💥ಸಿಬಿಐ ತನಿಖೆಗೆ ಒತ್ತಾಯ | ಅದಾನಿ ವಿದ್ಯುತ್ ಒಪ್ಪಂದದಲ್ಲಿ ₹ 62 ಸಾವಿರ ಕೋಟಿ ಹಗರಣ: ಸ್ವಂತ ಸರ್ಕಾರದ ವಿರುದ್ಧ ಬಿಜೆಪಿ ನಾಯಕ ಆರ್.ಕೆ. ಸಿಂಗ್ ವಾಗ್ದಾಳಿ

ದೆಹಲಿ: ಕೇಂದ್ರದ ಮಾಜಿ ವಿದ್ಯುತ್ ಸಚಿವ ಹಾಗೂ ಬಿಜೆಪಿ ನಾಯಕರಾದ ಆರ್.ಕೆ. ಸಿಂಗ್ ಬಿಹಾರದಲ್ಲಿರುವ ತಮ್ಮದೇ ಸ್ವಂತ ಸರ್ಕಾರದ ವಿರುದ್ಧ ಸಂಚಲನ ಮೂಡಿಸುವಂತಹ ಆರೋಪಗಳನ್ನು ಮಾಡಿದ್ದಾರೆ.

ಬಿಹಾರ ವಿಧಾನಸಭಾ ಚುನಾವಣೆಗಳ ಹಿನ್ನೆಲೆಯಲ್ಲಿ, ಮಾಜಿ ಐಎಎಸ್ ಅಧಿಕಾರಿಯೂ ಆಗಿರುವ ಆರ್.ಕೆ. ಸಿಂಗ್ ಮಾಡಿದ ಈ ಆರೋಪಗಳು ರಾಜಕೀಯ ಬಿರುಗಾಳಿಯನ್ನು ಎಬ್ಬಿಸಿವೆ. ರಾಜ್ಯದ ವಿದ್ಯುತ್ ಕ್ಷೇತ್ರದಲ್ಲಿ ₹ 62,000 ಕೋಟಿ ಮೊತ್ತದ ಭ್ರಷ್ಟಾಚಾರ ಹಗರಣ ನಡೆದಿದೆ ಎಂದು ಸಿಂಗ್ ಆರೋಪಿಸಿದ್ದಾರೆ.

ಬಿಹಾರದ ಅರ್‍ರಾಹ್‌ನ ಮಾಜಿ ಸಂಸದರಾಗಿರುವ ಸಿಂಗ್, ಎಬಿಪಿ ನ್ಯೂಸ್‌ಗೆ ನೀಡಿದ ಸಂದರ್ಶನದಲ್ಲಿ, ರಾಜ್ಯ ಸರ್ಕಾರಕ್ಕೆ ಸೇರಿದ ವಿದ್ಯುತ್ ಇಲಾಖೆಯು ಒಂದು ಖಾಸಗಿ ಕಂಪನಿಯೊಂದಿಗೆ ಬಹಳ ಹೆಚ್ಚಿನ ಬೆಲೆಗೆ ಒಪ್ಪಂದ ಮಾಡಿಕೊಂಡಿದೆ. ಇದರಿಂದ ರಾಜ್ಯದ ಖಜಾನೆಗೆ ಭಾರಿ ಪ್ರಮಾಣದ ಆರ್ಥಿಕ ನಷ್ಟ ಉಂಟಾಗಿದೆ ಎಂದು ಆರೋಪಿಸಿದ್ದಾರೆ.

“ಇದು ಬಹಳ ದೊಡ್ಡ ಹಗರಣ. ಯೂನಿಟ್‌ಗೆ ₹ 6.075 ದರದಲ್ಲಿ ವಿದ್ಯುತ್ ಇಲಾಖೆ ಪಾವತಿಸುವಂತೆ ಬಿಹಾರ ಸರ್ಕಾರವು ಅದಾನಿ ಕಂಪನಿಯೊಂದಿಗೆ 25 ವರ್ಷಗಳ ಒಪ್ಪಂದ ಮಾಡಿಕೊಂಡಿದೆ. ಅಧಿಕ ಬೆಲೆಗೆ ವಿದ್ಯುತ್ ಸ್ಥಾವರವನ್ನು ಸ್ಥಾಪಿಸಲು ಅದಾನಿ ಭಾರಿ ಪ್ರಮಾಣದ ಹಣವನ್ನು ಲಂಚವಾಗಿ ನೀಡಿದ್ದಾರೆ” ಎಂದು ಸಿಂಗ್ ಆರೋಪಿಸಿದರು.

