ಮೋದಿ, ಆರ್‌ಎಸ್‌ಎಸ್ ಉಲ್ಲೇಖಗಳೇ ಪೆಂಗ್ವಿನ್ ಜೊತೆಗಿನ ಸೋನಿಯಾ ಗಾಂಧಿ ಪುಸ್ತಕ ಒಪ್ಪಂದ ಮುರಿಯಲು ಕಾರಣವಾಯಿತೇ?

ಹೊಸದೆಹಲಿ: ಅಮೆರಿಕ ಮೂಲದ ಪ್ರಕಾಶನ ಸಂಸ್ಥೆ ಹಾಗೂ ‘ಪೆಂಗ್ವಿನ್ ರ್ಯಾಂಡಮ್ ಹೌಸ್’ನ ಅಂಗಸಂಸ್ಥೆಯಾದ ‘ಆಲ್ಫ್ರೆಡ್ ಎ. ನಾಫ್’ ಕಾಂಗ್ರೆಸ್ ಮಾಜಿ ಅಧ್ಯಕ್ಷೆ ಸೋನಿಯಾ ಗಾಂಧಿ ಅವರ ಬಹುನಿರೀಕ್ಷಿತ ಆತ್ಮಕಥನ ‘ಬಿಲಾಂಗಿಂಗ್: ಎ ಜರ್ನಿ ಆಫ್ ಲವ್’ ನವೆಂಬರ್ 10 ರಂದು ಬಿಡುಗಡೆಯಾಗಲಿದೆ ಎಂದು ಘೋಷಿಸಿದ ಕೆಲವೇ ದಿನಗಳಲ್ಲಿ ಈ ಪುಸ್ತಕ ಭಾರತೀಯ ರಾಜಕೀಯದಲ್ಲಿ ಹೊಸ ಬಿರುಗಾಳಿ ಎಬ್ಬಿಸಿದೆ.

ಭಾರತದಲ್ಲಿ ಈ ಕೃತಿಯನ್ನು ಪ್ರಕಟಿಸಿ ವಿತರಿಸಬೇಕಿದ್ದ ‘ಪೆಂಗ್ವಿನ್ ರ್ಯಾಂಡಮ್ ಹೌಸ್ ಇಂಡಿಯಾ’ (PRHI), ಒಪ್ಪಂದದ ಅಂತಿಮಗೊಳಿಸುವಿಕೆಗೆ ಮೂಲ ಹಸ್ತಪ್ರತಿಯಲ್ಲಿ ಕೆಲವು ಪ್ರಮುಖ ಬದಲಾವಣೆಗಳನ್ನು ಮಾಡುವಂತೆ ಷರತ್ತು ವಿಧಿಸಿತ್ತು. ಆದರೆ ಈ ಬದಲಾವಣೆಗಳನ್ನು ಒಪ್ಪಲು ಸೋನಿಯಾ ಗಾಂಧಿ ನಿರಾಕರಿಸಿದ್ದು, ಇದೀಗ ಭಾರತದಲ್ಲಿ ಕೃತಿಯ ಪ್ರಕಟಣೆಗಾಗಿ ‘ಹಾರ್ಪರ್‌ಕಾಲಿನ್ಸ್’ ಜೊತೆ ಮಾತುಕತೆ ನಡೆಸುತ್ತಿದ್ದಾರೆ ಎಂದು ವರದಿಯಾಗಿದೆ.

ಈ ವಿವಾದದ ನಡುವೆ ಆಗಸ್ಟ್ 28 ರಂದು ಹೇಳಿಕೆ ಬಿಡುಗಡೆ ಮಾಡಿದ್ದ ಪೆಂಗ್ವಿನ್ ಇಂಡಿಯಾ, ತಾನು ಭಾರತದಲ್ಲಿ ಈ ಪುಸ್ತಕದ ಪ್ರಕಾಶಕರಲ್ಲ ಎಂದು ಹೇಳಿಕೊಂಡಿತ್ತು. ಲೇಖಕಿ ಸಂಪಾದಕೀಯ ಬದಲಾವಣೆಗಳನ್ನು ತಿರಸ್ಕರಿಸಿದ ಕಾರಣಕ್ಕೆ ಪ್ರಕಟಣೆಯಿಂದ ಹಿಂದೆ ಸರಿಯಲಾಗಿದೆ ಎಂಬ ವಾದವು ಪರಿಸ್ಥಿತಿಯನ್ನು ಸರಿಯಾಗಿ ಬಿಂಬಿಸುವುದಿಲ್ಲ ಎಂದು ತಿಳಿಸಿತ್ತು. ಜೊತೆಗೆ ಹಸ್ತಪ್ರತಿಯ ಸತ್ಯಾಸತ್ಯತೆ ಪರಿಶೀಲಿಸುವುದು (fact-check) ಮತ್ತು ಲೇಖಕರಿಗೆ ಶಿಫಾರಸು ನೀಡುವುದು ಪ್ರಕಾಶಕರ ಹಕ್ಕು ಎಂದಿದ್ದ ಸಂಸ್ಥೆ, ತಾನು ಪುಸ್ತಕ ಪ್ರಕಟಿಸಲು ಉತ್ಸುಕವಾಗಿತ್ತು ಎಂದೂ ಸಮರ್ಥಿಸಿಕೊಂಡಿತ್ತು. ಆದರೆ ಈ ಹೇಳಿಕೆಯು ಗೊಂದಲಕಾರಿಯಾಗಿದೆ ಎಂದು ಹಲವರು ಟೀಕಿಸಿದ್ದಾರೆ.

