ಪ್ರತಿ 10 ನಿಮಿಷಕ್ಕೆ ಒಬ್ಬ ಮಹಿಳೆ ತನ್ನ ಆಪ್ತರಿಂದಲೇ ಕೊಲೆಯಾಗುತ್ತಿದ್ದಾಳೆ: ವಿಶ್ವಸಂಸ್ಥೆ ವರದಿಯಲ್ಲಿ ಬಹಿರಂಗ

ನ್ಯೂಯಾರ್ಕ್: ಹೆಣ್ಣುಮಕ್ಕಳು ಮತ್ತು ತಾಯಂದಿರಿಗೆ ಮನೆಯೊಳಗೂ ರಕ್ಷಣೆ ಇಲ್ಲ ಎಂದು ವಿಶ್ವಸಂಸ್ಥೆಯ ವರದಿಯು ತಿಳಿಸಿದೆ.

ಯುನೆಟೆಡ್ ನೇಷನ್ಸ್ ಆಫೀಸ್ ಆನ್ ಡ್ರಗ್ಸ್ ಅಂಡ್ ಕ್ರೈಂ (UNODC) ಮತ್ತು ವಿಶ್ವಸಂಸ್ಥೆಯ ಮಹಿಳಾ ವಿಭಾಗವು ಸೋಮವಾರ ಬಿಡುಗಡೆ ಮಾಡಿದ ವರದಿಯಲ್ಲಿ ಮಹಿಳೆಯರ ಮತ್ತು ಹೆಣ್ಣುಮಕ್ಕಳ ಹತ್ಯೆಗಳ ಕುರಿತು ಹಲವು ಮಹತ್ವದ ಅಂಶಗಳು ಬಹಿರಂಗಗೊಂಡಿವೆ.

2024 ರಲ್ಲಿ ಒಟ್ಟು 83,000 ಮಹಿಳೆಯರು ಮತ್ತು ಯುವತಿಯರು ಪುರುಷರ ಕೈಯಲ್ಲಿ ಕೊಲೆಯಾಗಿದ್ದಾರೆ. ಈ ಹತ್ಯೆಗಳಲ್ಲಿ 60 ಪ್ರತಿಶತದಷ್ಟು (60%) ಹತ್ಯೆಗಳು ಸಂತ್ರಸ್ತರಿಗೆ ಅತ್ಯಂತ ಆಪ್ತರಾದವರೇ ಮಾಡಿದ್ದಾರೆ ಎಂದು ವರದಿ ಹೇಳಿದೆ. “ಸಂಖ್ಯಾಶಾಸ್ತ್ರ ಹೇಳುವುದೇನೆಂದರೆ, ಮಹಿಳೆಯರು ಮುಖ್ಯವಾಗಿ… ಮನೆಯೊಳಗೇ ಹೆಚ್ಚು ಹಿಂಸೆಗೆ ಒಳಗಾಗುತ್ತಿದ್ದಾರೆ,” ಎಂದು ವರದಿಯು ಸ್ಪಷ್ಟಪಡಿಸಿದೆ.
ಮನೆಯೊಳಗಿನ ಅಪಾಯ: ವಿಶ್ವಾದ್ಯಂತ ಪ್ರತಿ 10 ನಿಮಿಷಕ್ಕೆ ಒಬ್ಬ ಮಹಿಳೆ ಅಥವಾ ಬಾಲಕಿ ಕುಟುಂಬ ಸದಸ್ಯರ ಕೈಯಲ್ಲಿ ಹತ್ಯೆಯಾಗುತ್ತಿದ್ದಾರೆ. ಸರಾಸರಿ ಪ್ರತಿ ದಿನ 137 ಮಂದಿ ಹೀಗೆ ಮರಣ ಹೊಂದುತ್ತಿದ್ದಾರೆ.

ಆಪ್ತರೇ ಕೊಲೆಗಾರರು: ಕಳೆದ ವರ್ಷ (2024 ರಲ್ಲಿ) 83,000 ಮಹಿಳೆಯರು ಮತ್ತು ಬಾಲಕಿಯರು ಹತ್ಯೆಯಾಗಿದ್ದಾರೆ. ಈ ಪೈಕಿ 60 ಪ್ರತಿಶತದಷ್ಟು (ಸುಮಾರು 50,000) ಮಹಿಳೆಯರು/ಬಾಲಕಿಯರು ತಮ್ಮ ನಿಕಟ ಸಂಗಾತಿಗಳು ಅಥವಾ ಕುಟುಂಬ ಸದಸ್ಯರ ಕೈಯಲ್ಲೇ ಹತ್ಯೆಯಾಗಿದ್ದಾರೆ.

