ಇಂಧನ ದರ ಏರಿಕೆ ಖಂಡಿಸಿ ದೇಶಾದ್ಯಂತ ಗಿಗ್ ಕಾರ್ಮಿಕರ ಮುಷ್ಕರ: ಕ್ಯಾಬ್, ಡೆಲಿವರಿ ಸೇವೆಗಳು ಸ್ತಬ್ಧ

ಕೇಂದ್ರ ಸರ್ಕಾರವು ಪೆಟ್ರೋಲ್ ಮತ್ತು ಡೀಸೆಲ್ ದರಗಳನ್ನು ಪ್ರತಿ ಲೀಟರ್‌ಗೆ ಸರಿಸುಮಾರು 3 ರೂಪಾಯಿಗಳವರೆಗೆ ಹೆಚ್ಚಿಸಿರುವುದು ಸಾರ್ವಜನಿಕರ ಜೇಬು ಕತ್ತರಿಸುವಂತೆ ಮಾಡಿದೆ. ಈ ಹಠಾತ್ ದರ ಏರಿಕೆಯಿಂದ ವಾಹನ ಸವಾರರು ಕಂಗಾಲಾಗಿದ್ದರೆ, ದಿನವಿಡೀ ರಸ್ತೆಯಲ್ಲೇ ದುಡಿಯುವ ಗಿಗ್ ಕಾರ್ಮಿಕರು (ಆ್ಯಪ್ ಆಧಾರಿತ ಚಾಲಕರು ಮತ್ತು ಡೆಲಿವರಿ ಪಾರ್ಟ್‌ನರ್‌ಗಳು) ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಹೆಚ್ಚಾದ ಇಂಧನ ದರ ಹಾಗೂ ಆ್ಯಪ್ ಕಂಪನಿಗಳ ಕಡಿಮೆ ಸಂಬಳವನ್ನು ವಿರೋಧಿಸಿ ಶನಿವಾರದಂದು ದೇಶಾದ್ಯಂತ ತಾತ್ಕಾಲಿಕ ಮುಷ್ಕರಕ್ಕೆ ಕರೆ ನೀಡಲಾಗಿದೆ.

ಗಿಗ್ ಅಂಡ್ ಪ್ಲಾಟ್‌ಫಾರ್ಮ್ ಸರ್ವಿಸಸ್ ವರ್ಕರ್ಸ್ ಯೂನಿಯನ್ ಶನಿವಾರ ಮಧ್ಯಾಹ್ನ 12 ಗಂಟೆಯಿಂದ ಸಂಜೆ 5 ಗಂಟೆಯವರೆಗೆ ಈ ಬಂದ್‌ಗೆ ಕರೆ ನೀಡಿದೆ. ಈ 5 ಗಂಟೆಗಳ ಕಾಲ ಆ್ಯಪ್ ಆಧಾರಿತ ಕ್ಯಾಬ್‌ಗಳು, ಬೈಕ್ ಟ್ಯಾಕ್ಸಿಗಳು ಹಾಗೂ ಫುಡ್ ಮತ್ತು ಗ್ರೋಸರಿ ಡೆಲಿವರಿ ಸೇವೆಗಳನ್ನು ಸಂಪೂರ್ಣವಾಗಿ ಸ್ಥಗಿತಗೊಳಿಸುವಂತೆ ಕಾರ್ಮಿಕರಲ್ಲಿ ವಿನಂತಿಸಲಾಗಿದೆ. ಎಷ್ಟು ಕಷ್ಟಪಟ್ಟು ದುಡಿದರೂ ಹೆಚ್ಚುತ್ತಿರುವ ಪೆಟ್ರೋಲ್ ದರಗಳಿಂದಾಗಿ ದಿನದ ಖರ್ಚುಗಳನ್ನು ನಿಭಾಯಿಸಲು ಸಾಧ್ಯವಾಗುತ್ತಿಲ್ಲ ಎಂದು ಯೂನಿಯನ್ ಸಾಮಾಜಿಕ ಜಾಲತಾಣವಾದ ಎಕ್ಸ್‌ನಲ್ಲಿ ಬೇಸರ ಹೊರಹಾಕಿದೆ.