ಕಾಂಗ್ರೆಸ್ ಪಕ್ಷದ ಆಂತರಿಕ ಮೂಲಗಳ ಪ್ರಕಾರ, ಕಳೆದ ಒಂದು ದಶಕದಲ್ಲಿ ನರೇಂದ್ರ ಮೋದಿ ಪ್ರಧಾನಿಯಾದ ನಂತರದ ರಾಜಕೀಯ ಬೆಳವಣಿಗೆಗಳ ಕುರಿತಾದ ವಿವರಗಳಲ್ಲಿ ಹಲವು ಬದಲಾವಣೆಗಳನ್ನು ಮಾಡಲು ಪೆಂಗ್ವಿನ್ ಬಯಸಿತ್ತು. ಪ್ರಮುಖವಾಗಿ ರಾಜಕೀಯ ರ‍್ಯಾಲಿಗಳಲ್ಲಿ ಮೋದಿ ಅವರು ಸೋನಿಯಾ ಮತ್ತು ಅವರ ಕುಟುಂಬದ ವಿರುದ್ಧ ಮಾಡಿದ್ದ ವೈಯಕ್ತಿಕ ಟೀಕೆಗಳ ಉಲ್ಲೇಖ ಹಾಗೂ 2020ರ ಜೂನ್‌ನಲ್ಲಿ ಗಾಲ್ವಾನ್ ಕಣಿವೆಯಲ್ಲಿ ಚೀನಾ ಪಡೆಗಳ ಅತಿಕ್ರಮಣಕ್ಕೆ ಮೋದಿಯವರ ಪ್ರತಿಕ್ರಿಯೆ ಕುರಿತ ಭಾಗಗಳನ್ನು ಬದಲಾಯಿಸಲು ಅಥವಾ ಸಂಪೂರ್ಣವಾಗಿ ತೆಗೆದುಹಾಕಲು ಪ್ರಕಾಶಕರು ಒತ್ತಾಯಿಸಿದ್ದರು ಎನ್ನಲಾಗಿದೆ.

ಜೊತೆಗೆ ಭಾರತೀಯ ಸಂಸ್ಕೃತಿ ಮತ್ತು ಕಲ್ಪನೆಗೆ ಧಕ್ಕೆ ತರುತ್ತಿದೆ ಎಂಬ ನೆಲೆಯಲ್ಲಿ ಆರ್‌ಎಸ್‌ಎಸ್ ಕುರಿತು ಬರೆದಿದ್ದ ಹಲವು ಸಾಲುಗಳನ್ನು ಕೈಬಿಡುವಂತೆಯೂ ಪೆಂಗ್ವಿನ್ ಕೋರಿತ್ತು. ಆದರೆ ತನ್ನ ಜೀವನ ಕಥನದಲ್ಲಿ ಯಾವುದೇ ರಾಜಿಗೆ ಒಪ್ಪದ ಸೋನಿಯಾ ಗಾಂಧಿ, ಈ ಬದಲಾವಣೆಗಳನ್ನು ಸ್ಪಷ್ಟವಾಗಿ ನಿರಾಕರಿಸಿದರು.

