ನರೇಗಾ ಯೋಜನೆ ಬದಲಾವಣೆಯಿಂದ ಬಡಜನರ ಬದುಕು ನಾಶವಾಗಲಿದೆ: ಕಳವಳ ವ್ಯಕ್ತಪಡಿಸಿದ ಕೇರಳ, ತಮಿಳುನಾಡು, ಕರ್ನಾಟಕ, ಹಿಮಾಚಲ ಪ್ರದೇಶದ ಮುಖ್ಯಮಂತ್ರಿಗಳು

ದೆಹಲಿ: ಮೋದಿ ಸರ್ಕಾರವು ಜಾರಿಗೆ ತಂದಿರುವ ‘ವಿಕಸಿತ್ ಭಾರತ್ ಗ್ಯಾರಂಟಿ ಫಾರ್ ರೋಜ್‌ಗಾರ್ ಅಂಡ್ ಅಜೀವಿಕ ಮಿಷನ್ (ಗ್ರಾಮೀಣ)’ ಬಿಲ್ (ವಿಬಿ – ಜಿ ಆರ್‌ಎಎಂ ಜಿ) ಗೆ ಎಲ್ಲಾ ಪಕ್ಷಗಳಿಂದ ತೀವ್ರ ವಿರೋಧ ವ್ಯಕ್ತವಾಗುತ್ತಿದೆ. ಈ ಬಿಲ್ ಕುರಿತು ನಾಲ್ಕು ಪ್ರತಿಪಕ್ಷ ರಾಜ್ಯಗಳ ಮುಖ್ಯಮಂತ್ರಿಗಳು ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ಇದು ಗ್ರಾಮೀಣ ಬಡವರ ಪರಿಸ್ಥಿತಿಯನ್ನು ಇನ್ನಷ್ಟು ಹದಗೆಡಿಸಲಿದೆ ಎಂದು ಅವರು ಆತಂಕ ವ್ಯಕ್ತಪಡಿಸಿದ್ದಾರೆ.

ಹಸಿವು ಮತ್ತು ವಲಸೆಯಿಂದ ರಕ್ಷಿಸುವ ಕೊನೆಯ ರಕ್ಷಾಕವಚವನ್ನು ಇದು ಬಲಹೀನಗೊಳಿಸುತ್ತದೆ ಎಂದು ಕೇರಳ, ಕರ್ನಾಟಕ, ತಮಿಳುನಾಡು ಮತ್ತು ಹಿಮಾಚಲ ಪ್ರದೇಶದ ಮುಖ್ಯಮಂತ್ರಿಗಳು ಎಚ್ಚರಿಸಿದ್ದಾರೆ.

ಈ ಬಿಲ್ ಕಳೆದ ಎರಡು ದಶಕಗಳಿಂದ ಜಾರಿಯಲ್ಲಿದ್ದ ಮಹಾತ್ಮ ಗಾಂಧಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತ್ರಿ ಕಾಯ್ದೆಯನ್ನು (MGNREGA) ರದ್ದುಗೊಳಿಸುತ್ತದೆ ಮತ್ತು ನಿಧಿಯ ಹಂಚಿಕೆ, ಅನುಷ್ಠಾನದ ಪ್ರದೇಶಗಳು ಹಾಗೂ ಕೇಂದ್ರ-ರಾಜ್ಯಗಳ ನಡುವಿನ ನಿಧಿ ಹಂಚಿಕೆಯ ವಿಧಾನದಲ್ಲಿನ ಬದಲಾವಣೆಗಳ ಕುರಿತು ಕೇಂದ್ರಕ್ಕೆ ವ್ಯಾಪಕ ಅಧಿಕಾರವನ್ನು ನೀಡುತ್ತದೆ ಎಂದು ಅವರು ಉಲ್ಲೇಖಿಸಿದ್ದಾರೆ.

ಕಾಯ್ದೆಯನ್ನು ದುರ್ಬಲಗೊಳಿಸುವುದನ್ನು ಮತ್ತು ಗಾಂಧಿ ಹೆಸರನ್ನು ತೆಗೆದುಹಾಕುವುದನ್ನು ಕೇರಳ ಮುಖ್ಯಮಂತ್ರಿ ಪಿನರಯಿ ವಿಜಯನ್ ತೀವ್ರವಾಗಿ ವಿರೋಧಿಸಿದ್ದಾರೆ.

