ರೈಲುಗಳನ್ನು ರದ್ದುಗೊಳಿಸುವ ಮೂಲಕ ಭಾರತದ ಯುವಶಕ್ತಿಯನ್ನು ಕಟ್ಟಿ ಹಾಕಲು ಸಾಧ್ಯವಿಲ್ಲ: ತನ್ನದೇ ಸರ್ಕಾರದ ವಿರುದ್ಧ ಹೇಳಿಕೆ ಕೊಟ್ಟ ಸಚಿವ ಚಿರಾಗ್ ಪಾಸ್ವಾನ್

ಇತ್ತೀಚಿನ ರೈಲು ರದ್ದು ಮತ್ತು ಸಂಚಾರ ಅಡಚಣೆಗಳ ಕುರಿತ ಗೊಂದಲಗಳಿಗೆ ತೀಕ್ಷ್ಣ ಪ್ರತಿಕ್ರಿಯೆ ನೀಡಿರುವ ಕೇಂದ್ರ ಸಚಿವ ಚಿರಾಗ್ ಪಾಸ್ವಾನ್, ಸಂಚಾರ ಸಂಬಂಧಿತ ತಾತ್ಕಾಲಿಕ ಅಡೆತಡೆಗಳಿಂದ ದೇಶದ ಯುವಕರ ದೃಢ ಸಂಕಲ್ಪವನ್ನು ಕುಗ್ಗಿಸಲು ಸಾಧ್ಯವಿಲ್ಲ ಎಂದು ಪ್ರತಿಪಾದಿಸಿದ್ದಾರೆ.

ಹರಿಯಾಣದ ಸೋನಿಪತ್‌ನಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ರೈಲು ರದ್ದತಿಯಿಂದಾಗಿ ಸೃಷ್ಟಿಯಾಗಿರುವ ಗೊಂದಲಗಳ ಕುರಿತ ಪ್ರಶ್ನೆಗಳಿಗೆ ಉತ್ತರಿಸಿದರು. ಇಂತಹ ತಾತ್ಕಾಲಿಕ ಸಂಪರ್ಕ ವ್ಯತ್ಯಯಗಳು ದೇಶದ ಯುವಜನರ ಮುನ್ನಡೆ ಹಾಗೂ ಅಭಿವೃದ್ಧಿಯ ವೇಗಕ್ಕೆ ಎಂದಿಗೂ ತಡೆಯೊಡ್ಡಲು ಸಾಧ್ಯವಿಲ್ಲ ಎಂದು ಸ್ಪಷ್ಟಪಡಿಸಿದರು.

“ಇವರು ಭಾರತದ ಯುವಕರು, ಇವರನ್ನು ಯಾರಿಂದಲೂ ತಡೆಯಲು ಸಾಧ್ಯವಿಲ್ಲ,” ಎಂದು ಚಿರಾಗ್ ಪಾಸ್ವಾನ್ ಹೇಳಿದ್ದಾಗಿ ಸುದ್ದಿ ಸಂಸ್ಥೆ ಎಎನ್‌ಐ (ANI) ವರದಿ ಮಾಡಿದೆ. ಇದೇ ವೇಳೆ ಅಪಪ್ರಚಾರ ನಡೆಸುವವರಿಗೆ ನೇರ ಪ್ರಶ್ನೆ ಹಾಕಿದ ಅವರು, “ಅಪಸ್ವರ ಎಬ್ಬಿಸಲು ಯತ್ನಿಸುತ್ತಿರುವವರಿಗೆ ನಾನು ಕೇಳಲು ಬಯಸುತ್ತೇನೆ: ಯಾರಾದರೂ ಎಷ್ಟು ರೈಲುಗಳನ್ನು ತಡೆಹಿಡಿಯಲು ಸಾಧ್ಯ? ಸಂಪರ್ಕ ವ್ಯವಸ್ಥೆಯನ್ನು ಎಷ್ಟರಮಟ್ಟಿಗೆ ನಿರ್ಬಂಧಿಸಬಹುದು? ಇನ್ನು ಎಷ್ಟು ರಸ್ತೆಗಳನ್ನು ಬಂದ್ ಮಾಡಲು ಸಾಧ್ಯ?” ಎಂದು ಪ್ರಶ್ನಿಸಿದರು.

ಭಾರತೀಯ ಯುವಜನರ ನಾಯಕತ್ವ ಹಾಗೂ ಸಾಮರ್ಥ್ಯವನ್ನು ಬಲವಾಗಿ ಪ್ರತಿಪಾದಿಸಿದ ಕೇಂದ್ರ ಸಚಿವರು, “ಹಿಂದಿನ ತಲೆಮಾರುಗಳು ತೋರಿದಂತೆಯೇ ಇಂದಿನ ಯುವಪೀಳಿಗೆಯೂ ಜಗತ್ತಿಗೆ ದಿಕ್ಕು ತೋರುವ ಅಗಾಧ ಸಾಮರ್ಥ್ಯವನ್ನು ಹೊಂದಿದೆ. ಹೀಗಾಗಿ ಇಂತಹ ತಾತ್ಕಾಲಿಕ ಅಡೆತಡೆಗಳು ಅಥವಾ ವದಂತಿಗಳು ದೇಶದ ಯುವಶಕ್ತಿಯ ಪಯಣವನ್ನು ಕಟ್ಟಿಹಾಕಲು ಖಂಡಿತ ಸಾಧ್ಯವಿಲ್ಲ,” ಎಂದರು.