13 ವರ್ಷಗಳ ಹಿಂದೆ ಭಾರತಕ್ಕೆ ಬಂದಿದ್ದ 9 ಮಂದಿ ಬಾಂಗ್ಲಾ ನುಸುಳುಕೋರರ ಬಂಧನ

ಬಾಂಗ್ಲಾದೇಶದ ಮೂಲಕ ಅಕ್ರಮವಾಗಿ ದೇಶಕ್ಕೆ ಪ್ರವೇಶಿಸಿದ ವಿದೇಶಿ ಪ್ರಜೆಗಳೆಂಬ ಆರೋಪದ ಮೇಲೆ ಐದು ಮಕ್ಕಳು ಸೇರಿದಂತೆ ಒಂಬತ್ತು ಜನರನ್ನು ಅಸ್ಸಾಂನ ಕ್ಯಾಚರ್ ಜಿಲ್ಲಾ ಪೊಲೀಸರು ಬಂಧಿಸಿದ್ದಾರೆ.

ಮಂಗಳವಾರ ಸಂಜೆ ಕಟಿಗೋರಾ ಪ್ರದೇಶದಿಂದ ಶಂಕಿತರನ್ನು ಬಂಧಿಸಲಾಗಿದೆ ಎಂದು ಕ್ಯಾಚರ್ ಹಿರಿಯ ಪೊಲೀಸ್ ವರಿಷ್ಠಾಧಿಕಾರಿ (ಎಸ್‌ಎಸ್‌ಪಿ) ನುಮಲ್ ಮಹಾಟ್ಟಾ ತಿಳಿಸಿದ್ದಾರೆ.

“ಅವರು ಹಲವು ವರ್ಷಗಳಿಂದ ಭಾರತದಲ್ಲಿ ವಾಸಿಸುತ್ತಿದ್ದಾರೆ. ಇತ್ತೀಚೆಗೆ, ಅವರು ಈ ಪ್ರದೇಶದಲ್ಲಿ ವಾಸಿಸುವ ಉದ್ದೇಶದಿಂದ ಇಲ್ಲಿಗೆ ಪ್ರಯಾಣಿಸಿದರು. ಅವರು ಗಡಿ ದಾಟಲು ಪ್ರಯತ್ನಿಸಲಿಲ್ಲ, ಆದರೆ ಅವರು ಇಲ್ಲಿ ನೆಲೆಸುವ ಮೊದಲೇ ನಮ್ಮ ತಂಡ ಅವರನ್ನು ತಡೆದಿದೆ” ಎಂದು ಮಹಾಟ್ಟಾ ಹೇಳಿದರು.

ಅವರು ಮ್ಯಾನ್ಮಾರ್‌ನ ರೋಹಿಂಗ್ಯಾ ಸಮುದಾಯದ ಸದಸ್ಯರೆಂದು ಶಂಕಿಸಲಾಗಿದ್ದು, ಸುಮಾರು 13 ವರ್ಷಗಳ ಹಿಂದೆ ಬಾಂಗ್ಲಾದೇಶದ ಮೂಲಕ ದೇಶವನ್ನು ಪ್ರವೇಶಿಸಿದ್ದರು ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ. ಇಬ್ಬರು ಪುರುಷರು, ಇಬ್ಬರು ಮಹಿಳೆಯರು, ಒಬ್ಬ ಹದಿಹರೆಯದ ಹುಡುಗಿ ಮತ್ತು ನಾಲ್ವರು ಮಕ್ಕಳನ್ನು ಒಳಗೊಂಡ ಈ ಗುಂಪು ಭಾರತದ ವಿವಿಧ ಭಾಗಗಳಲ್ಲಿ ವಾಸಿಸುತ್ತಿತ್ತು. ಅವರು ಸೋಮವಾರ ಹೈದರಾಬಾದ್‌ನಿಂದ ಹಿಲಾರಾ ರೈಲು ನಿಲ್ದಾಣಕ್ಕೆ ಬಂದರು, ಆದರೆ ಕಟಿಗೋರಾದ ಸ್ಥಳೀಯ ನಿವಾಸಿಗಳು ಅವರನ್ನು ಗಮನಿಸಿದರು.

ಈ ಅಪರಿಚಿತ ಗುಂಪು ರೋಹಿಂಗ್ಯಾ ಭಾಷೆಯನ್ನು ಹೋಲುವ ಭಾಷೆಯಲ್ಲಿ ಮಾತನಾಡುವುದನ್ನು ಕೇಳಿದಾಗ ತಮಗೆ ಅನುಮಾನ ಬಂತು ಎಂದು ಅವರಲ್ಲಿ ಕೆಲವರು ಪೊಲೀಸರಿಗೆ ತಿಳಿಸಿದ್ದಾರೆ.

ಬಂಧಿತರು ಸುಮಾರು 13 ವರ್ಷಗಳ ಹಿಂದೆ ಬಾಂಗ್ಲಾದೇಶದಿಂದ ಭಾರತಕ್ಕೆ ಪ್ರವೇಶಿಸಿ ಜಮ್ಮು ಮತ್ತು ಕಾಶ್ಮೀರ ಮತ್ತು ತೆಲಂಗಾಣ ಸೇರಿದಂತೆ ಕೆಲ ರಾಜ್ಯಗಳಲ್ಲಿ ಕೆಲಸ ಮಾಡಿರುವುದಾಗಿ ಪೊಲೀಸರಿಗೆ ತಿಳಿಸಿದ್ದಾರೆ.