“ಗಾಂಧೀಜಿಯವರ ಹೆಸರನ್ನು ತೆಗೆದುಹಾಕುವುದು ಮತ್ತು ಎಂಜಿಎನ್‌ಆರ್‌ಇಜಿಎ ಸ್ವರೂಪವನ್ನು ದುರ್ಬಲಗೊಳಿಸುವ ಮೂಲಕ ಗಾಂಧಿ ಪರಂಪರೆಯ ಬಗ್ಗೆ ಹಾಗೂ ಶ್ರಮದ ಮೂಲಕ ಗೌರವ ಎಂಬ ಕಲ್ಪನೆಯ ಬಗ್ಗೆ ಸಂಘ ಪರಿವಾರಕ್ಕಿರುವ ಶತ್ರುತ್ವವು ಅರ್ಥವಾಗುತ್ತಿದೆ” ಎಂದು ಅವರು ಎಕ್ಸ್‌ನಲ್ಲಿ ತಿಳಿಸಿದ್ದಾರೆ.

ಬೆಳೆ ಹಂಗಾಮಿನಲ್ಲಿ ಕಡ್ಡಾಯವಾಗಿ 60 ದಿನಗಳ ವಿರಾಮ ನೀಡುವ ನಿಬಂಧನೆಯು ಗ್ರಾಮೀಣ ಬಿಕ್ಕಟ್ಟನ್ನು ಹೆಚ್ಚಿಸಿ, ಉದ್ಯೋಗದ ಅಸ್ಥಿರತೆಗೆ ಕಾರಣವಾಗುತ್ತದೆ ಎಂದು ಅವರು ಎಚ್ಚರಿಸಿದ್ದಾರೆ.

ತಮಿಳುನಾಡು ಮುಖ್ಯಮಂತ್ರಿ ಎಂ.ಕೆ. ಸ್ಟಾಲಿನ್ ಅವರು ಪ್ರಧಾನಿ ಮೋದಿಯವರಿಗೆ ಬರೆದ ಪತ್ರದಲ್ಲಿ ಹೊಸ ಕಾಯ್ದೆಯನ್ನು ಜಾರಿಗೆ ತರಬೇಡಿ ಎಂದು ವಿನಂತಿಸಿದ್ದಾರೆ. ಇದು ರಾಜ್ಯದ ಆರ್ಥಿಕತೆಯ ಮೇಲೆ ಹೊರೆ ಹೇರುವುದಲ್ಲದೆ, ಲಕ್ಷಾಂತರ ಬಡ ಗ್ರಾಮೀಣ ಕಾರ್ಮಿಕರ ಜೀವನೋಪಾಯಕ್ಕೆ ಧಕ್ಕೆ ತರುತ್ತದೆ ಎಂದು ಅವರು ಕಳವಳ ವ್ಯಕ್ತಪಡಿಸಿದ್ದಾರೆ.

ಕೇಂದ್ರವು ನಿಗದಿಪಡಿಸುವ ಮಾನದಂಡಗಳ ಆಧಾರದ ಮೇಲೆ ರಾಜ್ಯವಾರು ನಿಧಿಯ ಮಿತಿಯನ್ನು ನಿರ್ಧರಿಸುವ ಅಧಿಕಾರವನ್ನು ಕೇಂದ್ರಕ್ಕೆ ನೀಡುವುದನ್ನು ಅವರು ತೀವ್ರವಾಗಿ ವಿರೋಧಿಸಿದ್ದಾರೆ. ತಮಿಳುನಾಡಿನಲ್ಲಿ ಹವಾಮಾನ ಮತ್ತು ಭೌಗೋಳಿಕ ಪರಿಸ್ಥಿತಿಗಳಿಂದಾಗಿ ಬೇಡಿಕೆ ಹೆಚ್ಚಿರುತ್ತದೆ ಮತ್ತು ಜನಸಂಖ್ಯೆಯಂತಹ ಅಂಶಗಳ ಆಧಾರದ ಮೇಲೆ ವೆಚ್ಚಕ್ಕೆ ಮಿತಿ ಹೇರಿದರೆ ಕೆಲಸದ ದಿನಗಳು ಹಾಗೂ ವೇತನ ಕಡಿಮೆಯಾಗಿ ಕಾರ್ಮಿಕರು ತೊಂದರೆ ಅನುಭವಿಸುತ್ತಾರೆ ಎಂದು ವಿವರಿಸಿದ್ದಾರೆ. ಹೊಸದಾಗಿ ಪ್ರಸ್ತಾಪಿಸಲಾದ 60:40 ನಿಧಿ ಹಂಚಿಕೆ ವಿಧಾನವು ರಾಜ್ಯಗಳಿಗೆ ಹೆಚ್ಚಿನ ಹೊರೆಯಾಗಲಿದೆ ಎಂದು ಸ್ಟಾಲಿನ್ ತಿಳಿಸಿದ್ದಾರೆ.

