ಹೊಸ ಕ್ರಿಮಿನಲ್ ಕಾನೂನಿನ ಮೊದಲ ಪ್ರಕರಣ ; ಬೀದಿ ಬದಿ ವ್ಯಾಪಾರಿ ಮೇಲೆ ಎಫ್‌ಐಆರ್

ಹೊಸ ಕ್ರಿಮಿನಲ್ ಕೋಡ್, ಭಾರತೀಯ ನ್ಯಾಯ ಸಂಹಿತೆ ಇಂದು ಜಾರಿಗೆ ಬರುತ್ತಿದ್ದಂತೆ, ಹೊಸದಿಲ್ಲಿ ರೈಲು ನಿಲ್ದಾಣದ ಬಳಿ ರಸ್ತೆಯ ಬದಿಯಲ್ಲೇ ಹಾಕಿದ್ದ ಬೀದಿ ವ್ಯಾಪಾರಿಯ ವಿರುದ್ಧ ಮೊದಲ ಎಫ್‌ಐಆರ್ ದಾಖಲಿಸಲಾಗಿದೆ. ಹೊಸ ಕ್ರಿಮಿನಲ್ ಕೋಡ್‌ನ ಸೆಕ್ಷನ್ 285 ರ ಅಡಿಯಲ್ಲಿ ಈ ಎಫ್‌ಐಆರ್ ಅನ್ನು ದಾಖಲಿಸಲಾಗಿದೆ.

“ಯಾವುದೇ ಕೃತ್ಯವನ್ನು ಮಾಡುವ ಮೂಲಕ ಅಥವಾ ಯಾವುದೇ ವ್ಯಕ್ತಿಗೆ ಅಪಾಯ, ಅಡಚಣೆ ಅಥವಾ ಗಾಯವನ್ನು ಉಂಟುಮಾಡುವಂತಹ ಕೆಲಸ, ಯಾವುದೇ ಸಾರ್ವಜನಿಕ ಮಾರ್ಗ ಅಥವಾ ಸಾರ್ವಜನಿಕ ಸಂಚಾರ ಮಾರ್ಗಕ್ಕೆ ಅಡ್ಡಿಪಡಿಸುವವರಿಗೆ ಈ ಸೆಕ್ಷನ್ ನಲ್ಲಿ ತಪ್ಪಿತಸ್ಥರೆಂದು ಸಾಭೀತಾದರೆ ಐದು ಸಾವಿರ ರೂಪಾಯಿಗಳವರೆಗೆ ದಂಡ ವಿಧಿಸುವ ಮೂಲಕ ಶಿಕ್ಷೆಗೆ ಒಳಪಡಿಸಬಹುದು” ಎಂದು ಹೊಸ ಕಾನೂನಿನಲ್ಲಿ ಉಲ್ಲೇಖವಾಗಿದೆ.

ಕಳೆದ ರಾತ್ರಿ ಗಸ್ತು ಕರ್ತವ್ಯದಲ್ಲಿದ್ದ ಪೊಲೀಸ್ ಸಿಬ್ಬಂದಿ ರಸ್ತೆಯಲ್ಲಿ ನೀರಿನ ಬಾಟಲಿಗಳು ಮತ್ತು ಗುಟ್ಖಾ ಮಾರಾಟ ಮಾಡುತ್ತಿದ್ದುದನ್ನು ಗಮನಿಸಿದ ನಂತರ ಎಫ್‌ಐಆರ್ ದಾಖಲಿಸಲಾಗಿದೆ. ಬೀದಿಬದಿ ವ್ಯಾಪಾರಿಯ ಸ್ಟಾಲ್ ರಸ್ತೆಗೆ ಅಡ್ಡಿಯಾಗಿತ್ತು ಮತ್ತು ಅದನ್ನು ಸ್ಥಳಾಂತರಿಸಲು ಪದೇ ಪದೇ ಕೇಳಲಾಗಿತ್ತು. ವ್ಯಾಪಾರಿ ಅದನ್ನು ವಿರೋಧಿಸಿದ ನಂತರ ಪೊಲೀಸ್ ಸಿಬ್ಬಂದಿ ಎಫ್‌ಐಆರ್ ದಾಖಲಿಸಲು ಮುಂದಾದರು ಎಂದು ತಿಳಿದು ಬಂದಿದೆ.