ಮುಂದಿನ ಎರಡು ದಶಕಗಳಿಗೂ ಹೆಚ್ಚು ಕಾಲ ಕಂಪನಿಯು ಭಾರಿ ಲಾಭ ಗಳಿಸಲು ಸಾಧ್ಯವಾಗುತ್ತದೆ ಎಂದು ಸರ್ಕಾರವು ಅದಾನಿ ಕಂಪನಿಗೆ ಭರವಸೆ ನೀಡಿದೆ ಮತ್ತು ರಾಜ್ಯದ ಗ್ರಾಹಕರ ಮೇಲೆ ಕೃತಕವಾಗಿ ಅಧಿಕ ಶುಲ್ಕ ವಿಧಿಸುವುದಾಗಿ ಸರ್ಕಾರ ಭರವಸೆ ನೀಡಿದೆ ಎಂದು ಅವರು ಆರೋಪಿಸಿದರು.

“ಜನರ ಮೇಲೆ ಯೂನಿಟ್‌ಗೆ ₹ 1.41 ರಷ್ಟು ಹೆಚ್ಚುವರಿ ಹೊರೆಯನ್ನು ಹಾಕಲಾಗುತ್ತಿದೆ. ಇದು ₹ 62,000 ಕೋಟಿ ಹಗರಣವಾಗಿದೆ” ಎಂದು ಅವರು ಹೇಳಿದರು. ಇದರ ಕುರಿತು ಸಿಬಿಐ ತನಿಖೆ ನಡೆಯಬೇಕು ಎಂದು ಅವರು ಆಗ್ರಹಿಸಿದರು.

ಆದರೆ, ಈ ಸಂದರ್ಶನವನ್ನು ಎಕ್ಸ್‌ನಲ್ಲಿ (ಹಿಂದಿನ ಟ್ವಿಟರ್) ಪೋಸ್ಟ್ ಮಾಡಿದ ಎಬಿಪಿ ನ್ಯೂಸ್, ಕೆಲವು ಗಂಟೆಗಳ ನಂತರ ಅದನ್ನು ಅಳಿಸಿರುವುದು ಚರ್ಚೆಗೆ ಕಾರಣವಾಗಿದೆ. ಈ ಪೋಸ್ಟನ್ನು ಅಳಿಸಿರುವುದರ ಬಗ್ಗೆ ಹಲವು ಪ್ರಶ್ನೆಗಳು ಹುಟ್ಟಿಕೊಂಡಿವೆ.

ಆರ್.ಕೆ. ಸಿಂಗ್ ಹೇಳುವಂತೆ, ಬಿಹಾರ ಸರ್ಕಾರ ಮತ್ತು ಅದಾನಿ ಕಂಪನಿ ನಡುವಿನ ಒಪ್ಪಂದದ ಪ್ರಕಾರ, ವರ್ಷಕ್ಕೆ ಸುಮಾರು ₹ 2,500 ಕೋಟಿ ಪಾವತಿಗಳು ನಡೆಯುತ್ತವೆ. ಇದು 25 ವರ್ಷಗಳಿಗೆ ಸುಮಾರು ₹ 62,000 ಕೋಟಿ ಆಗುತ್ತದೆ. ರಾಜ್ಯ ವಿದ್ಯುತ್ ಇಲಾಖೆಯ ಹಲವು ಹಿರಿಯ ಅಧಿಕಾರಿಗಳು ವಿದ್ಯುತ್ ಒಪ್ಪಂದದ ಸೋಗಿನಲ್ಲಿ ಭ್ರಷ್ಟಾಚಾರದಲ್ಲಿ ಭಾಗಿಯಾಗಿದ್ದಾರೆ ಎಂದು ಸಿಂಗ್ ಆರೋಪಿಸಿದ್ದಾರೆ.