ಈ ಬಿಲ್ ಗ್ರಾಮೀಣ ಬಡವರಿಗೆ ಮತ್ತು ಪ್ರಜಾಪ್ರಭುತ್ವಕ್ಕೆ ಆತಂಕ ತರುವ ಬೆಳವಣಿಗೆ ಎಂದು ಕರ್ನಾಟಕದ ಸಿಎಂ ಸಿದ್ಧರಾಮಯ್ಯ ಎಕ್ಸ್‌ನಲ್ಲಿ ತಿಳಿಸಿದ್ದಾರೆ. “ಸುಮಾರು ಎರಡು ದಶಕಗಳ ಕಾಲ ಕೋಟ್ಯಂತರ ಗ್ರಾಮೀಣ ಕುಟುಂಬಗಳ ಕೆಲಸದ ಹಕ್ಕನ್ನು ರಕ್ಷಿಸಿದ ಕಾಯ್ದೆಯನ್ನು ಸರಿಯಾದ ಚರ್ಚೆಯಿಲ್ಲದೆ, ರಾಜ್ಯ ಸರ್ಕಾರಗಳೊಂದಿಗೆ ಸಮಾಲೋಚನೆ ನಡೆಸದೆ ಮತ್ತು ಸ್ಥಾಯಿ ಸಮಿತಿಗೆ ಕಳುಹಿಸಬೇಕೆಂಬ ವಿರೋಧ ಪಕ್ಷಗಳ ಬೇಡಿಕೆಯನ್ನು ನಿರ್ಲಕ್ಷಿಸಿ ಬಲವಂತವಾಗಿ ಅಂಗೀಕರಿಸಲಾಗಿದೆ.

ಜನರ ಜೀವನೋಪಾಯದ ಮೇಲಿನ ಇಷ್ಟು ದೊಡ್ಡ ಬದಲಾವಣೆಯನ್ನು ಈ ರೀತಿ ಜಾರಿಗೆ ತರಬಾರದು” ಎಂದು ವಿವರಿಸಿದ್ದಾರೆ. ಉದ್ಯೋಗ ಕಾಯ್ದೆಯು ಕಾರ್ಮಿಕರಿಗೆ ಗೌರವ ಮತ್ತು ಬಿಕ್ಕಟ್ಟಿನ ಸಮಯದಲ್ಲಿ ಆದಾಯ ಭದ್ರತೆಯನ್ನು ಒದಗಿಸಿದೆ. ಇನ್ನು ಮುಂದೆ ದೆಹಲಿಯಿಂದ ಬರುವ ಹಂಚಿಕೆಗಳು, ಅಧಿಸೂಚನೆಗಳು ಮತ್ತು ಕೇಂದ್ರವು ಚಲಾಯಿಸುವ ಸ್ವೇಚ್ಛಾಧಿಕಾರದ ಮೇಲೆ ಬಡವರ ಉದ್ಯೋಗ ಅವಲಂಬಿತವಾಗಿರುತ್ತದೆ ಎಂದು ತಿಳಿಸಿದ್ದಾರೆ.

ಈ ವಿವಾದಾತ್ಮಕ ಬಿಲ್ ಅನ್ನು ಹಿಮಾಚಲ ಪ್ರದೇಶದ ಮುಖ್ಯಮಂತ್ರಿ ಸುಖ್ವಿಂದರ್ ಸಿಂಗ್ ಸುಖು ವಿರೋಧಿಸಿದ್ದಾರೆ. ಇದು ಕಷ್ಟಪಟ್ಟು ಕೆಲಸ ಮಾಡುವ ಜನರ ಹಕ್ಕುಗಳನ್ನು ಕಸಿದುಕೊಳ್ಳುವ ಪ್ರಯತ್ನ ಎಂದು ಅವರು ವ್ಯಾಖ್ಯಾನಿಸಿದ್ದಾರೆ.