ದೇಶದ ಶೇ 55ರಷ್ಟು ಲಾರಿ ಚಾಲಕರಲ್ಲಿ ‘ದೃಷ್ಟಿ ದೋಷ’, ಶೇ. 57.4ರಷ್ಟು ಚಾಲಕರಿಗೆ ಅಧಿಕ ರಕ್ತದೊತ್ತಡ: ಐಐಟಿ ದೆಹಲಿ ವರದಿ

ದೆಹಲಿ: ಮಂಗಳವಾರ ಐಐಟಿ ದೆಹಲಿ ಬಿಡುಗಡೆ ಮಾಡಿದ ವರದಿಯ ಪ್ರಕಾರ, ದೇಶದಲ್ಲಿ ಶೇ 55.1 ರಷ್ಟು ಲಾರಿ ಚಾಲಕರು ದೃಷ್ಟಿಹೀನತೆಯನ್ನು ಹೊಂದಿದ್ದಾರೆ.

ಅವರಲ್ಲಿ ಶೇ. 53.3 ರಷ್ಟು ಜನರಿಗೆ ದೂರದೃಷ್ಟಿ ಮತ್ತು ಶೇ. 46.7 ರಷ್ಟು ಜನರಿಗೆ ಸಮೀಪದೃಷ್ಟಿ ದೋಷ ಇದೆ ಎಂದು ವರದಿ ವಿವರಿಸಿದೆ. ದೇಹದಲ್ಲಿನ ಕೊಬ್ಬಿನ ಪ್ರಮಾಣವನ್ನು ಸೂಚಿಸುವ ಬಾಡಿ ಮಾಸ್ ಇಂಡೆಕ್ಸ್ ಲೆಕ್ಕಾಚಾರದ ಪ್ರಕಾರ, ಶೇ. 44.3 ರಷ್ಟು ಜನರು ಅಧಿಕ ತೂಕ ಅಥವಾ ಅಧಿಕ ತೂಕಕ್ಕೆ ಹತ್ತಿರವಾಗಿದ್ದಾರೆ ಎಂದು ವರದಿ ಹೇಳಿದೆ.

ಶೇ. 57.4 ರಷ್ಟು ಲಾರಿ ಚಾಲಕರು ಅಧಿಕ ರಕ್ತದೊತ್ತಡ ಹೊಂದಿದ್ದಾರೆ ಮತ್ತು ಶೇ. 18.4 ರಷ್ಟು ಜನರು ಅಧಿಕ ರಕ್ತದ ಸಕ್ಕರೆ ಮಟ್ಟವನ್ನು (ಮಧುಮೇಹ) ಹೊಂದಿದ್ದಾರೆ ಎಂದು ಅದು ವಿವರಿಸಿದೆ.

ಉತ್ತರ ಪ್ರದೇಶ, ರಾಜಸ್ಥಾನ, ಮಧ್ಯಪ್ರದೇಶ, ಮಹಾರಾಷ್ಟ್ರ, ಕರ್ನಾಟಕ ಮತ್ತು ತಮಿಳುನಾಡು ರಾಜ್ಯಗಳಲ್ಲಿ 50,000 ಟ್ರಕ್ ಚಾಲಕರ ಮೇಲೆ ನಡೆಸಿದ ಅಧ್ಯಯನದ ಆಧಾರದ ಮೇಲೆ ಐಐಟಿ ದೆಹಲಿ ಈ ವರದಿಯನ್ನು ಬಿಡುಗಡೆ ಮಾಡಿದೆ.

ಶೇ. 33.9 ರಷ್ಟು ಚಾಲಕರು ಮಧ್ಯಮ ಒತ್ತಡದಲ್ಲಿದ್ದರು ಮತ್ತು ಶೇ. 2.9 ರಷ್ಟು ಚಾಲಕರು ತೀವ್ರ ಒತ್ತಡದಲ್ಲಿದ್ದರು. ಅವರಿಗೆ ಮನೋವೈದ್ಯಕೀಯ ಚಿಕಿತ್ಸೆಯ ಅಗತ್ಯವಿದೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ.

ದೇಶದಲ್ಲಿ ಸರಕು ಸಾಗಣೆಗೆ ಟ್ರಕ್‌ಗಳು ಬೆನ್ನೆಲುಬು. ಆರ್ಥಿಕತೆಗೆ ಅತ್ಯಂತ ನಿರ್ಣಾಯಕ ಸರಕು ಸಾಗಣೆ ವ್ಯವಸ್ಥೆಯನ್ನು ನಿರ್ವಹಿಸುವ ಚಾಲಕರು ಅತ್ಯಂತ ಕಷ್ಟಕರವಾದ ಜೀವನಶೈಲಿ ಸಮಸ್ಯೆಗಳನ್ನು ಎದುರಿಸುತ್ತಾರೆ.

ಅನಿಯಮಿತ ಕೆಲಸದ ಸಮಯ ಮತ್ತು ದೀರ್ಘಕಾಲದವರೆಗೆ ಕುಟುಂಬದಿಂದ ದೂರವಿರುವುದು ಮುಂತಾದ ಸಮಸ್ಯೆಗಳನ್ನು ಎದುರಿಸುವುದರ ಜೊತೆಗೆ, ಅವರು ಹಲವಾರು ಆರೋಗ್ಯ ಸಮಸ್ಯೆಗಳಿಂದ ಬಳಲುತ್ತಿದ್ದಾರೆಂದು ವರದಿ ಹೇಳಿದೆ.