ಈ ಹಸ್ತಪ್ರತಿಯನ್ನು ಸೋನಿಯಾ ಗಾಂಧಿ ಅವರ ಮಕ್ಕಳಾದ ರಾಹುಲ್ ಗಾಂಧಿ, ಪ್ರಿಯಾಂಕಾ ಗಾಂಧಿ ಮತ್ತು ಅವರ ಅತ್ಯಂತ ಆಪ್ತರ ಕೆಲವೇ ಮಂದಿ ಮಾತ್ರ ಓದಿದ್ದಾರೆ. ಈ ವರ್ಷದ ಆರಂಭದಲ್ಲಿ ನಿವೃತ್ತ ಸೇನಾ ಮುಖ್ಯಸ್ಥ ಎಂ.ಎಂ. ನರವಾಣೆ ಅವರ ಪುಸ್ತಕದ ವಿಚಾರದಲ್ಲೂ ಇದೇ ರೀತಿಯ ವಿವಾದ ಸೃಷ್ಟಿಸಿದ್ದ ಪೆಂಗ್ವಿನ್ ಇಂಡಿಯಾ ವಿರುದ್ಧ ಕಾಂಗ್ರೆಸ್ ನಾಯಕರು ಮಾತ್ರವಲ್ಲದೆ ಪತ್ರಕರ್ತರು, ಸಾಹಿತಿಗಳು ಹಾಗೂ ಬುದ್ಧಿಜೀವಿಗಳು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಪತ್ರಕರ್ತ ವೀರ್ ಸಾಂಘ್ವಿ, ಪೆಂಗ್ವಿನ್ ಇಂಡಿಯಾದ ನಿಲುವನ್ನು ಪ್ರಶ್ನಿಸಿ, ಅಂತಾರಾಷ್ಟ್ರೀಯ ಪ್ರಕಾಶಕ ಸಂಸ್ಥೆ ನಾಫ್ ಯಾವುದೇ ಬದಲಾವಣೆಗಳಿಲ್ಲದೆ ಪುಸ್ತಕ ಪ್ರಕಟಿಸಲು ಒಪ್ಪಿರುವಾಗ ಭಾರತೀಯ ಶಾಖೆ ಮಾತ್ರ ರಾಜಕೀಯ ಒತ್ತಡಕ್ಕೆ ಮಣಿದು ಇಂತಹ ನಿರ್ಧಾರ ಕೈಗೊಂಡಿದೆ ಎಂದು ದೂರಿದ್ದಾರೆ. ಪತ್ರಕರ್ತೆ ಸಬಾ ನಖ್ವಿ ಹಾಗೂ ಕಾಂಗ್ರೆಸ್ ನಾಯಕ ಗೌರವ್ ಗೊಗೊಯ್, ಮೋದಿಯವರ ‘ಎಕ್ಸಾಮ್ ವಾರಿಯರ್ಸ್’ ಮತ್ತು ಆರ್‌ಎಸ್‌ಎಸ್ ಕುರಿತ ಪುಸ್ತಕಗಳನ್ನು ಪ್ರಕಟಿಸಲು ಸಂತೋಷಪಡುವ ಪ್ರಕಾಶಕರು, ಸೋನಿಯಾ ಗಾಂಧಿ ಅವರ ಸ್ವಂತ ಅನುಭವಗಳನ್ನು ಸೆನ್ಸಾರ್ ಮಾಡಲು ಹೊರಟಿರುವುದು ನಾಚಿಕೆಗೇಡು ಎಂದಿದ್ದಾರೆ. ಅಶೋಕ್ ಗೆಹ್ಲೋಟ್ ಮತ್ತು ಕಮಲ್ ನಾಥ್ ಅವರಂತಹ ಹಿರಿಯ ನಾಯಕರು ಕೂಡ ಇದು ವಾಕ್ ಸ್ವಾತಂತ್ರ್ಯದ ಮೇಲಿನ ಹಲ್ಲೆ ಎಂದು ಕಿಡಿಕಾರಿದ್ದಾರೆ.

ಆದರೆ ಈ ಇಡೀ ವಿವಾದದಲ್ಲಿ ಕಾಂಗ್ರೆಸ್ ಪಕ್ಷದ ಅಧಿಕೃತ ಮಾಧ್ಯಮ ವಿಭಾಗವು ಮೌನ ವಹಿಸಿರುವುದು ಅಚ್ಚರಿಗೆ ಕಾರಣವಾಗಿದೆ. ಮತ್ತೊಂದೆಡೆ ಬಿಜೆಪಿ ನಾಯಕ ಅಮಿತ್ ಮಾಳವೀಯ ಅವರು ಸೋನಿಯಾ ಗಾಂಧಿ ಅವರ ನೆನಪುಗಳಲ್ಲಿ ಯಾವುದು ಸತ್ಯ, ಯಾವುದು ಕಲ್ಪನೆ ಎಂಬುದನ್ನು ಪರೀಕ್ಷಿಸಲು ಪ್ರಕಾಶಕರಿಗೆ ಅನುಮಾನ ಬಂದಿರುವುದು ತಮಾಷೆಯಾಗಿದೆ ಎಂದು ವ್ಯಂಗ್ಯವಾಡಿದ್ದಾರೆ. ಭಾರತದಲ್ಲಿ ಈ ಮಹತ್ವದ ಕೃತಿಯನ್ನು ಅಂತಿಮವಾಗಿ ಯಾರು ಪ್ರಕಟಿಸಲಿದ್ದಾರೆ ಎಂಬ ಕುತೂಹಲ ಮೂಡಿದ್ದು, ಅಂತರರಾಷ್ಟ್ರೀಯ ಮಟ್ಟದಲ್ಲಿ ಮಾತ್ರ ನವೆಂಬರ್ 10 ರಂದು ನಿಗದಿಯಂತೆ ಪುಸ್ತಕ ಬಿಡುಗಡೆಯಾಗಲಿದೆ.