ಮನೆಯೇ ಮಾರಕ ಸ್ಥಳ: ವಿಶ್ವದಾದ್ಯಂತ ಹೆಚ್ಚಿನ ಸಂಖ್ಯೆಯ ಮಹಿಳೆಯರು ಮತ್ತು ಬಾಲಕಿಯರಿಗೆ ಮನೆಯು ಅಪಾಯಕಾರಿ ಮತ್ತು ಕೆಲವು ಬಾರಿ ಪ್ರಾಣಾಂತಕ ಸ್ಥಳವಾಗಿ ಮಾರ್ಪಟ್ಟಿದೆ ಎಂದು ವರದಿ ಹೇಳಿದೆ.

ಆನ್‌ಲೈನ್ ಹಿಂಸೆ: ವಿಶ್ವಸಂಸ್ಥೆಯ ಮಹಿಳಾ ವಿಭಾಗದ ನಿರ್ದೇಶಕಿ ಸಾರಾ ಹೆಂಡ್ರಿಕ್ಸ್ ಅವರು ಮಹಿಳೆಯರ ಮೇಲಿನ ಆನ್‌ಲೈನ್ ಹಿಂಸೆ ಮತ್ತು ಕಿರುಕುಳದ ಬಗ್ಗೆಯೂ ಪ್ರಸ್ತಾಪಿಸಿದ್ದಾರೆ. ಡಿಜಿಟಲ್ ಹಿಂಸೆಯು ಯಾವಾಗಲೂ ಆನ್‌ಲೈನ್‌ನಲ್ಲಿ ಮಾತ್ರ ಉಳಿಯುವುದಿಲ್ಲ, ಅದು ಆಫ್‌ಲೈನ್‌ಗೂ ಹರಡುತ್ತದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಭಾರತದ ಅಂಕಿ-ಅಂಶಗಳು:

ಸಂಗಾತಿಯಿಂದ ಹಿಂಸೆ: ವಿಶ್ವ ಆರೋಗ್ಯ ಸಂಸ್ಥೆ (WHO) ವರದಿಯ ಪ್ರಕಾರ, 2023 ರಲ್ಲಿ ಭಾರತದಲ್ಲಿ 15-49 ವರ್ಷ ವಯಸ್ಸಿನ ಮಹಿಳೆಯರಲ್ಲಿ ಐದನೇ ಒಂದು ಭಾಗದಷ್ಟು (20%) ಮಹಿಳೆಯರು ಸಂಗಾತಿಯ ಹಿಂಸೆಗೆ ಒಳಗಾಗಿದ್ದಾರೆ.

ಜೀವಿತಾವಧಿಯ ಹಿಂಸೆ: ವಿಶ್ವಾದ್ಯಂತ ಸುಮಾರು ಮೂವರಲ್ಲಿ ಒಬ್ಬರು (ಅಥವಾ 840 ಮಿಲಿಯನ್ ಮಹಿಳೆಯರು) ತಮ್ಮ ಜೀವಿತಾವಧಿಯಲ್ಲಿ ಸಂಗಾತಿಯಿಂದ ಲೈಂಗಿಕ ಹಿಂಸೆ ಮತ್ತು ಕಿರುಕುಳವನ್ನು ಎದುರಿಸಿದ್ದಾರೆ. 2000 ಇಸವಿಯಿಂದ ಈ ಸಂಖ್ಯೆ ಕೊಂಚ ಕಡಿಮೆಯಾಗಿದೆ.

ಭಾರತದಲ್ಲಿ ಸಂಗಾತಿಯಲ್ಲದವರಿಂದ ಹಿಂಸೆ: 15 ವರ್ಷಕ್ಕಿಂತ ಮೇಲ್ಪಟ್ಟ ಮಹಿಳೆಯರಲ್ಲಿ ಸುಮಾರು 4 ಪ್ರತಿಶತದಷ್ಟು ಮಹಿಳೆಯರು ಸಂಗಾತಿಯಲ್ಲದ ವ್ಯಕ್ತಿಗಳಿಂದ ಲೈಂಗಿಕ ಹಿಂಸೆಯನ್ನು ಎದುರಿಸಿದ್ದಾರೆ ಎಂದು ವರದಿ ತಿಳಿಸಿದೆ.