₹22,000 ಕೋಟಿ ಸಬ್ಸಿಡಿ ಅಕ್ಕಿ ಅಕ್ರಮ ಮಾರಾಟ: ದೆಹಲಿ ಸರ್ಕಾರದ ವಿರುದ್ಧ ಆಪ್ ಆರೋಪ

ದೆಹಲಿಯ ಬಿಜೆಪಿ ಸರ್ಕಾರದ ವಿರುದ್ಧ ಆಮ್ ಆದ್ಮಿ ಪಾರ್ಟಿ (ಆಪ್) ಗಂಭೀರ ಆರೋಪಗಳನ್ನು ಮಾಡಿದ್ದು, ₹22,000 ಕೋಟಿ ಮೌಲ್ಯದ ಬೃಹತ್ ಅಕ್ಕಿ ಹಗರಣಕ್ಕೆ ಬಿಜೆಪಿ ಸರ್ಕಾರ ಮುನ್ನುಡಿ ಬರೆದಿದೆ ಎಂದು ದೂರಿದೆ.

ಆಮ್ ಆದ್ಮಿ ಪಾರ್ಟಿಯ ದೆಹಲಿ ಅಧ್ಯಕ್ಷ ಸೌರಭ್ ಭಾರದ್ವಾಜ್ ಭಾನುವಾರ ತಮ್ಮ ಎಕ್ಸ್ (X) ಖಾತೆಯಲ್ಲಿ ಈ ಕುರಿತು ಪೋಸ್ಟ್ ಮಾಡಿದ್ದಾರೆ. ಬಡ ಜನರಿಗೆ ತಲುಪಬೇಕಿದ್ದ ಅಕ್ಕಿಯನ್ನು ಅಕ್ರಮವಾಗಿ ಬೇರೆಡೆಗೆ ತಿರುಗಿಸುವ ಮೂಲಕ ಬಿಜೆಪಿ ಸರ್ಕಾರ ಬೃಹತ್ ಹಗರಣಕ್ಕೆ ನಾಂದಿ ಹಾಡಿದೆ ಎಂದು ಅವರು ವಿಮರ್ಶಿಸಿದ್ದಾರೆ.

ಸೌರಭ್ ಭಾರದ್ವಾಜ್ ನೀಡಿರುವ ವಿವರಗಳ ಪ್ರಕಾರ, ಅಸ್ಸಾಂ ಮೂಲದ ಕಾರ್ಪೊರೇಷನ್ ಒಂದರ ಜೊತೆಗೂಡಿ ದೆಹಲಿ ಸರ್ಕಾರವು ಒಪ್ಪಂದವೊಂದಕ್ಕೆ ಬಂದಿದೆ. ಈ ಸರ್ಕಾರ ಮತ್ತು ಕಾರ್ಪೊರೇಷನ್ ಸೇರಿ ಎಫ್‌ಸಿಐಗೆ (ಫುಡ್ ಕಾರ್ಪೊರೇಷನ್ ಆಫ್ ಇಂಡಿಯಾ) ಪತ್ರ ಬರೆದಿವೆ. ದೆಹಲಿಯ ಬಡ ಜನರಿಗೆ ವಿತರಿಸಲು ಮುಂದಿನ ಮೂರು ವರ್ಷಗಳ ಕಾಲ ಪ್ರತಿವಾರ 31,000 ಮೆಟ್ರಿಕ್ ಟನ್ ಅಕ್ಕಿ ನೀಡುವಂತೆ ಕೋರಿವೆ. ವಾರಕ್ಕೆ ಪೂರೈಕೆಯಾಗುವ ಈ ಅಕ್ಕಿಯ ಮೌಲ್ಯ ಸುಮಾರು ₹143 ಕೋಟಿಯಷ್ಟಾಗುತ್ತದೆ.

