ಅದಾನಿಗೆ ಕೇವಲ ಒಂದು ರೂಪಾಯಿಯಂತೆ ಸಾವಿರ ಎಕರೆ ಭೂಮಿ ನೀಡಿದ ಬಿಹಾರ ಸರ್ಕಾರ: ಪರಿಹಾರಕ್ಕಾಗಿ ರೈತರ ಆಕ್ರೋಶ

ಪಾಟ್ನಾ: ಬಿಹಾರ ಸರ್ಕಾರವು ಅದಾನಿ ಸಮೂಹದ ಕಂಪನಿಯೊಂದಕ್ಕೆ 1,020 ಎಕರೆ ಭೂಮಿಯನ್ನು ಅತ್ಯಂತ ಕಡಿಮೆ ಬೆಲೆಗೆ ನೀಡಿದೆ. ಭಾಗಲ್ಪುರ ಜಿಲ್ಲೆಯ ಪಿರ್‌ಪೈಂಟಿಯಲ್ಲಿರುವ ಈ ಭೂಮಿಯನ್ನು 25 ವರ್ಷಗಳ ಅವಧಿಗೆ ಗುತ್ತಿಗೆಗೆ ನೀಡಲಾಗಿದೆ.

ಈ ಭೂಮಿಗೆ ವಾರ್ಷಿಕ ಎಕರೆಗೆ ಕೇವಲ ₹1 ರಂತೆ ಬಾಡಿಗೆ ದರವನ್ನು ನಿಗದಿಪಡಿಸಲಾಗಿದೆ. ತಮ್ಮ ಭೂಮಿಗೆ ಸೂಕ್ತ ನಷ್ಟ ಪರಿಹಾರ ಸಿಕ್ಕಿಲ್ಲ ಎಂದು ರೈತರು ಆಕ್ರೋಶ ವ್ಯಕ್ತಪಡಿಸುತ್ತಿರುವಾಗಲೇ ಈ ಕ್ರಮ ಕೈಗೊಳ್ಳಲಾಗಿದೆ. ಮಾವು ಮತ್ತು ಲಿಚಿ ಹಣ್ಣಿನ ತೋಟಗಳಿದ್ದ ಭೂಮಿಯನ್ನು ಸರ್ಕಾರ ಕಿತ್ತುಕೊಂಡಿದೆ ಎಂದು ರೈತರು ದೂರಿದ್ದಾರೆ.

ಕಲ್ಲಿದ್ದಲು ಆಧಾರಿತ ವಿದ್ಯುತ್ ಕೇಂದ್ರ ನಿರ್ಮಿಸಲು ಅದಾನಿ ಪವರ್‌ಗೆ ಈ ಭೂಮಿಯನ್ನು ನೀಡಲಾಗಿದೆ.

ಪರಿಸರ ಮತ್ತು ಆರೋಗ್ಯ ಕಾಳಜಿ

ಬಿಹಾರದಲ್ಲಿ ಈಗಾಗಲೇ ವಾಯುಮಾಲಿನ್ಯದ ಮಟ್ಟ ತೀವ್ರವಾಗಿದೆ. ಇಂತಹ ಪರಿಸ್ಥಿತಿಯಲ್ಲಿ ಮತ್ತೊಂದು ವಿದ್ಯುತ್ ಕೇಂದ್ರವನ್ನು ನಿರ್ಮಿಸುವುದರಿಂದ ಸ್ಥಳೀಯರ ಮೇಲೆ ಆರೋಗ್ಯಕ್ಕೆ ಸಂಬಂಧಿಸಿದ ದುಷ್ಪರಿಣಾಮಗಳು ಉಂಟಾಗುತ್ತವೆ ಎಂದು ಆತಂಕ ವ್ಯಕ್ತವಾಗಿದೆ. ಇದು ಭಾರತದ ಹವಾಮಾನ ಗುರಿಗಳನ್ನು ಸಾಧಿಸಲು ಮತ್ತು ನವೀಕರಿಸಬಹುದಾದ ಇಂಧನ ಮೂಲಗಳ ಕಡೆಗೆ ಸಾಗಲು ಕಷ್ಟವಾಗುತ್ತದೆ ಎಂದು ತಜ್ಞರು ಎಚ್ಚರಿಸಿದ್ದಾರೆ.

