2006ರ ಮಾಲೆಗಾಂವ್ ಸ್ಫೋಟ ಪ್ರಕರಣ: ತನಿಖೆಯ ಹಾದಿ ತಪ್ಪಿದೆ, ಎನ್‌ಐಎ ವಿರುದ್ಧ ಬಾಂಬೆ ಹೈಕೋರ್ಟ್ ತೀವ್ರ ಆಕ್ರೋಶ

ಮುಂಬೈ: 2006ರ ಮಾಲೆಗಾಂವ್ ಸ್ಫೋಟ ಪ್ರಕರಣವು “ಡೆಡ್‌ ಎಂಡ್‌ ತಲುಪಿದಂತೆ ಕಾಣುತ್ತಿದೆ” ಎಂದು ಬಾಂಬೆ ಹೈಕೋರ್ಟ್ ಕಟುವಾಗಿ ಟೀಕಿಸಿದೆ. ಈ ಪ್ರಕರಣದಲ್ಲಿ ನಾಲ್ವರು ಆರೋಪಿಗಳನ್ನು ಖುಲಾಸೆಗೊಳಿಸಿರುವ ನ್ಯಾಯಾಲಯ, ಹಿಂದಿನ ತನಿಖಾ ಸಂಸ್ಥೆಗಳು ಕಲೆಹಾಕಿದ್ದ ಸಾಕ್ಷ್ಯಗಳನ್ನು “ಸಂಪೂರ್ಣವಾಗಿ ಕಡೆಗಣಿಸಿದ್ದಕ್ಕಾಗಿ” ರಾಷ್ಟ್ರೀಯ ತನಿಖಾ ದಳ (NIA) ವಿರುದ್ಧ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದೆ.

ರಾಜೇಂದ್ರ ಚೌಧರಿ, ಧಾನ್ ಸಿಂಗ್, ಮನೋಹರ್ ರಾಮ್ ಸಿಂಗ್ ನರ್ವಾರಿಯಾ ಮತ್ತು ಲೋಕೇಶ್ ಶರ್ಮಾ ಬಿಡುಗಡೆಗೊಂಡ ಆರೋಪಿಗಳು. ಇವರ ವಿರುದ್ಧ ವಿಚಾರಣೆ ಮುಂದುವರಿಸಲು ಅಗತ್ಯವಾದ ಸಾಕ್ಷ್ಯಗಳಿಲ್ಲ ಎಂದು ನ್ಯಾಯಾಲಯ ಹೇಳಿದೆ. ಈ ಪ್ರಕರಣದಲ್ಲಿ ಒಟ್ಟು 31 ಮಂದಿ ಮೃತಪಟ್ಟಿದ್ದರೂ, ಈ ಭೀಕರ ಕೃತ್ಯಕ್ಕೆ ನಿಜವಾದ ಹೊಣೆಗಾರರು ಯಾರು ಎಂಬ ಪ್ರಶ್ನೆಗೆ ಉತ್ತರ ಸಿಗದಂತಾಗಿದೆ.

ಈ ಪ್ರಕರಣದಲ್ಲಿ ತನಿಖಾ ಸಂಸ್ಥೆಗಳ ವರದಿಗಳು ತದ್ವಿರುದ್ಧವಾಗಿವೆ. ಆರಂಭದಲ್ಲಿ ಎಟಿಎಸ್ ತನಿಖೆಯಲ್ಲಿ ಒಂಬತ್ತು ಮಂದಿ ಮುಸ್ಲಿಂ ಯುವಕರ ಕೈವಾಡವಿದೆ ಎನ್ನಲಾಗಿತ್ತು. ಆದರೆ ನಂತರ ಬಂದ ಎನ್‌ಐಎ, ಇದಕ್ಕೆ ವಿರುದ್ಧವಾಗಿ ಬಲಪಂಥೀಯ ಉಗ್ರಗಾಮಿಗಳ ಕೈವಾಡವಿದೆ ಎಂದು ಆರೋಪಿಸಿತ್ತು. ಈ ಎರಡು ವಿರೋಧಾಭಾಸದ ವರದಿಗಳನ್ನು ಹೊಂದಾಣಿಕೆ ಮಾಡುವುದು ಅಸಾಧ್ಯ ಎಂದು ಹೈಕೋರ್ಟ್ ಅಭಿಪ್ರಾಯಪಟ್ಟಿದೆ.

ಎಟಿಎಸ್ ಕಲೆಹಾಕಿದ್ದ ಸಾಕ್ಷ್ಯಗಳನ್ನು ವಿಚಾರಣಾ ನ್ಯಾಯಾಲಯ ಏಕೆ ಕಡೆಗಣಿಸಿತು ಎಂಬುದಕ್ಕೆ ಯಾವುದೇ ಸಮರ್ಥನೆಯಿಲ್ಲ ಎಂದು ಹೈಕೋರ್ಟ್ ಕಿಡಿಕಾರಿದೆ. ಎನ್‌ಐಎ ಕೇವಲ ಸ್ವಾಮಿ ಅಸೀಮಾನಂದ ಅವರ ಹೇಳಿಕೆಗಳನ್ನು ನಂಬಿತ್ತು, ಆದರೆ ಅವರು ನಂತರ ಆ ಹೇಳಿಕೆಗಳನ್ನು ಹಿಂಪಡೆದಿದ್ದರು. ಹೊಸ ಸಾಕ್ಷ್ಯಗಳನ್ನು ಸಂಗ್ರಹಿಸುವ ಬದಲು ಹಳೆಯ ಸಾಕ್ಷ್ಯಗಳನ್ನೇ ನಿರ್ಲಕ್ಷಿಸಿದ್ದನ್ನು ನ್ಯಾಯಾಲಯ ಪ್ರಶ್ನಿಸಿದೆ.

ವಿಶೇಷ ನ್ಯಾಯಾಲಯ ಆರೋಪಗಳನ್ನು ರೂಪಿಸುವಾಗ ‘ತನ್ನ ವಿವೇಚನೆಯನ್ನು ಬಳಸಿಲ್ಲ’ ಎಂದು ಹೈಕೋರ್ಟ್ ಅಸಮಾಧಾನ ವ್ಯಕ್ತಪಡಿಸಿದೆ. ಕಳೆದ ವರ್ಷವಷ್ಟೇ 2008ರ ಮಲೆಗಾಂವ್ ಸ್ಫೋಟ ಪ್ರಕರಣದಲ್ಲಿ ಸಾದ್ವಿ ಪ್ರಜ್ಞಾ ಸಿಂಗ್ ಠಾಕೂರ್ ಮತ್ತು ಇತರರು ಖುಲಾಸೆಗೊಂಡಿದ್ದರು. ಒಟ್ಟಾರೆಯಾಗಿ, 2006ರ ಪ್ರಕರಣವು ಇದೀಗ ತಾರ್ಕಿಕ ಅಂತ್ಯ ಕಾಣದ ಗೊಂದಲದ ಸ್ಥಿತಿಯಲ್ಲಿದೆ.