ಒಪ್ಪಂದದಂತೆ ಎಫ್‌ಸಿಐ ಪ್ರತಿವಾರ ಈ ಅಕ್ಕಿಯನ್ನು ದೆಹಲಿ ಸರ್ಕಾರ ಮತ್ತು ಅಸ್ಸಾಂ ಕಾರ್ಪೊರೇಷನ್‌ಗೆ ಒದಗಿಸಬೇಕಿತ್ತು. ಆದರೆ, ಈ ಅಕ್ಕಿ ದೆಹಲಿಯ ಯಾವೊಬ್ಬ ಬಡವನಿಗೂ ತಲುಪುತ್ತಿಲ್ಲ ಎಂದು ಸೌರಭ್ ಆರೋಪಿಸಿದ್ದಾರೆ. ಬಡವರಿಗೆ ನೀಡುವ ಬದಲು ಈ ಅಕ್ಕಿಯನ್ನು ಹರಿಯಾಣದ ಖಾಸಗಿ ಸಂಸ್ಥೆಯೊಂದಕ್ಕೆ ನೀಡಲಾಗುತ್ತಿದ್ದು, ಇದರಿಂದ ಕೆಲವೇ ವ್ಯಕ್ತಿಗಳು ಲಾಭ ಮಾಡಿಕೊಳ್ಳುತ್ತಿದ್ದಾರೆ. ಹೀಗೆ ವಾರಕ್ಕೆ ₹143 ಕೋಟಿಯಂತೆ ಮೂರು ವರ್ಷಗಳಲ್ಲಿ ಒಟ್ಟು ₹22,000 ಕೋಟಿ ಮೌಲ್ಯದ ಸಬ್ಸಿಡಿ ಅಕ್ಕಿ ದುರುಪಯೋಗವಾಗಲಿದೆ ಎಂದು ಸೌರಭ್ ವಿವರಿಸಿದ್ದಾರೆ.

ಅಸ್ಸಾಂ ಕಾರ್ಪೊರೇಷನ್ ಜೊತೆಗೂಡಿ ದೆಹಲಿಯ ಬಿಜೆಪಿ ಸರ್ಕಾರವು ಈ ಭಾರಿ ಹಗರಣವನ್ನು ನಡೆಸುತ್ತಿದೆ ಎಂದು ಅವರು ಆರೋಪಿಸಿದ್ದಾರೆ. ಆದರೆ, ಈ ಆರೋಪಗಳ ಕುರಿತು ದೆಹಲಿ ಸರ್ಕಾರದಿಂದ ಇನ್ನೂ ಯಾವುದೇ ಅಧಿಕೃತ ಸ್ಪಷ್ಟನೆ ಬಂದಿಲ್ಲ. ದೆಹಲಿಯಲ್ಲಿ ಪ್ರಸ್ತುತ ರೇಖಾ ಗುಪ್ತಾ ನೇತೃತ್ವದ ಬಿಜೆಪಿ ಸರ್ಕಾರ ಆಡಳಿತ ನಡೆಸುತ್ತಿರುವುದು ಗಮನಾರ್ಹ.

ಮತ್ತೊಂದೆಡೆ, ದೆಹಲಿಯಲ್ಲಿ ನಡೆಯುತ್ತಿರುವ ‘ಎಸ್‍ಆರ್‌’ (SIR) ಪ್ರಕ್ರಿಯೆಯ ಕುರಿತೂ ಸೌರಭ್ ಭಾರದ್ವಾಜ್ ಗಂಭೀರ ಆರೋಪ ಮಾಡಿದ್ದು, ಹಲವು ಅರ್ಹ ಮತದಾರರ ಹೆಸರುಗಳನ್ನು ಎಸ್‍ಆರ್ ಹೆಸರಿನಲ್ಲಿ ಮತದಾರರ ಪಟ್ಟಿಯಿಂದ ತೆಗೆದುಹಾಕಲಾಗುತ್ತಿದೆ ಎಂದು ಆರೋಪಿಸಿದ್ದಾರೆ. ಈ ಕುರಿತು ಅವರು ದೆಹಲಿಯ ಮುಖ್ಯ ಚುನಾವಣಾಧಿಕಾರಿ (CEO) ಅಶೋಕ್ ಕುಮಾರ್ ಅವರನ್ನು ಭೇಟಿಯಾಗಿ ದೂರು ನೀಡಿದ್ದಾರೆ.