ ಮತ್ತು ಪ್ರಜಾಪ್ರಭುತ್ವದ ಮೇಲಿನ ದಾಳಿ. ಆದ್ದರಿಂದ ಈ ಪ್ರಕರಣಗಳನ್ನು ಕೂಡಲೇ ಹಿಂಪಡೆಯಬೇಕು ಎಂದು 15 ಸಂಸದರು ಆಗ್ರಹಿಸಿದ್ದಾರೆ.
ಭಾರತೀಯ ನ್ಯಾಯ ಸಂಹಿತೆ (ಬಿಎನ್‌ಎಸ್‌) ಯ ಸೆಕ್ಷನ್ 152 ಅನ್ನು ದುರುಪಯೋಗಪಡಿಸಿಕೊಂಡು ‘ದಿ ವೈರ್’ ಸಂಪಾದಕರಾದ ಸಿದ್ಧಾರ್ಥ್ ವರದರಾಜನ್, ಕರಣ್ ಥಾಪರ್ ಮತ್ತು ಇತರ ಪತ್ರಕರ್ತರ ಮೇಲೆ ಹಲವು ಕ್ರಿಮಿನಲ್ ಪ್ರಕರಣಗಳನ್ನು ದಾಖಲಿಸಿರುವ ಅಸ್ಸಾಂ ಪೊಲೀಸರ ಕ್ರಮದ ಬಗ್ಗೆ 15 ಸಂಸದರು ತೀವ್ರ ಆತಂಕ ವ್ಯಕ್ತಪಡಿಸಿದ್ದಾರೆ. ಈ ಆರೋಪಗಳಲ್ಲಿ ಜೀವಾವಧಿ ಶಿಕ್ಷೆ ವಿಧಿಸುವ ಸಾಧ್ಯತೆ ಇದೆ ಎಂದು ಅವರು ಹೇಳಿದ್ದಾರೆ.
ಈ ಬಗ್ಗೆ ಅವರು ಜಂಟಿ ಹೇಳಿಕೆಯನ್ನು ಬಿಡುಗಡೆ ಮಾಡಿದ್ದಾರೆ. ಸುಪ್ರೀಂ ಕೋರ್ಟ್ ರಕ್ಷಣೆ ನೀಡಿದ ನಂತರವೂ ಈ ರೀತಿ ಸಮನ್ಸ್ ನೀಡಿರುವುದು ಪತ್ರಿಕಾ ಸ್ವಾತಂತ್ರ್ಯ ಮತ್ತು ಪ್ರಜಾಪ್ರಭುತ್ವದ ಮೇಲೆ ಗಂಭೀರ ದಾಳಿಯಾಗಿದೆ ಎಂದು ಅವರು ಹೇಳಿಕೆಯಲ್ಲಿ ತಿಳಿಸಿದ್ದಾರೆ. ಅಸ್ಸಾಂನ ಬಿಜೆಪಿ ಸರ್ಕಾರವು ಸ್ವತಂತ್ರ ಧ್ವನಿಗಳನ್ನು ಬೆದರಿಸಲು ಮತ್ತು ಟೀಕೆಗಳನ್ನು ಹತ್ತಿಕ್ಕಲು, ದೇಶದ್ರೋಹ ಕಾನೂನುಗಳಾಗಿ ಮಾರ್ಪಟ್ಟಿರುವ ಕಾನೂನುಗಳನ್ನು ದುರುಪಯೋಗಪಡಿಸಿಕೊಳ್ಳುತ್ತಿದೆ ಎಂದು ಅವರು ಟೀಕಿಸಿದ್ದಾರೆ.
ಈ ಕ್ರಮಗಳನ್ನು ತಾವು ತೀವ್ರವಾಗಿ ಖಂಡಿಸುತ್ತೇವೆ ಮತ್ತು ಅವುಗಳನ್ನು ತಕ್ಷಣವೇ ಹಿಂಪಡೆಯಬೇಕೆಂದು ಆಗ್ರಹಿಸಿದರು. ತಪ್ಪಾದ ಉದ್ದೇಶದಿಂದ ದಾಖಲಿಸಲಾದ ಈ ಪ್ರಕರಣಗಳನ್ನು ಕೂಡಲೇ ವಾಪಸ್ ಪಡೆಯಬೇಕು ಮತ್ತು ಮಾಧ್ಯಮಗಳ ವಿರುದ್ಧ ಸೆಕ್ಷನ್ 152 ಅನ್ನು ಬಳಸುವುದನ್ನು ನಿಲ್ಲಿಸಬೇಕು ಎಂದು ಅವರು ಪೊಲೀಸರನ್ನು ಒತ್ತಾಯಿಸಿದರು.
ಈ ಹೇಳಿಕೆಗೆ ಸಹಿ ಹಾಕಿದವರಲ್ಲಿ ಸಿಪಿಎಂ ಸಂಸದರಾದ ಜಾನ್ ಬ್ರಿಟ್ಟಾಸ್, ಎ.ಎ. ರಹೀಮ್, ವಿ. ಸದಶಿವನ್, ಹಾಗೂ ಇತರ ಪಕ್ಷಗಳ ಸಂಸದರಾದ ಜೈರಾಮ್ ರಮೇಶ್, ತಿರುಚಿ ಶಿವ, ರಾಮ್‌ಗೋಪಾಲ್ ಯಾದವ್, ದಿಗ್ವಿಜಯ ಸಿಂಗ್, ಜಯಾ ಬಚ್ಚನ್, ರೇಣುಕಾ ಚೌಧರಿ, ಮುಕುಲ್ ವಾಸ್ನಿಕ್, ಶಕ್ತಿ ಸಿಂಗ್ ಗೋಹಿಲ್, ಸೈಯದ್ ನಜೀರ್ ಹುಸೇನ್, ಜಾವೇದ್ ಅಲಿ ಖಾನ್, ಆರ್. ಗಿರಿರಾಜನ್ ಮತ್ತು ಅನಿಲ್ ಕುಮಾರ್ ಯಾದವ್ ಸೇರಿದ್ದಾರೆ.