ಬೀದಿ ವ್ಯಾಪಾರಿ ನಿನ್ನೆ ತಡರಾತ್ರಿ ನವದೆಹಲಿ ರೈಲು ನಿಲ್ದಾಣದ ಬಳಿಯ ಫುಟ್ ಓವರ್ ಬ್ರಿಡ್ಜ್ ಅಡಿಯಲ್ಲಿ ತನ್ನ ಸ್ಟಾಲ್ ಅನ್ನು ನಿಲ್ಲಿಸಿದ್ದ ಎಂದು ಎಫ್‌ಐಆರ್ ನಲ್ಲಿ ದಾಖಲಾದ ಅಂಶಗಳು ಬಹಿರಂಗಪಡಿಸಿವೆ. ಈ ವ್ಯಕ್ತಿ ರಸ್ತೆಯಲ್ಲಿ ನೀರು, ಬೀಡಿ, ಸಿಗರೇಟ್ ಮಾರಾಟ ಮಾಡುತ್ತಿದ್ದು, ಸಾರ್ವಜನಿಕರಿಗೆ ತೊಂದರೆಯಾಗುತ್ತಿದ್ದು, ರಸ್ತೆಯಲ್ಲಿದ್ದ ಅಂಗಡಿಯನ್ನು ತೆಗೆಯುವಂತೆ ಸಬ್‌ಇನ್‌ಸ್ಪೆಕ್ಟರ್‌ ಹಲವು ಬಾರಿ ಮನವಿ ಮಾಡಿದರೂ ಪಾಲಿಸಿಲ್ಲ. ಬೀದಿ ಬದಿ ವ್ಯಾಪಾರಿಯ ಮೇಲೆ ಪ್ರಕರಣ ದಾಖಲಿಸಲು ಹಲವಾರು ದಾರಿಹೋಕರನ್ನು ಕೇಳಿದರೂ ಯಾರೂ ಸಹ ಪ್ರಕರಣ ದಾಖಲಿಸಲಾಗಲಿ, ಸಾಕ್ಷ್ಯ ಹೇಳಲಾಗಲಿ ಮುಂದಾಗಿಲ್ಲ.

ನಂತರ ಇ-ಪ್ರಮಾನ್ ಅರ್ಜಿಯನ್ನು ಬಳಸಿಕೊಂಡು ವೀಡಿಯೊವನ್ನು ಚಿತ್ರೀಕರಿಸಿ, ಆತನ ಮೇಲೆ ಸ್ವಯಂ ಆಸಕ್ತಿಯಿಂದ ಕೇಸು ದಾಖಲಿಸಲಾಗಿದೆ ಎಂದು ತಿಳಿದು ಬಂದಿದೆ.

ತ್ವರಿತ ತೀರ್ಪು ನೀಡುವ ಕಾರಣಕ್ಕಾಗಿ ಹೊಸ ರೀತಿಯ ಅಪರಾಧಗಳನ್ನು ನಿಭಾಯಿಸುವ ಉದ್ದೇಶದಿಂದ ಕ್ರಿಮಿನಲ್ ಕೋಡ್‌ಗಳನ್ನು ಬದಲಾಯಿಸಲಾಗಿದೆ. ವಿಚಾರಣೆಯನ್ನು ಪೂರ್ಣಗೊಳಿಸಿದ 45 ದಿನಗಳಲ್ಲಿ ತೀರ್ಪುಗಳನ್ನು ನೀಡಬೇಕಾಗಿದೆ ಮತ್ತು ಮೊದಲ ವಿಚಾರಣೆಯ 60 ದಿನಗಳಲ್ಲಿ ಆರೋಪಗಳನ್ನು ರೂಪಿಸಬೇಕು ಎಂದು ಹೊಸ ಕಾನೂನಿನಲ್ಲಿ ಉಲ್ಲೇಖಿಸಲಾಗಿದೆ.