ತಾಜಾ ಪರಿಷ್ಕರಣೆಯ ನಂತರ ದೇಶದ ರಾಜಧಾನಿ ದೆಹಲಿಯಲ್ಲಿ ಪೆಟ್ರೋಲ್ ದರ ಲೀಟರ್‌ಗೆ 97.77 ರೂಪಾಯಿಗೆ ಹಾಗೂ ಡೀಸೆಲ್ 90.67 ರೂಪಾಯಿಗೆ ತಲುಪಿದೆ. ಅಂತರರಾಷ್ಟ್ರೀಯ ಮಟ್ಟದಲ್ಲಿ ‘ಸ್ಟ್ರೈಟ್ ಆಫ್ ಹಾರ್ಮುಜ್’ (Strait of Hormuz) ಪ್ರದೇಶದಲ್ಲಿ ಉಂಟಾಗಿರುವ ಉದ್ವಿಗ್ನತೆಯಿಂದಾಗಿ ತೈಲ ಪೂರೈಕೆಯಲ್ಲಿ ವ್ಯತ್ಯಯವಾಗಿರುವುದು ಈ ಬೆಲೆ ಏರಿಕೆಗೆ ಪ್ರಮುಖ ಕಾರಣವಾಗಿದೆ. ಈ ಹಿಂದೆ ಪ್ರತಿ ಬ್ಯಾರೆಲ್ ಕಚ್ಚಾ ತೈಲದ ಬೆಲೆ 70 ಡಾಲರ್ ಇತ್ತು, ಆದರೆ ಈಗ ಅದು ಬರೋಬ್ಬರಿ 105 ಡಾಲರ್‌ಗಿಂತಲೂ ಅಧಿಕವಾಗಿದೆ.

ಇಂಧನ ಸರಬರಾಜು ಸಂಸ್ಥೆಗಳ ಅಧಿಕಾರಿಗಳ ಮಾಹಿತಿ ಪ್ರಕಾರ ಮುಂದಿನ ದಿನಗಳಲ್ಲಿ ಇಂಧನ ದರ ಮತ್ತಷ್ಟು ಹೆಚ್ಚಾಗುವ ಸಾಧ್ಯತೆ ಇದೆ. ಪ್ರಸ್ತುತ ಲೀಟರ್ ಪೆಟ್ರೋಲ್ ಮೇಲೆ 10 ರೂಪಾಯಿ ಹಾಗೂ ಡೀಸೆಲ್ ಮೇಲೆ 13 ರೂಪಾಯಿಗಳಷ್ಟು ಸರ್ಕಾರಿ ಸ್ವಾಮ್ಯದ ತೈಲ ಸಂಸ್ಥೆಗಳು ನಷ್ಟ ಅನುಭವಿಸುತ್ತಿವೆ ಎಂದು ಕ್ರಿಸಿಲ್ (CRISIL) ಸಂಸ್ಥೆ ಅಂದಾಜಿಸಿದೆ. ದೇಶದಲ್ಲಿ ಏಪ್ರಿಲ್ 2022 ರ ನಂತರ ಇಂಧನ ದರಗಳಲ್ಲಿ ದೊಡ್ಡ ಬದಲಾವಣೆಗಳಾಗಿರಲಿಲ್ಲ. ಈಗ ಮತ್ತೆ ತೈಲ ದರಗಳು ಏರಿಕೆಯಾಗುತ್ತಿರುವುದರಿಂದ, ಗಿಗ್ ಕಾರ್ಮಿಕರು ಈ ತಾತ್ಕಾಲಿಕ ಮುಷ್ಕರದ ಮೂಲಕ ಸರ್ಕಾರ ಹಾಗೂ ಆ್ಯಪ್ ಕಂಪನಿಗಳಿಗೆ ತಮ್ಮ ಆಕ್ರೋಶವನ್ನು ತಲುಪಿಸಲು ನಿರ್ಧರಿಸಿದ್ದಾರೆ.