ಪ್ರಧಾನಿ ಮೋದಿ ಅವರು ಈ ತಿಂಗಳ 15 ರಂದು ಪೂರ್ಣಿಯಾದಲ್ಲಿ ಸುಮಾರು ₹ 40,000 ಕೋಟಿ ಮೌಲ್ಯದ ಯೋಜನೆಗಳಿಗೆ ಶಂಕುಸ್ಥಾಪನೆ ಮತ್ತು ಉದ್ಘಾಟನೆ ಮಾಡಿದರು. ಈ ವಿದ್ಯುತ್ ಕೇಂದ್ರವೂ ಅದರಲ್ಲಿ ಸೇರಿದೆ. ಆದರೆ, ಇದನ್ನು ಅದಾನಿ ಗ್ರೂಪ್ ನಿರ್ಮಿಸುತ್ತಿದೆ ಎಂದು ಮೋದಿ ಪ್ರಸ್ತಾಪಿಸಿರಲಿಲ್ಲ. ಅದಾನಿ ಪವರ್ ಇಲ್ಲಿ ₹ 25,000 ಕೋಟಿ ಹೂಡಿಕೆ ಮಾಡಿ, ಉತ್ಪಾದಿಸಿದ ವಿದ್ಯುತ್ ಅನ್ನು ಬಿಹಾರ ರಾಜ್ಯ ಪವರ್ ಯುಟಿಲಿಟೀಸ್‌ಗೆ ಪ್ರತಿ ಕಿಲೋವ್ಯಾಟ್‌ಗೆ ₹ 6.075 ಕ್ಕೆ ಮಾರಾಟ ಮಾಡಲಿದೆ.

ತಮ್ಮ ಭೂಮಿಗೆ ನೀಡಿದ ನಷ್ಟಪರಿಹಾರವು ಏಕರೂಪವಾಗಿಲ್ಲ ಎಂದು ರೈತರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ. ಪ್ರತಿ ಭೂಮಿಗೆ ವಿಭಿನ್ನ ಮೌಲ್ಯವನ್ನು ನಿಗದಿಪಡಿಸಿ ಪರಿಹಾರ ನೀಡಿರುವುದನ್ನು ಅವರು ಪ್ರಶ್ನಿಸಿದ್ದಾರೆ. ಇನ್ನೂ ಹಲವರಿಗೆ ಸಂಪೂರ್ಣ ಪರಿಹಾರ ಸಿಕ್ಕಿಲ್ಲ ಎಂದು ದೂರಿದ್ದಾರೆ.

ಮೊದಲಿಗೆ ಈ ಯೋಜನೆಯನ್ನು ಸರ್ಕಾರಿ ಸ್ವಾಮ್ಯದ ಎನ್‌ಎಚ್‌ಪಿಸಿ (NHPC) ನಿರ್ಮಿಸಲು ಪ್ರಸ್ತಾಪಿಸಲಾಗಿತ್ತು, ಆದರೆ ಈಗ ಅದನ್ನು ಅದಾನಿ ಪವರ್‌ಗೆ ನೀಡಲಾಗಿದೆ. ಇದು ರಾಜ್ಯದ ಮೊದಲ ಮತ್ತು ಅತಿ ದೊಡ್ಡ ಖಾಸಗಿ ವಲಯದ ಉಷ್ಣ ವಿದ್ಯುತ್ ಸ್ಥಾವರವಾಗಿದೆ. ಭಾಗಲ್ಪುರ ಜಿಲ್ಲೆಯಲ್ಲಿ ಈಗಾಗಲೇ 2,340 ಮೆಗಾವ್ಯಾಟ್ ಸಾಮರ್ಥ್ಯದ ಕಹಲ್ಗಾಂವ್ ಸೂಪರ್ ಥರ್ಮಲ್ ಪವರ್ ಸ್ಟೇಷನ್ ಇದೆ. ಇದರಿಂದ ಕೆಲವೇ ಕಿಲೋಮೀಟರ್ ದೂರದಲ್ಲಿ ಮತ್ತೊಂದು ಕಲ್ಲಿದ್ದಲು ಆಧಾರಿತ ವಿದ್ಯುತ್ ಕೇಂದ್ರವನ್ನು ನಿರ್ಮಿಸುವುದು ಅರ್ಥಹೀನ ಎಂದು ಸಂಶೋಧಕ ಸುಭಾಶಿಶ್ ಡೇ ಹೇಳಿದ್ದಾರೆ. ಈ ವಿದ್ಯುತ್ ಕೇಂದ್ರಗಳಿಂದ ಹೊರಸೂಸುವ ಧೂಳಿನ ಕಣಗಳಿಂದ ವಾತಾವರಣ ಮತ್ತಷ್ಟು ಕಲುಷಿತಗೊಳ್ಳುತ್ತದೆ ಎಂದು ಅವರು ಕಳವಳ ವ್ಯಕ್ತಪಡಿಸಿದ್ದಾರೆ.